【遊記】祼辭獨遊日本35天（名古屋＋關西＋山陽＋對馬島＋北九州）

因為我冇揸車，基本上淨係留喺嚴原呢邊
我相信東橫inn嗰條街就係市中心，喺條街經過見到啲疑似遊客但我唔肯定佢哋係咪韓國人
觀光中心同對面間商場應該人流最旺，見得最多人就係𥚃面間aeon

原來得一隻山貓，我以為會有多幾隻
你仲去咗啲咩景點？

景點真係唔算多，但分到好散，兩日一夜其實唔去得幾多
實際景點名就冇特別記低，𠴱陣抱住「一生人只會嚟一次」既心態，
喺map盡量挨住個島既邊緣篤d景點，然後揸住架車過去望下山望下海咁
d景點真係好唔景點，但d海水真係好藍好綠。

係，人流最旺一定係𠴱度，離開咗碼頭之後沿途唔知以為個島d人一夜消失哂

去到個中心，d職員仲「？？？？？」咁問我咩事

對馬島主打景點都係得呢啲自然風景，冇乜特別嘢可以做
我本身諗住去漁火公園浸免費足湯，唔知點解去到現場水都冇滴，我仲要明明已經check咗佢開放時間
不過坐喺公園睇吓海係幾正嘅



我最想去就係和多美都神社同小茂田海灘嗰邊，可惜今次冇揸車去唔到
對馬島呢個地方真心唔知仲有冇下一次

DAY 16（27/3）續

行程：六角堂 ⮕ 本能寺 ⮕ 寶藏寺 ⮕ 六波羅蜜寺 ⮕ 清水寺

由六角堂行大約15分鐘去到寺町通，大名鼎鼎嘅「本能寺」就喺𥚃面！


「敵は本能寺にあり！」
呢句嘢太經典啦，連我唔熟戰國歷史嘅都有印象


本能寺
本尊：日蓮曼陀羅本尊
主要祈求：健康，生活安穩


本能寺係為咗弘揚日蓮大聖人所宣揚嘅「法華宗」所建立嘅寺廟，信奉「南無妙法蓮華經」，原本名為「本應寺」，喺1433年開始改稱為「本能寺」，由1415年創建以來，經歷咗多次焚毀同重建，依家嘅本堂係1928年第7次重建時所修復

1582年嘅本能寺早就喺明智光秀一把火下同織田信長一齊煙消灰滅，依家位於寺町通呢到嘅本能寺係奉豐臣秀吉命令於1587年遷移，所以大家耳熟能詳嘅「本能寺之變」並唔係發生喺呢到



距離本能寺約20分鐘路程，位於蛸藥師通油小路東側附近，設立咗一塊「本能寺跡」嘅紀念石碑，上面記載當年嘅經過，認為呢到就係本能寺之變嘅原址


如果仔細觀察本能寺嘅文字，會發現「能」字嘅「匕」改寫成「去」，咁係因為日文中「匕」同「火」嘅讀音相同，曾經遭遇五次火災嘅本能寺為咗祛「火」，於是將「匕」改成「去」，取其「火去」嘅意思


寺內設置咗「信長公廟」，喺本能寺之變之後同新嘅本能寺一齊建造出嚟，𥚃面豎立咗喺本能寺之變戰死家臣嘅木牌同墓碑，當中嘅信長之墓並冇埋葬織田信長嘅遺體，只係立碑紀念，因為信長嘅遺體一直都係下落不明，冇人知去咗邊


境內除了本堂之外，收藏並展示信長相關物品與各種寺藏寶物的「大寶殿寶物館」也相當值得參觀

寶物館中藏有信長的畫像、本能寺之變前夜使用過的茶碗、森蘭丸的太刀，本能寺地址變遷地圖等，其中值得一看的收藏是一只三腳蛙香爐，據說本能寺之變的前夜，曾經發出鳴聲，暗示信長將會遭到危險！

另外仲有展示咗信長相關物品同各種寺藏寶物嘅「大寶殿寶物館」，例如信長嘅畫像、本能寺之變前夜用過嘅茶碗、森蘭丸嘅太刀，本能寺地址變遷地圖等等，大家有興趣可以俾入場費入去參觀


御朱印GET！嚟本能寺呢到最大目的係為咗佢嘅御朱印，我分別拎咗信長特別版同另一款通常款，信長嗰張我mark低想要好耐，上面印咗信長嘅水墨畫勁靚！但係我用佢現場支漿糊筆痴張朱印落御朱印帳痴到勁核突，想打柒自己



然後繼續出發下一站，行8分鐘到附近嘅「寶藏寺」，同樣地都係為咗佢嘅御朱印而嚟



寶藏寺
本尊：阿彌陀如來像
主要祈求：求子，安產


相傳為「弘法大師空海」所創立，後來喺1269年由如輪上人開基建寺，後來1591年豐臣秀吉為咗整頓市街，命令寺院轉移到現址，1864年又因禁門之變而燒毀，依家見到嘅本堂係1932年重建，寺內範圍其實好細，十幾廿步就行完成間寺院，除咗本堂仲有一啲小神社同祠堂




舊時喺京都市嘅錦小路經營果菜批發商「桝屋」的嘅伊藤家，以呢座寺院作為菩提寺，即係伊藤家嘅家族墓地，而活躍於江戶時代嘅畫師「伊藤若冲」亦都將父母葬喺呢到，出於呢一層緣分，寶藏寺保存住伊藤若冲嘅作品，例如「骷髏圖」同「竹間雄雞圖」，而且都有收藏佢弟弟「伊藤白歲」之作「羅漢圖」等好多「若冲派」畫師嘅作品，所以可以稱呢到為「宛如藏寶庫一般嘅寺院」


呢到最出名應該就係呢個骷髏骨御朱印，原畫係黑色，之後陸續出咗好多彩色版本，有種pop art嘅感覺




除此之外，佢哋其他嘅限定御朱印都好靚，如果想儲特別御朱印，呢到係幾值得嚟，不過就要上佢哋Facebook番意返營業時間，每日提供嘅御朱印都有可能唔同




御朱印GET！最後揀咗原始嘅黑色款，同埋另一款阿彌陀如來直書，嗚～好靚！

我都有本能寺張妙法直筆同埋書置
好撚有霸氣

DAY 16（27/3）續

行程：六角堂 ⮕ 本能寺 ⮕ 寶藏寺 ⮕ 六波羅蜜寺 ⮕ 清水寺

然後就要穿過鴨川去另一邊～


鴨川任何時候睇都好有feel


行大概20分鐘就見到六波羅蜜寺



六波羅蜜寺
本尊：十一面觀音立像
主要祈求：金運，財運


六波羅蜜寺前身係供奉十一面觀音嘅西光寺，於951年由「空也上人」為咗祈求祛除疫病而創建，據講呢座寺院同平清盛有好深嘅關係，喺平安時代，當時擁有至高權勢同極盡榮華嘅武士一族「平家」將此作為主要據點，喺最繁盛時期，有超過5200間宅邸位於其廣大嘅占地之內，後來平家沒落之時遭受戰火侵襲，除咗本堂之外皆被燒毀，雖然之後都陸續遭受多次戰火嘅襲擊，但受到當時權力者們竭盡所能嘅保護下，先可以將當年鮮豔嘅丹紅外貌流傳至今



本堂嘅左邊有一座本尊嘅複製神像，旁邊有一條刻咗六波羅蜜寺銘文嘅石柱「一願石」，上面仲有刻繪咗梵字嘅石盤，傳說只要心懷祈願，並將呢個石盤轉動3次，觀音菩薩就會實現你嘅願望


六波羅蜜寺嘅境內供奉咗2尊弁財天神像，大家一入門口就會見到「日本最古都七福神之一 」嘅字眼，第1尊「福壽弁財天」就安置喺𥚃面嘅「弁財天社」，「弁財天」係七福神中唯一一位女神，可以保佑語言、藝術、金錢財運方面



另一尊神像「錢洗弁財天」就安置喺納經所嗰邊，呢到又可以洗錢錢，將錢用神像前嘅水洗過之後作為護身符就能夠提升財運


境內仲有呢隻牛牛，身體有病痛或者疾病嗰陣，只要撫摸牛牛嘅的相同部位，就會有所好轉，所以我起勢摸佢喉嚨，祈求我嘅味覺快啲返嚟


本堂後面嘅寶物館內展示咗國寶十一面觀音立像、及藥師如來坐像、 空也上人立像、平清盛坐像等重要文化財，大家有興趣就可以俾600 yen入場參觀


御朱印GET！西國三十三所巡禮第十七番札所！


跟住就沿住清水坂上去清水寺，但行到去商店街嗰段路未諗過咁多人，可能撞正櫻花季同復活節假期，成條街係塞死咁，最後塞成半個鐘先上到去，so crazy


我2017年嗰陣都嚟過清水寺，不過嗰陣佢嘅清水舞台啱啱開始整修，如果唔係為咗想睇一次完整嘅清水舞台都未必會再嚟，見到咁多人有少少燥底



清水寺
本尊：千手觀音
主要祈求：學問，健康，結緣


清水寺由佛僧「延鎮上人」於778年創建，之後由「坂上田村麻呂」於798年建造佛殿

相傳喺奈良修行嘅延鎮上人喺夢中得到神諭，於是向北行走尋覓靈泉，喺音羽山中發現了一個清澈嘅瀑布，就將呢到奉為聖地，並結草菴供奉觀音，成為清水寺嘅起源，後來延鎮上人結識咗坂上田村麻呂，延鎮上人就勸佢唔好殺生，仲向佢灌輸佛家嘅博愛精神，被感化嘅田村麻呂將位於瀑布附近嘅宅邸改建為一座寺廟，就係清水寺佛殿的嘅前身

清水寺自創建以來嚟，曾經遭火災焚毀十幾次，但又喺屢屢重建之下維持創建初期嘅樣貌，但係包括正殿在內嘅大部分建築喺1629年嘅一場火災中被徹底摧毀，依家見到嘅建築物幾乎都係江戶幕府第三代將軍「德川家光」嘅捐贈下，喺1631年至1633年之間重建


呢個咁cute嘅神明係「出世大黑天像」，可以保佑金錢運同商業興隆


本堂可以除鞋入去參拜，不過太多人啦唔想入去迫



御朱印GET！西國三十三所巡禮嚟到清水寺就暫告一段落啦，今次一共儲咗6所，留返下次繼續！


今次嚟咁啱就到地主神社整修，預計要到2025年先再次開放


必影嘅兩個角度，雖然撞唔正櫻花同紅葉盛開，但係清水舞台就咁樣睇都幾靚，不過現場真係people mountain people sea，社恐仔有人群恐懼症，影完相即刻撤退



然後經過奧之院慢慢行返落去


就會見到清水寺另一個著名景圖口位「音羽之瀧」，呢到就係清水寺嘅發源地，亦都係寺院名稱嘅由來，由音羽瀑布流落嚟嘅泉水，被稱為「延命水」或者「金色水」，自古以來就被尊崇為聖水，泉水分成三道小瀑布流落嚟，分別代表三種唔同嘅祈求，右邊係「健康長壽」，中間係「愛情圓滿」，左邊係「學業有成」，據講只能選擇其中一道泉水飲用，否則你嘅願望唔會成真


最後就繼續沿住斜路離開啦，可能因為京都實在太多人，破壞晒成個京都嘅vibes，根本就冇得靜靜地專心感受周圍嘅環境，所以今日嘅體驗唔算好好，有種短期都唔想再嚟京都嘅想法

同埋我自己其實唔太鍾意啲神社寺院變得過度景點化，雖然有好多社寺都好值得大家去，但又好怕被大量遊客入侵，令到失去咗應有嘅莊嚴感，始終都係宗教地方，正所謂「入屋叫人，入廟拜神」，大家嚟到想影吓靚相冇問題，但起碼都要遵守規則，尊重返呢個地方


好啦，之後行去清水五條站搭京阪本線返去大阪


晚餐又又又又又係我最愛嘅超市


又一本御朱所帳完成


第16日完！

我儲御朱印嘅開端就係清水寺 我去個陣 奧之院個階級係坐滿曬人係度休息

呢到中途插入分享一個我上年11月喺京都挑戰嘅御朱印巡禮：「京都五社めぐり」
https://kyoto-design.jp/special/gosya



自古以來，人們為咗祈求地方安寧免於災厄，總會喺城鎮嘅重要關口設置神社或者寺院，令神明能夠前來守護居住喺呢到嘅居民，而古稱「平安京」嘅京都希望掌管四個方位嘅「四神」（東青龍、北玄武、西白虎、南朱雀）能夠守護京城嘅安寧，所以就賦予咗位在京都東南西北嘅四間神社相對應嘅地位

鎮守喺京都核心位置嘅係「平安神宮」，喺北方有象徵玄武嘅「上賀茂神社」，西邊橫越過桂川之後係象徵白虎嘅「松尾大社」，位於東山山麓嘅係象徵蒼龍嘅「八坂神社」，而南邊桂川同鴨川合流之處就係象徵朱雀嘅「城南宮」，呢五間同京都守護神有淵源嘅神社，就合稱為「京都五社」，五社加埋起嚟就係一個法力超強嘅風水陣，守護住京都，所以順利完成呢個御朱印巡禮嘅話，就等同於得到四神獸嘅保佑



收集御朱印嘅特定順序，可以因應自己行程選擇喺上賀茂神社、八坂神社、城南宮、松尾大社、平安神宮其中一間作為開始，例如我就揀咗第一站喺城南宮，首先要喺授予所買一張「京都五社めぐり」專用嘅色紙，價錢係1000 yen，當中就已經包埋城南宮嘅御朱所，之後去埋另外4間神社嘅御朱印就各300 yen，所以要完成呢個「京都五社めぐり」總共需要2200 yen


當你儲埋最後一間神社嘅御朱印，佢會送一個印咗五社社徽嘅書簽作為紀念品，如果你係每年前3000名完成「京都五社めぐり」嘅話，個書簽上面仲會印埋當年嘅生肖圖案


「京都五社めぐり」嘅御朱印巡禮唔算難儲，呢5間神社本身就各有特色同代表性，都好值得大家去參拜，大家有興趣又咁啱會去京都嘅話不妨試試

儲齊之後張色紙好靚好有feel

京都五社最麻煩個個係城南宮 雖然有巴士到但係極度疏落 用兩日會輕鬆D, 其餘四社交通相對好就

城南宮參拜完時間間隔大到去對面間松のや食完個lunch仲有剩

去35日會唔會太耐

lm

我嗰陣都係分開幾日慢慢去，一日要去晒東南西北好chur

我自己唔覺得吖
平均除開每個縣都只係stay咗3、4日左右，仲有好多地方想去但唔夠時間

咁當然要睇你本身鍾意去啲咩地方
如果冇嘢啱行，你去一日就會厭太耐

去咗探樓主

天氣好好

隔咗成個禮拜冇更新，唔知仲有冇人追緊

開咗po兩個月先寫到一半，希望唔好爛尾，盡量寫返快啲

me

我都係, 我都偷懶緊

我斷左兩個月咪又照寫，推唔番上去咁解姐

好想一口氣寫晒，拖得愈耐愈唔想寫

加油

等緊後半