(七十)
新郎哥所謂蟲化身解散消失,元神了哥就同一時間出現,此奇景對Raydon而言大概早有預料,他沒有放低過手中酒瓶,繼續為下一位劍俠斟酒,排除一下席上人物,估也估到,就是斟俾客人了。
客人無舉杯,反而一手蓋住杯口,說道:「我知道我應該要飲酒,但未滿十八歲飲酒觸犯法律引發青少年模仿,挑戰社會道德底線㗎!」
Raydon溫柔一笑:「唔係啵!香港賣酒俾十八歲以下先犯法啫!我無賣啊。」
客人一個陶大宇拍額頭,哎呀一聲,終於舉杯接酒:「原諒我啦!我有病㗎,我自閉啊!我唔轉彎㗎!」
「唔係咁講法㗎,『唔同』同『有病』係好大分別,有一種諗法叫做神經多樣性,你同我嘅大腦都唔同,但唔同咪唔同囉!」
Raydon沒有即席講書向我們延展神經多樣性的意思,我又不是讀精神心理腦神經,當時也是似懂未懂,後來在星間遊歷久了,見識多了,才發現有時一個人頭腦病不病,原來除了是醫學問題外,還是一個社會問題,我見過一些文明發展到某個程度就開始以自我放逐的形式散播,每個個體都有充足資源深入星空獨自開發一個恆星系生活,沒有他人,那就沒有正常人與奇怪人了,其實劍俠也算是自我放逐文明的一例,不過都是一句,日後講我的其他故事時再傾。
客人望住酒沉思,說道:「我知道飲完酒就要測試我係咪好人啦!但我都應承咗我嘅好朋友剃頭啦!」
「唔準剃!同我生返啲頭髮呀你!」我最害怕的神仙Tina插嘴了,新郎哥解散身體,那我就變成坐她旁邊那位了,她無情情開聲,我都咪話唔心驚!「如果你剃咗頭,元神無咗,點知你係咪好人?」
客人說:「身體我唔要啦!敬請童女你還俾Mandy啦!唔該!」
一提到Mandy,細蚊仔也和我對望一眼,Mandy說無話想再見返他,雖是狠話,但也的確太狠。
「只爭來早與來遲,我係要知你係咪好人。」Tina說話高深,我聽得唔係好明,但她後半句捉準了客人的思維特徵,可謂高明:「況且你應承我地在先,應承人哋在後,你唔係好講原則咩?」
「既然你咁講,我都要做守信用嘅人啦!既然你咁講,我都要做守信用嘅人啦!」客人想一想,開始口嗡嗡幾句,然後同我講句:「對唔住啦!我要測試係咪一個好人啦!不過我用咗劍術,都一定係衰人啦!」
客人說罷閉眼把酒吞,我想叫也叫不住,突然他身體一軟,頭就「碰」一聲叩了在檯面,與此同時,客人那紫紫藍藍的舊人頭就開始眼仔碌碌,客人的舊身體雖然一度在清涼山雪藏,但現在應有少少解凍,那無頭屍體的手臂滴住雪水,緩緩把檯面自己的人頭推前,我才留意到原來頭下有個小小蒸魚鐵碟,用來防止融雪時的血水整污糟檯面。
這時細蚊仔把他的叮噹百寶缽放在客人朋友面前的檯上,客人朋友講聲唔該,就站起身把自己連住一副腸胃的頭垂直放入缽中,因為缽本身無底,就剛好收納了她的臟器,只留下女仔的人頭托在缽上,她也學客人的動作,把自己的頭推前,並與客人的頭拍埋一對,無頭身體才坐下來,主動牽住客人的手。
細蚊仔本身坐在客人朋友與心師Raydon中間,他先把自己的櫈挪前,為他師傅讓出空間,Raydon站起來,手中已有兩支筷子,走到兩位無頭屍體的身後。
這時天上又有三隻自來麻雀,降了在Raydon沒有站了哥的另一邊肩上,沒有吱吱叫,很乖,六條魚的故事,這次故事篇幅有限,怕長氣到二百回都未說完,所以只為你說了一半三條魚的事,這時才出現的三隻小麻雀,背後大有故事,也只能暫且不說了。
Raydon左右手各一支筷子,開始各自敲打在兩顆人頭上,尊重返傳統,又開始唸口訣:
「天地有常不問心,廣寒生養忠奸人,
人有常體不常有,胸懷布戟眼難分,
心思廟藏深思經,拜經心師問心事,
無事不登花徑殿,有問必答蓬門僧。
靈台鎖開見青天,不畏人知畏心師,
平生不做虧心事,半夜敲門也不驚,也不驚!」
兩人的額頭同時發出「卟」一聲,眉心都彈出了紅漆小門,Raydon口咬一對筷子,然後兩手從頭的後方繞到紅門處,手指把兩道門揭開,兩道門分別立即瀉出一條紅線,兩邊的線頭像是有意識一般互相伸索,接觸,然後融合成一條線,將兩顆人頭連接一起,懸在兩臉之間,像道紅橋。
我見到紅線,想起阿慧,真是咩心理陰影都出哂嚟,之前因為我唔識,做多了場冥婚,才令新郎哥與阿慧的紅線連起來,而客人與他朋友這一對,看來還是中學生年紀,斷估未成親,但紅線竟也連起來了,兩小無猜,究竟又有過幾深刻的經歷?
Raydon把筷子取回手上,開始伸向紅線橋捲纏繞,這時全檯人……說錯!全檯仙佛鬼神,都在留意Raydon手中動作,他兩支筷子互相穿梭,有時一根筷子離手,在線陣中滑翔,又流動到另一隻手上去了,流暢程度比得上織布機,過了一陣子還真是織出一塊紅布來!
我自己已見過Raydon開腦一次,細蚊仔開腦一次,但都是心師正對著人頭做的,這次Raydon在人頭後方表演勾線織布,我衷心佩服心師的能耐。
Raydon突然一拉筷子,失驚無神,客人的頭開始講出一句嘢:「女同學,你唔可以唔食學校飯盒啦!學校營養豐富!有助身體發育啦!西蘭花富含維他命K,有助減輕老人痴呆症啦!」
再拉筷子,客人朋友的頭莞爾一笑,又回應道:「我又唔係老人家!」
接下來隨住心師拉線,兩人心思裡珍貴的回憶就這樣被一句一句拉出來了。
「哎呀,老人痴呆症係俗稱啦!即係腦退化症啦!」
「哈哈!你講嘢咁好笑嘅!」
「我有病㗎,我係自閉症病人啊!」
「嘻嘻!咁啱嘅!我食嘢會唔舒服,係厭食症病人喎!」
「厭食症病人都要食野啦!吸收營養度過健康每一天啦!小烏龜,食得慢!一粒飯要食三餐!小老鼠,愛偏食!」
「知啦知啦!下次無咁多人先唱我聽!你呢?今日有咩食?等我睇吓你帶咩愛心飯盒先!咦?……咁得意嘅……成盒都係雜豆嚟嘅?」
「係啊,三色豆經過立即雪藏,保存住豐富營養啦!」
「但係仲凍架喎!」
「琴晚開始解凍,已經接近室溫狀態啦!媽媽要返大陸半年,拜觀音,我唔識開爐蒸熱吖嘛!」
「吾……最多咁,我肯食嘢,但我食唔到訂飯,你肯唔肯同我交換食?我想食豐富營養嘅雜豆多啲。」
「無問題吖,如果你食到三色豆,我聽日都請你食三色豆好唔好!」
「啊!唔洗啦!聽日我整嘢食帶返嚟,整埋你嗰份吖,你鍾意食咩?」
客人與他朋友你一句我一句,我聽得入神,然後心師剛好織完大塊紅布,動作停止,這段對話就告一段落了。
我眼淺,打個冷顫,流出了眼淚來。
一次魯莽駕駛,又害到一對小鴛鴦,我呢個害人精。
Raydon把筷子變走收回,並把兩對角連住紅線的一塊紅布蓋住兩顆人頭,布下立即滾出一隻翠綠小球,看真一點,是一隻相思雀,他把相思雀放取在手心,回到自己位置坐下,再遞給至他旁邊的魚師Tina面前,解釋道:「佢地兩個心心相印,元神解唔開兩個,所以Tina你可以一次問哂兩位啦!」
Tina點頭,開口問道:「兩位小情人,你哋係咪好人啊?」
相思雀不是了哥,只是唱起了鳥語來,沒有講人話。
Tina把耳仔豎埋去,點頭聆聽,然後說:「哦,你兩個做得幾好啵,好,兩個都100分!」
兩個都100分?客人不是有放劍,所以不是好人嗎?
這時被紅布蓋住的客人開口搭嘴:「吓?但係我向天使叔叔借劍,飛龍灣斬咗好多遺民,又親自放過斬裂劍,煉劍做唔到好人,罪大滔天,罪大惡極啦!」
Tina一邊用手指撩相思雀的肚仔羽毛,一邊托腮答道:「我要你哋做好人,好人咪係好人囉,你諗到咁複雜嘅?」
此時心師Raydon再對客人的頭補充說:「好人定壞人,都係自問本心。」
聽到心師魚師親自揭曉甚麼是好人,我才回想起師傅都曾經試過點醒客人一幕,好人衰人,答案從來無變,只係人心複雜,鍾意諗埋一邊:
「唔煉啦!今世講過要做好人。童女話我已經令佢失望過一次,今次最後機會啦!雖然我都唔知自己幾時令佢失望過第一次!」
「學下啲濕鳩天仙吖嘛,四圍游吓吽吓,你自己都知天大地大架啦,煉劍唔一定衰人嘅,唔同人過唔去咪得囉!」
「你講咁易咩!文殊師傅!我一煉劍,師子蟲就會開始殺人架啦!」
記憶一旦勾起,又鬼咁清楚,我開始錯哂重點,留意到客人佢最尾一句,一煉劍,師子蟲就會開始殺人?
唔係掛,唔通香港地要開展一場劍俠鬥劍?日日都好似飛龍灣同廣華醫院咁?死咗好多人之後,就全部換成鬼?
我的分心走神很快就遭打斷了,因為Tina開始發落判決,我也十分緊張。
「咁我哋唔會變返你哋做魚啦,你哋想投胎做人,定比文殊師利剃頭,隨你哋心意啦!」這時她望了一眼細蚊仔,細蚊仔立即會意,走去扶起客人剛才軟倒在檯面的鬼身體,並打開鬼口,相思雀便從Raydon手中飛出,鑽入鬼口中。
鬼身體又重新活動起來了,我沒理解錯的話,相思雀是客人與她朋友合二為一的元神,現在送入客人的鬼身體,咁點稱呼佢哋好?
故事都快完了,接下來還是照舊叫做客人吧!到我上場了吧?兩位飛髮定剃頭?今舖為了客人東奔西走,請一定要揀剃頭啊!