【遊記】祼辭獨遊日本35天（名古屋＋關西＋山陽＋對馬島＋北九州）

lm

睇咗咁多個神社終於有一個係去過

邊間？

估宇治，因為我都係

呢到表面上係遊記，其實暗地裡係日本冷門神社寺廟嘅宣傳post

朱印宣傳po

冇錯

lm

大正製藥個黃色藥粉

金粉淨係感冒最初期食先有效，病緊先食就已經冇用

DAY 15（26/3）

行程：大鳥大社 ⮕ 百舌鳥八幡宮 ⮕ 方違神社 ⮕ 住吉大社

繼續係失去味覺嘅一日，早餐補充吓蛋白質先


酒店望出去嘅景，位置其實算係今個trip咁多間酒店𥚃面最好，一落樓下就係地鐵站，附近行街買嘢都好方便


今朝先去堺市嗰邊，搭堺筋線到新今宮然後轉大阪環狀線，去到天王寺站再轉阪和線


喺鳳站落車，行大概5分鐘就到第一站：大鳥大社


大鳥大社
主祭神：日本武尊，大鳥連祖神
主要祈要：勝運，開運，厄除，交通安全


根據記載喺927年已經存在，自古以來都係防災祈雨嘅祈禱神社，係其中一座受到皇室尊崇，用以祈求平定天地嘅85座神社之一，亦係日本全國大鳥神社嘅總本社


主要供奉日本武尊，相傳日本武尊喺去世後，靈魂化身成為白色嘅大鳥由墓中飛走，後來白色大鳥從天空飛降之際，嗰到地區嘅樹木一夜之間就變成繁密綠蔭嘅景色，為咗紀念呢個奇蹟，所以就喺佢最後停留嘅地方創建咗神社


已經連續落咗4日雨，今朝仲要突然勁大雨，大雨到間神社開始出現輕微水浸嘅情況，想喺境內行吓都行唔到




講到大鳥大社最出名嘅，就係佢哋上年10月新出嘅透明御守「先が見通せる御守」，聲稱係可以看透未來嘅御守


有別於一般傳統御守，透明御守係用亞加力膠製成，由神職人員進行祈禱並親手為御守綁上，印上光雕設計，喺唔同嘅光線下會呈現唔同嘅顏色，可保佑喺工作、學業、考試、愛情等各方面都得到大鳥明神的指引，睇見未來嘅方向，價錢方面都比起平時嘅御守貴啲，都要成1500 yen


呢個透明御守一推出就受到當地人同遊客歡迎，試過曾經3個鐘內就賣晒，大家睇啲旅遊ig page都應該見過有介紹，佢哋最新一共出咗10種顏色嘅結繩可以選擇，官網每日都會keep住update每隻顏色嘅出售情況，基本上某啲顏色長期都係售罄，好難出現10隻顏色都齊貨，小癲



除咗御守係透明，佢哋就連求籤都有透明！但係只有抽到大吉才先會係透明嘅籤文



另外仲有出限定御朱印「大鳥の四季」，每個月都會有唔同季節嘅花草款式



如果儲齊晒12個月嘅限定御朱印，就會送張紀念品色紙俾你，不得不說呢間神社真係好識搞呢啲gimmick嘢


御朱印GET！有兩款御朱印可以寫，最後我都係揀返通常版，始終鐘意即場手寫嘅感覺（冇咁多錢買限定款）



行完大鳥之後就去百舌鳥啦，繼續搭阪和線去到百舌鳥站，然後再行大概15分鐘就會見到神社入口


百舌鳥八幡宮
主祭神：應神天皇
主要祈要：厄除開運


創建於欽明天皇時期，接近有1500年歷史，神社自古就深受朝臣貴族同武士嘅崇拜，相傳當時神功皇后三韓征討後，喺回程嘅途中路經過此地區，曾經喺到發誓要守護日本人民千萬代，維持天下太平




正殿右前方嘅大樟樹直徑5.2米、高25米，樹齡長達800年，係大阪府指定嘅天然紀念物


每年農曆8月15日嘅中秋節，百舌鳥八幡宮都會舉辦「月見祭」，主要係祈求豐收同慶祝滿月嘅祭典，當中會有巨型嘅布團太鼓喺街上巡遊，根據記錄祭典已經有300年以上嘅歷史


呢到嘅御神籤造型都比較特別，係以埴輪為設計，埴輪係以前會擺喺古墳嘅陶製品，因為堺市有非常多喺5-6世紀建造嘅古墳群，當中最出名嘅就係八幡宮附近嘅「百舌鳥古墳群」，喺2019年登錄世界遺產，亦都係大阪成功登錄嘅第一個世界遺產


嚟到神社𥚃面一個人都見唔到有人，就授予所都冇人喺到，又要撳鐘仔呼喚職員，我呢啲社恐仔當然又唔敢啦，所以參拜完就走嚕～

唔怪得上次食極都唔覺有用

有諗過租26自駕玩幾個城市 但日本26租車同私家車一樣價

大正a 真係只限想作病個陣用

DAY 15（26/3）續

行程：大鳥大社 ⮕ 百舌鳥八幡宮 ⮕ 方違神社 ⮕ 住吉大社

跟住由神社行15分鐘去到百舌鳥八幡站，搭南海高野線去到堺東站



出站再行10分鐘左右就到方違神社入口



方違神社
主祭神：方違幸大神，素盞嗚尊，三筒男大神，息氣足長姫命
主要祈要：方災解除，除災招福


創建於崇神天皇8年，當時「物部大母呂隅足尼」應崇神天皇嘅命令，被派往茅渟嘅石津原，進行須佐之男神嘅祭祀，被視為神社創建嘅開端，當神功皇后喺三韓征伐成功後遭遇忍熊皇子發動叛亂嗰陣，佢就喺呢到祭祀天神地祇，祈求避免災禍，並最終喺戰鬥中取得勝利


神社位於攝津國、河內國、和泉國交界處嘅三國山，即係依家嘅三國丘，呢到係一塊唔屬於任何三令制國嘅土地，亦都係一個無方位嘅地方，自古以來就以避邪同擇吉嘅功能聞名，好多人喺轉職、結婚搬屋或者海外旅行等重要生活轉折點嗰陣都會嚟尋求祝福保佑，仲可以喺神社進行方位淨化，將神社嘅淨砂帶返去，撒喺屋企四周以求平安




方違神社嘅紋章係粽子，源於神武天皇征東嘅過程中，佢嘅兄長發動叛亂，突然有一位老人喺神武天皇嘅夢中顯現，指示佢製作瓦片同飴糖並且獻於神前，就能夠鎮壓任何造反者，依照呢個神諭，神武天皇成功令佢兄長嘅族人屈服，後來當神功皇后抵達堺港，並登上三國丘嗰陣，佢用葦葉包住本地嘅黏土進行驅邪儀式，並用黏土製成嘅飴獻於神前，祈求治國平天下嘅願望，每年5月31日粽祭嘅時候，神社都會依照舊例，將粽子供奉俾神明



御朱印GET！上面印咗3月嘅主題花（紫色唔知係咩花），佢哋每個月都會換唔同嘅花款，再加上代表性嘅粽葉圖案，簡單得嚟又幾靚


然後都係繼續搭南海高野線，喺住吉東站出行5分鐘左右就到神社後門嘅入口，如果想喺正門入去就要行10分鐘兜返去另一邊


喺正門穿過鳥居，之後就會見到住吉大社嘅象徵：「反橋」，但通常被稱為「太鼓橋」，因為佢同水中嘅倒影連成一嗰陣好似日本太鼓嘅形狀，世人深信跨過呢座橋就能夠淨化心靈，根據記載喺1600年左右，由戰國梟雄豐臣秀吉嘅側室澱殿出資建成，全橋長約20公尺，高約3.6公尺，寬約5.5公尺，最大坡度為48°，我自己上落覺得都幾斜吓，要慢慢行




住吉大社
主祭神：住吉三神（底筒男命、中筒男命、表筒男命），息長足姫命
主要祈要：生意興隆，結緣，家內安全


住吉大社係日本最古老嘅神社之一，與下關、博多兩地嘅住吉神社並稱為日本「三大住吉」，亦都係日本約2300座住吉神社嘅總本社


相傳由神功皇后喺211年建成，大社裡面供奉住「住吉三神」——底筒男命、中筒男命、表筒男命，呢三位海神嘅名分別包含了「底部」、「中部」、「表面」嘅意思，說明佢哋在喺海裡面都有自己嘅位置，有傳說認為呢三位神明係獵戶座腰帶上嗰三粒星星，能夠為航海者指明方向，所以都吸引好多事從漁業、航運同其他海洋產業嘅人嚟祈求航行安全，另外，神功皇后去世後都被供奉喺住吉大社，名為「息長足姬命」


日本大多數嘅神社殿宇，一般都會根據從中國傳入嘅風水法則面向南方或者東方，但相對其他神社比較特別嘅係，住吉大社嘅本殿係由4座面向西方嘅本宮組成，呢4座本宮被稱為「住吉造」，係屬於一種建築史上最古老嘅特殊建築手法，已經被指定為日本國寶

大社供奉嘅4位神明就各自安置喺呢4座本宮，第一本宮至第三本宮排成一列，第四本宮就喺第三本宮嘅一側，呢種位置分佈喺日本全國神社當中係非常罕見，就好似係前往大海嘅船舶一樣，參拜嗰陣最好按照第一到第二，第三到第四嘅順序會比較吉利


喺大社境內會發現到唔少兔仔嘅出現，據聞住吉大社成立於「卯年」「卯月」嘅第一個「卯日」，「卯」即係兔，所以由嗰時開始，兔仔就同住吉大社有不解之緣


境內佔地都幾大，包含4棟本宮、攝末社總共27座建築，好多小神社都各有特色，我覺得好值得大家嚟慢慢探索，我自己都喺到玩咗個半鐘


位於第一本宮附近嘅「五所御前」，被認為係住吉大社嘅起源之處，當初神功皇后尋求住吉大社嘅殿址嗰陣，喺呢棵巨杉中間見到三隻白鷺出現，就認定呢到係吸收天地神明靈氣嘅寶地，成為依家住吉大社中最有人氣嘅靈地


五所御前呢到有個特別嘅小習俗，喺杉樹底下有一大堆小石頭，當中混雜咗寫有「五」、「大」、「力」字樣嘅鵝卵石，呢「五大力」係指神明賜予嘅5種力量：體力、智力、財力、福力、壽力，據講只要收集到「五」、「大」、「力」各一粒，就可以獲得呢5大運氣，心想事成
三種石頭做為護身符，願望就能實現


其實唔算難搵，不過佢隔住咗個圍欄，你要伸隻手入去或者拎支樹枝隊入去慢慢摷


最後喺啲日本姨姨幫手之下，順利搵齊「五大力」！


集齊3粒石之後，就可以去授予所買個御守外袋，將石頭放入去做成「五大力御守」隨身攜帶，如果願望成真，就喺自己屋企附近搵3粒新嘅鵝卵石，寫上「五」、「大」、「力」後，再將之前帶走嘅3粒石頭一齊送返去五所御前，咁就表示所得嘅福運加倍奉還


另外，喺為4座本宮內神明準備供品嘅建築𥚃面，都有一間祈求保佑戀愛成功同夫妻白頭到老嘅小神社「侍者社」，係為咗紀念「田裳見宿禰」同他的妻子「市姬命」對神明同對彼嘅的奉獻而建，田裳見宿禰係住吉大社嘅第一任宮司，當初神功皇后就係委託佢建造第一座殿閣



侍者社可以買到兩款御神籤，一種係一對赤裸男女「裸雛」，代表夫妻之間坦誠相見，冇任何秘密嘅理想婚姻關係，另一種係「侍者人形」，係一對身著古典和服嘅夫婦，能夠令婚姻圓滿

DAY 15（26/3）續

行程：大鳥大社 ⮕ 百舌鳥八幡宮 ⮕ 方違神社 ⮕ 住吉大社

住吉大社其中一個最常舉行嘅儀式就係「初辰敬拜」，以祈求生意興隆同家內安全，喺每個月嘅第一個辰日去參拜住吉大社嘅4座小神社，按照種貸社、楠珺社、淺澤社、大歲社嘅順序參拜，據聞喺初辰呢日參拜可以獲得更多嘅力量幫助同庇佑，如果喺4年內每個月都完成初辰敬拜，連續48個月冇間斷咁參拜，就能夠得到滿願成就，始終發達嘅祝福，因為「四十八辰」喺日文嘅發音，聽起嚟就同「始終發達」一樣



雖然今日唔係初辰，但係都按照習俗咁順序參拜一次啦～Let’s Go！

初辰敬拜嘅第1站，先嚟到「種貸社」


種貸社喺平安時代早期就已經存在，當時被列入朝廷財政支持嘅神社名單，最初位於2公里外，喺16世紀嘅一場火災之後被移至住吉大社

種貸社同播種、豐收息息相關，主祭神係「倉稻魂命」，佢係農業同商業之神「稻荷神」嘅眾多化身之一，「種」嘅意思為「種子」，所以除咗農業界以外，都吸引咗好多想懷孕嘅人嚟參拜，喺初辰敬拜中，佢代表咗事業成功所必需嘅早期投資同努力



然後就到第2站：「楠珺社」


主祭神又係「稻荷神」嘅眾多化身之一，農業之神「宇迦魂命」，可以祈求生意興隆同居家安穩，附近有2棵依偎一齊嘅楠木，構成咗一對「夫婦」楠，被認為係象徵商業合作同婚姻圓滿



而楠珺社最出名嘅就係可以保佑家宅平安同生意興隆嘅招福貓，分別有舉左手同右手嘅招福貓，左手嘅招福貓係代表招人緣同埋保家宅平安，右手嘅就係我哋最常見嘅招財貓，可以保佑生意興隆



楠珺社仲有個好特別嘅收集活動，每個月嘅初辰敬拜都可以獲得一隻細招福貓，單數月份會提供左手貓，雙數就係右手貓，當你分別儲夠48隻左手貓同右手貓，可以換到中招福貓，然後再當你集齊2隻中招福貓+48隻細招福貓，就可以換隻大招福貓，令你可以keep住「始終發達」，所以如果你想換到一對大招福貓，成個過程係需要24年嘅時間，風雨不改嚟參加初辰敬拜


之後兩間小神社都唔喺住吉大社境內，要經東南方嘅後門行2分鐘左右先會見到第3站：「淺澤社」


主祭神係水神「市杵島姬命」，佢係關於美同表演藝術嘅守護神，同佛教中嘅女神「弁財天」經常被視作同一神明，呢到可以祈求演藝精進同女性守護，所以好受女性歡迎，特別係演員、舞者、音樂家、藝術家等，尋求提升藝能同發展事業



跟住喺淺澤社隔離嘅就係最後一站：「大歲社」


主祭神為豐收之神「大歲神」，佢係掌管農業同商業嘅「稻荷神」嘅兄長，可以祈求收款順利同心想事成，根據江戶時代嘅一本旅遊指南中講到，當大阪商人喺討債要帳嘅過程中遇到困難嗰陣，就會到大歲社參拜


大歲社社面有一個好受歡迎嘅占卜石頭「重輕石」，首先進行參拜，然後舉起重輕石確認佢嘅重量，跟住將手放喺重輕石上面許願，然後再一次舉起重輕石，如果你感覺比第一次舉起嗰陣更輕，咁即係代表你呢個願望會實現，如果感覺變重咁，咁即係叫你要繼續努力




參拜完大歲社就即係完成初辰敬拜，整個儀式如果喺業角度嚟講，就象徵住從種植（種貸社）到培育（楠珺社）再到收穫（大歲社）嘅整個過程，而延伸到商業角度嚟睇，就代表住從最初投資到最終成功嘅過程

之就去寫御朱印，如果想拎到呢4間初辰敬拜嘅神社御朱印，就要初辰日嚟先會有，另外比較特別嘅就係呢到有刺繡御朱印，每個月份都會有唔同嘅刺繡圖案



御朱印GET！我都係繼續揀返通常款


行完住吉大社勁好天，同今朝喺大鳥大社嘅反差太大


走嗰陣仲見到「阪堺電車」，係大阪市區僅存嘅路面電車，已經有100年嘅歷史


之後就搭鐵去返心齋橋附近行吓



嚟到日本梗係要瘋狂扭蛋啦


最後繼續係大家睇到厭嘅超市晚餐



第15日完！

有啲關於朱印嘅問題想問樓主

日本啲神社有冇啲好似「城印帳」咁嘅朱印帳賣？

本身以為朱印同城印差唔多，點知⋯

你指嘅「城印帳」即係好似透明folder咁攝張紙入去呢種？

Yes，之前係「二條城」買咗本



但未必每間神社都可以放到，有啲朱印太大，要另外用folder 裝

Um…我印象中未見過神社賣呢種御朱印帳，因為通常大家都傾向直接寫御朱印落去

可能要上網搵吓日本專賣朱印帳嘅舖頭，有機會多啲size同款式

C兄你剩係儲紙本朱印，唔打算儲直書？

神社 同 城 -》 紙本

佛寺 -〉 直書

我自己暫時咁樣分開，

主要係因為有啲神社出一啲好大張嘅朱印（好似叫大判，
同埋未必每間神社都有直書。

遲啲睇吓有冇機會去伊勢神宮，打算買本木製朱印帳，開始儲神社直書～

如果唔介意用非神社出嘅御朱帳嘅話，可以上amazon睇吓？
https://www.amazon.co.jp/s?k=御朱印帳+書き置き用&__mk_ja_JP=カタカナ&ref=nb_sb_noss

伊勢神宮嘅木製朱印帳值得擁有

DAY 16（27/3）

行程：六角堂 ⮕ 本能寺 ⮕ 寶藏寺 ⮕ 六波羅蜜寺 ⮕ 清水寺

朝早起身feel到感冒好得七七八八，味覺都開始有返少少，Nice！早餐食個鹽包先


今日嘅行程嘅係京都一日遊，之前已經嚟過京都3次，我自己係好鍾意呢個地方，因為基本上每隔幾條街都有神社寺院，對於我呢啲儲開御朱印嘅人嚟講係極度爽，去極都仲有好多間想去，而咁啱今次想去嘅全部都係寺院

旅程嚟到中段加上病咗之後，體能開始下降，朝朝都hea到10，11點先出門口，就好似我今日咁，搭阪急去到京都已經11:30

搭到去鳥丸站出，再行8分鐘左右就到六角堂


紫雲山頂法寺（六角堂）
本尊：如意輪觀音像
主要祈求：長壽，病氣平癒


六角堂建於587年，距今已經有1500年歷史，相傳聖德太子當年想喺大阪興建四天王寺，周圍尋找木材而嚟到呢個地方，咁啱聖德太子見到一個泉池就停低沐浴，隨手將啲衣物同攜帶嘅如意輪觀音放咗喺樹下，當晚就夢到觀音託夢要佢喺到渡化眾生，於是聖德太子就喺呢到興建咗六角堂，不過本堂經歷過多次火災，依家見到嘅係1877年重新修建，中間供拜如意輪觀音坐像，左面係聖德太子，右面就係親鸞上人


六角堂其實原名叫「頂法寺」，因為本堂呈六角形而被稱為六角堂，六角代表住人嘅六根（眼・耳・鼻・舌・身・意），六根生六慾，只要我哋六根清淨，生活就可以自在解脫




一入門右手邊有一棵柳樹，又叫做結緣六角柳樹，相傳嵯峨天皇曾經夢到在喺呢棵柳樹之下會遇到一生摯愛，於是佢就依照夢境嚟咗呢到，之後就遇到佢嘅王妃，所以都開始咗只要向六角堂呢棵柳樹許願就能夠獲得良緣嘅傳說，吸引咗好多後生仔女嚟祈願


六角堂境內有一粒名為「へそ石」肚臍石嘅六角形石頭，位置啱啱好係京都嘅中心點，就好似肚臍眼喺人體嘅中間一樣，所以六角堂又被稱為京都嘅肚臍，喺幕府室町時代嘅饑荒時期，人們會聚集喺六角堂門前領取寺院烹炊嘅食物，動亂後至幕府末期，六角堂亦會充當下京區嘅市政廳、民眾集會所等，所以無論喺地理位置，定係實質機能上，都可以話係名副其實京都嘅中心


六角堂嘅後方係一個水池，池上面有一個紀念聖德太子嘅太子堂，呢到都係聖德太子嘅沐浴之地，中間石井係古蹟，水池裡面養了唔少天鵝同鯉魚




本堂另一邊都擺放咗十六羅漢，16嘅數量係來自四面八方嘅倍數，每尊羅漢都係溫和笑顏，聽講只要誠心祭拜就能得到善報


境內仲供奉好多地藏，合稱為「地藏山」，專職守護小朋友，佢哋好多都戴咗紅色嘅圍兜同唔同顏色嘅帽仔，勁得意







六角堂內亦都群集咗好多白鴿，佢哋被視為神的信使，所以推出咗好多精緻可愛嘅祈願籤同周邊，我就買咗呢個cute cute嘅「祈願鳩」，將自己心中所求寫喺「一願成就」嘅籤紙上，然後放入去隻鳩𥚃面，之後可以選擇放喺寺院，或者可以參拜後當作御守帶返屋企，祈求心願達成




境內真係周圍都見到肥嘟嘟嘅白鴿㗎



另外都買咗呢個5円御守，日文5円「ごえん」同御緣「ご縁」嘅發音都差唔多，意思係「ご縁がありますように」，即是代表著有緣分，所以去神社寺院參拜嗰陣，香油錢通常都會盡量俾5円，咁樣即係代表同神明結緣


櫻花期delay咗成個禮拜，今日嚟到京都終於見到櫻花開始滿開，勁多人都湧埋去影相





御朱印GET！六角堂係西國三十三所嘅第十八番札所


同時都係洛陽三十三所嘅第一番札所，下次有機會再嚟京都就試吓挑戰呢個！

你去有冇遇到韓國人？
我咁岩撞唔岩船期，碼頭啲舖近乎冇開，兩日一夜見過一兩架旅遊巴
成個行程個島都好似死城咁，係得東橫inn附近多啲人氣，有啲手信買下


自駕去兔猻保育中心點知揸兩個鐘去到
唯一一隻縮埋訓著咗