【遊記】祼辭獨遊日本35天（名古屋＋關西＋山陽＋對馬島＋北九州）

Lm

Strong post

留名

Strong post

樓主、正喎！

支持樓主
我都愛上長旅行, 依家感覺長旅行先有旅行feel

想問下酒店係咪每去一個新地點前先book?或者早一晚book定下一日行程既酒店？

出發前book晒13間

lm 支持

DAY 2（13/3）續

行程：若宮八幡社 ⮕ 大須觀音 ⮕ 三輪神社 ⮕ 萬松寺 ⮕ 熱田神宮 ⮕ 綠洲21

沿住大須商店街行10分鐘左右，就到三輪神社啦

三輪神社
主祭神：大物主大神、徳川義宜
主要祈求：結良緣！！！

1570-1572年由牧若狹守長清創建，佢嗰陣由奈良櫻井三輪町搬到依家嘅矢場町附近，因為佢好崇敬故鄉大和三輪山嘅大物主神，為咗可以繼續供奉就起咗呢間神社啦


大物主神即係大國主神，凡係同大國主神有關嘅野都會出現因幡白兔，因為傳說中有一隻白兔受咗重傷，眾多神明之中只有大國主神願意出手相助，白兔為咗報恩，就幫助大國主神可以順利同八上比賣結為夫婦，所以白兔就成為咗結緣嘅象徵


神社其實唔大，但係裡面有好多可愛兔兔元素，都幾啱囡囡嚟打下卡







傳聞摸下呢隻福兔，就會獲得幸福


呢棵係有450年歷史嘅姻緣樹，好多人都會買條紅線綁上去祈求結得良緣，結良緣其實唔係單單指愛情，仲可以包括親情、友情、工作上、事業上嘅貴人之類嘅人際關係


三輪神明另外一個出名嘅地方就係裡面嘅「尾張藩矢場遺跡」，1668年，尾張德川家喺神社呢到修建咗個練習射箭嘅場所，起咗個名叫「矢場町」，成為咗矢場町呢個地名嘅起源

矢場遺跡亦都衍生一個含意，就係好似射箭咁擊中目標，好多追星fans知道之後都會嚟祈求抽中con同抽到靚位


御朱印GET！
可惜我今日嚟冇直書御朱印（即係直接寫落御朱印帳），只係得書置御朱印（預先寫好嘅御朱印紙本）最後又揀咗個Loong年限定


其實呢間神社仲有勁多款可以揀，佢哋官網同ig會住update


注意番佢哋社務所不定期休息，想買御守御朱印嘅，最好上官網睇下佢哋schedule
https://miwajinnjya.com

由三輪神社行5分鐘左右，好快就嚟到萬松寺啦

萬松寺（亀嶽林 萬松寺）
本尊：十一面観世音菩薩
主要祈求：厄難消除、生意興隆


由織田信長嘅爸爸織田信秀喺1540年建設，作為織田氏嘅家廟，織田信秀嘅葬禮都係喺呢到舉行，後來1610年搬遷到大須（日本歷史我唔太熟，有咩錯漏歡迎指正）

萬松寺位於商店街裡面，經過嗰陣唔特別留意都唔會發覺原來係間寺院


門口有條白龍裝置，每隔兩個鐘會有幻彩泳噹噹表演



入去嗰陣見個咁多御朱印款式可以揀已經勁興𡚒


裡面仲可以參拜身代不動明王同白雪稻荷






萬松寺唔單止外表望落超級現代化，就連香油錢好現代化，都可以電子支付


掙扎咗勁耐揀邊款好


最終揀咗呢兩款！嗚！好靚！！！

樓主指甲

依個鳥居上到去？

御朱印個本嘢你邊度買架？

上唔到，只係岩石上面嘅小鳥居

去神社就可以買，每間神社都會自己設計本御朱印帳，間間款式都唔同，你可以根據自己喜好去揀

另外我見過Loft同Hands都有得買，不過款式偏向新潮同埋得好少款揀

例如呢本係京都「大將軍八神社」，佢嘅御朱印帳就結合咗星座嘅元素


呢本奈良「大神神社」嘅就有三輪山同白兔元素

除左御朱印，樓主有無儲埋御城印

有
以往去日本唔會特別去名城，不過因為今次有好多時間，就可以入去參觀下

超伏

嘩、咁咪要跟著行程、無得臨時變更🤔

DAY 2（13/3）續

行程：若宮八幡社 ⮕ 大須觀音 ⮕ 三輪神社 ⮕ 萬松寺 ⮕ 熱田神宮 ⮕ 綠洲21

搭名鐵名城線去到熱田神宮西站落，然後再行10分鐘經西門入去



入到嚟搵個地方休息先，近草薙館呢邊有個小公園，隔離有間烏冬舖可坐低食


我就食頭先喺大須買嘅兩個飯團


熱田神宮
主祭神：熱田大神
主要祈求：家內安全，無病息災，結緣


熱田神宮建於1900年前，係日本三大神宮之一，另外兩個分別係三重縣嘅伊勢神宮同京都市嘅平安神宮，叫得神宮嘅都係同日本皇室有關，祭祀嘅對象都係日本皇室祖先或者同皇室有淵源嘅人。貴為名古屋熱門景點，據聞日本三大神宮之一嘅「草雉劍」就係收藏咗神宮裡面，不過一般人唔會有機會見到，如果有興趣都可以入去草薙館或者寶物館睇下其他嘅收藏品


成個神宮佔地好大，雖然遊客比較多，但唔會好迫，慢慢散下步都幾c服







留意樓梯以上就係本殿範圍，會有個警衛叔叔看守住唔俾人影相，所以只可以離遠影番張相


御朱印GET！


近正門嗰邊仲有別宮八劍宮同上知我麻神社都可以寫御朱印



完成晒今日要去嘅神社同寺院，時間只係晏晝3點幾，決定去番榮嗰邊行下街

上網搵名古屋景點，其中一個係綠洲21，本身冇特別想去邊所以就決定去睇睇，不過佢得地下嗰層係舖頭同餐廳，上一層係高速巴士站，再上地面嗰層就係大草地，然後就係天台

舖頭方面係得呢間Harry Potter比較特別，其他都係普通嘢
Dobby is FREE！！！


跟住上咗天台嘅「水の宇宙船」，其實就係玻璃屋頂然後有啲水喺到流動，都幾靚嘅


側邊有啲位可以俾啲情侶坐低打情罵俏



可以見到隔離嘅NHK同MIRAI TOWER



之後去咗附近商場睇下街，差唔多時間就食晚餐，本身有間拉麵想食但臨時冇開，廢事再諗就碌咗入隔離嘅一蘭


食埋個雪糕就完成第二日啦

碌咗咁耐都冇見到鰻魚飯