大家好,如標題所言我係一個隱蔽左12年既殘疾廢青
我一直都唔想承認自己係殘疾人士呢個身份,所以我好拒抗同人講關於自己既野
但我今日決定行返出黎面對,想係最熟悉既平台講自己既故事出黎
除左係想求助,都想以文字去梳理自己想點
我係天生殘疾既,母胎結構異常,出世冇耐已經做左好多次手術
3歲前大部份時間住係醫院,醫療紀錄被笑稱成呎厚
手,腳有肉眼可見既殘疾,所以365日都係著長袖
有心漏問題,甲狀腺低下本來係要長期食藥
所以你會見到張白卡係器官傷殘,長期病患
阿源講過:我覺得自己係零
我就覺得自己係0.5
唔係數值上既高低
想表達既只係自己一半正常一半唔正常
活動能力大概係正常人既60-70%
從小就知道自己同正常人唔同,唔會有未來,唔知道點解自己要存在
想死但又怕
我唔會同人講自己既感受,因為健全既人再有同理心都唔會明白
俾人當怪物既目光係點,佢地唔係有惡意但每一次都係好難受
久而久之,我就封閉自己,就算係對住屋企人我都唔會講自己既事
好害怕其他人既目光,公開演講,企出黎面對人都令我好不安
我只想縮到最小彷彿不存在,發生咩事都只係想逃避
我係讀正常學校既,我前面講到咁,你地可能會以為我校園生活好唔開心,會俾人蝦
相反,我係大家既開心果,佢地寫俾我既信都係覺得我係mood maker,好笑,樂觀
我係有咁既一面,唔係假既但負面情緒都同時存在
一個人既時候呢d諗法就會出黎而我又唔會同人講
AL成績麻麻入左副學士,其實我唔知自己想讀咩就是旦入左個科
同時係朋友老豆手下搵左份intern
又同另一位朋友搞下d創作上既野
但原來我係應付唔到咁多野,新環境,新同學令我好不安
追數,追deadline既壓力,我係頂唔住既
開左學一個禮拜後既早上,好唔想返學
眼前每一樣野都好似一座座大山,我冇信心完成到
再一次我選擇左逃避
我去左薄扶林大口環海邊(附近間兒童醫院我細個住左好耐)
跳落去就咩都唔使煩
左思右想,最終都係冇勇氣跳落去
找不到自信面對,情緒又盪來盪去
唔知點樣去面對,我切斷所有聯繫,熄電話,唔睇msg
唔想同任何人接觸,呢個狀態持續左兩年
因為我仲呃住屋企人我係返緊學
所以我會去圖書館,m記,戲院hea到夠鐘先返屋企
食完飯就閂埋房門
直到兩年後要畢業我先同佢地講
但我都只係講我畢唔到業
每當提起呢個問題,情緒都會變得暴燥
佢地都冇再提喇,只係間唔中會叫我搵工
我好hea咁見左兩,三次都冇下文
呢個狀況又持績左一年
我會形容上面既狀況係我最差既時候
盡量唔出街,唔同人接觸
如無意外,呢個狀況會持續到今日
但意外既發生就係隱蔽既時候
我鐘意左睇akb48,佢地填補左空虛既心靈
而佢地將會開一場里程碑式既演唱會
我好想去
就係咁,我一個人飛左去名古屋
此後,我不斷去日本參加活動
自學日文,學習日本文化
直到2019年
會去旅行仲算咩隱青??
唔知大家點諗,但我的確係NEET,Not in Education, Employment or Training
呢段經歷雖然不足以令我走出黎,都仲係驚同人接觸
但起碼令我可以同人表面溝通到
係異國講非母語原來會冇咁大壓力
屋企係我既comfort zone亦都係comfort prison
偶而離開呢個地方,對我心情上都幾有幫助
同埋去旅行既日子充實好多,冇時間諗其他野
2019年後發生左好多事,社會好壓抑加上被困香港
唔止我,相信大家都唔好過
呢幾年,意識到身體愈黎愈差
手痛,腳痛多左,腸胃差左,甩頭髮,心悸....
今年年頭開始唔知係中covid定咩事斷斷續續咁病下好下
當我頭痛發燒左幾日,覺得好無助
諗起之前睇既一本書《 無緣社會》,深信我唔係孤獨死就係自殺死
控制唔到出生,至少可以控制死亡
係時候喇
一直都有留意新聞,邊度jump係最適合,最高成功率
親身去左幾個地方視察,已經揀定左邊一度
有左決定後,發覺做咩都係冇意義
唔想上連燈,睇yt,fb,打機
只有上兇宅網睇自殺新聞,從中好似得到d勇氣
寫好遺書
最後想同屋企人食埋最後一餐飯
清晨,係相對比較少影響到人既時間
人生最後幾個鐘
重睇左《 大隻佬》,種咩因得咩果
我係抵死既
訓左係床,又開始諗好多野
突然有個念頭,我係咪可以有第二個選擇
明明你有得揀
點解要逼到自己走投無路
咁你點解又要放棄自己呢?
我沒辦法
諗起屋企人,我當然知自己係負累
我走左,佢地會輕鬆好多
一直都係咁諗
一念天堂,一念地獄
當你負面既時候,你睇既所有野都係負面
佢地既心願可能好簡單
個仔係身邊就夠喇,其他野都係其次
就咁走左去唔係解脫,係不負責任
我想陪住佢地,至少唔好令佢地擔心
想改變,但我已經唔知點做
有一樣野係打呢篇文,回顧自己先發現到
大概係好早既時候已經有抑鬱既症狀
我都知以我既status有情緒問題係好正常
只係唔知道當時咁樣已經係抑鬱
一直以為自己控制到情緒
原來咁只係壓抑
不知不覺就打左咁長,多謝睇到尾既你
好猶疑係咪真係要po咁私人既野上黎但我知一定要變
大家有咩想問,想講,想屌,無任歡迎