【遊記】祼辭獨遊日本35天（名古屋＋關西＋山陽＋對馬島＋北九州）

我見你呢段時間係橫跨復活節
當中有幾晚酒店應該特別貴個喎?

係，plan行程嗰陣都諗咗好耐，最後揀咗相對少啲遊客嘅神戶希望可以平啲，住咗復活節weekend嗰3晚，除開每晚$395左右

DAY 6（17/3）

行程：名古屋 ⮕ 伊勢 ⮕ 鳥羽水族館

Check out前先記得影間房，今次喺名古屋住嘅酒店係Hotel Wing International Select Nagoya Sakae，小型雙人房13平方米，距離地鐵站10分鐘左右路程，住咗5晚都正正常常冇乜問題


之後就去名古屋JR站，搵自助機劃位先


今次用到嘅JR Pass係伊勢、熊野、和歌山地區周遊券，5日內使用，包咗6次指定席，可以搭呢張圖上面嘅路線
https://touristpass.jp/zh-tw/ise_kumano/


嚟緊5日都要靠呢張pass啦


今朝要搭9:37班JR，不過仲未夠鐘，坐低等下先


見到販賣機咁特別有呢個雜炊賣就試下，結果十分伏，就係一罐有味精嘅水，然後飲到最尾先食到啲米粒


班車嚟啦，我搭呢架係みえ3號


如果好似我咁拎住個28吋喼嘅朋友就要注意，雖然頭頂有行李架，但我個喼又大又重放唔到上去，座位之間又比較窄擺唔到個喼，咁啱我個位係門口隔離，所以我就搵條繩，將個喼綁住喺車門條扶手到，耐唔耐就要起身望下個喼仲係唔係到


7仔朱古力波波，幾好食


搭個半鐘就到伊勢啦，用pass出入要經人工通道


由JR站行15分鐘左右到酒店放低行李先


然後再出返嚟JR站搭參宮線去鳥羽，班次唔算多，要留意時間


鳥羽呢程都係可以用pass


鳥羽呢到出名珍珠同海鮮，出站後沿住海邊行會見到唔少食海鮮嘅小店

‘


行到中途就會見到觀光船碼頭，可以經鳥羽灣去海豚島


碼頭再行前啲就到鳥羽另一個景點：珍珠島，可以睇海女表演採珍珠


行10分鐘左右就到鳥羽水族館啦



門票2800 yen，上面印咗水族館嘅名星海獺：基拉同阿梅

推住個喼行15分鐘好勁、超過10分鐘路程已經想揾巴士坐

DAY 6（17/3）續

行程：名古屋 ⮕ 伊勢 ⮕ 鳥羽水族館

入到嚟去個廁所先，有可愛嘅海獺提你唔好漏低嘢


呢到比日本其他水族館特別，佢𥚃面分咗12個區域，但係冇固定嘅遊覽路線，遊客可以跟據個人喜好自由參觀，



雖然呢間水族館唔係全日本最大，但係就擁有全日本最多嘅養殖種類，超過1200種動物



去完廁所見到差唔多到海獅表演時間，去睇睇先



睇完之後開始周圍行啦



瞓覺嘅海豹


微笑魔鬼魚


藍色嘅龍蝦


現實版派大星


孤獨嘅水豚


大家係咪奇怪點解會有貓貓係水族館？呢隻並非一般嘅貓貓，佢叫漁貓，係貓貓當中罕見擅長游水嘅品種，以捕獲魚同青蛙等為食物，一般生活喺熱帶、亞熱帶嘅河流同沼澤周邊


漁貓被評定為瀕危狀態，基本上好少會見到，當初鳥羽水族館為咗慶祝60周年就引進咗2隻，之後佢哋生咗BB，依家總共有8隻啦，不過今日淨係見到2隻，唔知係咪阿爸阿媽


漁貓隔離有個位可以摸下啲魚仔，見到啲𡃁仔瞓晒落地下好好笑


鱷魚


黑白海豚

好奇問吓點解唔買近鐵五日pass對比起平好多

利申：唔知你三重同和歌山exactly去咩景點

你睇佢一開頭幅地圖 佢要去新宮嘛

因為我會去埋熊野三山

多謝你分享
我上次去到門口因為唔夠時間無入去

DAY 6（17/3）續

行程：名古屋 ⮕ 伊勢 ⮕ 鳥羽水族館

然後就係呢到嘅人氣icon：海獺


但係佢哋游得太快，好難影到佢哋



全日本只係剩返3隻海獺，1隻喺福岡嘅海洋世界海之中道，另外2隻就喺鳥羽呢到，因為佢哋3隻都已經踏入老年期，繁殖困難加上瀕危物種禁止國際交易，大家將來可能就冇機會係日本水族館再見到海獺嘅出現


大家冇得親自嚟鳥羽睇唔緊要，官方喺Youtube開咗個24小時Live，咁就幾時都可以見到佢哋
https://www.youtube.com/live/creq_1I-llE?si=JNRSK2ctKx7jCdum

官方Channel時不時都會upload佢哋啲片，真係好得意
https://youtu.be/vKatgEewFBs?si=KlGOjhWu5tnfMgd7

另外一種好特別嘅動物就係儒艮，目前全世界只有3隻，分別喺澳洲同日本，亞洲只有鳥羽水族館飼育


唔好睇佢個樣蠢吓蠢吓，據聞佢就係美人魚嘅原型，因為雌性儒艮喺哺乳時會抱著BB，將頭部與胸部露出水面，遠遠睇過去就好似女人咁，被認為可能係古代美人魚同海妖傳說嘅靈感來源


佢嘅乳頭係胳肋底


企鵝



大家都攰啦



行完個水族館都差唔多4點，去返鳥羽站食嘢先，喺google map搵咗呢間〇八食堂


我入到去嗰陣剩返呢個炸魚套餐可以嗌，𥚃面應該有幾種魚，個份量其實都幾多，食完勁飽


食完搭JR返到伊勢已經開始天黑，突然又大風落雨，變到勁凍，嗱嗱聲返酒店check in先


伊勢酒店揀咗呢間EN HOTEL Ise，雙人房15平方米


休息咗一陣，就落咗去酒店隔離間超市買宵夜


呢個pizza味其實𥚃面只係蕃茄醬


第六日完

我覺得幾值得去，比起其他水族館多啲特別品種睇

上次得半日喺鳥羽，二揀一揀咗珍珠館希望有機會可以再落去三重

珍珠館我覺得好似會好悶，所以冇去到

留名

樓主仲未比連仔block

DAY 7（18/3）

行程：二見興玉神社 ⮕ 伊勢神宮外宮 ⮕ 伊勢神宮內宮 ⮕ 猿田彥神社 ⮕ 月讀宮 ⮕ 倭姬宮 ⮕ 月夜見宮

大家冇睇錯，今日行程係非常緊湊，要去7間神社

其實本身冇plan到去別宮，但去完內宮之後發現都仲有時間剩，就臨時決定衝埋3間別宮

琴晚返酒店前已經feel到出面都幾大風，結果今朝起身睇新聞就見到出咗強風警報，強度大概7-8級，然後上網check發現有啲JR線延遲或者停駛，希望今日可以順利去晒所有地方啦

酒店包咗早餐，食飽就開始上路


自古以嚟最正式嘅順序係參拜伊勢神宮之前，先參拜咗二見興玉神社同埋位於海上嘅夫婦岩，清淨身體之後先再去伊勢神宮，所以第一站就嚟二見浦先


二見浦站係無人車站，車站外型模仿番夫婦岩咁樣，幾有心思


夫婦岩睇日出嘅最佳時間係5月至7月，可以見到太陽從夫婦岩中間升起


神社距離車站大概15-20分鐘路程，出站之後沿住夫婦岩表參道行


行到二見浦海岸呢個位就feel到超級大風，啲風正面吹埋嚟係會有種唞唔到氣嘅感覺，企唔穩真係會俾風吹走，唔係講笑


但因為想睇海所以上咗防波堤行，一路行一路俾啲風吹到係咁流鼻水


到入口啦，已經俾風吹到塊臉開始冇感覺


二見興玉神社
主祭神：猿田彦大神，宇迦御魂大神
主要祈求：夫妻和睦，結緣，交通安全


729-748年由行基和尚所創建，相傳第11代天皇的皇女倭姬命路過時，被呢到嘅美景吸引，忍唔住兩次回頭觀望，所以就有「二見」呢個地名


喺神社𥚃面會見到好多青蛙，佢哋叫「二見蛙」，因為青蛙係猿田彥大神嘅使者，而青蛙嘅日文「カエル」，同歸來「帰る」的發音一樣，所以有平安歸來、借出嘅嘢可以順利歸還等意思





全日本都有好多夫婦岩，但最出名嘅就係二見浦呢個，左邊大舊嘅係男岩，右邊細舊嘅係女岩，一大一小岩石並肩排列，加埋條粗麻繩，代表連繫夫妻嘅感情，令到呢個夫婦岩成為咗夫妻圓滿同埋良縁嘅象徴


兩塊岩石中間可以眺望喺海面約700公尺嘅猿田彥大神靈石「興玉神石」


繼續向前行就會見到另一間神社：龍宮社，供奉住海嘅守護神「綿津見大神」


御朱印GET！
影相嗰陣勁驚俾風吹走


海邊呢到實在太大風，個人體感似十號風球咁勁，留咗一陣就頂唔順，原路折返行返車站


返到嚟車站等車，因為強風關係班車delay咗十幾分鐘


俾風吹乾淨身心之後返嚟伊勢站，準備去神聖嘅伊勢神宮啦，I am ready！！！

酒店附近有得洗衫?

酒店裡面有洗衣機吖

伊勢7社我差最遠個兩個未去
伊雑宮・瀧原宮

呢兩個唔揸車好難一日搞掂

投幣式?

係

DAY 7（18/3）續

行程：二見興玉神社 ⮕ 伊勢神宮外宮 ⮕ 伊勢神宮內宮 ⮕ 猿田彥神社 ⮕ 月讀宮 ⮕ 倭姬宮 ⮕ 月夜見宮

由伊勢站出嚟沿住外宮參道行10分鐘左右就會到外宮入口


伊勢神宮分咗「內宮」同「外宮」兩座，自古以來都係習慣「外宮先祭」嘅參拜順序，即係先從外宮開始再到內宮，所以大家記得去咗外宮先呀！

嚟到外宮入口要經過呢條火除橋，相傳橋下嘅流水可以保護神域免於火災，橋口有塊牌寫住左側通行，代表外宮境內都要靠左邊行


伊勢神宮外宮（豐受大神宮）
主祭神：豐受大御神
主要祈求：開運招福，厄除，產業振興


外宮正式名稱叫「豐受大神宮」，係祭祀食衣住與產業嘅守護神「豐受大御神」

公元478年由雄略天皇創建，當時正值內宮建成約500年後，天照大神突然報夢俾雄略天皇

天照大神：天皇，喺到嗎？得我自已一個住喺內宮，我好難過，食嘢都食唔落，可唔可以幫我call阿豐過嚟？

雄略天皇：喺到！小弟即刻幫你搞

然後天皇就起咗外宮，將豐受大御神由丹波國迎接過嚟，從此照顧天照大神嘅飲食，1500年以來，每日早晚都仲係由神職人員生火煮飯，為神宮內祭祀嘅眾神供奉神饌，從來都冇中斷過

嗚～就係呢種俾大樹包圍淨化嘅感覺，好正

一個關於神社嘅小知識：我哋一般人入神社，通常都係靠左右兩邊行，唔會企正喺路中間行，因為中間嘅位置係神明先有資格行


從1300年前嘅天武天皇時代開始維持到依家，伊勢神宮每隔20年就會進行「式年遷宮」，將內宮、外宮、14個別宮、神宮內嘅寶物等等，全部依照原本嘅型式全部重新建造，令到伊勢神宮依舊保持住1300年前一模一樣嘅建築工法同埋形式，而天照大神都一直都可以有新屋住

初時覺得身為地位最高既伊勢神宮，𥚃面嘅宮殿應該整到好靚好宏偉，但正正相反，因為保持住1300年前嘅樣，所以比起平時去嘅神社，反而更加樸素，任何fancy嘢都見唔到

外宮同內宮嘅正宮比起一般嘅神社都有分別，佢哋會用塊白布遮住裡面嘅御神體，我哋呢啲凡人係唔可以直接同神明面對面相見

另外呢到唔會有賽錢箱，因為以前只有天皇先可以嚟正宮進貢神明，祈福國家安泰、國民幸福安康，嚴禁外人私下俾錢祈福，為咗避免凡俗私幣掉落神域，所以正宮地面上鋪咗塊白布，依家大家參拜嗰陣啲錢就可以拋落布上面


正宮隔離嘅空地，就係用嚟進行「式年遷宮」嘅古殿地，大家如果2033年過嚟，就會見到新嘅正宮搬咗嚟呢邊


參拜完正宮，就去埋外宮𥚃面嘅3間別宮，分別係供奉風神嘅「風宮」，供奉土地之神嘅的「土宮」，同埋被稱為「第一大別宮」嘅「多賀宮」


喺行去別宮嘅路上，會見到呢俾繩圍住嘅「三石」，遷宮時期會喺呢到進行儀式


雖然成個伊勢神宮佔地好大，但係我哋一般遊客可以去到嘅範圍其實好細，外宮快行嘅話30分鐘就行完


御朱印GET！伊勢神宮嘅就係咁簡單，剩係得日期同印

第一次去、唔知有分開外宮&內宮、返到JR站、就見到架巴士寫住去內宮、跳左上去撘