[廣東話/都市懸疑/本土典故]落地開眼見劍俠 （想追故請俾負評）

中午推

補充返，一般鬼無元神用唔到劍術，但男主角用閻摩降斬自己，有齊元神軀殼，所以用到，至於客人，唔知用唔用到呢

附圖解香譜，催命變大天真：

收工推

再推

早晨推

推

我未寫過小說，唔識寫好小說;但睇過唔少，只識分好睇唔好睇。

優點就係廣東對白最生鬼，粵語寫得最好睇。

前面鋪排太長太沉，十幾章都未入直路。唔知寫緊乜? 冇驚嚇冇懸疑。除非係名家，或者實體書，會忍住睇落去。連載駛忍你?頭三章唔啱就走。

知你好多資料，事實啱用得嗰2-3%。唔需要一次過撻晒出嚟，慢慢因劇情分佈每個章節，陰啲咁展開世界觀。畢竟睇緊小說，唔係百科全書。直接睇百科全書唔好?態度認真唔代表故事好睇。

累贅臃腫：下下對話都要動作表情，心理活動。魯迅講：提煉最重要細節，一二句描寫咪得。

打幾招都要幾百字，一秒拉長到成個世紀．一秒可以講到咁多嘢? 打得唔夠爽。節奏過慢，應快就快。心理描述，策略戰術，打完再講啦。

語言笨重：主詞出現過，後面毋須再指示，一段內＂我＂字重覆咗4，5次。唔夠流暢。太多長句，沒層層遞進嘅語感。

啟章鋪排太多，唔吸引，新讀者睇到4，5章就會走，家下都係靠食老底班讀者支持。

推
返晏，幾時打風

收工推

再推 好眼瞓

收工再推

（五十一）

我拖住客人入屋，伯母鬼跟住入嚟，轉身閂完門，擺低佛經機係門邊鞋櫃，就好有目標咁跟住血路走入門邊廚房，同透明鬼一人一邊，各拖住伯母無頭屍身嘅一邊手臂，拖到一張綠布黑骨的露營摺櫈前。

伯母鬼坐上去，又把起自己條屍摟係大髀上，這時透明鬼又在廚房捧住伯母的頭出來，交到伯母鬼手中，我睇唔到咩第二個維度，淨係見到個頭飄住出嚟，劍俠斬下的頭都是開眼的，而且仲會望住仇人，客人借劍開殺戒，伯母個頭都識冤有頭債有主，眼珠追住笠住膠袋的客人望。

這時伯母鬼將自己個頭舉至無頭頸上方，用中指無名指尾指推推個人頭下巴，竟然就識開開合合，唔知佢點做到，佢係屍體後面出聲，好似同木偶配音咁講嘢：「咦？發生咗咩事？呢度邊度？」

我未開聲，客人又一手拉走自己膠袋，即刻講話：「媽媽！我死咗啦！你唔好傷心啦！」

「吓？哈！哈！」伯母鬼嘅手明明已經忙住扶頭，無頭屍對手竟然識得凌空自己拍手，真不知是另有原理還是透明鬼在幫手做動作：「你條安信契弟，攞完債啦咩！」

又係食字，乜今晚啲人咁鍾意講爛gag！

「你個仔嚟㗎！八婆！」而且我嬲到彈起，個gag就算唔爛我都笑唔出。

「咁佢唔係嚟拎債咩！佢弱智㗎！讀特殊學校㗎！呢世人無出色㗎！」

「我係自閉症啦，但慧姑娘話我唔係弱智㗎啦！我智力正常，輕度都無！」

「仲出聲！你條闔家鏟打靶仔啊！」伯母雖然全新型態，造型Cult爆，我都唔識分叫唔叫做真伯母，但佢講嚟講去都係三督屁，我完全無興趣同佢斟，如果唔係佢個屍體本來斷頭，我早想衝動放劍了。

沒想到這時師傅遙距出聲幫口：「邊個拎債都未知！文殊面前仲咁搶口？」

這時我的褲袋一沉，我伸手摸一摸，原來師傅派了大師兄閻摩降來傍住我。

伯母眼珠盯住客人，臉的方向又隨住伯母鬼的控制轉向對住我，幾鬼恐怖，不過呢啲感官野我都一早麻木，這時佢又下巴郁郁：「文殊菩薩？」

我捉住褲袋的剃刀，見閻摩降如見文殊，咁就答得理直氣壯，「係啊！飛髮定剃頭？」

美治！我好似兩樣都唔係好識做！

「吓？飛髮剃頭有乜分別？」伯母問的問題和當初我踏入理髮舖問的問題一模一樣，我差啲想答佢幫襯就飛髮，搵老襯就剃頭！

這時伯母再問一句：「文殊菩薩！我到底係生係死？」

就係呢一個時刻，三件事接連發生咗，第一，不知是否透明鬼攪事，由我拎實的佛畫突然彈跳脫手，跌在地上順勢攤開，正對住伯母，伯母鬼手將頭面向地上佛畫，因為眼珠仍然水平盯住客人，眼珠一下子上藏，就只有下眼白露出來。

第二，伯母鬼放在鞋櫃面的佛經機突然打開，播起那個講故仔的電台節目。

生人聽到南無阿彌陀佛，死人都聽到南無阿彌陀佛，而唔知自己生定死嘅傻佬傻婆，就會聽到人講經講故⋯⋯

「話說吳王轉世拜文殊師利為師，為死人剃頭，遇著佢仇敵干將嘅現世惡母，為解開惡母同干將嘅宿世孽緣，吳王借相南無阿彌陀佛，勸惡母放低仇恨⋯⋯」吓？聽到我一嚿雲！

第三，佛畫向上升起，擋在我同伯母屍體之間，此時我明明沒有開口，卻從喉嚨底傳出了聲音：「舍利弗，若有人，已發願，今發願，當發願，欲生阿彌陀佛國者。是諸人等，皆得不退轉於阿耨多羅三藐三菩提。於彼國土，若已生，若今生，若當生⋯⋯」

隔住畫紙，我只聽到伯母開始念佛，不停在唱「南無阿彌陀佛」，跟足佛經機嗰個Tone。

呢時佔據我喉嚨的聲音又問：「盲女，飛髮定剃頭？」

「飛髮！我仲想要輪迴下世報仇！」

「好地地念佛往生，報咩仇？」

「師子蟲林撲殺咗我個仔李承慶！」

「李承慶？高麗人喎！十九幾世啦！咁你知唔知李承慶今世去咗邊？」

「我想知！我想知！南無阿彌陀佛！請話俾弟子聽！」

「佢變返你個仔，但你生佢唔出，先至上五臺山求多個仔之嘛！咁你知唔知師子蟲林撲今世去咗邊？」

「林撲係度！佢就係呢個白痴仔！」

「咩林撲！佢係你個仔喎！白痴婆！」

呢時客人摸住自己耳仔，在我旁邊開始原地跳：「唔準鬧我呀媽！唔準鬧我呀媽！唔準鬧我呀媽！阿彌陀佛都無情講，阿彌陀佛都無情講！」

這時我已放鬆身體，任由那把聲音自由發揮：「一個仔無咗，另一個乖仔你唔要，宜家兩個仔死哂，你又死埋，一拍三散嚕，你鬧自己個仔闔家鏟，你咪心想事成囉！」

「南無阿彌陀佛！可唔可以講多次？我個仔死咗？」

「頭先你個仔咪講咗囉！你從來都唔聽自己個仔講嘢㗎？」

「我以為佢特登講嚟激我㗎咋！唔好啊！唔好啊！」伯母突然聲音變尖，喊了出來，「我個乖仔啊！心肝寶貝仔啊！我成世人得返呢粒仔㗎咋！無陰公啊！個天好仆街啊！」

佛畫失去了懸浮的力量，一下跌落地上，我見畫紙正中空白一片，只留下伯母兩行藍筆字，唯獨不見了畫在上面的阿彌陀佛像。而那把借我口講嘢的神秘聲音，就再沒有出聲了。而那神神經經的佛經機，則恢復正常播返南無阿彌陀佛。

客人一支箭衝上伯母膝前，抱住伯母對腳，搖啊搖：「媽媽唔好喊啦！我一定會好返架啦！我聽話！我跟你念佛經啦！南無阿彌陀佛！南無阿彌陀佛⋯⋯」

伯母對眼珠下垂望住客人，她的斷頭在哭泣，表情沒有，倒是流淌住血淚兩行：「仔啊仔⋯⋯唔洗念佛啦，啊媽對你唔住⋯⋯啊媽念經都無用啦，一定菩薩都唔收！」

菩薩？美治！

「伯母！飛髮定剃頭？」我拎出剃刀閻摩降，放置在掌心。

「菩薩我想剃頭，我唔想下世再做一個壞媽咪啦！」

我點頭，拋高閻摩降，唸道：「請寶貝轉身。」

劍光一閃，剃過了伯母屍體頸身之間的空隙，也剃斷了在扶住人頭的伯母鬼頸，回到我手，伯母鬼頭落地往後滾開，而本來的斷頭則落地向我滾來。

聲先劍後人方至，落地開眼見劍俠，伯母的雙眼望向我，面帶微笑。

呢時外邊傳來敲門聲，又不停按門鈴，我嚇一驚，嗱嗱臨叫客人用膠袋笠返個頭，點知唔聲唔聲嘅透明鬼就已應機開門。

門後面企住一個眼仔精靈的年輕女人，我睇個真，原來是沒有黑眼圈的伯母鬼，簡直容光煥發，後生咗五六年。「師兄，師妹同你打聲招呼！遲啲見！」

我吽吽哣哣，手中閻摩降一個彈起，就帶埋伯母⋯⋯就帶埋呢個自稱我師妹嘅女人走咗去。

我同呢個師妹嘅故事，有機會你睇到我經歷明妃劫嗰時就會知，不過宜家呢個故事始終係一個懸疑故事，要講緊生同死，講太多兒女私情就唔太啱channel，學你地連登仔講句，有人想知再講，哈，摟打還摟打，唔好屌我老母，飛你劍㗎！

上期更疏咗，誠意加速，原諒樓豬慢啦

推

推

推

推

中午推

再推

推

多謝幫推

（五十二）

惡母劫都解埋，相信客人都了無遺憾啦！大師兄飛走先，我估都係返去理髮舖。咁就要返去先可以同佢剃頭了。

「其實你無病架。」我沉思一陣，總結咗句。

「你講咩啊！我有病架，我有自閉症架！」

「但剃刀閻摩降斬人會醫返好個人，你理髮舖斬完你一次，缺氧都變返青靚白淨，我又唔見你行為講嘢有咩唔同，你病係邊？」

客人不出聲幾秒，才講：「多謝你啊！遇到好人講好說話我一定要多謝啦！」

我笑一笑，真係無氣。

跟住我問客人準備好返去剃頭未，仲心諗會唔會一陣又有個客人鬼彈出叫我師兄！諗諗吓客人個tone都覺得好笑。

「我仲有件事好心急啦！」

仲有？

「你仲有咩事未完成啊？」我都洗濕頭好耐，唯有咁問。

「我個朋友唔知有無事啦！佢有厭食症架，如果住院會食唔落醫院嘢啦！」佢個朋友？我估來來去去都係佢個莫邪啦，宿世阿媽搞掂先到個宿世女朋友，唔知讚唔讚佢孝順好。

「⋯⋯你心急唔早講？」

「一件事做完先做下一件事啦！」

唉，有時真係唔識同佢溝通。不過緊要事情始終要辦，我想起我另一把玻璃劍，雖然話放劍殺人有獅兄睇住，我係飛龍灣呢度夠唔係直接殺人，結果就害死人地媽媽，諗到呢點，我都幫客人心急一份。

「咁佢會係邊？」

這時一把熟悉聲音插嘴：「廣華醫院啊！俾你害嘅人全部都係廣華醫院啊！係咪飛髮舖哥哥仔啊？」

我聽聲就認得，是上一位客人，為了有個區分，就叫新郎哥吧！新郎哥把聲講嘢十足劍俠架勢，這時我看見一隻青藍獅子從外面跳上露台，與我們隔住塊落地玻璃門，我都不是第一兩次俾劍俠斬，危急關頭諗嚟嫌命長，拿起一片玻璃劍就拋，叮噹一聲，新郎哥現身，手中拿住師傅把獅子鉸剪，夾住我把玻璃劍。

「仆你個街！鬥劍還鬥劍，咪亂用地獄劍吖！」新郎哥滿腔怒氣，態度惡到完全唔係我地上次告別個樣，我以為認錯人添呀！「呿！」新郎哥隨手一搖手中鉸剪，玻璃劍就回到我手上。

「勾踐出手，我唔夠快口，勾踐出手，我唔夠快口啦！」客人救我駕遲咗，似乎好激心，我未知獅兄咁多典故，又點知咩越王巨闕水石蕩！點估到師父把飛劍會聽新郎哥支笛！

我只知我又吳王，原來新郎哥又係中學教科書臥薪嘗膽嗰個吳王勾踐，六國大封相咁款！客人又講：「佢係呀慧個男朋友啦！中心見過啦！佢煉劍，群埋損友做師子蟲！衰到貼地啦！」

我想起了哥話自己正一衰人，衰到貼地，嗰陣時我唔知自己拍緊蜀山劍俠傳，點知衰人係煉劍咁解！

「自閉生壞腦啊？睇過！」新郎哥走向客人，一手捏住客人個下巴，無厘禮貌。「哦，鬼嚟喎，唔怪得，你好哋哋剃咩頭！仲報唔報仇！」

「我要做個好人啦！學會放低仇恨啦！唔怪佢害死我媽媽啦！」

「咁你條女呢？我就無你咁廢啦，佢害埋我老婆！」新郎哥轉頭望住我，木口木面又眼神定定，唔洗日式劇集奸角嘅誇張顏藝，就係咁樣平平靜靜嘅表情，手拎住把鉸剪，口講血海深仇先至最痴線。「喂！你害我老婆啊！撚樣！」

我語塞，新郎哥一定係講呀慧跳樓單野，係嘅，係我多事同佢哋冥婚。

客人原地彈跳，大叫一句：「啊！弊啦無啦！唔好害我朋友啦！」

新郎哥捉住客人個頭，Chok一Chok，客人不停掙扎：「咁擔心，去一轉廣華醫院囉，睇完再諗下剃唔頭！唔剃再同你計做二五仔要點發落！」

我唔聲唔聲準備身後偷拋高玻璃劍，新郎哥又咩都知，鬼咁警覺，手指串住師傅把飛劍鉸剪轉了一圈，對我講：「想返去搵師傅啊？童女知道你到宜家仲咁心狠手辣，唔知道悔改，連呀慧都唔放過，就帶住碗膶粥去搵你師傅，魚師娘娘要幫我出氣，你走埋去我怕你提早投胎啫！」

新郎哥出師有名，我就好心做壞事，咩氣勢都無，況且佢識劍術，我識條毛，客人又唔夠佢快，我都無渣嗱去鬥嘴，唯有死口唔認：「無啊，我心急想去廣華醫院。」

「好啊！Mandy你話同意返去廣華醫院架！我哋行先啦！」新郎哥一拋獅兄，就帶住客人消失無蹤。

又講Mandy！我係我自己！唔係嗰個Mandy！

卡稿頹咗一陣，好彩推到

推～～～
樓主仲係咪度？

係度 想寫好啲先出
好多謝你打氣