【遊記】祼辭獨遊日本35天（名古屋＋關西＋山陽＋對馬島＋北九州）

DAY 9（20/3）續

行程：熊野古道大門坂 ⮕ 熊野那智大社 ⮕ 那智山青岸渡寺 ⮕ 飛瀧神社 ⮕ 那智瀑布 ⮕ 熊野速玉大社

搭到去速玉大社站前落車，再行一段路就到入口


熊野速玉大社
主祭神：熊野速玉大神，熊野夫須美大神
主要祈求：結良緣，家內安全


傳說最初熊野神明降臨嘅地方，就係位於速玉大社附近嘅神倉神社，係速玉大社嘅元宮，而速玉大社係後來去到128年先創建出嚟供奉熊野神明嘅新宮，呢個亦都係「新宮」呢個地方名嘅由來

本身都想見識吓神明降臨嘅聖地係點樣，但係一睇要行成538級勁難行嘅石級先上到神倉神社，就即刻決定放棄，擔心得我自己一個人，萬一碌咗落山就冇人救我


主祭神係「熊野速玉大神」同「熊野夫須美大神」，即又係天照大神阿爸同阿媽，同時代表藥師如來同千手觀音


雖然係熊野三山中最容易去嘅一間，但比起另外兩間熊野大社，速玉大社嘅人流相對較少，可能因為唔夠佢哋特別？本宮大社有大齋原，那智大社就有那智瀑布，但係速玉大社就相對普通，冇一個代表性嘅嘢




境內有一棵樹齡超過千年嘅御神木「椰」，又名為竹柏，相傳係由武將平重盛親手種植，已經被指定為國家天然紀念物，竹柏嘅日文 「NAGI」同海面風平浪靜嘅「凪」發音相同，所以古人會將竹柏嘅葉作為祝願旅途平安嘅護身符帶返去，另外因為樹葉呈現左右對稱嘅形狀，亦都被認為有夫妻圓滿嘅含意


當然要買埋最後一張熊野牛王神符啦，不過嗰陣落雨我驚淋濕就冇拎山嚟影相，用官圖頂住檔先，速玉大社呢張就有48隻烏鴉喺上面


御朱印GET！拎埋呢個朱印，就代表今次紀伊半島朝聖之路呢part正式完結啦


行完速玉大社體力已經所剩無己，嗱嗱聲去埋超市求其買啲嘢食就返酒店休息


新宮就係一個鄉下地方，基本上好少喺條街度見到人


是日甜品


第9日完！

應該去到四國就完，睇埋你個trip點走法先

絲打隻手好香

伊勢、熊野番外篇（神社 / 御守分享）

繼續記錄喺伊勢、熊野去過嘅神社寺院同埋買過嘅御守，如果大家有興趣可以mark低將來去，冇興趣嘅大家可以直接skip

15. 二見興玉神社
https://futamiokitamajinja.or.jp
★夫婦岩守



16. 伊勢神宮外宮
https://www.isejingu.or.jp/about/geku/
★開運鈴守



17. 伊勢神宮內宮
https://www.isejingu.or.jp/about/naiku/
★厄除御守



18. 猿田彥神社
https://www.sarutahikojinja.or.jp
★はじめの一歩御守



19. 月讀宮
https://www.isejingu.or.jp/about/outerbetsugu/


20. 倭姬宮
https://www.isejingu.or.jp/about/outerbetsugu/


21. 月夜見宮
https://www.isejingu.or.jp/about/outerbetsugu/


22. 熊野本宮大社
http://www.hongutaisha.jp


23. 熊野那智大社
https://kumanonachitaisha.or.jp
★注連縄守



24. 青岸渡寺
https://seigantoji.or.jp


25. 飛瀧神社
https://kumanonachitaisha.or.jp/pavilion/waterfall.html?id=pavilion-top
★延命水守

★延命御守



26. 熊野速玉大社
https://kumanohayatama.jp
★直霊守

★八咫烏 勝守

伊勢+熊野呢part係我今次旅程𥚃面最鍾意，因為身為神社撚終於可以親身去到兩大神聖之地朝拜，感恩

其中最令我印象深刻嘅係那智山嗰日，當好辛苦終於行到上山，然後擰轉頭一望，嗰下真係會被雄偉嘅大自然景色震撼到，有少少感動，我真係好鍾意大自然嗰種淨化身心嘅感覺

可惜今次用JR pass所以留唔到好耐，有機會嘅話想再返嚟慢慢感受


下篇開始進入和歌山部分

你搭咩車去

搭近鐵去到長島站再轉巴士

印象中記得轉車巴士唔係好密班次

我嗰陣接近日落時間去就多班次啲
https://www.kintetsu.co.jp/senden/Railway/Ticket/nabana/

名古屋名鐵巴士站有車直到
同去長島同一架車

啱啱睇到榮有巴士直接去，唔知需唔需要買定飛先，定係網上有得預約

正常唔洗

這就是青春

溝通緊，睇黎得嘅
我先開咗一個日本集運倉嘅ac
然後留言日文比佢講我要咩(全部靠Google translate同POE啲ai bot轉成日文)
只要寄到去集運倉，就翻到黎香港
宜家傾到比錢#yup
如果係香港國際匯款，其實會比較貴
我問過HSB，佢香港依邊bank charge收65，然後預付200比日本間銀行做bank charge
搵到有日本朋友可以幫我比 pay翻佢就得，慳唔少
依間寺話大概要一個月時間完成畫作，咁等我又唔介意xD

啲行山杖係咪要還架？
Btw 有冇飲瀑布水

DAY 10（21/3）

行程：新宮城跡 ⮕ 新宮 ⮕ 和歌山

琴日行完山消耗咗好多體力，所以今日嘅行程就輕鬆返啲，主要係搭JR去和歌山就完


覺得日本啲天氣預報會提埋要著咩衫好得意


食完早餐就check out啦


本身plan今朝去埋速玉大社先離開新宮，但係琴日已經去咗，所以今朝有3個鐘空咗出嚟，就決定去酒店附近嘅新宮城跡行吓


以前係源為義嗰女「丹鶴公主」所居住嘅地方，所以亦被稱為「丹鶴城」，1601年，德川家康嘅第十個仔賴宣取代淺野氏成為紀州藩主，呢個時候就由身為賴宣重要家臣嘅水野氏入主為新宮城城主，新宮城歷經了水野家十代嘅長年統治而興盛


基本上依家只係剩返啲石垣遺跡，上到嚟都係睇吓風景咁，冇乜特別，hea咗陣就走




新宮市內其實唔係好多景點可以行，咁啱見到附近有間書店，就入咗去打書釘


Hea到咁上下時間就返酒店拎喼然後去JR站搭13:29班車


Bye Bye啦新宮


月台地下有可愛嘅腳印同魚魚？


就係搭呢架黑潮號啦


由新宮去到和歌山要3個幾鐘


基本上都係沿海邊行，如果想睇到海就記得坐左邊啲位



中途經過白濱站，因為5年前都嚟過，大部分景點都去咗，所以今次就skip


班車好彩唔算好full，好驚有人坐我隔離搞到冇位擺喼


終於到和歌山啦，之前都只係搭車經過，冇留喺和歌山市內玩



我book嘅酒店就近和歌山市站多啲，所以就用JR Pass搭埋最後呢程


呢幾日住嘅就係呢間和歌山APA，由和歌山市站行15-20分鐘就到，但係沿路啲地面比較凹凸不平，搞到嗰喼好難拖，好辛苦先行到酒店，如果大家都有機會住呢間APA，建議喺和歌山站再轉巴士，直接到酒店樓下


單人房13平方米，我check in嗰陣先醒起原來自己book咗吸煙房（應該因為平啲），一入去勁大陣煙味，同埋𥚃面有啲污糟，個人體感麻麻


抖咗陣就拎啲衫去洗先


唔知點解今日真係好攰，所以settle down啲嘢後，就求其去附近7仔買晚餐周聽朝早餐就算


第10日完

要啦，公家嘢嚟

冇，驚肚痾

要住幾日smoking room真係搞唔掂,即刻book過第二間啦

DAY 11（22/3）

行程：紀州東照宮 ⮕ 和歌浦天滿宮 ⮕ 玉律島神社 ⮕ 鹽竈神社 ⮕ 紀三井寺

早餐


今朝一起身鼻塞又係咁流鼻水，似係作感冒咁，就知道自己瀨嘢，難怪琴日明明冇做過咩嘢都咁攰，即刻啪返兩粒panadol先


食完藥就出發啦！今日主要去和歌山市嘅南面，先行15分鐘去和歌山市站，然後搭大概25分鐘巴士去和歌浦


落車之後再行10分鐘就見到紀州東照宮嘅鳥居



紀州東照宮
主祭神：徳川家康，徳川頼宣
主要祈求：學業成就，安產，病氣平癒


「東照宮」即係同江戶幕府初代將軍德川家康有關，喺德川家康逝世之後，就封咗佢做「東照大權現」，喺日本各地嘅東照宮供奉，而和歌山舊稱「紀州」，紀州初代藩主德川賴宣為咗祭祀父親德川家康，喺1621年創建咗紀州東照宮，德川賴宣去世之後都一齊喺到被供奉


入去本殿之前，要先上呢條108級嘅樓梯「侍道」


行到上嚟可以睇到遠處嘅海景，不過大部分都俾樹遮住咗



呢到係要收300 yen入場費，行到門口左邊社務所就會有人向你收錢


成個神社範圍其實唔大，主要都係睇被列為重要文化遺產嘅本殿，𥚃面放咗左甚五郎創作嘅雕塑、狩野探幽作嘅壁畫、仲有狩野派同土佐派嘅壁畫，留意返𥚃面係唔俾影相


網上搵嘅圖，𥚃面就係睇呢啲，基本上圍住本殿行一個圈就睇完


每年5月東照宮會舉辦傳統祭祀活動「和歌祭」，一班著白色裝束嘅男人會抬著神轎由東照宮出發，行108級樓梯落山，之後沿路巡遊同埋上演傳統表演


御朱印GET！


然後就順便去埋隔離嘅和歌浦天滿宮


行5分鐘左右就到啦


冇錯，呢到都係要行條長樓梯先上到去，我覺得難行過啱啱東照宮嗰條，因為係凹凸不平嘅石級而且又比較斜，要扶住中間欄杆慢慢行上去先得


但係行到上去就發覺係值得嘅，個景仲靚過東照宮，呢邊冇遮冇擋



和歌浦天滿宮
主祭神：菅原道真
主要祈求：學業成就


初建於10世紀，後來毀於1585年豐臣秀吉紀州征伐嘅戰火中，之後由入主和歌山城嘅藩主淺野幸長，喺1604年開始進行整修，直到德川賴宣入主初期仍然改建緊

叫親「天滿宮」都即係供奉學問之神「菅原道真」，佢喺901年因官場鬥爭失勢被貶到九州大宰府，由京都前往九州嘅途中，曾經因為要避風浪短暫停留喺和歌浦



嚟親天滿宮一定會見到牛牛，菅原道真生於牛年，亦都死於牛年，佢同牛之間都流傳好多故事，所以被視為菅原道真嘅神使


另外亦都會見到呢隻鷽鳥，日文係「うそどり」，「うそ」有謊言嘅意思，所以鷽鳥被認為係能夠將唔好嘅事情變為謊言、逢凶化吉嘅吉祥物，相傳菅原道真喺前往太宰府嘅路上，鷽鳥亦曾經保護過佢，所以鷽鳥亦被視為守護天滿宮嘅神鳥



御朱印GET！喺外面等緊嗰陣，聽到入面嘅大叔一路咳一路幫我寫


走嗰陣發現原來仲有另一條易行啲嘅路，早知上嚟行呢條


你睇吓幾斜，仲要兩邊冇扶手，唔小心碌落去就GG

DAY 11（22/3）續

行程：紀州東照宮 ⮕ 和歌浦天滿宮 ⮕ 玉津島神社 ⮕ 鹽竈神社 ⮕ 紀三井寺

然後就去都喺和歌浦附近嘅玉津島神社，由和歌浦天滿宮行大概15分鐘就到



玉津島神社
主祭神：稚日女尊，息長足姫尊，衣通姫尊
主要祈求：開運，結緣，藝能進步


724年，聖武天皇親臨依家和歌山縣一帶嗰陣，見到面向潮間帶連綿重疊嘅玉津島山，被呢番景緻深深打動，於是就下令派人守護呢個景區，平安時代之後，玉津島神社供奉和歌嘅守護神「衣通姬」，眾多和歌都被獻納喺到，關原之戰後，受封紀州嘅淺野幸長將神殿重建，後來又由紀州藩第一代藩主德川賴宣進行了整修


玉津島神社同住吉大社、柿本神社並列為供奉「和歌三神」嘅三社，自古以來凝聚咗天皇、上皇、公家、和歌人、藩主等嘅尊崇，每年會喺到舉辦短歌活動，廣羅各方投稿，傑出作品將會公開展示



御朱印GET！


呢到可以寫埋喺玉津島神社旁邊嘅鹽竈神社御朱印


喺西邊鳥居出嚟，沿住馬路行幾步就會見到佢


零零舍舍就喺馬路邊


鹽竈神社
主祭神：鹽槌翁尊
主要祈求：安產，求子，健康長壽


鹽竈神社位於鏡山下嘅一個洞窟𥚃面，以前被海浪侵蝕而成，裡面供奉掌管潮汐、製鹽、順產、求子嘅鹽槌翁，佢曾經令山幸彥同豐玉姬結緣，並保佑佢哋可以平安分娩產下後代，所以作為保佑安產嘅守護神社喺當地廣為人知


過去喺濱降祭神儀式中，來自紀之川上游丹生都比賣神社嘅神轎被安放喺洞窟內，所以又被稱為「輿之窟」


喺鹽竈神社對面就係呢條石造拱橋「不老橋」，喺1851年完工，係江戶時代紀州東照宮舉辦和歌祭嗰陣，開放俾德川家同相關人員前往祭拜時通行嘅專用道路


而家就咁睇只係一個普通嘅海港，好想知道以前和歌浦呢度究竟靚到咩嘢地步，令到天皇同咁多詩人都會讚嘆

本身識唔識日文
去日本洗錢真係好抵 酒店又平

唔識吖
依家啲yen咁平真係唔洗睇價錢咁滯，想再平可以住hostel添