[是咁的] 我喺加拿大住咗十幾年, 識到一個女仔叫Z..（2）

因為並唔係傳說中, 被選中嘅細路美少女變身勇救公主嘅故仔, 途中無經過任何波濤壯闊嘅冒險, 亦唔需要升level打怪獸刷神裝.

只係一條戇鳩仔、冰天雪地、盲中中四圍走.

然後死好命, 搵得返個公主.

所以救到Z之後,無出字幕、無黑畫面大大隻字寫住happy ending, 甚至連The end都冇.

因為我同Z嘅量子糾纏, 仲未捨得係呢一刻完結.

當晚Z全程車都冇講過點解佢會去咗Niagara falls, 亦冇交代發生咗咩事, 而我亦都冇問.

只係Z一句救命, 已經足夠我乜都唔理、放棄所有嘢狗衝入去救佢.

而人搵到, 睇落又冇穿冇爛, Z又冇提出下一步嘅要求, 咁即係任務完成.

至於原因,係呢一刻我冇興趣、亦冇需要知, 只要Z平安無事就夠.

當送Z返到佢屋企樓下, Z仍然一句說話都冇講過,只係落車之前好似有啲猶疑, 雙腳放咗喺車外嘅地下, 但人仍然坐咗喺乘客位.

我等左陣見Z都仲係冇講嘢, 就伸隻右手過去、揸實拳頭, 輕輕力揼咗佢頭頂一下, 講咗句：mission accomplished.

Z：哎吔！？...
由上車到落車, 成幾個鐘嘅車程終於聽見Z把聲.

我：使唔使我陪你上去？

Z背對著我, 維持著準備落車嘅姿勢, 擰咗擰頭.

我：你自己一個ok?

Z仍然係背對著我, 唔出聲.

.....

.......

.........

............

我：咁你有咩就call我？
成五分幾鐘冇人講過一句嘢, 感覺氣氛極度尷尬, 唯有搵啲嘢講吓..但講完就有啲後悔, 因為好似趕Z落車咁..

正當我諗緊, 應該再加多句乜嘢, 先會令Z唔好誤會我嘅意思, 但Z已經直接頭也不回咁樣落車、開門、上樓.

Z成個動作一氣呵成, 而我只能夠戇鳩鳩咁望住呢件事發生, 唔知俾咩反應好..

諗咗諗, 唯有安慰自己, 我識咗Z咁耐, 如果有嘢想講嘅, 佢一早講咗啦...佢唔想講嘅, 我點迫佢都冇用..唉....

望住乘客位、Z落車嗰陣唔記得咗閂嘅車門, 我就拎支煙出嚟, 諗住落車食支煙、順便過去閂門.

而且係揸車返屋企之前, 我真係要食支煙定下驚.

因為頭先由趕住入去搵Z, 到搵到佢之後又即刻接佢返屋企, 成個過程腎上腺素飆升, 到呢一刻望住佢入屋、肯定佢安全之後, 個人放鬆落嚟先開始覺得有啲淆淆地、對手又震震地...

尤其係開門擰轉身踩落地下個吓, 真係有啲腳軟, 爭啲又仆多次街...

話曬無牌駕駛仲要係烏鼠嘅狀態,畀差佬捉到真係可以洗定個屎忽, 入去坐完之後遞解返香港...

閂好咗乘客位道門之後, 就點著支煙、挨住乘客位嗰邊車頭, 吸咗幾啖之後見無嘢做, 就自然抬高頭, 望吓Z住嗰間屋.

點知我一抬頭, 就見到有個人影, 企咗喺隻窗口到隔住塊玻璃望住我, 嚇搵到我個心離一離..

好彩間房入面應該有開盞床頭燈, 我唔信邪再望真少少, 我隱約仲見到Z輪廓...

仆你個街丫, 想嚇撚死我咩..

我同Z互望咗一陣, 我唔知喺二樓嘅Z望落黎見到啲乜嘢, 但呢刻我由地下行返上去、係我眼中嘅Z, 真係好似一個係城堡入面等緊皇子嘅公主...

唔知點解個吓我有衝動, 破門入屋狗衝上去攬住Z, 捉緊住佢打十分鐘嘅茄輪, 然後咩都唔理拉住佢走人...

吓？走去邊？唔知㗎...

邊到都好啦...走咗先算...

不過亂諗咗幾秒之後, 我極速返返嚟現實, 然後爭啲笑出聲.

始終..Z係咪公主都好, 我都幾肯定自己唔係咩皇子, 而且仲係一條合法身份都冇、過得一日得一日、今日唔知聽日事嘅貧窮戇鳩仔..

我笑笑口用揸住支煙嗰隻手同佢揮咗揮, Z亦慢慢舉起隻手, 放在係隻窗上面.

到支煙差唔多食完嗰陣, 我就舉高手指畀Z睇, 用手勢表示我支煙食曬、同叫佢快啲去瞓覺.

Z望住我做完一大輪手勢之後, 就將原先放喺窗上面嗰隻手, 拉後咗少少、再同我揮一揮手, 跟住就轉身離咗隻窗.

我彈咗支煙出馬路, 上返車之後繼續望住Z隻窗, 雖然佢間房入面嗰盞燈冇熄過, 但我再坐多十零分鐘都唔見Z再出現, 就決定set返個gps,揸返架車畀T.

揸到上去T屋企, 我連車都未停定,佢已經衝出嚟驗屍咁驗架車, 又趕我落車仲聞下入面有冇味..

搞咗一大輪先黑口黑面坐喺駕駛位, 同喺隔離食緊煙嘅我講：聽朝早瞓醒覺, 齊齊去買份報紙搵工啦..

我：吓？你都要？

T啤咗我一眼：你話呢！？

我聽見T咁講, 即刻死狗mode：Er.... Sorry呀T哥..

T：屌你條友真係麻撚煩過人...喂, 你可唔可以企去車尾嗰邊呀？

我：都得呀, 啲煙吹入咗車咩？
我以為我啲煙吹咗佢架車, 就拿拿聲行去車尾嗰邊.

T：唔係呀, 我諗住入後波泊車, 順便撞鳩死你個仆街..

我：Er....咁有咩為呢...你要撞, 我實企定定畀你撞, 但撞完你架車又要整、保險出年又加價, 連間屋都變埋凶宅....何必咁睇唔開呢....

T：丫屌...

我：直接撞鳩我算啦, 無謂搞屎忽....

T：仆街仔串串貢丫, 睇你個死樣, 應該搞掂咗啦, 人冇事呀嘛？

我：人冇事.......
我答緊T嗰陣, 突然諗起Z孤伶伶坐喺長凳到嗰個樣, 硬生生將個“啩“字吞返落肚.

T冇為意我嗰句說話, 原本應該係問句, 就話：咁上車啦仆街, 我肚餓呀,陪我去買麥記..

我：哦...

係老麥Drive thru落完單等緊畀錢嗰陣, T問我：女黎㗎？

我：吓？oh, 係呀.

T：咁都好啲, 幾撚驚你答我仔...

我：丫屌...我同佢識咗好多年㗎..

T：識咗定食咗呀？阿C生你發音準少少好喎.

我：識咗、識咗、識咗、識咗呀屌你, 你耳仔窿生野就去睇泌尿科啦.

T：你老尾丫, 借埋架車畀你去搵女仲咁撚多嘢講.

我：Err.....

T：屌你老母,今餐你畀.

我：吓, 我失業喎..

T：好撚威咁喎？你覺得我冇份！？

我：有有...
我一路講一路拎個銀包出嚟數錢.

T：攞嚟啦！仆街！
T完全冇理過我感受,直接搶咗我個銀包.

正當我想搶返佢返嚟嗰陣, T再加多句：仲有呀, 呢單嘢我唔會同D講嘅...

嚇到我即刻停手：丫屌..咁我都係幫人啫,你要講我都吹你唔脹嘅...
唔係T講起, 頭先幾個鐘入便我真係完全唔記得咗自己條女D嘅存在..

T：係咪呀？咁我而家打畀佢㗎喇...

我：咁又唔好,而家咁夜, 冇謂嘈到人丫..

T：屌, 你隻淆底獸..
T直接攞咗廿幾蚊畀咗老麥個姐姐.

我：淆吓底就可以瘦, 我都想呀...

T：仲講丫仲講丫！？聽朝瞓醒我就打..

我：咁又唔好, D已經好瘦...

去買完麥記之後, T仲順便車我返屋企....

返到去已經成四點幾, 我阿媽畀我嘈醒咗就問：嘩, 衰仔你又去邊呀？又搞到咁鬼夜先返？

我就除口話：哦冇呀, 同咗T去篤波..

阿媽：玩到咁夜, 第二朝唔使返工咩？

我諗咗諗就答佢：唉...頭先同同事嗌交, 嬲得滯辭咗職啦...

阿媽聽見即刻吓一聲, 之後ee oror咗一輪, 到最後沖埋涼達上床嗰陣, 已經係五點幾.

瞓喺張床到攬住刻兔, 臨斷片之前用我最後一分力氣, send咗個message俾Z睇下佢瞓咗未, 叫佢起身打畀我.

但到第二日, 我瞓到成十二點幾先起身嗰陣,發現Z完全冇覆過.

因為失業嘅關係, 之後連續幾日, 唔係落咗去搵D、就係留喺屋企同T打FF11, 有時得閒無聊就行過去搵LL大人食煙吹水, 順便買份報紙搵下工.

但每晚臨瞓前, 我都會諗起Z望住我個身影.

然後會問自己, 其實當時, 我係咪真係應該衝入去拉佢走呢？..

可惜呢個問題一直都冇答案..

因為之後成個禮拜,我每晚都有send message俾Z, 但佢一直冇覆過我.

係咁嘅情況之下, 我又唔好意思打畀佢, 因為我唔敢肯定, 佢想唔想聽到我把聲..

唯有靜靜地等佢搵我.

然後.

係不知不覺間.

Z再次消失係我生命入面...

~~~Z故 公主與MK王子篇完~~~

第二部完結

又可以藉啲意蛇王唞返幾日

ender lilies好玩！啲音樂勁好聽

我一個都唔識分

講起雙魚座, 我淨係記得十二宮入面最撚廢、淨係識鬼鬼鼠鼠攞支玫瑰花去拮鳩人嗰條友...

（你唔係第一個人鐘意呢味）



我冇話過我鍾意啲呢味呀

明㗎喇

有時係講緣份既…..
我都試過明知一個人會出現既時間同地點
都見唔到佢一臉

究竟呢啲係咩關係

Z事無大小都即刻搵你

你聽到一句救命即刻飛去搵佢（除左K果次啦仆街仔）

但你又得閒換女屌靚西嫁喎

真係唔知係你做兵定Z做兵

巨蟹都好易分
特別麻撚煩，乜都唔講出口一定要人估佢個心諗乜

？？？？？？？
咁最後知唔知嗰晩咩事…

係囉, 睇咗咁耐, 有冇人話到畀我聽？

時間線幾年之後會知

Simple and clean
Kingdom Heart 1首歌
已經唔係有無品味咁簡單，而係揀Z睇你打既game首主題曲

之後要幾年後先再聯絡？

我到而家, 都仲係用緊simple and clean呢首mp3做ringtone, 只係唔同年代唔同版本嘅remix

再聯絡嗰陣你咪知囉

會唔會遲啲知埋點解救完佢之後佢單方面斷你聯絡

快D出post pleaseeeeeee!