繼Black Friday 一輪出血後,差唔多到另一個出血時間聖誕檔期了
資本主義推使,各大商戶又出招刺激消費,而IFC最近搞買野送cash coupon, 由於正好要買禮物比Friend, 放左工就躝左去連卡佛
行下行下又經過JOYCE 個MKF 櫃,本來就只係想試噴下鼎鼎大名嘅Baccarat Rouge 540 extrait,點知最後變咗咁
連卡佛佢哋做緊聖誕promotion,左邊嗰啲係贈品嚟,有A La Rose Hand cream 同 Candle, 任選4 支5ml perfume, 我揀咗 A La Rose, 新出既 L'Homme A La Rose,Gentle Fluidity Silver同埋 L'eau A La Rose (呢支係EDT)
今次連卡佛都算有誠意做吓優惠, 贈品幾多算唔錯,佢買夠一定嘅金額會有唔同嘅贈品可以選擇,我自己就揀5ML 香水多, 但其實佢可以揀蠟燭或浸浴泡泡球,MFK fans 可以去連卡佛睇睇
除咗講優惠之外, 都想獻一獻醜同大家分享吓少少噴後心得
Baccarat Rouge 540 應該算係MFK呢個牌子入比較小眾,但係討論度又係最高嘅一支?? 討論度高嘅原因係因為評價超級兩極,有人好鍾意但係又有人好唔鍾意,唔同人都有唔同嘅感覺, 有人話似牙醫噴係個口入邊嗰啲消毒藥水,有人話似話梅味
,我就覺得一開始係似陳皮零食
唔知係唔係甜蕃紅花味就會係咁嘅味
我自己就唔排斥,係覺得佢甜咗小小,之後中調同尾調都好正,係我最鍾意嘅奶奶地龍涎香+雪松木
mix得好自然好舒服,而且呢款個留香好好,噴咗一日都仲有味
好多人都唔鍾意佢嘅前調,係因為舊版EDP真心甜,至於EXTRAIT就大大改善咗呢個問題,仲加咗啲辛辣嘅味道,成個感覺中性咗好多,但相對來講價位都貴咗好多
兩款我都試咗係身同埋噴咗喺紙上面比較,其實兩款除咗甜度之外,分別真係唔太大,最後我都係揀咗舊版 EDP, 正常 EXTRAIT版應該會比較濃,但可能舊版EDP隻甜味真係太搶,兩隻比較起上嚟我住戴口罩竟然聞唔到EXTRAIT
由於唔知要戴口罩帶幾耐
最後我都係揀咗舊版EDP。如果大家唔使喺價錢上邊掙扎嘅話,鍾意甜啲嘅可以買舊版,想要中性啲容易啲接受嘅就買新版EXTRAIT
至於另一支估唔到我自己會買咗嘅就係FEMININ PLURIEL
清甜嘅花香全人類接受到,好感度100%,完全唔覺得濁,雖然介紹入邊冇mention 水果香,但我自己覺得前調有少少梨味,後調就係成熟小小嘅花香味,呢支噴去返工見人簡直係完美,超級實用
BTW 唔知點解呢支好似冇乜人講?奇怪
最後講吓最新出嘅 the fragrance wardrobe -- Discovery collection for her 2020 版, 比起上年個版本,呢套最抵嘅地方當然就係有最貴嘅baccarat rouge 540 extrait, 其他main item 好似Aqua Universalis, Amyris Femme, Oud satin mood 都係齊晒度, 想樣樣都試吓的話其實呢款都幾好入手,又或者送俾人都好得體
最後埋單呢度4500, promotion期間商場送咗$800現金卷,再加埋贈品,還算可以啦
(就快買香水買到要斬手指
)