【遊記】祼辭獨遊日本35天（名古屋＋關西＋山陽＋對馬島＋北九州）

慢慢寫

終於追完post

平等院我都後悔冇入到寺入面因為見要等一個鐘，on 9 冇照拎飛行住等

結果行到入面d 展覽介紹，發覺寺入面應該幾壯觀

到行完想拎飛，又要一個鐘後，所以放棄左

座銀雞soba 我覺得好正，配搭完美，食完好c 服，下次你再試

加油我仲追緊慢慢寫

你對d寺廟歷史好熟係咪上網做哂功課先去？

樓主呢

五大力個度，係咪類似還神？

要拜24年個個大癲
應該當地人先容易達成

西國三十三所個個，係咪一本專門for依個系列嘅御朱印帳？已經寫好33個地方？

端午節鐘馗個張幾靚

你淨係選擇寫一邊？背面唔寫？

唔係好熟咋，出發前會上網簡單search吓
始終今次總共去咁多間，好難間間都記得清楚

你見我呢篇遊記寫得咁詳細，係因為我返到嚟再搵資料

所以寫嘅途中都會發現原來自己miss咗唔少值得睇嘅位

我諗差唔多

係呀～你去呢33間裡面其中1間就可以買到

我習慣寫單面only，雙面驚啲墨透底

DAY 18（29/3）

行程：生國魂神社 ⮕ 豐國神社 ⮕ 大阪城 ⮕ 大阪 ⮕ 神戶

今日係大阪last day，喺大阪行多半日晏晝先去神戶，快手食埋個早餐就check out啦


大阪街頭某處嘅渠蓋，到而家為止都係覺得呢隻世博吉祥物好kam


今日第一站係去大阪最古老嘅神社，由酒店行過去25分鐘左右，行到附近見到路標繼續就到


生國魂神社
主祭神：生島大神，足島大神
主要祈求：家內安全，健康長壽，結緣


呢間大阪最古老嘅神社擁有2700年嘅歷史，相傳初代嘅神武天皇為咗祈求國土平定安泰，喺大阪城所在地附近祭祀被視為國土守護神嘅「生島大神」同「足島大神」，後來因為要興建大阪城，喺1585年遷移到依家嘅位置，境內高20米的本殿屋頂採用咗桃山時代獨特嘅建築風格，稱為「生國魂造」，喺流造建築嘅正面屋頂上有3層破風板，呢種建築樣式喺日本全國約8萬所神社中僅此一家！


喺生國魂神社境內一共有11間末社，各方面嘅神明都喺齊到，想求咩都無問題



而當中最有人氣嘅就係「鴫野神社」，3位祭神都係女性，所以有「女性守護神」之稱，好多囡囡都會特登嚟祈求良結善緣或者斬斷惡緣



仔細睇就會發覺裡面嘅燈籠同繪馬上都係有一個由「心」字同鎖組成嘅圖案，據聞係指「內心路話俾給任何人」嘅意思
「我嘅心靈～LOCK！」


而繪馬寫嘅內容同一般嘅都唔同，上面只會寫自己嘅性別、年齡同生肖，並唔需要寫願望，因為願望係只有你自己本人同神明先要知道



御朱印GET！寫咗兩款唔同嘅



然後搭谷町線去列谷町四丁目站，出站次後跟住啲人群慢慢街去大阪城公園



入到去先到豐國神社參拜吓先


豐國神社
主祭神：豐臣秀吉，豐臣秀頼，豐臣秀長
主要祈求：出世開運，厄除招福，商賣繁昌


大阪豐國神社建於1897年，係京都豐國神社嘅別社，主要祭祀豐臣秀吉、豐臣秀長（秀吉嘅細佬）同豐臣秀賴（秀吉嘅仔），由於秀吉係從平民出身，一路向上攀至日本政權頂峰，喺過去重視門第出身嘅戰國時代係十分稀有嘅案例，所以豐國神社出名祈求勝利、開運、出世，希望可以同豐臣秀吉一樣咁出人頭地



御朱印GET！今次係第二次嚟啦，所以簡單參拜完拎埋印好快就走

DAY 18（29/3）續

行程：生國魂神社 ⮕ 豐國神社 ⮕ 大阪城 ⮕ 大阪 ⮕ 神戶

行完神社跟住就入去大阪城啦


對上一次嚟已經係2019年嘅事，嗰陣同行嘅朋友對天守閣冇咩興趣所以就冇上到去，今次自己一個人就可以隨心所欲上去


現場勁多人排隊買飛入去，我排到一半先醒起KKDAY同KLOOK都有得買電子門票，但都已經排到咁上下就算，另外冇記錯嘅話大阪周遊卡都包埋天守閣


入到去都係睇吓啲展品，對於日本歷史唔熟嘅我都係大概睇吓冇仔細睇



上到頂層睇風景，不過周圍都起咗隔網，其實都影唔到啲咩靚相




加上成層都迫滿晒人，行咗一個圈就頂唔順


御城印喺1樓紀念品店可以買到，落返去買完打卡就撤退



見仲有時間，出返嚟就圍住公園行咗陣





4年前嚟嗰陣撞啱櫻花季，同朋友一齊完成咗坐喺櫻花樹下野餐賞花呢個心願


呢間已倒閉Lawson 4年前已經喺到，4年後間舖仲喺到係咩玩法？


臨走前成功捕獲貓貓



跟住返酒店拎番行李之後，就搭地鐵去大阪車站再轉JR去三宮站


由大阪過嚟神戶都幾廿幾分鐘嘅事，好快就到


拖住個篋慢慢行10-15分鐘就到酒店


今次喺神戶住嘅係「神戶三宮union飯店」，15平方米單人房，內裡啲裝修明顯有返咁上下年代，但用落問題不大



唞咗陣就出門口食晚餐，呢3晚揀喺神戶主要係想避開復活節假期，plan行程嗰陣呢個位kick咗好耐，想搵個地方酒店平而且又夾到跟住落嚟嘅行程，最後就決定stay神戶，雖然除開每晚都要接近$400，但都已經比其他地方平，而且我又唔想同人迫，呢到唔係旅客首選嘅地方，我估冇人會特登放復活節假嚟神戶睇櫻花啩


呢到就係頭先落車嘅三宮站，呢幾日基本上都係由呢個站出發去其他景點


喺商店街行吓有咩好食，我諗呢到算係神戶人流最多嘅地方，撞啱今日呢到新開咗間Uniqlo，好多人排隊入去


最終喺google map揀咗間4.5星嘅拉麵店「麺道しゅはり 三宮センタープラザ店」


嗌咗碗泡沫豬骨湯拉麵，食落正正常常，個人鍾意呢間多過琴日間雞soba（重申：味覺仲未完全恢復）


食飽飽再喺附近散吓步，見到扭蛋舖又入去行返個圈，最後喺超市買埋啲物資就返酒店啦


嚟到日本其中一個好處就係可以冇時差地追星睇囝囝


呢間房唯一小缺點就係電視機太細，瞓喺張床上面會睇得有啲辛苦


第18日完！

終於一半

大阪、京都番外篇（神社 / 御守分享）

繼續記錄喺大阪、京都去過嘅神社寺院同埋買過嘅御守，如果大家有興趣可以mark低將來去，冇興趣嘅大家可以直接skip


37. 三室戶寺
https://www.mimurotoji.com


38. 宇治上神社
https://www.ujikamijinja.jp


39. 宇治神社
http://uji-jinja.com


40. 平等院
https://www.byodoin.or.jp


41. 大鳥大社
https://www.ootoritaisha.jp



42. 百舌鳥八幡宮
https://www.mozu8.com


43. 方違神社
http://www.hochigai-jinja.or.jp


44. 住吉大社
https://www.sumiyoshitaisha.net




45. 六角堂
http://www.ikenobo.jp/rokkakudo/



46. 本能寺
https://www.kyoto-honnouji.jp


47. 寶藏寺
http://www.houzou-ji.jp


48. 六波羅蜜寺
https://rokuhara.or.jp




49. 清水寺
https://www.kiyomizudera.or.jp


50. 少彥名神社
https://www.sinnosan.jp


51. 大阪天滿宮
https://osakatemmangu.or.jp


52. 生國魂神社
https://ikutamajinja.jp


53. 豐國神社
https://www.osaka-hokokujinja.org

DAY 19（30/3）

行程：生田神社 ⮕ 弓弦羽神社 ⮕ 湊川神社 ⮕ 明石海峽大橋

旅程下半部分正式開始！

神戶酒店包埋早餐，不過對比之前兩間，呢間嘅食物種類同款式明顯差啲


今日第一站首先去位於市中心嘅其中一個最代表性神戶景點：「生田神社」


由酒店行過去大概20分鐘就到


生田神社
主祭神：稚日女尊
主要祈求：戀愛成就，結緣，安產


生田神社建於201年，已經有1800年以上歷史，為日本古墳時代皇族「神功皇后」興建，供奉伊勢神宮內宮「天照大神」嘅姊妹女神「稚日女尊」，佢係編織之神，將2條線編織埋一齊就好似將緣份連繫一齊，所以吸引好多人嚟祈求戀愛運同結緣，更有好多人會選擇喺生田神社舉行結婚儀式，以祈求婚姻圓滿，例如藤原紀香同陣內智則2007年結婚嗰陣，就喺呢到舉行結婚式


生田神社中「生田」二字最初是叫作「活田」，喺漫長嘅歲月裡，生田神社曾經遭受神戶大水災、第二次世界大戰嘅神戶大空襲、阪神淡路大地震等無數災難同戰爭嘅破壞，但係仍然可以堅強地存活，所以被尊為「生命力之神」，而被改稱為「生田」，係代表整個神戶地區嘅超級能量景點，神社內嘅神明都被視為重生同勝利之神


為咗供奉生田神社嘅神明，喺806年建造咗44棟被稱為「神戶」（KANBE）嘅房屋，後來讀音改為（KONBE），據說呢個就係神戶地名嘅由來


神社境內都有祈求生意興隆嘅生田稻荷神社，都有條小小嘅鳥居隧道俾大家打吓卡



稻荷神社隔離放置咗有約500年歷史嘅生田神社御神木「楠之神木」，佢撐過咗1945年嘅神戶大空襲，即便遭受嚴重破壞仍然存活，被認為係重生、復興、成功、復活的象徵


社殿後方有一片「生田森林」，1184年曾經喺到發生過源平合戰，係重要史蹟之一
13


生田之森裡面有個玩水占卜嘅小水池，預先買一張籤紙然後放入水，就會浮現你嘅嘅戀愛運勢


呢到慢慢行吓賞吓花幾C服～




御朱印GET！除咗呢兩個直書之外仲買咗限定御朱印，生田神社每個月都會出唔同嘅限定款，基本上都好靚幾值得儲




然後下一站搭阪急神戶線去到御影站落車，出站再5分鐘左右就見到目的地：弓弦羽神社



呢間係寵物友善嘅神社，可以帶寵物入去，門口位仲整咗個俾狗狗嘅飲水區


弓弦羽神社
主祭神：伊弉冉尊，事解之男命，速玉之男命
主要祈求：厄除開運，家内安全，交通安全，諸願成就


創建於８世紀末，距今有1200年歷史，供奉嘅係熊野三山嘅神明，所以係神社周圍都會見到熟悉嘅八咫烏身影，呢到嘅八咫烏仲會企喺支箭上面


而且神社仲設計咗隻八咫烏吉詳物叫弓弦丸君（ゆづ丸），可以去授予所買一隻，寫低你嘅願望放入去弓弦丸君裡面，然後寫埋日期同你嘅大名，最最最重要係幫弓弦丸君畫埋對翼，咁樣佢先可以飛去幫你實現願望，完成之後就可以放入個櫃




另外神社嘅御神籤分別有八咫烏同足球兩款造型，之前喺熊野篇都有講過八咫烏同足球之間嘅關係


見到一班八咫烏喺到踢足球嘅畫面實在太得意，忍唔住買咗隻


御守方面見到呢個比較特別嘅御守貼紙，可以貼喺用開嘅電子產品上面，保佑佢哋長壽啲唔好咁易壞


境內都會見到呢個足球雕像，弓弦羽神社係祈求足球相關祈願嘅神社之一，除咗因為八咫烏原因之外，神社位處嘅御影地區亦都係日本足球嘅發源地，日本第一支足球隊就係誕生喺呢到


而御影嘅當地產物係御影石，神社就將足球同八咫烏用御影石整咗呢個象徵石雕出嚟


唔少神社都有呢個玉祓儀式可以玩，買一粒斎玉，然後對住斎玉嘅洞孔吹一口氣後再砸碎佢，象徵厄運消除嘅意思，如果大家覺得自已嗰排好黑仔嘅可以試試



弓弦羽神社本身只係一間普通嘅神社，後來因為一個日本名人而令到神社爆紅，呢個人都就係「羽生結弦」


由於「弓弦」嘅日文發音同「結弦」相似，羽生結弦透過fans贈送嘅御守得知呢間弓弦羽神社後，真係特登嚟神戶參拜，呢個消息傳開之後，吸引咗大批fans嚟朝聖、為偶像祈福


所以神社嘅繪馬架相當精彩，充滿咗一班迷妹對羽生結弦嘅愛意




羽生結弦本人寫嘅繪馬都喺到，俾神社用亞加力膠片保護住，不過我喺現場睇就搵唔到


我今日嚟到其寶冇咩人，相信平時都係附近居民嚟參拜多


人少少就可以慢慢影吓櫻花，冇人同你爭



御朱印GET！神社伯伯仲送咗張弓弦丸君書簽

仲以爲樓主放棄了

希望唔會爛尾

DAY 19（30/3）續

行程：生田神社 ⮕ 弓弦羽神社 ⮕ 湊川神社 ⮕ 明石海峽大橋

繼續！然後再搭阪神本線到高速神戶站落車，一出站就會見到湊川神社



湊川神社
主祭神：楠木正成公
主要祈求：開運招福，厄除，家内安全


湊川神社建於1872年，由明治后提議，明治天皇批準興建，係為咗紀念喺鎌倉幕府末期時期一位忠於日本天皇嘅將軍「楠木正成」，當時因為擁護天皇，反抗鎌倉幕府對天皇嘅控制而戰死，佢同戰國末年嘅真田信繁、源平合戰嘅源義經並列為日本史中三大「末代」悲劇英雄


為咗表彰忠貞報國、捍衛皇室嘅功勞，特登喺楠木正成戰死地湊川建立湊川神社，以奉祀殉難嘅楠木正成同楠木一族



神社佔地7000多坪，正門旁邊有明治天皇親筆石刻嘅碑文，境內有主殿，楠公會館，寶物殿，楠木稻荷神社等等




雖然呢到冇生田神社咁多遊客，好似冇乜人氣咁，但其實佢喺神戶嘅代表性都好高，好多日本當地人都會嚟，大家唔想同人迫嘅話可以過嚟呢邊


御朱印GET！


之後就行去車站搭車，途中見到呢間KinKi雜貨店（一見到個名就起KinKi Kids），最平50 yen就買到一件嘢，計返5算即係$2.5就有


去到車站餓餓地就買左件薯餅食


本身未諗好去邊，因為神戶市內啲景點對我嚟講唔算好吸引，有諗過去神戶動物王國，但我行完神社都已經2點幾，應該唔夠時間玩，所以最後決定走去明石海峽大橋


搭JR去到舞子站，一出站其實已經見到條橋，之後沿住天橋行去海邊就到


打卡～可以望到對面嘅淡路島


明石海峽大橋係連接神戶同四國淡路島嘅重要通道，同時都係目前世界上跨距最大嘅吊橋，全長3911公尺，歷時10年完工，喺1998年正式通車，而喺興建過程中經歷咗阪神大地震，當時震央距離橋址只有4公里，但大橋安仍然然無恙，據講設計嗰陣嘅耐震達8.5級，所以係安全度相當高嘅跨海大橋


嚟到呢到當然唔只喺地面睇啦，仲要上去大橋嘅舞子海上步道，體驗吓喺距離海面47米嘅大橋下層散步，由橋嘅內部欣賞神戶一帶嘅風景，入口就喺橋墩地面，入口處有自助售票機買飛，因為我星期六去就300 yen，如果平日去就平少少250 yen


入到去搭𨋢上到8樓，然後行出門口就係散步走廊嘅範圍，一見到嗰高度已經開始淆底，後悔點解要上嚟（我係畏高嘅廢物 sorry），但上到嚟點都要行埋去，唔可以嘥咗300 yen


一路行一路feel到上層啲車經過嘅震動同聲音，再加埋啲風吹埋嚟，只好咬緊牙關慢慢行（內心掙扎中）


成個舞子海上步道全長317米，係半開放嘅圓形走廊，可以分成兩part，行完第一段就會嚟到休憩區，大家可以喺到坐低睇吓風景，裡面仲有間cafe可以食嘢同買手信


呢邊望過去係大阪方向


另一邊係姬路方向


穿過休憩區出去繼續行埋第二段，就會嚟到特別設計嘅一個位置，地面嘅一部分變做強化玻璃，中間有一條名為「丸木橋」嘅獨木橋，俾你體驗喺47米高空漫步嘅感覺


身為一個懼高症患者，喺上面行真心覺得幾恐怖，feel到自己暈暈地唔係講笑（我都知自己好weak）


行到盡頭就係展望廣場，放咗一排櫈俾大家坐低休息影吓相





如果向前望會見到下層仲有一條路可以繼續行，呢條係大橋嘅工程維修步道，俾啲參加咗明石海峽大橋登頂活動嘅人都行去大橋嘅頂部，上到300米高嘅主塔塔頂，鍾意剌激體驗嘅朋友可以留意吓，好似每年4-11月先開放預約


展望廣場左右兩邊都整咗一格細細嘅強化玻璃地面，可能已經慢慢適應咗，我終於可以踏出勇敢嘅一步


我已經係個成熟嘅大人，我可以做到的！


最後我行多個圈先返落去


其實大橋附近仲有啲景點可以順便行埋，例如孫文紀念館、舊武藤山治邸、舞子公園，不過我已經覺得攰攰地就冇行，直接搭返JR返神戶



夜晚嘅Kobe～


晚餐買咗M記外賣返酒店食，嗌咗我最鍾意食嘅蝦堡


仲加咗件期間限定嘅抹茶黑蜜批，不過唔知係咪我放得太耐先食，感覺一般般


第19日完！