返到小田原城方面，6月26日石桓山城峻工，北條家終於屈服於豐臣秀吉既軍威，首先由北條氏直、北條氏房、北條氏規透過德川家康請求和議，而先前死守既韮山城、下田城、鉢形城相繼投降，最終北條氏政、北條氏直父子於7月5日投降。
同一時間，石田三成對忍城發動總攻擊，但響忍城堅守之下，石田三成損失千人大敗。
7月11日，響豐臣秀吉命令下，北條氏政、北條氏照及重臣松田憲秀，以及叛投既大道寺政繁負起戰爭責任而切腹，北條氏直、北條氏規響德川家康幫口下保住性命，流放到紀州高野山。
北條家都投降了，忍城就再冇必要打落去，成田長親開城投降，女兒成田甲斐被秀吉迎娶做側室，由於石田三成慘敗事跡傳遍豐臣家。石田三成返到豐臣本陣，遇到與其不和既「秀吉托兒所」同學 - 福島正則、加藤清正
福島正則、加藤清正指住石田三成恥笑
「（σﾟ∀ﾟ)σﾟ∀ﾟ)σ 唔識打仗既人啊哈哈」
「戰場好危險架，返大坂啦。」
7月26日，豐臣秀吉前往鐮倉、宇都宮城，將從家康過繼既養子 - 豐臣秀康，改為結城晴朝既養子，即結城秀康。豐臣秀吉按照傳統參拜宇都宮大明神，宣布統一日本，並開始處置東北地區，分封如下：
蒲生氏鄉：會津地區
佐竹義重：整個常陸國
伊達政宗：因為去年違令進攻蘆名家，以及小田原城遲到，減封至南奧州13郡
最上義光、南部信直、津輕為信、相馬家、秋田家維持原來領地，而黑川、大崎、葛西、白河等南奧州勢力被改易。
豐臣秀吉安排淺野長政擔任監督人，奧州一帶既勢力大致由蒲生、淺野兩位監管。而關東諸侯如里見家被減封至安房一國、宇都宮家取下野國十八郡、結城家維持原案。
最後，關東一帶無人看管，豐臣秀吉為左控制力量，就向德川家康表示：「幫我捱義氣食左佢。」就咁樣德川家康被轉封關東八州，原來既領地被田中吉政、中村一氏、山內一豐、仙石秀久、石川康長等接手，表面係封個更大既地方，實際係削弱德川家康既勢力，令佢接下關東呢塊剛逢戰火既豬頭骨。
小田原城後 東部勢力配置
次回
「葛西大崎一揆」- 伊達躺著中槍
豐臣政策 - 太閣檢地、浪人停止令、對大名既制肘
