織田德川聯軍於設樂原對峙，我地先講戰爭過程：5月21日早上，兩軍先響東北部交戰，武田軍分五波攻擊織田，首先由四名臣之三：「紅色彗星」山縣昌景、「鬼美濃」馬場信春及「修理亮」內藤昌豐由左、中，右三方同時突擊，與德川軍大久保忠世、織田軍瀧川一益及佐久間信盛交鋒，織田德川不敵武田銳氣，退到第一層馬防柵後。
武田殺入馬防柵時，織田德川鐵砲隊齊射，武田先鋒隊損失慘重，山縣昌景僵持不下，迂迴側擊德川，瀧川一益、大久保忠世、大久保忠佐急忙鞏固右翼防線，武田衝殺不果，山縣昌景先行退兵休息，內藤昌豐及馬場信春牽制織田。
跟住，由小山田信茂、武田信廉率領赤備出擊，支援中央及右翼部隊，內藤昌豐利用小山田信茂赤備部隊既犧牲，突破第一層馬防柵，織田軍退到第二層防守。
而佐久間信盛隊一時擊退馬場信春，一時對峙，但武田右翼已殺入織田核心。此時，德川家康立即派兵到中央戰線及八劍山增援，與內藤昌豐、武田信廉隊陷入混戰，武田軍突破第二層馬防柵防線，但被織田鐵砲隊多次擊退，一時未有成果。
武田軍兩度突擊，暫時佔盡優勢，馬場信春留低部隊對峙，自己回歸本陣，勸武田勝賴見好就收，一時撤退，但武田勝賴堅持進攻，派小幡憲重、小幡信貞、原昌胤率領第三波進攻，小幡信貞發現織田有狙擊騎馬主將既高手，立即下馬混入步兵群作戰，小幡憲重於亂戰中陣亡。
戰況陷入僵持，馬場信春帶領土屋昌次、真田昌輝、真田信綱從左翼突襲織田鐵砲隊，內藤昌豐亦殺入陣中，再度突破第二層防線，第三波部隊與柴田勝家、羽柴秀吉混戰，真田兄弟突擊織田時，被以土壘包圍本陣既織田鐵砲隊伏擊，真田信綱戰死，武田軍突破第三道馬防柵！（《長篠日記》）
呢個時候，武田信豐、穴山信君既一門部隊發動第四波攻擊，武田信豐偷襲位於八劍山一帶既德川右翼，迫德川離開中央，專注右翼，其他部隊冒死正面突擊，響織田第三道防線血戰。
德川軍逼退武田後，武田軍發動第五波總攻擊，馬場信春、內藤昌豐、真田昌輝等人殺敗佐久間信盛，但混戰中真田昌輝陣亡，內藤昌豐再擊破瀧川一益隊，武田軍將織田左翼擊潰。
山縣昌景趁大軍優勢，以「三倍速」殺入織田本陣，但被回防既德川軍阻擋，本多忠勝親自攔截，就響混戰期間，本多忠勝終於出動著名既絕招 - 「喊將殺人」，大叫「條友就係山縣昌景，同我射！」鐵砲隊即刻瞄準並射殺山縣昌景。
武田先鋒因為「紅色彗星」陣亡，士氣大落，德川乘機率兵反擊，武田勝賴親自領軍打算重整旗鼓，但德川從馬防柵殺出，向武田本陣突擊，雙方兵刃交鋒，各自死傷慘重。
武田四名臣 山縣昌景，為紀念其戰績，將為佢撰寫《戰國點將錄》，敬請期待
織田軍趁機突擊武田，武田信廉、穴山信君不理本陣，自行撤離，武田勝賴在內藤昌豐、馬場信春勸勉下，下令全軍撤退。
敗軍當然被追擊，鳶巢山既酒井忠次亦加入追擊，殺死武田殿後軍將領，內藤昌豐親自響柳田殿後，一度擊退德川軍，再殺入德川本陣，被本多忠勝阻止，織田軍夾擊內藤隊，原昌胤、內藤昌豐陣亡。
馬場信春為保護勝賴逃走，向聯軍決死突擊，最終被塙直政殺死，響武田勝賴既豪賭下，武田四名臣戰死三人，而武田勝賴倉皇撤退，遺留大量名貴物品，12000大軍回到甲斐時僅餘三千（呢度指跟隨武田勝賴回到甲斐既人數，未計陣中撤離既部隊及四散保命既逃兵）
織田軍反擊圖 （風林火山文部省）
武田家有唔少名將、重臣死於戰役，導致武田一時青黃不接，慘敗令武田幾乎敗壞信虎、信玄時代留低既家當，武田經此一役，已經難以東山再起⋯
長篠之戰黎到呢度結束，以上過程係綜合《信長公記》、《甲陽軍鑑》、《長篠日記》所寫，大家睇完可能有意見：「聞名既三段戰法呢？武田騎兵團呢？唔係話武田突擊織田，被三段戰法輕鬆射殺於馬防柵前咩？」
冇錯，呢個係所謂通說、電影及遊戲創作常見既一面，但睇完歷史文獻後，相信會發現一件事：武田根本維持優勢，整場戰爭主要係接近戰，係德川回防先有轉折。呢部份又係有些少爭議，《三河物語》呢本刷鞋小說甚至話「要不是我德川照顧，你地織田早就完蛋了」，呢刻我既表情同鄭嘉穎一樣⋯
