[帶住父母去旅行]12日橫越日本列島 (札幌 ~ 鹿兒島)

架N700好污糟

巴打好孝順
其實你父母都好獨立，起碼夠膽自己周圍行同食嘢，我同老母去，佢去廁所都要我係門口等佢

兩老識自己行街買野食野其實好勁

姬路冇野食咩,又松屋

Day 09
說時快那時快
呢一日就係最後一日用JRP
所以今日做埋最後一次長距離移動
姬路站 - 鹿兒島中央站 819.5km
因為呢一日有埋鹿兒島一日遊同轉酒店
所以要搭最早既車趕行程

朝早6點酒店望出去
經商店街行出去就係姬路站


Checkout完係7-11買早餐就要出發去新幹線月台
時間表第一班車去鹿兒島中央站係みずほ
JNP搭唔到，唯有要搭後一班さくら
但因為我地帶住行李，住博多
所以我地搭さくら541去博多先
用20分鐘時間搵locker放好3個喼
之後上番月台搭さくら543去鹿兒島中央站
如果冇locker就拎埋行李去鹿兒島中央寄存


用左2個鐘就到左博多站
一落車就即刻去之前搵既locker
博多站locker本身都好多人用
好彩呢日唔係假期，仲有大locker剩
所以衝得切番上去月台等下一架さくら


隔離線就係傳說中既博多南線
係山陽新幹線既分支線，駁住博多站同博多南站
本身嗰度係山陽新幹線車廠，唔係俾人用
附近居民爭取係嗰度起站俾佢地通勤
而收費係用番特急自由席，300yen就搭到


博多站係山陽新幹線同九州新幹線既分界站
のぞみ，ひかり，こだま都會係呢站做終點站
之前講過山陽·九州新幹線路段
みずほ會代替のぞみ做最快車
さくら會代替ひかり做第二快車
つばめ就取代こだま係九州新幹線做站站停既車
佢用九州新幹線專用既800系，得6卡
又係水戶岡做設計，所以都係有pattern同用木




終於係當日11點到達鹿兒島中央站
成就：北海道·東北·東海道·山陽·九州新幹線完乘

專業松屋廣告po

姬路坐到博多
我老母已經坐到媽媽聲

cls

鹿兒島買張cute pass 1800 yen 兩日, 包埋搭觀光船去櫻島火山好抵玩

佢哋好enjoy喎
老母話又乾淨又靜又定
連我個愛國老豆都話高鐵俾多20年都追唔到日本

我有買呀
我剩係用半日就回左本

咁趕都去櫻島？

留名等新update

佢嫌車程長

一下落鹿兒島

咁多位放心，去到九州之後就冇食松屋了
去到鹿兒島都係11點，即刻去食lunch先
今次揀左いちにいさん，食薩摩黑豚
位置係鹿兒島中央站隔離AMU PLAZA 5樓
呢間野晚市係專食豚肉shabu shabu
價錢好貴，但係lunch set就平好多


啱啱開門冇耐，張籌已經去到12號
不過等左1分鐘就有人帶位入去
waiter帶我地行過去枱既時候見到個凍櫃
裝左好多肉同埋蔬菜拼盤



我同老母叫左黒豚の野菜蒸し定食
老豆就叫左黒豚丼set
每個餐都唔駛1000yen


我地坐係個bar台邊
前面放住日本酒同埋關東煮
不過個師父除左同我落單之外都係專注切緊野


等左5分鐘啲野就到，超快


黒豚の野菜蒸し定食 (980yen)
呢個set有好多菜十分健康
左下角係醋飯，有幾片紅薑同蛋絲
簡單得黎又幾好食，啲飯好軟熟彈牙


主菜係呢個蒸籠，擺得好好睇
有各式各樣既野菜同豬肉片，左邊就放左生果
野菜有菇，西蘭花，蕃薯，南瓜等
全部都蒸到好林，可以食到食材既原味
蕃薯同南瓜好甜，怕唔夠味可以點籠入面碟野
食唔出用乜野溝成，但酸酸地鹹鹹地咁
玉子都好甜好多汁
豚肉佢用左腩位，肥瘦比例一比一，一層層咁
雖然佢切得好薄，但係夾起已經聞到好香
但絕對唔係大排檔聞到嗰啲油溢味
食落去啲油係舌頭上溶化，好有油香
但食落一啲都唔油膩
慢慢趙既時候仲食到有少少豬肉既甜味
同埋因為佢切得好薄，所以好滑唔鞋


味噌湯我飲得多，最忌就係太鹹同太濃
之前食松屋豚汁其實都睇到佢點整
就係將放左豚汁材料既食物盒加水放入微波爐叮完倒落碗
所以有時個店員求鳩其落太少水，碗野飲完會腎病
當然重口味既人會覺得濃啲飲落爽啲

但呢個豚肉味噌湯唔好以為佢係普通野
waiter一放個set上枱已經聞到好香既肉湯味
入面放左大量白蘿蔔紅蘿蔔薄片同肉片碎
飲落去不得了，調味啱啱好
要知道「啱啱好」呢樣野唔係一件簡單既事
類似射三分波既時候個波係chop一聲咁入樽
而唔係彈框彈籃板入嗰種感覺，個人會好有滿足感好gur
正常食野都會覺得佢鹹左啲或者淡左啲
但呢個俾我既感覺係充滿衝擊力
飲落去首先飲到因為落左勁多蘿蔔而引出既甜味
之後就飲到好柔和既白味噌同清香既豬肉味融為一體
最後係有豬油既aftertaste
白蘿蔔紅蘿蔔薄片全部都好林冇渣，用條脷都撩得爛
啲肉片碎就係用番同一隻豬，所以都係好有肉味
呢個湯真係唔講得笑
應該係我一生人入面暫時飲過最好飲既味噌湯


---------------------------------------------------------------
：嘩點解個湯咁好飲架，點整架
：個湯真係好好飲，我諗下返香港點整先
：阿仔識揀喎，呢間野又唔貴又有菜食仲要好好食
：我嗰個都好正，蛋又香肉又香，飯又索哂啲汁
：你叫我食多個都仲得呀
：但點解我個湯唔係你地個湯黎既
：俾你地揀東京間魚(鈴波)同呢間你會揀邊間做第一
：好難揀喎，嗰間個魚好好食，呢間啲豬都好唔錯喎
：打和得唔得
：梗係得 (不過我對呢個湯既印象高過條魚)

d對白

帶父母去食同玩, 令佢地滿意安排, 個滿足感都幾大

樓主一家好好笑

我們這一家 花師奶一家咁 對白好好笑

lm

吉豬+しゃぶしゃぶ個aet呢

樓主老豆呀媽好正

食左呢餐咁好食既鹿兒島黑豚之後
係時候開始行程
首先就去番鹿兒島中央站個遊客中心買Pass
呢張Cute Pass基本上係必買，有1日券2日券
但我剩係今日用所以買1日券，1200yen
包鹿兒島巴士，電車，櫻島渡輪同環島巴士
某啲旅遊點憑Pass入場費都會有得平
就算我今日行程剩係去櫻島
鹿兒島中央 <=> 水族館口 = 170x2 = 340yen
櫻島來回船飛 = 200 x 2 = 400yen
環島巴士1日任搭Pass = 500yen
咁樣計番已經回左本有突


首先就係行去路面電車站
係JR鹿兒島中央站東口出面
今日天氣極好，啱哂出戶外活動



電車站係中途站，所以有2邊月台
去櫻島渡輪碼頭就係天文館方向
等左5分鐘就有車



搭左15分鐘就到水族館口落車
對住岩岩間舖keep住直行
行到尾上天橋就到碼頭