【遊記】祼辭獨遊日本35天（名古屋＋關西＋山陽＋對馬島＋北九州）

求「後生女神官」照

起碼你都去咗最重要嘅內宮，之後有冇去返外宮？

就係去了左外宮、見案內圖寫[外宮]、即係有[內宮]啦

留名先，諗緊到時day trip定2日1夜好

會自駕？你打算搭飛機定搭船去？

起酒店洗 乾衣？

我book多數都係商務酒店，通常有齊洗衣機同乾衣機

DAY 7（18/3）續

行程：二見興玉神社 ⮕ 伊勢神宮外宮 ⮕ 伊勢神宮內宮 ⮕ 猿田彥神社 ⮕ 月讀宮 ⮕ 倭姬宮 ⮕ 月夜見宮

行完外宮就行返出去搭巴士去內宮，呢程巴士可以用Pass，雖然好多人排隊，不過佢嘅班次都好密，唔洗等好耐，搭10分鐘左右就到內宮入口


留意返內宮呢邊係靠右行～同樣地入去都要先過一條橋，內宮呢條係「宇治橋」，代表人間界同神界嘅連結之處，過咗宇治橋就表示開始進入神明嘅世界


橋下面就係五十鈴川，會見到插咗幾條木柱喺到，係為咗攔截由上流漂落嘅木頭，避免直接衝撞橋身


伊勢神宮被譽為「日本人的心靈故鄉」，「每個日本人一生必定要去一次」，身為神社撚，伊勢神宮一直都喺我bucket list上，今次終於嚟到真係有小小興奮，天照大神我嚟啦


伊勢神宮內宮（皇大神宮）
主祭神：天照大御神
主要祈求：開運厄除


創建於約2000年前嘅內宮，正式名稱係「皇大神宮」，祭神為「天照大御神」，原本由歷代天皇供奉喺古都大和嘅皇居內，但因為第十代崇神天皇時日本國內疫病流行，災害頻發，所以崇神天皇就叫佢嗰女豐鍬入姬命喺皇宮外祭祀天照大神，到咗第十一代垂仁天皇即位，佢又叫佢嗰女倭姬命巡視全國各地，搵下邊到最啱祭祀天照大神，倭姬命從大和出發，經近江、美濃嚟到伊勢，到達伊勢之後倭姬命就得到天照大神嘅神示

天照大神：皇女，喺到嗎？呢到面對住伊勢灣，風光明媚，氣候溫暖，又有豐富嘅山珍海味，我好鍾意，想永遠都留係依到

倭姬命：喺到！小妹即刻幫你

所以就將天照大御神移駕到伊勢，興建咗伊勢神宮啦

穿過咗第一個鳥居之後，右邊有條路可以行落去五十鈴川，呢到又名為「御手洗場」，大家可以直接用河水洗手淨身

相傳倭姬命就係喺呢到洗衫嗰陣，收到大神order


伊勢神宮之所以咁重要，係因為內宮供奉嘅天照大神係日本八百萬神明之中地位最崇高，天照大神即係太陽神，象徵賜予生命力嘅萬物之源，守護住日本全國，被尊為日本人嘅總氏神信奉，同時都係日本天皇皇室嘅始祖，歷代日本天皇都是係天照大神嘅直系後裔

江戶時代之前只有皇室先可以參拜，要等到江戶時代後先允許一般民眾都可以去，所以各地嘅日本人發夢都想去一次伊勢神宮，以當時嚟講，由東京徒步行去伊勢至少要25日，由京都大阪出發就需要5日，儘管山長水遠，伊勢神宮至今都係日本人心靈的嘅故鄉，夢寐以求嘅神境，每年都有超過800萬人去參拜


而天皇代代相傳嘅三大神器之一「八咫鏡」，相傳就係內宮所供奉嘅御神體，日本神話中，呢塊八咫鏡曾經照過天照大神嘅面容，後來天照大神嘅孫仔「瓊瓊杵尊」降臨日本嗰陣，天照大神就將八咫鏡、草薙劍、八尺瓊勾玉一起交俾孫仔，同佢講見鏡就如見大神本人，要慎重咁供奉


參拜完正宮就去埋另外2個別宮，分別係供奉天照大神嘅荒御魂，別宮中地位最高嘅「荒祭宮」，同埋供奉風神嘅「風日祈宮」


內宮比外宮大，但遊客可以去嘅範圍都係唔多，一個鐘內都可以行完

另外兩個比較特別嘅嘢係，第一係呢到冇得求籤，因為能夠嚟到咁神聖嘅伊勢神宮參拜就代表今天係吉日，運勢已經係大吉，唔需要去求籤；第二係呢到冇繪馬，因為伊勢神宮真係有養神馬，所以唔洗用繪馬代替，自然就唔會有繪馬賣

Hello！神馬！


御朱印GET！感恩！多謝神明一路以來嘅保佑


行完內宮差唔多2點，本身plan去埋猿田彥神社就完，但時間比我預期中剩得多，所以就臨時決定去埋另外3間別宮，成個行程即刻變得勁趕

因為趕時間，喺托福橫丁買咗個包食就算



由內宮行15分鐘就可以到猿田彥神社


猿田彥神社
主祭神：猿田彥大神
主要祈求：開運除災，事業繁榮，交通安全


我上網搵咗好耐都唔知幾時興建，淨係知全日本大約有2000間猿田彥神社，伊勢呢間就係總本社，同朝早參拜嘅二見興玉神社一樣，都係拜祭猿田彥大神，古事記同日本書紀中都記載咗「猿田彥大神將開國天孫引導到這片國土」，所以佢被認為係引導萬事萬物走向好的方向，開拓道路之神，如果大家要開始新嘅發展，或者迷失喺人生道路上，即係我呢啲裸辭廢J咁，不妨嚟拜拜猿田彥大神



猿田彥神社同伊勢神宮關係深厚，猿田彥大神嘅後裔大田命，曾經推薦五十鈴川作為伊勢神宮內宮嘅地點，另外大田命嘅直系子孫「宇治土公宮司家」，除咗喺神宮擔任特別職務之外，喺式年遷宮中都身負重要任務


本殿前面有個八角形嘅石柱，上面刻咗方位同十二生肖，據聞摸吓自己生肖或者今年嘅生肖，可以提高運氣


神社境內仲有另一間神社：佐瑠女神社，相傳天照大神匿埋喺岩屋嗰陣，佢曾經獻跳過神樂，所以被稱為神樂、技藝、戲劇嘅守護神，有好多從事藝術同運動相關嘅人都會嚟參拜


御朱印 x 2 GET！

難得見到咁多御朱印既高汁遊記

必須留個名

DAY 7（18/3）續

行程：二見興玉神社 ⮕ 伊勢神宮外宮 ⮕ 伊勢神宮內宮 ⮕ 猿田彥神社 ⮕ 月讀宮 ⮕ 倭姬宮 ⮕ 月夜見宮

然後由猿田彥神社行20分鐘左右去月讀宮，其實可以搭車，不過等得班車嚟我行過去好似仲快啲


月讀宮（皇大神宮別宮）
主祭神：月讀尊，月讀尊荒御魂，伊邪那歧，伊邪那美
主要祈求：身心淨化，開運招福


創建年份不明，但根據記載大約804年以前已經存在，主祭神係月讀尊，佢係天照大神嘅細佬，負責掌管夜晚嘅世界，又稱為「月神」


除咗月讀尊，仲可以參拜埋月讀尊嘅荒御魂，佢阿爸伊邪那歧同阿媽伊邪那美


別宮𥚃面寫咗參拜嘅順序


御朱印GET！


然後搭15分鐘巴士去下一站！

倭姬宮（皇大神宮別宮）
主祭神：倭姫命
主要祈求：身心淨化，開運招福


建於1923年，係伊勢神宮125社之中最新嘅一間，為咗讚頌倭姬命將天照大御神移駕至伊勢嘅功積而興建


座落喺小森林𥚃面，呢到相對少啲人會嚟，靜靜地慢慢行真係好舒服


倭姬宮附近有神宮徵古館、神宮美術館、神宮文庫可以去參觀，另外仲有間專門培養神職人員嘅皇學館大學



御朱印GET！


行完倭姬宮都3:40，跟住要即刻趕去下一站，因為我唔肯定授與所幾時收，如果遲咗少少拎唔到御朱印我會好傷心

由呢到去月夜見宮要再搭20分鐘巴士，出返伊勢站再行5分鐘

月夜見宮（豊受大神宮別宮）
主祭神：月夜見尊，月夜見尊荒御魂
主要祈求：身心淨化，開運招福


創建年份不明，月夜見宮同月讀宮嘅主祭神雖然嗰名唔一樣，但其實都係講緊同一個人：天照大神嘅細佬



嗚～天照大神係你嗎？


御朱印GET！順利4:30前完成晒今日行程


見到呢到陽光咁靚，幫我今日買嘅寶貝影吓相先

呢本係內宮限定嘅木製御朱印帳，係用式年遷宮時更換嘅舊木材嚟整，每本嘅木紋都獨一無二，非常有意義價值


另外呢個係喺二見興玉神社買嘅，用嚟放御朱印帳嘅袋袋，上面縫咗夫婦岩夜晚嘅景色


行咗成日攰啦，狗衝返酒店


是日晚餐：酒店隔離嘅超市


KO咗今次旅程嘅第一本


頭7日已經買咁多御神籤


第7日完

遊記完成進度：20%

跟住落嚟其實都係神社寺院嘅內容佔大多數，如果大家對呢啲冇興趣，要講聲唔好意思先

我打嘢比較慢，對馬島行程係Day 29 30，想睇嘅可以隔多排先返嚟

下篇開始熊野三山

繼續支持樓主

留名支持，條路線幾特別

你啲神社唔係一般連登仔會去嘅有人睇完你個post之後嚟緊去名古屋即刻加咗JJ神社同埋伊奴神社

好睇
以前都會去神社，但係御朱印都係近一兩年先儲
想儲滿一本都難

睇樓主遊記可以事先望下有咩御朱印岩儲

DAY 8（19/3）

行程：伊勢 ⮕ 新宮 ⮕ 熊野本宮大社 ⮕ 大齋原

繼續酒店早餐，食完就check out啦


Bye Bye伊勢！下次有機會再嚟嘅話想玩埋落志摩


今朝要先搭參宮線去到多氣站，然後再轉紀勢本線到新宮站


嚟到多氣站，紀勢本線要過另外一邊月台，但我最驚嘅事終於出現，就係呢到係冇升降機可以搭，即係我要拎住個接近20kg嘅大喼，上樓梯過天橋然後再落樓梯

好彩距離轉車都仲有啲時間，可以慢慢行，但最後落樓梯真係好撚攰，好想成個喼碌落去算


就係要搭呢架南紀1號


車箱前後都有行李架放喼，可以舒舒服服坐低休息吓


搭咗兩個鐘頭多啲就到新宮啦，先去酒店放低個喼先


跟住就去返JR站隔離嘅熊野御坊南海巴士站，用Pass搭51號巴士直接去到熊野本宮大社


車程大約1個鐘，沿途可以見到好靚嘅熊野川



落車之後過對面就係神社入口啦


呢到會經常見到一隻有三隻腳嘅烏鴉「八咫烏」，佢喺熊野地區被視為神嘅使者，同時亦都係太陽嘅化身，相傳八咫烏受到天照大神之命，喺神武天皇東征嗰陣肩負帶路嘅重任，大家喺日本足球隊logo見到嗰隻就係八咫烏啦


3間熊野神社嘅八咫烏外型都各有不同


上去參拜要行158級樓梯先


熊野本宮大社位於熊野古道嘅正中心，係全國4776間熊野神社嘅總本社


熊野本宮大社
主祭神：家津御子大神
主要祈求：結緣，消災，家庭圓滿，漁業豐收


據說創建於第十代天皇崇神天皇時期，最初位於熊野川同音無川交匯處嘅大齋原沙洲，但係1889年被一場大洪水摧毀，逃過一劫嘅4座社殿就移址到依家嘅熊野本宮大社位置


主祭神係家津御子大神，4間社殿嘅參拜順序係先拜家津御子大神，然後速玉大神，夫須美大神，最後天照大神

除咗天照大神，其餘3位係咪唔知邊位呢？其實分別就係天照大神嘅另一位細佬：素戔嗚尊，天照大神嘅阿爸：伊邪那岐，天照大神嘅阿媽：伊邪那美

其實來來去去都係嗰啲神明，只係啲名唔同（媽，好亂呀）


喺呢4間社殿旁邊仲有間滿山社，供奉住「重生之玉石」，係締結親子緣分、人與人之間緣分嘅結緣之神


自古以來，熊野位於深山嘅偏遠地區，被群山阻隔，古人認為呢片難以輕易接近嘅土地就係「神明居住的聖地」

熊野速玉大社、熊野那智大社、熊野本宮大社總稱為「熊野三山」，分別代表「將前世罪孽洗淨（速玉）」、「與現世結緣（那智）」、「最後救濟來世（本宮）」，相傳只要完成三社參拜，過去、現在、未來都可以得到安寧


熊野參拜大約由2000年前第10代崇神天皇開始，盛行於平安時代中期至鐮倉時代，進入江戶時代後，紀州藩主徳川頼宣大力復興熊野三山，廣泛普及至一般庶民，不論任何階級、身分、性別嘅朝拜人群，朝住內心嚮往嘅聖域前行，祈求前世今生嘅救贖同來世嘅幸福

日本人流傳一個講法：「伊勢へ七度，熊野へ三度」，意思指一生必定要到伊勢神宮參拜7次，到熊野三山朝聖3次，可想而知，同伊勢神宮相提並論嘅熊野三山對於日本人嚟講係幾咁神聖


熊野信仰係以自然信仰為原點，喺6世紀佛教傳入之後，再融合神道同佛教成為「熊野權現信仰」，「權現」即係指佛教中嘅佛菩薩，經由化身嘅方式，以日本神嘅型態出現

所以呢到嘅主祭神既係素戔嗚尊，又係阿弥陀如来


呢個係全日本唯一一個嘅八咫烏黑色郵筒，可以去授與所買postcard寄


可愛嘅八咫烏


熊野本宮大社仲同荒木飛呂彥crossover出咗個御守，可惜我唔係JoJo粉


最後我淨係買咗呢個熊野牛王神符，係熊野三山獨有，將熊野權現化作鳥形文字嘅護身符，上面畫咗88隻烏鴉，被稱為係萬能嘅神符，能夠驅邪避凶


御朱印GET！適逢今年係熊野古道登錄為世界遺產20周年，右上角嗰印會唔同

名花之里我去個時有夜楓睇，d 燈光好靚

我今次本身都想去熊野三山，但發現唔轉酒店名古屋去單程要4粒幾鐘，都係下次先

熊野三山stay一晚好啲，即日太chur啦

熊野本宮大社想留俾朝聖之路
因為要行完西班牙聖雅各之路 之後再行熊野古道
先有資格打個太鼓

已經三張野 但係依然係人生bucket list 入面

支持c兄 第時記得出遊記

真心respect可以完成晒兩條朝聖之路嘅人，要有好強大嘅信念同體能先搞得掂

綠洲21地下有一間壽司舖都唔錯，幾好食

DAY 8（19/3）續

行程：伊勢 ⮕ 新宮 ⮕ 熊野本宮大社 ⮕ 大齋原

由本宮大社門口過對面馬路就會見到大齋原嘅標示


沿路行入去會見到分岔路，左邊係去產田社，右邊就係大齋原，神社建議大家去產田社參拜先


呢到供奉伊邪那美荒御魂，佢係女性嘅守護神，可以祈求生產平安


然後就行返另一邊條路，離遠已經見到個大鳥居啦


大齋原大鳥居係全日本同全世界最大型嘅鳥居，高34米，闊42米


上面有隻細細嘅八咫烏


後面一大片森林就係本宮大社嘅原址，據聞係依家嘅熊野本宮大社8倍咁大，當時喺神社𥚃面有12座社殿，後嚟1889年被洪水淹沒剩返4座，所以依家要行158級樓梯先上到去本宮大社，就係避免再被洪水侵襲



大鳥居建於2000年，以鋼鐵建造，並唔係舊時留落嚟，據聞係為咗提醒世人唔好忘記呢到係最初神明降臨嘅地方，代表日本一切嘅原點


雖然我影得麻麻，但係現場親眼睇到真係覺得好壯觀


因為開始落雨變得好凍，我就冇再行入去，決定沿路折返

大鳥居周圍都係稻田，不過因為季節嘅關係，望落好似好荒蕪咁，但撞啱時間嚟就應該好靚


回程都係搭返同一架巴士，不過仲要等成粒鐘先有車，所以就入咗去巴士站隔離嘅世界遺產熊野本宮館，𥚃面除咗有遊客中心，仲有個展覽廳介紹本宮、熊野信仰和同熊野朝聖路歷史等等

喺本宮大社嗰陣除咗見到好多外國人，仲有好多上咗年紀嘅阿叔阿姨都去行熊野古道，真心佩服佢哋有咁嘅體力同信念去挑戰，日本另外一個出名嘅朝聖之路「四國遍路」其實我都有興趣，但係垃圾體能嘅我應該好難完成到



出返新宮已經差唔多6點，就係JR站附近搵咗間餐廳「寿司･お食事処 かつ田」食晚飯


叫咗個刺身套餐1800 yen，正正常常幾好食


食完就返酒店啦，介紹返今次喺新宮住呢間Shingu UI Hotel，距離JR站大概10分鐘路程，門口只有樓梯冇斜路，又要抬個喼上去


本身新宮就唔係咩旅遊熱點，商務酒店嘅選擇並唔多，呢間性價比已經唔錯，15平方米單人房，雖然感覺上比較舊，但所有嘢都正常冇咩問題，同埋間房比我想像中大，係成間trip𥚃面最大嘅一間房


第8日完

DAY 9（20/3）

行程：熊野古道大門坂 ⮕ 熊野那智大社 ⮕ 那智山青岸渡寺 ⮕ 飛瀧神社 ⮕ 那智瀑布 ⮕ 熊野速玉大社

新宮呢間酒店都有包早餐，今日係體力勞動嘅一天，要食飽啲


本身今朝打算搭JR去紀伊勝浦，但係又有強風警報嘅關係而停駛


所以就轉去搭巴士，反正都可以用pass，大家可以喺巴士站到拎定啲班次時刻表，方便預時間搭車


冇乜人搭嘅巴士


時刻表後面係那智山地圖，大家可以選擇由大門坂或者那智瀑布開始行，我就揀咗比較熱門嘅大門板出發


搭半個鐘頭多啲就到紀伊勝浦，然後再轉31號巴士


喺大門坂站落車後，對面馬路有個休息站，嗰到可以免費拎啲行山杖用，我會建議大家去拎，有行山杖真係會輕鬆啲，因為我冇做好事前research，miss咗呢個位

繼續向前行，見到石碑就啱㗎啦



過咗呢條「振瀬橋」就代表開始進入神明嘅世界啦


然後會見到大門坂茶屋，呢到可以租借平安時代嘅服裝去大門坂影相，睇價錢都唔算好貴


利申：平時完全零運動，跑步跑幾下就喘氣，上斜上樓梯行幾步又會喘氣，體能極廢嘅我真係好想挑戰熊野古道，所以就揀咗呢條最容易最啱新手行嘅路段，官方聲稱大門坂呢段只係需要30分鐘就可以完成，等我試試係咪真係咁輕鬆


熊野古道初體驗



嚟到大門坂入口會先見到夫婦杉，呢兩棵大樹已經有800年歷史



日本人認為呢啲千年大樹咁多年嚟吸盡日月精華，會習慣摸吓沾沾靈氣


等我都摸摸先


吸完靈氣就正式開始行大門坂啦


大門坂整段路大約600公尺，總共有267級石階，對於冇做開運動嘅我嚟講都有少少吃力，每行一段就要停低唞唞，但咁樣慢慢行其實感覺還好，係要留意返啲石級位，某啲階級嘅落差都幾大，同埋啲石頭都有少少凹凸不平，表面仲有青苔，我冇行山杖嘅就要每一步都小心慢慢行驚跣親




喺熊野古道上會見到好多王子社嘅神社，佢哋被稱為「熊野九十九王子」，係熊野大神社嘅附屬神社，目的為咗保護並指引朝聖者，往時嘅朝聖者亦會喺九十九王子休息，最接近大門坂入口嘅多富氣王子就係九十九社嘅最後一社


沿路上都被大樹包圍，陽光由上面透落嚟，空氣又清新，真係有種入咗仙境嘅感覺


無盡嘅樓梯（喘氣ing）


當見到呢個路牌就代表你順利完成大門坂啦，以我咁廢作為準則，最後都係行咗30分鐘左右，冇想像中咁辛苦