究竟邊個成員受歡迎，畀資源佢(上電視節目/選拔)又有無成效，一般係好難知道。因為人氣係好難量化去分析。
有人去買一個組合嘅碟，一般唔會知道佢嘅購買原因。唔知佢係某成員嘅Fans定係整個團體嘅Fans，又或者單純鍾意嗰隻碟嘅音樂/舞蹈/MV。一般嘅營運都會缺乏資訊去分析，而握手會就可以或多或少咁解決呢個問題。
AKB48握手會分為「全國握手會」同「個別握手會」，前者要買「初回限定盤」(首批出版CD)，入面會附贈握手券一張，握手會開辦日期/地點/參與成員都唔確定，即將舉行嗰陣先會喺官方網站公佈詳情，到時就可以帶埋不記名嘅握手券參加活動。
而「個別握手會」就唔同，握手會資訊係事先公佈(場地/日期/參與成員)。Fans要上網預訂另一個版本嘅CD(稱為「劇場盤」)，訂購嗰陣要先選擇自己想去握嘅成員。點解要事先揀? 因為供不應求，想去同人氣成員握手嘅Fans太多，但握手會嘅時間係有限，所以就要進行抽選。一段時間後就會通知抽選結果，成功抽中之後先畀錢。
From: http://akb48.chara-ani.com/
↑訂購畫面
-要揀選握手會場次，之後揀想握成員同埋購買數量
-握手時段分成唔同部，第1部係最早
-「每部」限額約500握手券
-購買係記名制，參加個別握手會要核對身份
「個別握手會」會進行多輪抽選，頭幾輪有抽選數量限制而且係記名制，所以唔會出現一個有錢Fan人買晒所有握手卷嘅情況，亦都防止炒賣。
抽選過程提供重要訊息畀營運，到底邊個成員受歡迎，邊個成員人氣上升緊或者下滑緊，投放資源畀成員有無回報，回報率高唔高等等，都可以透過握手會掌握到。
同一時間，抽選結果係公開資訊，Fans可以知道每一個成員賣完咗幾多部。當中就會產生化學作用。人氣成員嘅握手券頭幾輪就會賣晒，大家都明白一開始唔抽就唔會有機會，導致更多人想去抽。
握手會係AKB48 Single維持百萬銷量嘅秘密。Fans大量購買，表面上係買CD附送握手券，但實際上CD更似係握手券嘅附屬品。「可以同偶像近距離直接交流」先係大部分Fans購買嘅原因。有人批評話AKB48根本唔係賣音樂，我部分同意。音樂係偶像價值嘅一部分，但仲需要有其他方面嘅付出先可以構成完整嘅偶像。
偶像唔等於音樂人。我唔會話AKB48整體係出色嘅音樂團體，但我肯定AKB48係非常成功嘅偶像團體。
Extra:
*除咗握手會之外，其實仲有
-大サイン会(大簽名會)
-大写真会(大寫真會/大合照會，專輯發行嗰陣舉辦)
可以有一樣實際嘅嘢帶走嘅活動，可以google/twitter搜尋 大サイン会 / 大写真会，就會睇到Fans po出嚟嘅實物。
