[廣東話/都市懸疑/本土典故]落地開眼見劍俠 （想追故請俾負評）

推

推

好睇！！！！推！支持樓主

再推

幫推

刷牙推

如果新讀者想了解多啲背景故事，可以睇埋魚師故！

劍俠豬
魚師豬

魚師整野食

連登版
https://lihkg.com/thread/2273887/page/1

Penana版(改咗錯字及Bugs)
https://www.penana.com/story/82094

（三十五）

我拿起玻璃劍，想要飛走，既然無人在旁，個心鳩鳩吓，想試是旦唸咒語，於是心想住回去飛髮舖，又學周星馳電影，單腳跳起，叫聲「天外飛仙」，結果我仍然身在原地，無事發生。

唉，睇來老實跟返師傅指示做吧！仲有，唔知放火燒咗一座山會唔會俾師傅省一鑊，唉。

「唔係啊，你咪咁急先！」我唸完天外飛仙，就開始聽到吳王出聲，都係講廣東話。「你漏咗九把地獄劍，一把係原來嘅劍，八把餓鬼劍，計埋你手上面果把，一共十把，要執返齊佢。」

我雖然唔理解吳王殺咁多人嘅動機，但未左膠到要同前世自己打對台，吳王想我執返另外九把劍，我照理執返也無損失，但點解要執返呢？我好奇。

「呢九把劍都認你主人，但你擺底唔理，隨時自己飛走，遲吓俾人打撈走好唔抵。」

打撈走？即係俾其他劍俠或者師子蟲執到咁？

「一來啦，不過最大機會係俾人打撈走。」吳王不藏私，由得我呢個劍俠小學生問問題。

咁究竟咩叫打撈走？

「外面好多嘢唔係劍俠，但佢地會將飛劍裝係飛船核心，可以用嚟做星間旅行，發射星間炮同做超遠程通訊。」哇，一下轉咗科幻台喎！

我想知更多，這次吳王就催促我了：「你個師傅同客人唔係等緊咩？」

係！我不敢再拖，立即搜索九個自己屍體的口袋，集齊十把劍，十片玻璃一式一樣，我沒有用心去記哪把是哪把，但偏偏心中有數，大概因為自己就是劍主的原因。

這次我正式補習落堂，可以同這個大雪房講byebye了，我講聲「請寶貝轉身」，吳王的聲音又出現，笑我點解唔講「天外飛仙」，飛劍旅程一剎無窮，我的身體沒有時間面紅耳熱，但心中覺得自己又柒一次。

我趁機追問吳王點解佢要同師子蟲鬥劍，吳王話外面有無盡咁多劍術派系同觀念，我跟文殊學劍，就淨係受限於文殊果套觀念，我問吳王咁佢觀念係乜，佢唔答我。

下一剎那，我又來到了理髮鋪門外，心事重重。

理髮舖門邊的白藍兩色花柱不斷轉上，我順住抬頭望望舖頭招牌，招牌白底藍字，寫住「上海街理髮」五個字。

我覺得心事重重，是因為一個問題解決，又有更多疑問產生，我出發時借師傅飛劍，宜家用自己飛劍飛返嚟，前世今生都夠複雜，咁星河宇宙、地仙天仙，六道劍、師子蟲同吳國遺民，又係想點？

而我呢刻最困擾係，究竟六條魚係咪一開始就知自己千鬼淵源？咁六條魚入面有幾多位係師子蟲？

至少我知道客人係師子蟲干將再世，我害過佢家破人亡，佢又害返我，今世到我再害佢，炒車炒到佢一面紫藍咁辛苦缺氧死。

密密更密密更，情人節煮完飯事頭婆食就開始寫故，錯字細bug要原諒我

早晨推

中午再推

夜晚推

推

live 左推一推～
估唔到咩心事，同Mandy 有關？ 有冇提示？

（三十六）

我推開理髮舖門口，門鈴叮噹作響，我順手把玻璃劍收進褲袋，不拍拮腳，我就暫時左右每邊袋五把。

「宜家補完習啦嘛？」師傅唔知點解有啲面燶，問到我心虛，以為自己衰人太蠢，補習超時。

「補咗習咁。」我點頭，唔敢認叻講補完習，徒弟怕師傅，來來去去都係嗰樣，最怕師傅開金口屌人。

師傅正在為一個短髮女人吹頭，而客人則坐在紅皮長櫈上，一見我就笑笑口。

「傳統理髮師傅肯同女人整頭髮係咪好少見呢！唔洗奇怪！因為文殊菩薩幫人飛髮係男女平等嘅！」客人再搶答，我都無問。

我見女人的頭有點扁，一定是死得悽慘，出於禮貌，我沒有眼多多，倒不是因為驚見到人的死狀。

然後我被一條線掃到腳眼，我低頭，是紅色的，俾放鬆下垂的無名指吊住，衣袖出，由衣領入，眼尾睄到紅線來自女人的額頭……

我心不安，想望女人的臉，但不忍心望，只敢保持低頭，避之不及，我又看到了女人手刀處紋住三個中文字。

「喂，鬼差大哥！」女人主動叫我，師傅剛好吹完頭髮熄風筒，好靜，我本身仲打算扮吹頭太大聲聽唔到。「之前叫你痴線佬，嘿，失禮哂！」

「呀慧……hi……又會見到你嘅。」

「你又識慧姑娘嘅！慧姑娘人好靚，心地又好，係中心手工梘義工嚟，佢男朋友都成日做義工，都係六條魚之一，最近佢地結婚，唔知結唔結得切呢……」客人又未問先答，我聽到頭痛，原來真正感覺天旋地轉，真係會睇嘢睇到上下倒轉，而且畫面越拉越遠。

「結咗啦。」呀慧舉高無名指，睇住粒結婚戒指，笑得心甜。

「我都想發表架啦，慧姑娘你手掌紋粗言穢語嘅！唔怪得次次貼膠布！」

我唔想知咩手工梘義工有紋身，我淨係想知一件事，「你係第六條魚？」

「吓？你講緊咩魚？仆……仔話自己係魚，原來我都係架？」呀慧有心不在客人面前講粗口，「仆」字出口都吞得返，她這時和我對望，FUCK！ 她的頭撞到好闊，好似頭頂有條裂痕撐開咗咁。

「哈哈，你都以為佢係六條魚哩！我最初都以為係，但原來佢同你咁都唔係六條魚嚟！文殊師傅話我係第五條，咁剩低第六條一定係指我朋友啦！」

師傅捲好風筒電線，嘴角想笑，終於睇落無咁燶，但有心潤我：「我話過你做多咗，不過未撞過板都唔會聽，宜家你知唔知自己係衰咩呢！」

我正契弟，無擔帶，唔敢再想像。

「各位鬼差，唔好意思啊想插句嘴，我俾你地執靚完條屍，就可以好好睇睇去搵仆街仔，你地啲地府規則係咪咁？」

「幫你搵埋老公添啊，我飛髮架咋！」，師傅講嘢十足錄音複讀，呢句說話我咪聽過。「……售後服務啦喎！你問隔離哥仔囉，佢話自己乜都做。」

師傅講到我發腳軟，跌在客人側邊坐低，褲袋玻璃劍拮我一吓，我未至於唔知痛，立即從右邊褲袋拎出兩把玻璃劍在手。

我係咪害死完新郎哥，又害埋人哋個新娘子？

神推鬼磨，我手抽搐一彈，兩把玻璃劍一個脫手，消失無蹤。吳王留下一句聲音於我耳邊：「同千鬼報仇，你都幾上心吖！」

「嘩，無啦啦放飛劍！係時候攞人命啦？」客人開口，我至知原來佢一直都知咁多。「吳王醒咗啦？嘩，遲咗啦，飛劍殺人乜都殺完啦！你係咪放劍殺咗我朋友啦！佢唔係師子蟲，可以手下留情啦！我係鬼唔可以阻止你，但個元神會憎死你架！如果剃唔成頭，下世又會害你架，哎呀！哎呀！」

我都擔心吳王放劍殺人，唯有望住師傅求救。「點算？師傅可唔可以幫幫我！」

師傅定是見慣大場面，他搖搖頭，卻一點都唔緊張：「放劍唔一定殺人嘅，有青絲睇住架嘛。」

唉，由我返嚟理髮舖呢幾分鐘，發生嘅事就一浪接一浪，抖啖氣，我哋下回再傾傾！

推

推
呢排準備見工，琴日見完工，更完文，今日就病能咗
陰性，但見工地方之前爆過
大家幫幫手推文
有錯字原諒me

病緊推

終於好返7788推

（三十七）

「菩薩，我個頭撞到咁，有無得整架。」

「盡幫啦，唔好揀跳樓咁盡吖嘛。」師傅兩手按在呀慧的顴骨位置，掌根發力一推，「啪」一聲把她的頭部夾返接近正常闊度，「幫你放瘀血鐵線扭實啲骨唔係做唔到，不過香港地俾生人發現縫補過就唔啱規舉，留返俾殯儀做啦！」

「我知道人死咗之後原來會去另一個地方，就心急咗，早知係咪要燒炭死？粉紅色好睇啲。」

「唓，你無見過真人燒炭死啫，邊好睇，果啲紅色人哋以為你皮膚生嘢！」師傅作為文殊菩薩，講生死好似家常便飯，「不過你心急明嘅，結完婚吖嘛，吊住吊住。」

師傅後半句有心講我聽，初時見呀慧覺得佢惡，原來心思都細膩溫柔，聽得出師傳哽我，又幫幫我口：「唔好怪鬼差大哥啦，人死咗可以再見返另一半，都好浪漫，唔悲哀。」

「你話浪漫就浪漫啦，我見你髮尾唔齊，修兩刀好無？」

「咁唔該哂你啦！」呀慧答得寬容，心情好過在生時唔少。

我唔出聲得個聽字，客人則自己在前後搖擺，印下印下腳，我以為佢坐唔定，客人見到我留意佢，又搭嘴：「我係自閉症啦，但我唔係弱智架啦！我智力正常，輕度都無！生到個腦唔同人，好唔公平啦！」

老老實實，雖然佢次次無人問自己答，但其實好識留心人目光，估到人注意緊啲乜然後先會搭嘴。

在師傅帶路下，呀慧由洗頭盤來到理髮椅前，師傅請佢坐上去，再鼓腮一吹，這次只吹出鉸剪獅子一把，師傅踩一踩理髮椅，將椅子壓低，原地轉個45度角，偏偏要將呀慧的方向斜對鏡子方向。師傅日後再講解，始終是因為死人貼牆睇野，將理髮舖由半間舖睇成一間舖頭，才不知道地方淺窄，理髮椅打斜轉，這叫節省空間。

「睇唔睇飛髮？」

「睇！」我立即起身，走了上前。

「穿銅釜，絕鐵礪。」師傅對鉸剪唸口訣，手指穿入鉸剪，我未知飛劍乾坤，沒看出獅兄有甚麼反應，然後師傅有心在我面前露兩手，定住手臂，手腕轉動，鉸剪就在手中變換角度，而手臂依然是凌空鎖實的。「剪頭髮手要靈活，而且一定要定！」

我望得留心，覺得好似武俠小說睇師傅教基本功，這時害到了呀慧的內疚感暫時放下了一些。不過話時話，學飛髮還學飛髮，學飛劍還學飛劍，不似小說入面劈柴挑水都有大道理，實則修煉內功云云，飛劍一閃人頭落地開眼，然而文殊菩薩拿鉸剪仍是慢慢一刀一刀，為想整理遺容的先人剪個靚頭，但求送人好好上路，一份心意而已。

新娘本身就有髮型，師傅也沒有大執，收尾拿個爽身粉墊掃兩掃，肩上零星髮碎就輕鬆撣走，我覺得師傅剪得好，絕無私心，呀慧也點頭大讚。

「白象鼻，青獅頭，上垂嫋嫋青絲蘿。」師傅再唸口訣，鉸剪消失不見，看得呀慧驚嘆。師傅再問：「洗頭？」

「唔洗啦，已經好好睇，我想快啲見我老公。」呀慧笑拒，師傅唯有叫我濕多塊毛巾給呀慧暖面。

我突然將呀慧老公熱巾敷面的一幕與她重疊，諗起一個工序未做：「師傅，係咪仲有眉頭眼額要剃？」

「醒目！」師傅難得大聲俾讚，「不過唔洗，道生和尚得人尊重，一般劍俠唔會為難佢，而且佢對千鬼有恩無仇，師子蟲要斬都唔係斬佢。」

「係啊係啊！我地好恩怨分明嘅！」客人附和。

我聽到電腦大爆炸，呀慧原來係道生？咁佢咪同我一樣係Mandy半邊元神？Mandy本身條命短，所以六條魚五條魚都死咗，我死咗，呀慧死咗，呢啲係咪整定？阿含薩劍俠故最尾，講到Mandy元神分兩半，一個有吳王闔閭的殺念，一個有劍僧道生的心腸，所以吳王就撞車撞死大家，道生就人好靚，心地又好，係中心做義工，仲同千鬼之一結埋婚？

呢啲又係咪整定？

唉，前世今生，業力係咪打唔得斷嘅？難怪人要做和尚。

「啊，我點俾錢你，我果陣無帶銀包。啊！你哋係咪淨係收冥通銀行果啲。」

「係啊，唔收八達通添啊！」師傅講笑咁話，然後揚揚手：「唔收錢架，你安心走啦！」

「多謝師傅，多謝兩位鬼差。」呀慧在我的幫助下脫下尼龍袍，朝我們三人點頭，又扶一扶自己兩頰，畢竟是跳樓死的人，屍體已經很齊整。她轉一轉身，望向玻璃門外，好像見到甚麼：「咦！仆街仔，你又搵到嚟嘅？」

我聞聲望出，午夜空盪的上海街，有街燈，舖頭全都是落閘的，偏偏沒有呀慧說的人，沒有上一位客人的身影，也沒有了哥。

呀慧好似被門外甚麼牽引住，沒有再和我們說話，直接走到門前。

我起步，一來醒目仔想送客，二來想確認她到底見到了甚麼，怎料師傅與客人一人一隻手搭在我膊頭拉住我，我望望他們，師傅擰擰頭，客人則四萬咁口，笑道：「唔好著相啦！」

我不知他們意思，只是當我再望向門口，呀慧已經不見蹤影，門自己關上，門鈴在叮噹作響。

我不解，等師傅開口點化。

「呀醒，你未識聽反話啊。」師傅開始講：「我笑你乜都做，係叫你唔好做，唔好幫人娶埋老婆，唔好幫人搵老公，人死咗就無架啦，乜都無得繼續做架啦，知無？」

訓前推

推

推

（三十八）

嗰晚呀慧嘅屍體究竟去過邊，我最終都無從得知，師傅話，有啲先人飛髮係想執好遺容安慰在生嘅人，於是飛完髮就會返去殮房等人認，至於呀慧呢種一心與故人相會嘅情況，佢會俾自己嘅心象牽引住，成晚係街上面遊盪，可能會重新去一次兩人有回憶的地方，可能會盪失路，直至天光或者俾生人撞到，佢就會瞓返殮房，變返做唔會郁嘅屍體。

師傅仲話，其實新郎哥死咗，呢個世界就再無新郎哥呢個人，呀慧再死咗，呢個世界就唔會再有掛住佢老公嘅呀慧，無呀慧，無新郎哥，兩個都無咗，亦唔會有得再見對方。

似乎師傅講到人死如燈滅咁，但人唔係有輪迴轉世咩？上一世，下一世，劍俠夠為愛恨恩仇投胎一處，我連人嘅元神都見識過了，兩個相愛到死嘅人唔通又無得下世再繼續未了緣咩？

「咁你同呀慧仲係唔係Mandy？定係吳王？定係道生？」師傅問我。

我口啞啞，始終又重新講到五蘊無我的道理，緣份聚聚散散，吳王嘅業影響咗道生嘅生命軌跡，但道生唔等於吳王，我亦唔係吳王，相信呀慧都唔會覺得自己係道生，至於Mandy，佢生命入面愛過恨過嘅事，或者依然影響到我，但我都唔再係Mandy了。

回想起呀慧嘅屍體以為人死咗可以再見返另一半，佢話好浪漫，唔悲哀。但一諗到講緊嘢嘅只係冰涼嘅屍體，天光就唔會郁，新郎哥已經唔再存在，呀慧已經唔再存在，無野搵緊無野，無野可以再見返無野，我又點可以唔覺得悲哀。

「我哋唔講真相呀慧聽係咪有原因？」我其實想問師傅頭先點解唔講真相呀慧聽，但唔敢用質問態度，唯有改口咁問，但我也心裡有數，同呀慧講死咗唔會見返新郎哥，點講出口。

「真真假假果啲，呀慧咪覺得自己真係見到佢老公囉，安落咪得，計教咁多！咁反正諸行無常、諸法無我、人都要涅槃寂靜啦！唔講啦！哈！一陣講偈你又怪我要你自己領悟！」師傅始終是鍾意窒我，又重提佢自創的梵文：「HoLunChuTaKa！」

「文殊師傅係講三法印啊！即係……」客人又來料。

「得得，我知咩係三法印。」為了客人慳返啖口水，我出口打斷，可能因為他是經我飛劍斬出的鬼，沒有扭擰，乖乖安靜。

上過清涼山補習，佛教知識都叫補返個底，三法印係用來辨別佛教理論真偽的特徵，諸行無常係指世界一切現象都是處於流轉變滅的狀態，緣聚即生，緣散即滅，香港人鍾意講變幻是永恆，其實好有佛味；而諸法無我，《五蘊觀》就指出「五蘊和合，假名為人」，我亦係因緣和合而成的，其實世上並無一個永恆不變獨立存在的我；最終涅槃寂靜，大意是指學佛人所追求脫離世間煩惱痛苦得到安樂寂靜的境界。

師傅話諸行無常、諸法無我、都要涅槃寂靜，也許是在說「反正無常無我，追求涅槃寂靜也沒有意義吧？」這種常見對佛教質問，而師傅的答案好簡單，安落咪得，計教咁多。

後來回想，其實唔排除我是過度解讀了師傅的話，不過當下一刻我真係咁樣去理解，況且唔想俾師再笑我好撚豬，以為自己明咗就算，亦無再糾纏師傅提三法印的用意，而「安落咪得，計教咁多」呢句說話我就記了在心中，日後我為人飛髮，動機不外乎幫人求個安樂，自己開心，當係做吓義工，話時話，咁得閒幫人皆因劍俠唔憂柴米，唔洗返工。

呀慧嘅屍體離開之後，就到繼續服務客人的時候了，我補完習後，覺得客人剃唔成頭係因為心有牽掛，我問客人，客人倒也坦白：「我撞車死咗去，呀媽一定好傷心。」

「師傅，我可唔可以帶客人去搵佢媽媽？我保證會小心唔做多架！」我口口聲聲，其實我都唔知哪來的信心，我前世遍照送個惡母劫俾客人前世林撲，今世見一見客人媽媽，話唔定可以幫佢解除宿怨，也算是為前世自己嘅行為負返少少責任吧？

「你自己諗啦！𡃁仔過嚟，幫你剃吓面！」說完師傅行指指放毛巾的鐵架，我立即去熱條祝君早安俾客人敷面。「你今世做好人唔煉劍，但你都知仇人唔會因為咁放過你條屍架啦。」

客人傻笑三聲，還真是哈哈哈咁三聲笑，然後又講：「未死果時有童女睇住，吳王又未醒，宜家我都好驚啦！」

師傅唔阻止，我當是默許了。

我再醒爬，向師傅伸出雙手，大聲問：「師傅，係咪要盪刀。」

「我挑！懶醒！」師傅鼓腮一吹，吹出大師兄閻摩降出來，我一定要問問師傅點收埋把劍入口先得，唔通日日袋住十塊玻璃片！

推