【遊記】祼辭獨遊日本35天（名古屋＋關西＋山陽＋對馬島＋北九州）

我都唔識日文
你點搵啲巴士班次時間？
有冇試過落錯車

剛剛睇呢個post仲想緊，佢話是廢J，睇手指似是囡囡

感謝分享

基本上交通問題google map可以搞掂晒
驚落錯車咪開住google map睇你去到邊個位

DAY 11（22/3）續

行程：紀州東照宮 ⮕ 和歌浦天滿宮 ⮕ 玉津島神社 ⮕ 鹽竈神社 ⮕ 紀三井寺

跟住就去和歌浦另外一個出名嘅景點「紀三井寺」，可以搭巴士去，不過我見天氣幾好就決定慢慢行過去，大概要行30分鐘


基本上都係一條直路向前行


行到盡頭就係入口


紀三井寺位於名草山山腰，有3種上山嘅方式可以選擇，分別係揸車，行路，纜車


如果你選擇行呢條231級嘅樓梯上山，就唔需要俾入場費，可以免費參拜

呢條樓梯亦有段故事，相傳江戶時代有位孝子每日都會咩阿媽上紀三井寺參拜，有一日佢對草鞋嘅繩結突然斷咗，正當好無助嗰陣，玉津島神社住持嘅女咁啱經過，幫佢整返好對草鞋，就係因為咁佢哋兩個互相認識再結為良緣，之後孝子仲做生意發咗達添，所以呢條樓梯就叫做「結緣厄除坂」，坊間流傳如果情侶戀人一齊行過呢231級樓梯，觀音菩薩就會幫助兩人締結良緣


但我呢啲毒J今日已經行咗好多樓梯唔再行，決定用錢解決一切

纜車單程要200 yen，因為落樓梯冇咁辛苦，所以我淨係買咗上去嗰程，但要留意返，如果選擇搭纜車係要另外再俾多400 yen入場費，夾埋即係俾600 yen


搭纜車廿幾秒就上到嚟


但係都仲有最後一段路先上到去本堂位置


同我一樣唔想再行樓梯嘅朋友唔需要擔心，因為呢到係有𨋢可以搭！



紀三井寺（金剛宝寺護国院）
本尊：十一面観音菩薩
主要祈求：結緣，生意興隆


傳說係唐朝僧侶「為光上人」於770年所建立，紀三井寺呢個名係來自於「位於紀州、有三口井的寺廟」，三口井分別係清淨水、楊柳水、吉祥水，呢三口井水仲被選為日本名水百選，本來呢三口井分別喺寺廟唔同位置，上年就起咗個新水手舍將三口井水集結喺同一個地方


清淨水可以消除罪惡，楊柳水可以健康長壽，吉祥水可以招來幸運


寺內都放置咗唔同嘅觀音像，都有各自嘅祈求功效




呢座鐘樓相傳係安土桃山時代所建，經過多次重建整修變成依家咁嘅樣，被指定為「重要文化財」


另外一個被指定為「和歌山縣指定有形文化財」就係六角堂，喺1748-1751年間建成，內部供奉緊西國三十三所觀音靈場嘅33尊複製觀音像


呢個新佛殿喺2002年完工，𥚃面有12 米高嘅木造佛像「大千手十一面觀世音菩薩」


佛殿三樓係展望回廊，大家有興趣嘅可以俾100 yen上去睇風景

DAY 12（23/3）

行程：日前神宮&國懸神宮 ⮕ 竈山神社 ⮕ 伊太祁曾神社 ⮕ 貴志車站 （貴志川線一日遊）

今日起身明顯feel到自己係感冒，成排panadol差唔多食完，但仲係好鼻塞好瘋狂流鼻水


但又未至於病到行唔到嘅，簡單食個麵包就出發


今日嘅行程係貴志川線一日遊，我預先已經喺kkday買咗one day pass，搭車當日可以自由中途落車而不限次數，和歌山來回貴志站要820 yen，一日券只係800 yen，所以你淨係去貴志站睇貓站長就已經回到本

而換pass嘅地方和歌山站𥚃面嘅9號月台，記得唔需要拍ic卡或者買車票入站，如果同我一樣喺和歌山站外入去，建議經東口入，因為東口係無人閘口，你可以直接行入去9號月台，如果喺西口入，可能就要經人工通道show你換pass嘅資料俾職員睇先入到去


見到9號月台上去就係換pass counter


成功獲得一張印咗今日日期嘅pass同postcard


然後就坐低等車嚟，發現月台個鐘有貓耳


今日目的除咗探小玉貓站長，另外就係去參拜「西國三社」，喺西日本，歷史悠久嘅三座神社集中喺一個地區係非常罕見，所以每年都吸引好多遊客到訪


貴志川線嘅觀光列車總共有6款，每日運行嘅車款嘅唔同，有特別款想搭嘅可以上官網check時刻表，今朝呢架係「小玉電車博物館號」


列車車身印咗初代小玉同二代玉嘅樣



本人平時對啲列車冇乜太大感覺，但呢架一入到去真係嘩咗聲，勁靚！


裡面放咗勁多貓貓嘅裝飾同擺設




冇諗過會有扭蛋機出現



仲會有電視播小玉嘅相同動畫，下面書櫃仲可以拎書睇


換pass嗰陣會送埋張postcard俾你，可以分別係和歌山站，伊太祁曾站，貴志站，觀光列車蓋印，儲齊4個印就係一幅畫


貴志川線大部分都係無人車站，落車嗰陣行去車頭俾車長check pass就得


順住次序，第一站先喺日前宮站落車



班次大概半個鐘一班，大家落車嗰陣可以影低時刻表方便預時間搭車

DAY 12（23/3）續

行程：日前神宮&國懸神宮 ⮕ 竈山神社 ⮕ 伊太祁曾神社 ⮕ 貴志車站 （貴志川線一日遊）

日前宮站係貴志川線第3個站，出站行2分鐘就到神宮入口


雖然站名寫係日前宮，但其實呢到係比較罕見同一境內有兩座神社「日前神宮」「國懸神宮」，總稱「日前宮」或者「名草宮」


日前宮擁有超過2600年歷史，日前神宮嘅主祭神係日像鏡嘅神體(日前大神)，國懸神宮嘅主祭神係日矛鏡嘅神體(國懸大神)

依據日本神話所記載，天照大神為咗躲避喺眾神之地高天原惹事生非嘅細佬素戔嗚尊，匿埋喺天戶岩入面，天地陷入一片黑暗，眾神就打造咗神器八咫鏡同八尺瓊勾玉掛喺樹上，並且舉辦祭典引誘天照大神出洞，令世間恢復正常，而日像鏡同日茅鏡就係打造八咫鏡所試做嘅兩面鏡子，被視為係八咫鏡前身，而八咫鏡係伊勢神宮天照大神嘅神體，所以日前宮亦都被視為準皇祖神，地位崇高，日本全國神宮之中，只係得伊勢神宮、日前神宮、國懸神宮等三宮無神階，係別格嘅神社


入口直行到盡頭會分成兩邊，左邊係日前神宮，右邊係國懸神宮



日前神宮
主祭神：日前大神
主要祈求：良緣，結婚，家內安全



穿過小森林行返去另一邊就係國懸神宮


國懸神宮
主祭神：國懸大神
主要祈求：良緣，結婚，家內安全



日前宮現時全境規模只係得全盛時期嘅5分之1，現有嘅建築物喺1926年翻修完成，整體風格都係樸實無華，屬於冇咩特色亦冇咩驚喜嘅神社，本身以為日前宮嘅社格咁高，應該有好多人都會嚟參拜，但唔知關唔關今日落雨事，眼見嘅人流唔多，冇乜人氣咁



御朱印GET！可惜唔係直書


跟住搭2個站去竈山站

今次搭到呢觀光列車係「梅星」，過去和歌山曾經盛產梅子，拯救咗荒貧嘅和歌山農家，而載客量少嘅貴志川線一度差啲廢線，來又因為小玉而起死回生，就好似梅子嘅傳說再起咁，所以將新列車取名為「梅星」


𥚃面嘅裝飾擺設都融入咗和歌山南高梅嘅特色，到處都見到梅花元素


仲擺咗個櫃display周邊商品同和歌山特產


一落車就開始落大雨



由車站行過去大概要15分鐘



明明跟住google map行，但係個入口勁難先搵到


神社境內被一片森林包圍，成個環境都好寧靜，但同日前宮一樣都係冇乜人流


竈山神社
主祭神：彦五瀬命
主要祈求：消災解厄，交通安全，結緣，五穀豐收


創建年份不明，主祭神係「彥五瀨命」，佢係日本神話中嘅皇族，第一代天皇「神武天皇」嘅哥哥，根據記載神武天皇東征嗰陣，彥五瀨命喺交戰中被箭所傷，最後喺紀國竈山傷重不治，神社本殿後面嘅古墳就係佢嘅陵墓，但係屬宮內廳管轄，禁止一般人進入




御朱印GET！今日社務所冇開，所以只有書置御朱印俾人自助式購買


呢到仲可以買到境外社「靜火神社」嘅御朱印

自助購買御朱印都幾好
唔洗趕到去先發現無，要特登再去

自助有個問題
一係連日期都冇
一係就漏空左個日期要自己填

我今次去就撞到一間係咁
要返香港買支秀麗筆自己填日期

祼辭撚表示

加多個

係喎

DAY 12（23/3）續

行程：日前神宮&國懸神宮 ⮕ 竈山神社 ⮕ 伊太祁曾神社 ⮕ 貴志車站 （貴志川線一日遊）

由竈山站搭4個站嚟到伊太祁曾站



見到另一架觀光列車「Chuggington電車」泊咗喺路軌到，請問係咪Thomas啲frd嚟？


貴志川線總共有兩個貓站長駐守車站，分別係伊太祁曾站同貴志站


今日喺伊太祁曾站當值嘅係「四代玉」，佢嘅玻璃辦公室就喺車站角落，不過見佢瞓緊晏覺，決定去咗神社先，轉頭再返嚟搵佢


由車站行5分鐘就見到入口



都係一間人煙稀少嘅神社，但算係比前面兩間多返少少人


伊太祁曾神社
主祭神：五十猛命
主要祈求：開運厄除，病氣平癒，林業繁榮


建造年代不明，最早見於702年「続日本紀」嘅記事中，伊太祁曾神社原本喺日前宮嘅境內，大約喺713年搬遷到現址，主祭神為「五十猛命」，別稱「大屋毘古神」，佢係素盞嗚尊嘅仔，自古以來就被奉為林業之神，舊時木材會用喺建造房屋同船嘅用途上，後來延伸到可以保佑住宅平安同交通安全

根據「日本書紀」記載，素盞嗚尊將樹木種子交俾五十猛命，命令他將種子播種到日本全國，佢嘅妹妹們亦都一齊執行任務，完成後就鎮座喺紀伊國，同時被稱為木之國，所以和歌山縣嘅樹木係特別多


境內放咗好多木雕作品



中庭呢座中空樹幹叫做「厄難除け木の俣くぐり」，意思即係穿過中空嘅樹窿就可以除厄難，但記得除咗鞋先穿入去


社務所前面有一棵千年御神木，喺1962年被雷擊中之後燃燒枯死，遺留低依家見到呢3公尺殘木


其實神社𥚃面都幾好行，但可惜落雨就冇留低好耐




御朱印GET！


好啦～之後就行返去搵四代玉



和歌山電鐵嘅貴志川線因為貓站長小玉而揚名國際，貓站長小玉原本住喺貴志站旁邊嘅商店裡面，喺2007年擔任日本首隻貓站長後，吸引咗大量遊客嚟親身見小玉一面，為當地旅遊業帶來巨大經濟效益，令到原本面臨廢線嘅貴志川線起死回生

小玉站長喺2015年離世後被追封為永久名譽站長，而繼承小玉精神嘅小玉二世站長（二代玉）和四代玉站長，就繼續喺貴志站為大家服務，等候乘客大駕光臨


四代玉係一隻2016年出生於和歌山市嘅母貓，因為係第四代嘅小玉，所以就起咗呢個名，四代玉在經過大約一年嘅實習後，喺2019年1月5日起開始任職伊太祈曾站長，同時身兼貴志站嘅代理站長




伊太祈曾站係實習貓站長嘅駐守車站，目前主要係四代玉當值，現任站長二代玉喺做實習生嗰陣都曾經喺呢到返過工




日本社畜星期六都要返工，真可憐


大家想嚟探佢哋嘅記得留意個更表，佢哋兩個唔係日日都返工，二代玉淨係喺貴志站返工，四代玉就兩邊走，如果想一日探晒兩隻就最好揀星期二，六，日嚟啦


車站𥚃面都放咗啲初代小玉嘅展品


另外都可以喺到買到紀念品


下世投胎想做貓站長，好似都幾chill


大家得閒都可以上去twitter睇吓佢哋平時嘅日常
https://x.com/ekichotama?s=21&t=g_0cvXpeEDcGboT2Y9BexA

返工可以明目張膽咁瞓覺，真好

Bye Bye啦，我要去搵埋你另一位同事

正

你依本係專門儲33觀音嘅御朱印帳？封面咩樣架

邊間？

鐮倉 成就院.


個兩個「五」字都係後加嘅

樓主主要都係去寺廟神社，如果唔去神社叫我去日本一個月都唔知點遊法
上次我一個人去大阪8日睇紅葉，除左大型公園外都係去d寺廟神社，諗極都唔知一個人有邊度好去但個次一個人慢慢行慢慢玩係幾正，有機會都會再試

唔講都唔覺得係加上去 成功！

發覺佢連年份都冇
返到再加返個「六」字先

DAY 12（23/3）續

行程：日前神宮&國懸神宮 ⮕ 竈山神社 ⮕ 伊太祁曾神社 ⮕ 貴志車站 （貴志川線一日遊）

由伊太祁曾站搭5個站就嚟到貴志站，呢到係貴志川線嘅終點站，大家搭得呢條線都一定係為咗嚟呢到睇貓站長



因為嗰陣落緊雨冇影到相，上網搵返張示意圖，貴志站整個都係貓咪外型，屋頂仲有貓耳嘅設計，車站其實並唔大，除咗車站本身，右邊係小玉咖啡廳，左邊就係賣紀念品嘅小山商店


一落車梗係即刻去搵二代玉啦，明顯地貴志站嘅站長室靚過伊太祁曾站好多





喺2012年小玉就職5周年嗰陣，鐵道公司就搵另一隻流浪三色貓二代玉作為學徒，並擔任伊太祈曾站站長，成為貴志川線上第2座有貓站長嘅車站

二代玉係一隻2010年出生於岡山縣岡山市嘅母貓，二代玉同小玉並冇血緣關係，係和歌山電鐵嘅母公司岡山電氣軌道由岡山市送嚟嘅流浪貓，佢嘅名主要來至於首任貓站長小玉，除咗佢同小玉嘅外型相似之外，亦都因為佢曾經係小玉嘅第二個部下，所以就改咗個帶有雙關語嘅名，同時因為佢散發住一種西洋風氣質，個名都特登用片假名「ニタマ」稱呼

2015年小玉過世後，二代玉就改到貴志站返工，伊太祈曾站就由四代玉接棒做站長



可能因為年齡大啲，又返咗咁多年工，比起四代玉，二代玉係冇咁活潑同埋有啲厭世feel，大部分時間都背住外面嘅窗，唔想對客咁，所以影唔到好多相


如果佢長期背住窗，可以試吓入去小山商店𥚃面都可以望到佢


車站𥚃面周圍都係小玉嘅裝飾擺設，想買紀念品嘅話去小山商店同小玉咖啡廳都有




講咗咁耐小玉，二代玉，四代玉，有冇發現冇提過三代玉呢？三代玉名叫「SUN玉玉」，佢喺岡山市嘅岡電博物館擔任代理館長，根據官方說法話佢唔願意轉職所以先改派四代玉嚟和歌山返工


貴志站嘅月台另一側仲有一間小玉神社



原本瀕臨廢線嘅貴志川線，因為2007年任命咗貓站長小玉後一砲而紅，喺日本各地都帶起咗動物站長嘅風潮，亦都令貴志川線起死回生

2015年6月22日，小玉站長因為急性心臟衰竭逝世，鐵路公司為小玉舉辦喪禮，封小玉為貴志站嘅「永久名譽站長」，並喺貴志站興建一座小玉神社，祭祀小玉嘅靈魂，以此紀念小玉對貴志川線嘅貢獻




小玉神社都有御朱印！可以去返小玉咖啡廳到買



之後就搭30分鐘車返到和歌山，蓋埋最後一個印就完成張postcard啦，上面有齊小玉，二代玉，四代玉嘅樣


落車嗰陣會有職員俾張車飛仔你for出閘用


玩完貴志川線雖然只係3點幾，但因為仲病緊想早啲休息，所以都係繼續喺超市簡單買啲嘢食就算


食晒啲panadol都仲未好，所以要去藥房買藥，揀咗勁耐最後買咗呢隻，唔知大家有咩感冒藥推薦呢，我自己唔識吞藥丸，但呢隻算容易吞


最後分享埋係貴志站買嘅紀念品，係印咗小玉嘅袋仔，可以見到佢嘅奶頭同屁眼


第12日完！

推一推見樓主更新慢咗，想同你講唔係冇人睇㗎

DAY 13（24/3）

行程：淡嶋神社 ⮕ 刺田比古神社 ⮕ 和歌山城 ⮕ 大阪

病咗嘅早餐就係要食粥，今日嘅病情已經發展到剩返3成味覺


呢幾日懷疑因為住喺呢間吸煙房導致病情加劇


Check out完就擺低行李，今朝先去和歌山市西北邊嘅加太，由和歌山市站搭南海加太線，車程大約25分鐘就到



自從病咗就開始瘋狂買能量飲品飲，補吓我虛弱嘅身子


加太係一條寧靜嘅小漁村，當地又以「鯛魚」最為出名，受到來自各地釣客青睞，所以車站都佈滿鯛魚嘅設計



由車站行20分鐘左右，行到近海邊就會見到神社入口




過咗第一個鳥居，左邊會有幾間食海鮮同水產手信嘅舖頭仔，繼續向前行就會到正殿範圍


淡嶋神社
主祭神：少彦名命，大己貴命，息長足姫命
主要祈求：婦女健康，安產，求子，結緣


淡嶋神社已經有大約1700年歷史，是日本全國約1000座淡嶋神社、粟島神社、淡路神社嘅總本社，主要供奉掌管婦女健康、安產、求子嘅醫藥之神「少彥名命」，祈求良緣嘅「大己貴命」同埋日本第一位女皇「神功皇后」

淡嶋神社嘅歷史起源於友島，相傳神功皇后當年親征朝鮮回國嗰陣，喺海上遭遇大風浪，危急之際向上蒼祈願，最後船隻就停靠喺依家加太町對岸嘅友島，島上供奉住少彥名命同大己貴命，神功皇后為咗感謝神明嘅救助，就將所得嘅寶物供奉俾兩位神明，多年後，神功皇后嘅孫仁德天皇嚟到友島狩獵，聽聞呢段故事之後，就將兩位神明移到對岸嘅加太町，並創建咗淡嶋神社



日本流傳住一個有關供養人偶嘅都市怪談，日本人認為呢啲人偶娃娃同人相處耐咗會有自己嘅情感，隨便拋棄係會被人偶報仇，於是會送到神社嚟供養，而淡嶋神社就係專門處理呢啲人偶當中最出名嘅神社，基本上一入到嚟神社，就會見到境內周圍都擺放由全國各地而來嘅人偶娃娃，數量多達兩萬幾，其中包含女兒節人偶，法國人偶，家喻戶曉嘅貍貓同招財貓等等，真係咩類型都有




當中比較恐怖嘅就係呢啲女兒節嘅雛形人偶，望得耐真係有少少心寒


他好像永遠對著你笑，笑得你心裡發寒.jpg



其中一個都市傳說，神社嘅地下室放嘅都係啲怨念特別重嘅人偶，有些會自己生頭髮、流淚、張嘴等..…. 所以神社唔會開放地下室俾人參觀，曾經有電視台去報導地下室嘅怨靈人偶，事後造成5位工作人員死亡，節目當日都發生咗好多不安嘅事情……


網上經常都會用詭異嚟形容呢到，但現場睇其實又冇咁誇張嘅，有啲人偶都幾cute






另外，淡嶋神社都以雛流儀式「ひな流し」 出名，傳說中德川家中只要有公主出生，就會供奉一對雛形人偶到淡嶋神社祈求公主健康成長，而日本3月3日女兒節嗰陣，神職人員會將呢啲祈福過嘅人偶放喺小船上面，再放喺海上流放，跟住就收返嚟焚燒祈福，呢啲被焚燒嘅人偶係替代主人嘅災難


網上示意圖


少彥名命除咗掌管醫療，亦都係首位傳授裁縫嘅神明，所以喺每年嘅2月8日，都會舉行裁縫針的「針祭」，將全國收集返來嘅針，埋入「針塚」裡面供養，據講參拜針塚可祈願「裁縫上達」


御朱印GET！留意返，成個御朱印都係用蓋章印，冇任何手寫嘅成份

多謝大家默默嘅支持
早幾日冇咩時間寫，我會盡量keep住日更㗎啦