Extra – 劇場公演
究竟「劇場公演」有咩可以睇? 又有咩吸引力?
公演收費(一般男性)大約217 HKD,可以睇到一場110分鐘左右嘅表演。公演係常規嘅表演,內容大致上固定(歌/舞/服裝/舞台效果),編制好嘅公演有自己嘅「標題」,畀觀眾區分到表演內容。
一場劇場公演大約有15首歌(包括Encore),同3段MC時間,流程如下:
Overture(序曲) > 全Team合唱 > MC(成員自我介紹) > 分成小組演唱 >
[MC(成員對話) > 全Team合唱] x 2
*特別寫出overture,因為無論係劇場公演定係演唱會,開場都一定會播放呢一首樂曲。鍾意睇live嘅Fans,聽overture嘅次數應該多過聽其他歌。
https://www.youtube.com/watch?v=DMLlr61J35o
未必每一個公演都係跟住以上程序,但大致上就係咁嘅鋪排。
*公演詳情,可以參考(日文: 睇「歴代の劇場公演」):
https://48pedia.org/%E5%8A%87%E5%A0%B4%E5%85%AC%E6%BC%94
中文可以睇返各團wiki,無整合版本
48團會將成員分隊(Team),之後就按分隊進行劇場公演。上場嘅大概16人,而多出嚟嘅成員同研究生就會成為後備。每個Team都會表演同一個公演項目一段時間(幾個月至幾年不等),完結之後就改為表演其他已有嘅公演項目或全新嘅公演。
劇場公演吸引之處
[獨有歌曲] 大部份歌都唔係出喺Single,係「劇場公演獨有」。所以睇公演唔同於電視上睇到嘅表演。
[特別公演] 由於表演內容大致上固定,Fans未必有興趣重覆去睇公演。但間中就會有特別公演,打破Team嘅界限,選出唔同Team嘅成員一齊表演,提供新鮮感。
比較令人印象深刻嘅有AKB48前成員兼總監督,高橋南喺畢業前策劃嘅8場唔同主題嘅公演。其中一場係「Staff公演」,由高橋南同工作人員一齊表演,亦都有環節安排Fans同工作人員交流。
[親切] AKB48藉藉無名嘅時候,就係靠住親民去俘虜Fans,舞台同觀眾席距離非常近。而且好多成員生日當日都會做公演(生誕祭),元旦、聖誕等大時大節都會有公演,成員同Fans一齊渡過節日。
*生誕祭公演,Fans會組成生誕祭委員會,籌備禮物同佈置劇場外大堂
https://www.google.com.hk/search?q=%E7%94%9F%E8%AA%95%E7%A5%AD+akb48&rlz=1C1ASVB_enHK744HK744&source=lnms&tbm=isch&sa=X&ved=0ahUKEwiWnOb_kq_VAhVGnZQKHUKEBmkQ_AUICigB&biw=1280&bih=694#imgrc=_
另外,生誕祭公演內容同平時嘅公演一樣,只係Encore部份會加入同Fans一齊唱生日歌,同埋固定會讀出某一個成員寫畀生日成員嘅信
[成長] 48團係有育成偶像嘅概念,徵選嘅人唔一定要有歌藝、舞藝,唔同時間睇佢哋表演,可以見證佢哋嘅進步。
[比較] 唔同Team會有機會表演返同一個公演項目,成員唱表演相同嘅歌舞,可以分辨出唔同Team或個別成員嘅表演力。再用高橋南策劃嘅特別公演做例子,其中有一場「Dance選拔公演」,揀出跳舞實力比較強嘅成員去表演。呢一班成員,唔係每一個都係Single嘅選拔人選,但佢吔嘅整體表現比Single選拔成員更好。都係嗰句,偶像唔一定係追求表演嘅實力,Single嘅選拔基本上係由最忙嘅成員組成,好難有時間將一個表演練到100%。
總結:
劇場對48團非常重要,但現時嘅淺層Fans未必會留意劇場公演,因為有更多人係經電視去認識48團。劇場有趣嘅地方係可以畀Fans挖得更深。好多出名嘅偶像,電視同Live已經係佢哋嘅全部。但48團仲有劇場,可以睇到比較少上電視嘅成員表演,又有劇場獨有嘅歌舞。
劇場亦都可以睇到48團嘅「未來」。總選舉係「見證」住歷史嘅一刻,而劇場係長時間「見證」成員由路人成長成出色嘅藝人嘅一環。
額外資料:
日本劇場公演時間表
https://ticket.akb48-group.com/home/event_live_list.php?mode=theater