【遊記】祼辭獨遊日本35天（名古屋＋關西＋山陽＋對馬島＋北九州）

係出名嗰啲先會去兜個圈

DAY 25（5/4）續

行程：錦帶橋 ⮕ 岩國白蛇館 ⮕ 吉香神社 ⮕ 白山比咩神社 ⮕ 岩國城 ⮕ 吉香公園

睇完蛇蛇就去久違嘅神社參拜啦～喺白蛇館出嚟過橋嘅另一邊就見到


吉香神社
主祭神：吉川氏（岩國藩主）歷代祖靈
主要祈求：開運


位於岩國城下嘅吉香神社係為咗祭祀岩國藩吉川家嘅歷任領主，最早設於1728年，後來喺1885年遷移到此地，屬於日本少見祭祀祖靈嘅神社，喺戰前被指定為「縣社」，2004年名列國指定重要文化財


神社嘅面積唔大，而且裡面係冇神職人員當值，如果你要買御守或者寫御朱印嘅話，就要去附近嘅白山比咩神社


白山比咩神社位置比較偏僻，好少人會特登行到咁入嚟呢到，所以沿途都可以安靜咁享受周圍嘅環境，睇吓櫻花、龜龜同錦鯉




吉香公園嘅古櫻


行幾分鐘就會見到白山比咩神社啦


白山比咩神社
主祭神：菊理媛神（白山比咩神）
主要祈求：結緣，安產


白山比咩神社創建於1559年，由現今石川縣嘅加賀國白山神社分靈而來，見到「白山比咩」呢個名係咪覺得好特別同得意呢？「白山比咩」係源自於神社所供奉嘅「白山比咩大神」，亦都係指日本神話中嘅「菊理媛神」，係掌管結緣嘅女神


神社嘅拜殿喺2004年亦都因為火災而燒毀，喺2005年完成重建，所以看睇落都仲幾新淨，裡面嘅祭神除咗菊理媛命之外，仲有「小白山比咩命」同「大己貴命」，亦即係大國主神


喺參道轉彎進入白山比咩神社之前，旁邊有座小神社「錦川水神社」，係1974年設立，為咗感謝錦川自古以來帶來源源不絕嘅河水，孕育都市產業發展而設置，祭神為彌都波能賣神，係日本神話中嘅女水神


參拜完就去寫御朱印，喺等候期間就見到社務所痴住嘅呢張「人生祝賀年表」，估唔到不同嘅歲數同結婚周年都有咁多稱號


御朱印GET！可以一次過拎晒兩間神社嘅印，呢位神職人員應該估到我係遊客，所以用英文問我邊到嚟，佢聽到我話香港之後嗰表情都幾surprise，之後feel到佢想同我傾吓偈，但奈何我又唔識講日文



行完兩間神社，跟住就去返纜車站準備上山啦，每15分鐘一班，如果大家想挑戰自己，吉香神座旁邊都有條登山步道行上山


上到山頂之後要再行8-10分鐘先會到達岩國城，佢有兩條路俾你選擇，左邊嘅係呢條平坦嘅石屎路，右邊就係難度比較高嘅樓梯山路，我呢啲垃圾當然揀條舒服嘅路上去啦


中途會經過呢座「大釣井」，相傳喺1608年岩國城築城嘅時候開鑿，除咗係城堡嘅水源之外，亦作為武器儲藏同逃生用途，而經過荒廢咗4世紀之後，裡面生咗一顆歪歪斜斜嘅樹



再繼續行上去就會見到呢個修復後嘅舊天守台

岩國城又名橫山城，最初建於1608年，係由岩國籓初代領主「吉川廣家」所蓋，但1615年因江戶幕府頒布「一國一城令」後就被廢城拆除，所以原本嘅岩國城好慘咁只有7年壽命，而喺破壞廢城之後，僅存埋在地底四分之一嘅地基，後來被發現修復，就係我哋依家見到嘅呢堆石頭


隨後為咗觀光考量，岩國城於1962年，選擇咗喺舊城跡南側約50公尺嘅位置重建，目的係為咗俾遊客可以更好地喺居高臨下嘅角度欣賞到錦帶橋嘅美景，亦都根據史料紀載依照原本嘅樣貌重建，整座城係四重六階，即係外面睇係4層、內部就有6層，以示領主嘅低調，建築風格亦都係日本少見嘅「桃山南蠻造」樣式

如果買咗套票嘅，喺門口show俾工作人員睇就可以入去參觀啦


裡面都係啲例牌嘢，古時嘅刀具武器、甲冑同城池嘅遺跡物，亦有日本各大名橋、百大名城等介紹





重頭戲就係上去天守閣展望台欣賞風景


上到嚟就是成個岩國市嘅制高點，喺200米左右嘅城山山頂，360度眺望岩國市嘅景色


左邊可以望返落去就係入口位


右邊就係普通嘅山景


正面睇就係我頭先經過嘅地方，錦帶橋、錦川、岩國城下町、岩國市街、吉香公園等，淨係呢個景都好值得特登上嚟睇


天氣再好啲嘅話，就可以清晰咁睇到遠處嘅瀨戶內海同四國


見住啲人喺錦帶橋上面行嚟行去，好似玩緊sims咁（我仲課咗100 yen用望遠鏡去睇）


呢到人又少，山上空氣又清新啲，成個感覺都好C服，忍唔住喺頂樓到坐咗陣先返落去


打卡～岩國城嘅御城印係入口處到可以買

lm

btw 近排搵緊D 可以郵送御朱印嘅神社
https://isahaya-jinja.net/items/66ec366d5192010bc36bc19b


即刻落左單
下次有機會去返呢個神社

DAY 25（5/4）續

行程：錦帶橋 ⮕ 岩國白蛇館 ⮕ 吉香神社 ⮕ 白山比咩神社 ⮕ 岩國城 ⮕ 吉香公園

行完岩國城就經另一邊二之丸跡行返落去




毒蛇注意！


回程我就選擇試吓難啲嗰條山路


但係行行吓就淆底了，隔離就係山崖，唔小心仆落山就gg，好彩行到中途有條分叉路可以去返石屎路嗰邊


行返嚟山頂纜車站等纜車


可以望住個風景等


落返嚟山底之後就慢慢行去吉香公園睇櫻花



櫻花放題～見到櫻花就係咁影，唔理影得靚唔靚





然後繼續沿路行返去錦帶橋附近







佢河邊一帶都有唔少小食攤檔


好多人都買啲嘢食，然後坐喺草地野餐賞花



見呢到咁好環境，我當然都唔例外啦，買咗件粉紅色鯛魚燒就坐低即興野餐


錦帶橋＋藍天＋河川＋櫻花＋爸爸媽媽帶住小朋友玩，成個畫面好靚好美好


太陽開始落山，都差唔多係時間要走




最後行埋落去呢個石灘近距離感受吓條河



夕陽無張好～今日呢個岩國一日遊我自己幾鍾意，人流又唔算太多，而且又睇到好多櫻花，成個vibes都好舒服


之後回程都係搭返巴士到岩國站，然後再轉JR到廣島站

今晚晚餐就食廣島站ekie嘅呢間「ひろしまギョウザ by餃子家 龍」，應該係一間食廣島餃子為主嘅居酒屋，ipad可以轉中文落單，啱晒我呢啲毒撚


呢間我都係喺google map到求其搵，吸引我嘅原因係因為見到呢款爆多蔥蔥嘅餃子，身為蔥愛好者嘅我當然無法抗拒，加埋杯啤酒，爽！


嚟到廣島唔少得嘅廣島蠔


之後再叫多碟雜錦口味餃子，分別係薑、蠔、檸檬口味，特別得嚟又幾好食


最後仲未夠喉就嗌多杯啤酒同碟炸牛腸（好似係），不過碟嘢味道就一般，可以嗌其他


食飽買埋個甜品返酒店，係心型嘅雪米滋～


第25日完！

仲有十日

你係直送嚟香港？想知咁樣郵費幾錢？

都係落訂送去集運倉（暫時未收到神社ship 嘅消息，唔知會唔會俾人cancel，而且圖入面個張已經冇得再買）
運去集運倉都係間間神社唔同，呢間就運國內500
不過都見到有D神社會cancel ship 去集運張單

and 其實咁運都有D唔岩禮數
所以之後都打算去返參拜 （以前有去過諫早，不過係轉個車）

不過其實都見到Buyandshit 個share 成日都都有人運東京某間寺嘅紙切朱印

樓主呢

一得閒就會入黎睇下樓主更新左未

推post 追數
唔好爛尾

DAY 26（6/4）

行程：白神社 ⮕ 空鞘稻生神社 ⮕ 廣島護國神社 ⮕ 廣島城 ⮕ 廣島 ⮕ 下關

早餐～依舊最愛嘅通粉沙律加條腸仔


今日係廣島最後一日，check out咗之後主要留返喺市區行吓，晏啲就起程去下個地方


第一站嚟到平和大通前嘅白神社，由酒店行過嚟大概20-25分鐘



白神社
主祭神：菊理姫命，伊弉諾尊，伊弉冉尊
主要祈求：結緣，子孫繁榮，事業成功，交通安全


創建年份不詳，但據說白神社係為咗防止海上事故而建造，原本呢個區域係一片海洋，當時有一塊礁石從海平面突咗出嚟，啲船隻成日都會冇為意就撞埋去舊礁石到，所以船夫就喺礁石上面豎立咗張白紙，作為一個安全標記，提醒其他船隻唔好再撞埋去


後來因為廣島三角洲嘅開發同填海工程，呢一帶地區逐漸開始露出地面，當地人就喺到起咗一座名為白神嘅小神社，因為白紙同上帝呢兩個字喺日文中都發音為「kami」，以白紙作為神明嘅象徵，從16世紀末到17世紀，人們將白神作為廣島鎮守府嘅總社而崇拜



御朱印GET！入面嘅神職人員知我係香港人好好咁為我介紹神社，可惜佢用日文我聽唔明，但我好感激佢一番心意


然後經平和大橋，穿過平和紀念公園過去另外一邊






繼續沿住河邊向前行，成條路都係櫻花樹，勁有feel～




大概行20分鐘就會見到神社門口啦




空鞘稻生神社
主祭神：宇迦之御魂神，宇氣母智神，和久產巢日神
主要祈求：五穀豐收，商賣繁盛，開運


根據文獻大概喺1532-1555年天文年間創建，至今已有約500年嘅歷史，曾經歷過兩次火災以及原子彈炸毀，後於1953年重建


「空鞘稻生神社」中嘅「空鞘」據說係源於神社內一棵上面掛著劍鞘嘅松樹，而「稻生」就代表著神社供奉嘅3位神明，佢哋合稱為「五穀之神」，自古以來，大米一直都係日本嘅主要糧食，提供人類生命嘅力量


境內有棵據說係原子彈爆炸後生長嘅樟樹，被認為係神樹「原爆樟樹」，所以都吸引咗好多人為了欣賞佢嘅生命力同能量而嚟神社參觀



我事前上網睇到神社裡面有部御守自動販賣機，好似好特別咁，但係嚟到現場就搵唔到，唔知係咪已經冇咗，定係特定時間先會出現？



授與所冇人，要㩒鐘仔叫人出嚟


出現嘅就係呢位神社嘅官司，但好好笑嘅係佢嗰陣著住西裝行出嚟，令我一度懷疑係咪搵錯人


御朱印GET！寫完仲送咗張貼紙仔！

回來了