行程：淡嶋神社 ⮕ 刺田比古神社 ⮕ 和歌山城 ⮕ 大阪
跟住就行返去加太站搭電車返和歌山，今程車咁啱搭到鯛魚電車
呢個係2014年官方開始推行嘅「加太魚線」企劃，希望吸引到更多觀光人潮，佢哋將「加太鯛魚」同「淡嶋神社嘅結緣」兩個主題融合成鯛魚電車，「鯛魚」嘅日文發音同「恭喜恭賀」相同，有喜氣嘅象徵，以戀愛為主題，鯛魚電車一開始推出咗粉紅色嘅彩繪電車，命名為「幸」，隔年推出咗水藍色嘅「海」，2018年幫粉紅鯛魚同水藍鯛魚舉辦婚禮之後，2019年仲推出咗佢哋嘅小朋友，以加太沿線有七個站命名嘅紅色鯛魚電車「七」，仲有最新嘅黑色鯛魚電車「かしら」，係粉紅鯛魚嘅哥哥
紅色鯛魚電車「七」嘅車內裝修主題係「結緣」，會見到好多水引結同魚仔圖案
搭電車返到和歌山市站之後再搭巴士去和歌山城
入去和歌山城之前去埋附近嘅一間神社先
刺田比古神社
主祭神：道臣命，大伴佐弖比古命
主要祈求：出世開運
刺田比古神社又稱為「岡之宮」，有1000年以上歷史，作為守護和歌山城嘅神社受到尊崇，德川吉宗出世嗰陣，為咗可以健康成長，親喺神社附近被稱為扇芝嘅地方舉行咗拋棄孩子嘅儀式，而嗰時吉宗嘅拾親道係刺田比古神社嘅宮司，後來吉宗出人頭地，喺命運之神嘅引導下成為咗紀州藩嘅第五代藩主，所以亦都作為開運之神而廣為人知
本身冇plan呢到，咁啱喺google map見到附近呢間神社就順便入嚟望望，神社範圍唔大，位於住宅區入面，上網搵唔到有關神社嘅中文資料，相信呢間都係啲日本當地人先會嚟嘅神社
最後諗住拎埋御朱印，但係社務所冇人，要撳鐘仔叫人嚟，我身為一個社恐毒J有啲淆底，所以簡單參拜完就走
跟住就出返去搵和歌山城嘅入口
和歌山城係位於和歌山市內虎伏山上嘅城池，1585年豐臣秀吉命令佢細佬建造而成，喺1600年「關原之戰」後，身為城主嘅淺野氏搭建咗天守閣，而喺1619年德川家康嘅仔賴宣建立紀州藩後，就以「紀州德川家」嘅名號居住於和歌山城
和歌山城所在嘅虎伏山，喺海上面睇就好似一隻伏低休息嘅老虎，因而得名，和歌山城喺江戶時代亦被稱為虎伏竹垣城，當時就整咗個伏虎像放喺大手門嘅小路上，依家呢個雕像就係1959年按照原本雕像再造出嚟
沿住樓梯上去就可以到天守閣
但係落雨行呢啲石板梯級要小心地滑
仲要留意唔好踩到地下嘅蚯蚓
天守閣售票處喺外面呢間白色屋仔到，仲可以喺到買埋御城印
佢今期有個特別版，變形金剛啲frd？
