(十八) AKB成功之道 –選拔總選舉(5)
「親民」係AKB48嘅基本概念,而喺親民嘅基礎上,更加形成出「培育偶像」概念。選拔總選舉更加突顯出AKB48同其他偶像團體唔同嘅地方,就係「參與度」。
正如之前嘅篇章所講,現世代追偶像已經可以由單向轉變成雙向。Fans對於AKB48亦係一個相當重要嘅角色,唔單止因為Fans係資金來源,同時亦提供「意見」畀營運同埋成員應該點行落去。
選拔總選舉畀Fans扮演營運角色去揀選選拔成員同Center,令到營運可以了解到「外部觀點」。營運到底用點樣嘅邏輯去揀選拔成員,觀眾未必會了解而引起不滿。營運睇成員嘅目光唔同觀眾,成員內在嗰面(對工作人員嘅態度、有無努力之類)只有營運睇得到,所以經常都會有爭論點解營運唔畀更多資源其他成員,而去揀一個總選舉成績差嘅人。
選拔總選舉可以平衡營運嘅「內部觀點」,令佢哋可以更全面咁去睇一個成員,再去調整資源分配。
觀眾認識AKB48,再去握手/睇網上直播交流,見證成員嘅成長(實力+年齡),之後更加為咗幫成員達成夢想而付出時間同金錢。一般Fans可能只係普通咁投票,而核心Fans更加會組成「選舉對策委員會」,幫偶像拉票,亦會進行集資去投票。
*上Twitter搜尋 選挙対策 就會搵到唔同成員嘅選舉對策委員會:
https://twitter.com/search?q=%E9%81%B8%E6%8C%99%E5%AF%BE%E7%AD%96&src=typd
選拔總選舉係Fans為自己鍾意嘅偶像創造機會嘅活動。Fans唔再只係齋睇,而係直接令偶像成名嘅推手。最後再同偶像同一時間見證成績。對比其他偶像團體嘅Fans,AKB48嘅Fans對偶像有更大影響力,係同偶像一齊寫AKB48歷史嘅「參與者」。