Day 07
本身呢兩日好地地
Day7原先得岡山後樂園同高松栗林公園要去
每個地方留半日睇下景點食下飯行下街不知幾爽
Day8就hea到差唔多中午先去倉敷
又有景睇又有街行,最重要有美食廣場
但係前一日係新幹線返姬路既時候...
--------------------------------------------------
:呀仔仲有冇時間去大阪呀,我未行完喎
:冇話唔得既,但係要cut是旦一日行程喎
:吓做乜要cut行程
:本身聽日係去岡山後樂園同高松栗林公園,你話啲相好靚嗰度
:後日就去倉敷同outlet,主要shopping
:如果你要去大阪,咁我cut倉敷唔去喇
:迫埋同一日去哂得唔得呀,倉敷outlet我都想去
:倉敷去大阪市區要2個鐘喎,一來一回返酒店冇左3個鐘
:你幫我拆掂佢得唔得
:唔係唔得,但係聽日好chur架喎,你買定麵包咬啦
:得架喇,我地頂得順
:OK
(
:你地好似冇問過我喎)
--------------------------------------------------
於是今日變左衝行程,將之後嗰日既行程係今日完埋
貴為交通魔神既我當然plan到啦
但我都係擔心兩老頂唔頂得順
而且本身plan落岡山同高松有正野食,而家冇了
今日係Green Day
因為全部都係睇園景同山水
兩老可能會睇到審美疲勞
首先就係朝早7點出發
搭新幹線去岡山食早餐
巧遇尋晚搭過既Rail Star
不過我地唔係搭呢架,係搭下一班さくら
山陽新幹線由關西既新大阪站去到九州褔岡既博多站
同東京站至新大阪站既東海道新幹線直通運轉
所以のぞみ ひかり こだま都會係山陽新幹線出現
而佢地最遠只會去到山陽新幹線南面總站 - 博多
而山陽新幹線本身會同九州新幹線直通運轉
由新大阪站去到九州新幹線南面總站 - 鹿兒島中央
於是就出現另外兩架車 - みずほ同さくら
みずほ對應のぞみ作為路段最快列車,停最少站
ひかり對應さくら作為路段第二快列車,停多少少站
こだま就兩邊都一樣,站站停
所以みずほ同のぞみ一樣,JRP係唔俾搭既
みずほ同さくら都係用N700系,同JR東海一樣
外形一樣但設計有少許分別
行東海道新幹線既車,車身藍線1粗1幼
行山陽/九州新幹線既車,車身藍線得1條
上下多左2條幼金線
仲有寫住"KYUSHU WEST JAPAN"
因為架車行駛JR西日本同JR九州地頭
所以佢地各自都造左一樣既車
只係唔似JR東日本咁又要分E7/W7同埋E5/H5
車窗下面JR個標誌係藍色就係西日本車,紅色就係九州車
JR東海既車除左Green Car之外全部都3-2一行
JR西日本就慷慨少少
雖然自由席都係3-2一行,但係指定席係用2-2一行
坐落去個位感覺明顯大左
姫路去岡山極快,20分鐘就到
見到日本共產黨叫緊口號
咁岡山有乜野早餐食呢
熟悉我既朋友應該會估到
冇錯!又係松屋
位置就係我上一次住既Hotel Abest Grande Okayama對面
兩老食腸蛋定食,我就食燒鮭定食
但好明顯我嗰個就中伏了
條魚細到一個點,又薄又乾
食落正常味道,不過鹹左少少,送飯都OK
問題係我個餐仲貴過佢地