行程：射楯兵主神社 ⮕ 兵庫縣姫路護國神社 ⮕ 姫路城
早餐
今日行程係姬路一日遊！由三宮站搭JR去到姬路站大概要40分鐘，一出站離遠就已經見到姬路城啦
不過第一站我先去咗姬路城附近嘅神社先，由JR站行15分鐘就嚟到射楯兵主神社
射楯兵主神社
主祭神：射楯大神，兵主大神
主要祈求：結緣，幸福祈願，結婚，森林守護
射楯兵主神社擁有超過1400年以上嘅歷史，神社名稱嘅由來係因為同時供奉「射楯（五十猛神）」同埋「兵主（大國主神)）」兩位大神而成，別名又叫「播磨國總社」
大約8世紀以前就已經建立祭祀射楯大神，直到927年神社合祀射楯大神同兵主大神，再後來喺1181年成為播磨國總社，後來因為豐臣秀吉要擴建姫路城先搬遷到現址，作為「家族神社」同「姬路城守護神社」而深受歷代城主嘅尊崇
身為播磨國嘅神社總社，境內供奉咗播磨國内合共174座大小神明，喺裡面就好似尋寶咁，周圍都會見到大大小小嘅境內社、末社、攝社等等，基本上咩範疇嘅神明都搵到
當啲旅客一窩蜂湧去姬路城嘅時候，神社呢到彷彿係一個世外桃源，未俾大量旅客入侵嘅感覺真係好～
影影吓花驚現小蜜蜂
喺神社周圍都會見到貓頭鷹嘅蹤影，佢喺射楯兵主神社裡面作為神嘅使者，代表知性同幸運
而神社最出名就係祈求良緣，係非常著名嘅戀愛神社，射楯大神係森林守護之神，而兵主大神就係緣結之神，佢哋兩個合而為一稱為「二神一光」嘅御神德
喺結緣繪馬上面會見到「51」呢個數字，日文嘅「51」同「こい」「来い」「恋」差唔多發音，所以亦都有結緣嘅意思
由南門正門大鳥居一路行，就有一條「緣結び通り」，因為喺呢條結緣參道嘅地面，有好多呢款刻咗51個愛心嘅水溝蓋
由鳥居開始數起直到本殿，直排總共有11行，代表住「いい恋いよ来い」，而打橫數有兩排，所以合共有22個水溝蓋，「1122」就代表「いい夫婦」一對好夫婦嘅意思
神社另一個出名嘅地方就係呢舊被圍住嘅「鬼石」，同鬼王「酒吞童子」的傳說有關
傳說中日本最強最惡三大妖怪分別係「酒吞童子」、「九尾狐玉藻前」、「大天狗」，喺平安時代中期，「一条天皇」命令「源賴光」討伐酒吞童子，源賴光就借助「賴光四天王」嘅力量，壓住酒吞童子嘅四肢，由源賴光使用名刀「太刀安綱」砍嘅酒吞童子的頭顱，後來成為「酒吞童子退治」嘅傳說同「童子切安綱」嘅由來
之後喺討伐完成返嚟，就將酒吞童子嘅頭顱埋喺呢到，並用大石鎮壓，就係呢舊鬼石嘅由來，而喺鬼石周遭嘅結界，亦正係鎮護同鎮壓鬼吞童子嘅結界，每年嘅除夕更會進行「鬼石の祓」嘅除厄儀式
御朱印GET！右上角有隻小小貓頭鷹
然後向大手前公園方向行幾分鐘，好快就到另一間神社
兵庫縣姫路護國神社
主祭神：兵庫縣西部地區12市、15縣之中嘅56988名陣亡將士
主要祈求：商賣繁盛，厄除
之前都有提過，護國神社係祭祀英靈嘅神社，而唔係傳統信仰嘅神祉，神社創建於1938年，係一座相當受到天皇皇后陛下賞賜嘅護國神社，因為自1960年計起，神社就收到8次來自天皇皇后所賜與嘅幣帛料同幣饌料
姫路護國神社曾經因係人們對於軍國主義嘅反感，而改名為「白鷺宮」，但隨著後來獨立之後，又改回原本嘅社名
喺門口入去已經見到地下鋪咗紅地毯，然後望真啲，裡面好似舉行緊結婚式
因為佢哋企晒喺本殿前面影相，所以就去唔到參拜，我都驚周圍行會阻住佢哋
但係機會難得咁啱遇到人結婚，我就行埋一邊睇咗一陣，一條友默默地羨慕人哋美好嘅婚姻，嗚～
行唔到入去神社裡面影相，唯有影吓啲花花草草
御朱印GET！最後拎埋個印就走啦
）
