[廣東話/都市懸疑/本土典故]落地開眼見劍俠 （想追故請俾負評）

早餐推

（四十七）

客人媽媽一邊合掌搓手，驚驚青青咁，當正我係文殊菩薩，突然她又覺得做唔夠，啪一聲屈膝跪地，準備行大禮頂禮膜拜我，我受唔起，梗要扶住她，她揉一下剛才跪過地的兩膝，又說：「菩薩大慈大悲，體諒弟子我膝頭唔好。」

我又唔識X光照骨頭，客人媽媽諗多哂，尤其大師兄又唔係我身上，其實我最多咪文殊菩薩個徒弟，不過係清涼山會見過細蚊仔劍俠，我都識得咪亂露底，索性問佢點知我係文殊，以免講多錯多：「你點解會知我係文殊菩薩嘅？你係劍俠？」

「吓？劍俠？菩薩我聽唔明。九年前送子觀音講過文殊菩薩會嚟見我，佢話菩薩你會吊住個啷啷⋯⋯」客人媽媽尷尬，又醒起未請我入屋，便說：「啊，菩薩請你入嚟啦！弟子我已經拖好地煲好水沖茶，馬騮搣啱唔啱飲？啊菩薩你肚唔肚餓？我蒸好咗腐皮卷倫滘糕⋯⋯腐皮卷齋嚟架，無肉架無肉架。」

請菩薩入屋飲茶一盅兩件係咩玩法？我覺得佢講嘢有語氣詞又剩，唯獨語調平均，毫無正常起伏，背書咁款。

而佢口中嘅送子觀音，會唔會就係果位魚師小妹妹呢？我記得佢食過字話觀音兵借路嘅。

我除鞋入屋，客人媽媽眼尖，明明轉緊身拎熱水煲，竟都見到我動作，又立即講：「菩薩唔洗除啦！你肯著鞋入屋，弟子我以後唔拖地添啊！」

真是有點誇張，不過一般人見到活生生神仙佛菩薩唔通又會敢敷衍咩，想像下如果有日俾耶穌佛祖敲門，正常就算唔信教都應該會恭恭敬敬吧，唔係普通人一個可以點？我唔想佢唔自在，也就把鞋著返了。

既然她眼利，我當下有心做吓動作俾佢睇，我特登轉個身托住客人手㬹入屋，說明有心做，就不怕空氣人嚇到她，最好她開口問，咁我就有位可以講起客人回來見她的事。

她明顯是用眼尾再睄了我一兩下，竟然不作反應，大概以為我不知她在偷望，真不知道是驚鬼定驚我。她請我在梳化坐低，再把熱茶倒入我面前茶杯，我兩指在茶几跪跪，叫做講聲唔該，她再企在一邊，我請她坐對面也不肯。

這時熟悉自己屋企環境的客人已摸下摸下來到我旁邊的梳化空位坐低。我見水是剛剛煲好，俾盡伯母面子都飲唔入口，況且我來報白事，也不是嘆一啖茶「呀」一聲嘆口舒服氣再講的做法，那就任由茶杯在茶几上攤，而我則專心苦惱如何開口是好。

見她半夜聽佛經，到底是知道自己個仔出事先播，定係因為唔知自己無咗個仔，所以有心情如常播佛經？

客人坐在我旁邊，突然就講：「媽媽知道我死咗一定好唔開心啦，你請佢唔好傷心啦！」

我托嘴望住他的位置，想了一陣，決定當住伯母正面同客人這嚿空氣講嘢，我都做到咁明顯，無得扮唔知啦咁，她當得我活菩薩，那麼佢過身的寶貝仔正以看不見的狀態下坐在我隔離，應該唔算匪夷所思吧？於是我直接問客人：「佢如果無睇新聞唔知，點算？」

沒想到這時客人媽媽再主動提起：「文殊菩薩，你對住空氣講嘢，弟子我無睇新聞啊，你係咪想暗示我個乖仔出咗事啦！觀音菩薩都話八年九年差唔多啦！」

難過的關終需要闖，我默默點頭。

她突然抽幾張紙巾大哭出聲，呼叫道：「我個乖仔啊！心肝寶貝仔啊！」

我突然成個人chok一chok，以為張梳化唔穩陣，點知是客人個屎忽同背脊開始大力搖梳化！

「你地逼我啦！係都唔放過我啦！係都要害我啦！Sol egressus est super terram, et Lot ingressus est Segor⋯⋯」客人越講越激動，開始口講我聽不明的話，說著說著，一下扯走罩住自己頭的膠袋。

我嚇到彈起，拉都拉唔住，客人屍體一旦係生人面前露樣，咪會變返郁都唔郁！

同一時間，一把女人聲音從我耳邊傳來：「係咪文殊菩薩啊！」

我頸子一寒，個腦更加輕機，呢個時候又邊個咁大整蠱要斬我？

我呢次未識反應拋劍，客人已講完最後一句火星文：「Respiciensque uxor eius post se, versa est in statuam salis！」

一道強光閃現，我一陣澀眼，馬尿猛咁滮，只見多了一嚿白色嘢從我右後方伸到我面前，眨眼看真啲，是一隻手拿白色劍的白色人手臂雕塑，劍刃攔在我頸前，也只距離我凸出來的喉核五六厘米，我抬頭一望，嚇到我嘩一聲，原來企住咗一個白色人雕！

人雕的頭一下斷裂，白色的粉塵灑我一身，我一口鹹苦味，好似食到鹽咁。

而那顆頭，正正滾咗落我大髀，打開眼，與我對望。

屌！佢咪係頭先果個清潔姐姐？

推啊

肚餓推 減肥好難

朝早 推

推

再推

今期最後一推

（四十八）

「係都要逼我殺人啦！係都要逼我做衰人啦！」除了膠袋的客人在伯母眼前不但沒有變回唔郁的死屍，反而精神到不得了，佢摸住耳仔，在我與伯母眼前開始原地跳。

我當然同你一樣唔明白當中原理，仲有我無啦啦俾人放劍，同埋突然出現的鹽人柱，點解我今晚既經歷好似睇緊懸疑故事咁？我作為當事人，又唔係坐車碌手機睇故事果位朋友，唔想用腦啦我！

伯母嚇到面色煞白，加上佢對黑眼圈，該煨，比起原地彈跳的客人更似殭屍。

「究竟發生咗咩事呢？」我嘆氣，攰多過驚，帶仔見呀媽啫！

客人見我問，就立即搶答我，但他邊跳邊講，聽到我眼鳴耳花添啊：「你話⋯⋯文殊菩薩啦！⋯⋯做人架梁啦，唔好傷害我同呀媽，遺民信吳王，吳王做菩薩⋯⋯唯有幫菩薩投胎，等⋯⋯吳王返嚟啦！」

我氣餒，於是講嘢極不體貼：「我知你唔開心，你不如冷靜返先講？」

「哈、呼、哈、呼⋯⋯」這時客人突然就停止了跳躍，但他不停深呼吸的靚仔樣又谷血到紅噹噹，他坐返低，個人又開始上半身體轉圈咁搖擺。

我醒悟到，其實閻摩降斬人雖然不算殺人，但畢竟是劍俠鬼，我講乜，客人就會做，我其實要小心用字，俾返個自由意志佢。「唔好意思，我唔係有心命令你，你順其自然，準備好先，想講先講啦！」

客人合上眼，點頭繼續深呼吸。這時客人媽媽望住我們兩個不出聲，一與我眼神交接，就生硬地平移視線向一邊，兩手合十猛拜，棹忌不已，我唔係好識講嘢，鳩鳩地對她微點個頭，就專心望住客人。

「我可以講嘢㗎啦！」這時客人舉手，呼出最後一口大氣，雖然人仍在搖擺，但已是情緒平伏返好多。未等我出聲回應，他就接著開始解說：「你係吳王啦，遺民唔想你做文殊，就斬你送你去投胎，下世做返吳王帶領佢地報仇啦！」

「嘩！我睇過十世吳王闔閭出家做劍僧，我知佢哋有人好迷信吳王，但都無試過俾遺民斬㗎喎。而且你係師子蟲，你點會知？」

「知己知彼吖嘛！」

客人咁答，都唔太解釋到我心中疑問，不過我有其他問題更想知：「咁點解會突然有嚿鹽雕拎把鹽劍行住我條頸先得㗎！」

「哎呀！佢咪想斬你嗰個人囉！我用鬼嘅方法借天使劍斬佢啦！」

劍俠故突然變聖經故，又來畫風大變，我唔太Get到，衝口就問：「天使啫係點，唔係講緊劍俠咩？」

然後我諗返起心師Rayon又是劍俠又自稱基督徒，劍俠又要諗自己係地球上嘅前世今生，太空都飛埋出去，從來唔係限於亞洲的事，係我先入為主，慣性諗得窄，說不定遲啲有個南非劍俠⋯⋯唉，太癲太癲。

「世界上好多種劍術觀念啦！Kabbalah嘅劍俠鬼Nefesh可以同天使傾計啦！我唔識講希伯來文，唯有講拉丁文，天使叔叔肯聽，咪及時救到你囉！」雖然錯重點，但客人真係亂叫人叔叔。至於客人口中的觀念，吳王把聲也講過類似的話，我當然有好奇，不過我才一晚學師仔，甚麼Kabbalah，Nefesh，現在還是不宜燒腦鑽太深。

「咁你借劍斬人，咪變做衰人囉！如果剃頭唔成功⋯⋯童女咪會⋯⋯」

「無辦法啦！我哋係益友啊！唔係普通朋友咁簡單，我對你好，你對我好！」客人又講，我只覺得自己好廢，身上有劍都唔識擋，累到客人。

「我仲想知，點解你可以係你媽媽面前露樣嘅？」

「佢唔係我媽媽！係鬼啦！我剃完眉頭眼額，隔住個膠袋都估緊！佢一喊我就知啦！」客人講講吓，個身就無再搖擺，然後再細聲講一次：「佢一喊我就知啦⋯⋯」

伯母立即加快合十兩手的拜神動作，連眼都緊張到合實埋，客人講到原來自己媽媽死咗，我就唔知點俾反應，最怕開口夾著脷。

客人自己細細聲，開始自問自答，越講個人就坐得越縮：「點解一喊你就知嘅⋯⋯梗係知啦！呀媽點會為咗我喊⋯⋯吓，咁你又話媽媽會傷心嘅⋯⋯係媽媽都錫自己個仔啦！死咗小朋友一定都會喊啦！我唔知點解但我媽媽又一定會好開心啦⋯⋯

我有病㗎，我自閉啊！我唔轉彎㗎⋯⋯

求求求！求菩薩結果生到你呢個弱智仔，真係我前世唔修啊！

你弱智架！你爛泥啊！早啲死啦你！仲要等幾年！

菩薩保佑啊！快啲帶返走個弱智仔啦！」

客人講吓講吓，就摸住自己手臂，再講：「我唔喊啦！我唔喊啦！我係孝順仔啦！媽媽唔好再播佛經啦！」

這時他才出返神，望住旁邊的我，嘻嘻一聲笑：「我有病㗎，我自閉㗎，原諒我啦！」

我只是一路聽，一路喊到收唔到聲。

最近輪寫三個故，更疏咗，有人睇緊嗎？

有

三個故

一時無忍手

追緊

多謝你

多謝，令我唔洗單機寫故

中午推

推

樓豬下個故唔好再玩負皮
難啲推

有道理

訓前推 肥叔叔破戒食咗晚餐，覺得自己真係一隻豬

朝早推

（四十九）

宜家客人越見越靜，我就心噏到流緊眼水，伯母鬼就搓手念佛，帶仔探親探到咁，我都唔知對客人剃頭有乜幫助。

我收拾心情，手背抹下剩返幾滴眼水，客人成個紙巾盒遞來我面前，我本身自己有包紙巾仔，就拎出嚟用，無接到佢盒紙，但又發現我唔接佢就唔放低手。

「有人喊就要俾紙巾啦！做個乖仔啦！」客人咁堅持，我唯手都拎返張。

「菩薩唔好介意！我個仔有病架！」伯母鬼用語重心長的語氣咁講，我立即睥住佢，佢先知自己講錯野嘢，又繼續合眼念佛。

咁我明點解客人成日提自己有病，點解啲老母咁鍾意人前踩自己仔女，其實伯母自己都應該睇吓精神科醫生，不過如果斬伯母把劍係大路飛劍，大概內裡都無咗靈魂，心中有點應佢都無用之感，就莫講過開口責怪了。

無論係就住真伯母真係被斬嘅事實，定鬼伯母講野鬼咁難聽，茶几壺馬騮搣我真係飲唔落，我覺得再坐都對客人無益，不如眼唔見為乾淨，但一切都應該要客人做決定，始終佢係我隻鬼，我開口，佢就屈服，我唔要咁，於是問：「咁你想唔想走？」

「我未叫媽媽唔好傷心啦！」客人咁講。「我地去搵呀媽啦！」

我一時轉彎慢，聽唔明。「但係⋯⋯佢唔係鬼咩？」

「哎呀！我呀媽嘅元神仲係本身個頭度架嘛！」

我聽畢腦袋靈光一閃，想起我們一出𨋢時劍俠清潔姐姐在地上捽散的血路，會不會那就是伯母被拖屍的血？屌，會唔會係我把玻璃劍飛過來殺人？唉，我無心做吳王報仇架喎！

這下我更覺得對客人有愧，連將這懷疑講出口都爭咁道勇氣：「欸⋯⋯其實會唔會⋯⋯因為我把玻璃劍⋯⋯即係⋯⋯我把劍斬死咗你媽媽？」

「哎呀！地獄劍斬人無鬼架！同埋『放劍唔一定殺人嘅，有青絲睇住架嘛。』，你斬人，師傅話有青絲睇住啦！雖然我唔知咩係青絲啦！」

客人唔明，呢時我卻又明明地，本身那時師傅講青絲我都不知是甚麼，不過諗返師傅前後對過鉸剪獅子念兩次「白象鼻，青獅頭，上垂嫋嫋青絲蘿。」我都大概估青絲是獅兄的別名，獅兄唔鍾意我，相信一定睇到我實一實，咁就一定不是我的劍斬到人了。

但我一點都沒有如釋重負：「不過咁⋯⋯會唔會係我把劍提示遺民郁手殺人？」

「我係你隻鬼，我唔會嬲你啦！」

客人有心唔對嘴，直接講自己唔會嬲，傻都Get到佢咩心情，我心不安：「但如果你唔係我隻鬼呢？」

「我係你隻鬼，我唔會嬲你啦！我呢世要做個好人啦！」

「唉！我⋯⋯對唔住。」

客人揞住耳仔，兩秒都無垂返低手，戴返好膠袋，又揞多次耳仔，才講：「我未叫媽媽唔好傷心啦！我地去搵呀媽啦！」

客人都主動轉移話題，我顧住自己個心好過再糾纏就太自私：「我估你媽媽係同層另一邊單位，我地行過去？」

「我地行過去？」客人覆述一次我的話，第一次用手拖住我，說道：「我地行過去啦！」

我有一刻覺得自己拖緊個親生細佬咁，吳王同干將的確係世仇，但我真係好想客人可以去得安安落落。

呢時伯母鬼又發作，佢念佛咦咦哦哦，我早當成背景聲音，但佢偏要一哭二鬧乞我憎：「哎呀！你真係嚟討債㗎！係咪真係要搞到我不得好死？」

可怒也！聽到我火遮眼，自己都不知算不算吳王上身！我的嘴不由自主，狠毒地說：「死多次唔爭在啦咁伯母！」說時我拋起玻璃劍，點知客人蒙住眼都出手快狠準，左手一下將玻璃劍拍回我手心。

「我唔係想阻住你啦！有青絲睇住架嘛！我唔知咩係青絲，唔知我保唔保護到你啦！」

嘩真險，一陣師弟曳曳，獅兄咬咬，我又唔知俾佢瞬間轉移去邊。

推

推