(八) AKB48成員的必經之路
究竟點解要做偶像呢,每個成員都可能有唔同答案。而擁有住唔同夢想同個性嘅成員聚埋一齊,就係AKB48。
女性偶像嘅生命非常短暫,可能幾年後就會被更青春嘅人取代。偶像並唔係一個可以做一世嘅職業。
AKB48好比一間學校,畀機會成員去試唔同類型嘅工作,除咗基本嘅歌舞表演外,仲有做綜藝節目、做主持(電視/電台)、拍戲、Model等等,令到成員可以累積經驗同人氣,之後再轉職去實踐自己嘅夢。當成員「畢業」離開AKB48,就係佢地繼續去挑戰或者放棄演藝事業嘅時候。
例如前AKB48代表人物,大島優子(14年畢業)[圖右2],童星出身嘅佢就係以演員為目標而成為偶像:
近期日劇《東京白日夢女》宣傳照
From:
http://www.ntv.co.jp/tarareba/
AKB48雖然提供好多機會,但機會係留畀金字塔上層嘅成員,而唔係每一個成員。就算做唔到Center,成員都要以金字塔上層為目標。但究竟要點做先可以爬到上去?
除咗頭三期成員,一般成員都係由研究生做起,接受唔同訓練。而之後條路就開始有分歧。正式成員都唔係每一個人可以做到,有唔少成員直接以研究生身份畢業。原因有好多,可能係被爆出入團前嘅醜聞,又或者體驗到睇偶像同真正做偶像嘅分別而放棄。
要由研究生升格做正式成員都唔容易,好彩嘅話1年內可以升格,唔好彩就要用多過1年。而升格之後,目標就係難度更高嘅「選拔成員」。要成為選拔一定要有「實力」,但偶像嘅實力唔係單純睇唱歌跳舞咁簡單。有好多成員加入幾年,付出所有青春畀AKB48,但都未必做到一次選拔成員就離開。偶像需要唱歌跳舞以外嘅武器。
偶像嘅實力評測係一件困難嘅事,因為
偶像並唔等同於歌手!!!
日本娛樂事業分工仔細,歌手專注於音樂,演員專注於演戲,藝人(主要係指搞笑藝人,賺得最多錢嘅多數係節目主持人)專注於綜藝節目,而偶像係綜合工作,樣樣都做而唔專注於某一方面。
偶像嘅成功應該要用人氣嚟計算。用盡一切方法得到觀眾喜愛,就係「偶像」。得到人氣嘅方法有好多,正所謂百貨應百客,唔同類型嘅偶像都會有人鍾意,AKB48成員眾多,正正就有滿足到唔同需求嘅優勢。觀眾鍾意一個偶像可以係因為佢外表好、表演力強、性格好、搞笑等等。
想得到人氣,就要盡全力發揮出自己嘅「個性」,令到自己可以喺觀眾腦海入面「留低印象」。1秒鏡頭都絕對唔會放過,努力去表現自己,咁先係強大嘅偶像。
AKB48歷史入面「得到過」機會嘅成員唔算多唔算少,但當中把握到機會,成功跨越金字塔上層門檻嘅就少之又少。但就算成功可以留喺金字塔上層,其實都只係得到可以喺娛樂圈生存嘅門票。AKB48外面嘅世界更大,其他競爭者更加唔會同你客氣。一條路嘅完結係另一條路嘅開始。