【遊記】祼辭獨遊日本35天（名古屋＋關西＋山陽＋對馬島＋北九州）

個jj人笑左

個印好靚

Btw見到啲御朱印帳，係咪有分神社，同埋寺廟？
要分開兩邊咁收集？


依個六道珍皇寺 嘅御朱印帳
http://www.rokudou.jp/event/rokudou_mairi.html

係咪有特別御朱印，點解唔係印係白色紙嘅？

Btw 我見到有你個本 大將軍八神社 御朱印帳賣

你個trip超正我計緊如果我揸車可唔可以兩星期內攪掂

未追完post留個言先
我2022年都係裸辭去日本玩左17日
到而家都好難忘

榮坐巴士去長島溫泉樂園 有冇得預約買咗飛先

一般嚟講都唔會分，但有人會鍾意分開儲嘅，都係睇個人喜好，我自己就神社同寺廟都寫埋同一本

係呀，神社同寺廟都成日推出呢啲限定特別款，不斷引人課金

同我一樣由名古屋玩到福岡？

17日玩咗邊啲地方？

我今次剩係去名花之里，冇去長島溫泉樂園嗰邊，所以唔太清楚 sorry

東京→內陸機去四國松山→高知→高松→淡路島→神戸坐新幹線去東京玩多幾走

點解咁刁鑽係因為買左機票先忽然發現想去四國
所以東京主要都係搵果邊住既朋友食下飯同埋求其行下

我果陣時仲係岩岩復常，要upload針紙既時候
去高松間酒店可以超大但人都無個
不過好似淡路島呢啲旅遊為主既地方就幾乎所有舖都唔開

成個月住酒店都平過香港租間爛鬼窄單位
你話香港租幾貴呢

之前有人講有d 會唔俾寫埋一齊 我自己寫完第三本就未試過
但係今次我寫完本金閣寺帳之後就分開左寺同社黎寫

金閣寺本野示意圖，幾華麗



今次我黎都淨係寫基本款，唔追限定
張張都好貴

支持巴打，ps

你隻手指弓好好笑，有月眼睛

加油

四國我未去過，希望之後有機會可以去

我11月去，唔凍好清涼大推
不過無玩到瀨戶內海，希望下次可以去埋

靚！

我都係，去到後期都冇乜點買限定款，張張都成千yen以上搞唔掂

DAY 9（20/3）續

行程：熊野古道大門坂 ⮕ 熊野那智大社 ⮕ 那智山青岸渡寺 ⮕ 飛瀧神社 ⮕ 那智瀑布 ⮕ 熊野速玉大社

正當以為行完大門坂就可以輕鬆啲？No～仲有另外一段樓梯地獄等緊你


由大門坂行上那智大社要經過呢段表參道，側邊都係啲商店，但唔係好多間有開



過咗表參道後會有分叉路，分別可以去那智大社，青岸渡寺 ，三重塔，大家可以根據自己嘅行程選擇行邊條路


我就選擇直踩上那智大社先



開始行到有樓梯恐懼症


捱埋上去就到㗎啦


經過473級樓梯，終於達陣！俾啲掌聲自己先
計埋大門坂嗰段路，最後上到嚟那智大社用咗差唔多1個鐘，但望返轉頭見到個山景就覺得值得


熊野那智大社
主祭神：熊野夫須美大神
主要祈求：結緣，無病息災，長壽，心願成就


熊野三山之一，以崇拜那智瀑布為原始信仰起源嘅神社，創建於317年，位於海拔約350公尺嘅那智山半山腰，主祭神為熊野夫須美大神，即係伊邪那美（天照大神嘅阿媽），喺神佛合一下同時代表千手觀音


呢到係用護摩木代替線香


呢到其中一個特別之處，就係有半個人咁高嘅超大籤筒


另外就係呢棵850年樹齡嘅神木「大楠樹」，喺由平安時代末期武將「平重盛」親手種植，神木嘅根部有一個好大嘅樹窿，據聞將願望寫喺護摩木上面，再拎住佢穿過樹窿，就可以消災解厄



境內仲有間「御縣彦社」，供奉嘅就係神嘅使者「八咫烏」啦



冇錯，我就係要買晒熊野三山嘅熊野牛王神符，三間神社都各自有少少分別，那智大社嘅上面係有72隻烏鴉，隱約會見到「那智」兩個字


御朱印GET！x 2



參拜完就坐低休息一陣，順便欣賞吓那智山嘅風景，不過現場太大風啦，坐咗幾分鐘就頂唔順要撤退


然後穿過那智大社授與所，就會嚟到青岸渡寺


一行到嚟青岸渡寺呢邊，個天就突然間落小冰粒，本身今日天氣麻麻，又大風又凍，仲keep住落微微雨，我冇諗過呢個moment竟然會凍到落冰粒，雖然只係落咗幾分鐘左右，但我已經覺得好凍，係凍到對手覺得痛

唔知大家睇唔睇到，件衫上面啲白色粒粒就係


青岸渡寺
本尊：如意輪觀世音菩薩
主要祈求：無病息災，長壽，心願成就


公元四世紀嗰陣，有人喺那智瀑布發現咗個觀音像，於是就地起咗個茅廬安置佢，呢個就成為咗青岸渡寺嘅起源，依家嘅殿堂係1590年由豐臣秀吉再興建出嚟嘅



然後我懷疑自己得到觀音的啟示，心血來潮喺到買咗本「西國三十三靈場納經帖」，係「西國三十三所觀音巡禮」專用嘅御朱印帳

西國三十三所即係祭祀觀音菩薩嘅關西地區33座寺院，作為日本最古老嘅巡禮之路而聞名，喺2019年5月被認定為日本文化遺產之一，透過巡遊參拜所有寺院，世人相信能夠令心靈充滿溫和、關愛同埋勤奮向上嘅能量，並且帶嚟平靜又充實嘅人生，最終可以前往極樂世界，咁我當然冇諗到咁誇張啦，純粹覺得幾得意所以就決定儲


佢𥚃面已經排好晒33間寺院嘅頁面，每頁都會列返嗰間寺院嘅一啲基本資料，呢本係由青岸渡寺自己設計，係那智山嘅獨家款，另外仲有其他款嘅西國三十三靈場納經帖，只要喺呢33間寺院都可以買到

我都見到有人寫話某啲會唔願意寫埋一齊
而且強迫症都會想分開黎寫
btw見到本好靚嘅！！！
https://www.kannonji81.com/blank-4

好想要紅藤色個本 唔知點樣先可以提前買定
網上search左下都唔見有代購...

So far我儲咗10本都未遇過唔俾寫埋一齊

我見佢個網寫可以郵寄，你要唔要試下問佢寄嚟香港得唔得？
御朱印帳呢啲冷門嘢應該唔會有代購？我諗多數人都係親自去買

DAY 9（20/3）續

行程：熊野古道大門坂 ⮕ 熊野那智大社 ⮕ 那智山青岸渡寺 ⮕ 飛瀧神社 ⮕ 那智瀑布 ⮕ 熊野速玉大社

由青岸渡寺出返嚟繼續向前行，就開始見到三重塔同埋那智瀑布


行到咁上下，就會見到條樓梯落去


嚟到呢個經典打卡角度，啱啱好影到個塔同瀑布，不過可惜今日天氣麻麻


三重塔亦都係青岸渡寺嘅一部份，現存嘅三重塔係1972年重修，塔高25公尺，可以上去瞭望台睇那智瀑布嘅全貌，不過就要俾入場費，冇記錯好似就300 yen


我覺得冇咩必要上去，所以係外圍影幾張相就算


之後繼續沿住斜路向下行，呢段係行車路所以要小心睇車


轉咗幾個彎就會見到條同大門坂一樣嘅石階，個人覺得呢段石級係比大門坂更加難行，啲石頭表面更加凹凸不平，石級之閒嘅落差更加大，加上落完雨地面又跣跣地，我要逐級逐級咁慢慢行落去（連身邊啲姨姨都行得快過我，我真係好廢）


行完落嚟就會見到巴士站同埋呢個免費拎行山杖嘅位，大家如果選擇由那智瀑布開始行嘅話，就係喺呢個巴士站落車


前面就係飛瀧神社嘅入口，那智瀑布就喺𥚃面




飛瀧神社
主祭神：大己貴神
主要祈求：延命長壽


作為熊野那智大社嘅別宮，同其他一般神社唔同，呢到冇起到本殿，而係直接將那智瀑布作為神體，被視為熊野信仰對自然崇拜嘅起源，相傳那智瀑布係由日本初代天皇神武天皇發現，大約公元前662年，天皇登陸紀伊半島嗰陣，見到山入面有嘢係到發光，然後朝住光芒就搵到那智瀑布，於是就將那智瀑布視為「大己貴命」嘅神體嚟供奉，大己貴命即係大家好熟悉嘅「大國主神」，一直到317年仁德天皇就將神社搬到依家嘅那智大社位置

喺授與所隔離有條樓梯可以俾300 yen上去觀覽台近啲咁望瀑布，仲會送個廷命御守俾你，據講身上沾到瀑布飛濺出嚟嘅水珠就會長壽


上嚟仲可以飲延年益壽嘅瀑布神水


那智瀑布瀑潭深度10米，落差約為133米，堪稱日本第一，同時被選定為「日本瀑布百選」之一，同櫪木縣嘅「華嚴瀑布」、茨城縣嘅「袋田瀑布」合稱為「日本三大名瀑布」，不過今日嘅水量唔算多，再多啲嘅話現場效果應該再震撼啲


其實飛瀧神社都有御朱印，但係我miss咗，嗚

行完都差唔多2點，計我10點由大門坂出發，全程用咗接近4個鐘，又唔算話好攰，但係加上大風又凍又落雨就唔係咁計，最後開始頂唔順就搭巴士落山


到紀伊勝浦之後再轉巴士返新宮，因為比預期中早行完，坐低休息咗一陣又好似冇咁攰，所以決定去埋本身聽日先去嘅熊野速玉大社

百名城印本書、御朱印帳、Folder裝御城印，個書包越黎越重

真，每日袋一兩本御朱印帳出去，加埋啲立雜嘢，有時真係咩到膊頭痛