[帶住父母去旅行]12日橫越日本列島 (札幌 ~ 鹿兒島)

正想講台灣轉機入台證問題
我同老母去過台灣所以問題不大
老豆大陸出世未去過台灣
所以當時專登開Post問連登仔
答案係唔駛

同埋台灣本身有好多野唔俾帶入口
例如所有肉類製品，尤其係豬肉 (因為當時祖國有豬瘟)
新鮮生果都唔得，包括三文治同生果餡既甜品
如果到時係台灣轉機盒生果俾人扣左咪大撚獲
專登問桃園機場，佢好快覆左我
轉機唔係入境，過到安檢就得，唔駛申報


但係有個小插曲
因為我地12點落機，多得香港機場delay
12點半就要準備登機
到左高雄小港機場就有空姐帶我地去轉機
我同老母行先，老豆行得慢係後面
轉機好簡單，睇一睇登機證
行李過機人行過X光機就得
之後上樓梯就會去番登機口
我同老母係樓上等左陣
見老豆都未出現就落番去睇下
原來佢個袋放左2個打火機
香港係俾帶1個打火機出境，有人check漏
所以檢查員過機check到要老豆丟左佢
之後要寫份野填名填丟左啲乜先俾佢走
佢丟哂2個，嚇撚死佢

老豆想去北海道，唔鐘意行
老母想去輕井澤，鐘意搭火車
我想去九州，睇景食好西
橫掂有假，一次過滿足哂大家既願望
俾佢地係其他親戚朋友面前威番次

上中下三路去哂，成就解鎖

小港機場國際航廈唔大，得12個登機口
今次黎到冇得去發大財


越捷航空原來會印啲女女廣告上隻飛機度
聽講空姐啲質素同制服都幾正


頭先落機既出機口係22
今次轉機去新千歲，登機口都係22
屌，咪姐係同一隻機
大家唔駛驚會轉唔切機，遲左大家攬炒


高雄去新千歲要4個半鐘
所以每個位都擺左個枕頭同被
下午1點飛，飛到過去當地6點幾
日光日白好難訓


8點幾機場食左1餐，10點幾食左次飛機餐
2點又食多餐，今次仲要有前菜有包有甜品
左邊前菜係醋漬唔知乜野蘿蔔絲
好酸好難食


主菜係豬肉飯，煮得好林好入味
佢啲蒜蓉汁撈飯勁好食
就算飽哂都食得落


個銅鑼燒係紅豆餡
甜度適中，好食


食完就睇神探比卡超
啲精靈係幾正，但故事過於套路
睇完先到廣島附近，姐係先一半機程


之後再睇埋真·哥斯拉
套野好撚cult，不過好符合日本社會政治現況
睇完到室蘭附近，都差唔多到新千歲

：機票你俾，酒店食野駛錢我地嗰part我地自己俾番

呢句幾正 機票最重皮

飛機比預定時間早左幾個字
所以6點就落機了
過關比我想像中多人
計埋拎行李都要半個鐘先出到關


一出閘就有多啦A夢迎接


本身諗住落機就食飯
但因為食得太多，兩老未食得落住
所以帶佢地行下新千歲機場先
我地出黎嗰度係國際線航廈
好多野買好多野食好多野行
2樓有個どさんこ產直市場
有啲人係度買海鮮拎番香港
不過今次無褔消受


行番出去國內線方向就係國際線航廈大堂
某個綠色Banner有啲格格不入
3樓有好多餐廳又有美食廣場
不過今次食既就唔係呢啲


3樓有一個corner係北海道拉麵道場
入面有10間北海道拉麵舖，各自有唔同口味
我之前係函館食過あじさい，呢度都有


係日本食野如果要排隊既話
嗰間舖頭一定唔會太差
而10間最長隊就係近門口呢一間
由舖面排到轉彎位，起碼30人等緊
而呢一間就係鼎鼎大名既一幻

又唔係喎，佢地睇少我精打細算既功力
機票：9000
酒店：15XXX
交通+locker+入場費：< 9000
食：< 7000
所以其實剩出機票我係賺到笑

cls帶住老豆母12日札幌玩到鹿兒島

吹到機票最重皮定你餐餐食family mart

當地穿州過省既交通+酒店+飲飲食食一定貴過機票，仲未計買手信俾自己，淨俾機票一定有so

北海道拉麵道場入面啲舖唔算太大間
好似一幻咁坐滿都係坐到40人咁上下
所以都等左20分鐘先入座


叫拉麵首先揀湯頭，有原味同特調
之後就揀口味，有味噌，鹽味同醬油味


老母同老豆叫左原味味噌
我飲左一啖湯，有好濃既蝦味同味噌味
但口味適中濃厚，鮮香得黎唔過鹹
佢地對呢個拉麵評價都幾高
湯底本身唔係好似豬骨湯底咁好順滑
因為佢有蔥花有蝦末有豬背脂有味噌蓉
所以飲落會有好多細細一粒粒咁既野
食之前撈勻佢好啲


我就叫左原味醬油，睇到係深色啲
佢地又偷左我一啖湯飲
：好鹹
的確，同味噌相比湯底係鹹啲
不過佢都有醬油嗰種淡淡既焦香味
雖然係鹹但都飲得出蝦味既
肉同蛋就普通課仔，唔算太特別
麵就係粗麵，浸耐左都唔會發漲
食落彈牙掛湯，都唔錯
最重要係碗野只係780yen，十分抵屌


食完都差唔多8點，諗住行下Smile Road
點知好多舖都準備收皮，所以都係返酒店算
新千歲空港JR站係國際線大樓地底，十分易搵
諗住順便換埋Japan Rail Pass唔駛煩
點知去到counter個職員話佢地7點就收工
但如果你聽朝就要用都可以幫你搞既
咁我費事麻煩人地，聽日先去札幌站搞啦

JR北海道係JR各集團最先天不足前景最差既公司
面積太大鐵路路線極長氣候問題導致維護成本極高
住係鄉郊既人越黎越少，少左人搭就cut班次
Cut班次啲人寧願買車方便自己，結果就蝕到要廢線
甚至而家冇一條鐵路線係有錢賺
就算講緊好多人住既札幌市區鐵路都係咁
冇錢賺就要加價，新千歲空港去札幌搭40分鐘要1070yen
我覺得都真係幾貴下

因為次次同老婆去日本都象徵叫佢比機票
我就其他所有洗費
就算坐cx Ana jal旺季都8000蚊來回一張

但酒店閒閒地都1500蚊晚up
當6晚都9000
食野坐車 一定貴過機票

不過一家人開開心心去就得，計住哂咁玩都唔爽，而家只可以靠睇巴打們遊記黎頂頂旅行癮

隔多幾年
2老再老d 去唔到呢種行程
到時一定好懷念

lm幾吸引 同搞笑應該

岩啊 我都係 去旅行由得老婆係咁買 食野又食好啲 樣樣舒服開心就得

因為帶住兩老+一人一個大喼
所以我揀酒店都盡量有以下條件
1. 係大站附近，唔駛成日轉車咁煩
2. 同站距離少於10分鐘，推喼都冇咁辛苦
3. 附近有野行，早啲完行程就係酒店附近自由活動
4. 我自己要1間房因為佢地鼻鼾聲好勁

今次札幌就住Hotel Mystays Sapporo Aspen
Hotel Mystays本身係大型連鎖酒店，評價唔錯
酒店就係札幌JR站北口(西)直行2個街口轉左就係


不過今次係住3人房，3晚要5500蚊
你地應該有個問題，點解好似咁貴既？
原來Rugby World Cup舉行緊，係札幌打緊分組賽
隊伍有英格蘭同澳洲
於是全世界啲人湧哂黎睇搶貴哂啲酒店
所以唔係話俾貴啲就有得住
而係俾人book哂冇得俾你住
不過間房都算幾大，3個大喼放平都仲有位行既


但係當我開電視睇新聞既時候
講緊有颱風吹緊九州
氣象站錄到破紀錄陣風同雨量
好多地方停電，鐵路損壞
仆街，條預測路徑係黎札幌
預定吹襲時間係行程既第四日凌晨
姐係離開札幌去東京嗰日
如果鐵路停駛走唔到，會將成個行程斷纜
呢度可能要住多晚，東京又會蝕左間酒店
於是我考慮左一陣，沖埋涼就開家庭會議

-------------------------------------------------------------
：有個風打緊黎，預計係我地去東京嗰朝吹到黎
：所以我地要早一日走，費事啲行程亂哂
：你地有冇問題
：咁大獲，咁呢度同嗰度啲酒店點算
：我聽朝同下面講早一日checkout，但係我用Expedia book所以冇refund
：我今晚搵下東京酒店，橫掂我Hotels.com已經儲到2晚免費酒店，用左佢住靚啲
：係靚先好講
：得啦，你唔係唔信你個仔掛
：同埋呢度行程得番1日，你地想係近郊(原定Day2)定市區(原定Day3)
：你都傻既，梗係市區啦，同人講住札幌但冇行札幌，笑死人咩
：市區啦，有街行，去啲鄉下地方做乜
：(想去小樽同余市既我)咁好啦
-------------------------------------------------------------

於是就得出以下更改
1. 所有行程提早1日，提早1日離開北海道
2. 早一日係度Checkout，嗰晚係東京用Hotels.com分換免費酒店
3. 原定Day4-10用既Japan Rail Pass轉做Day3-9用
好彩頭先係機場冇換到Pass，如果唔係蝕大本

點會機票最重皮,住酒店個數已經可以貴過機票

上年年頭都食過,,一幻係唔錯

Day 02
基於尋晚搵酒店同埋佢地既鼻鼾聲影響訓得唔係太好
朝早7點佢地都起左身，順便嘈醒埋我
-------------------------------------------------------------
：呢間酒店好唔好
：你話事得啦，唔好係垃圾酒店就得啦
-------------------------------------------------------------
搞掂左酒店之後
今日首先要做既就係換Japan Rail Pass同埋劃位

酒店望落好似係東橫inn咁既色既
酒店左邊係KEIO PRELIA HOTEL Sapporo
2019年5月先開既新酒店，有大浴場浸
我想book但係已經Full左，幹


星期日朝早既札幌站，好寧靜冇乜人
但好多外國人係附近行
南口嗰邊有好多商場
空地搭哂場地準備陣間波友派對




札幌站最早有得換Pass既地方係JR外籍旅客服務處
個counter 8點半開，位置就係北口(西) paseo west門口嗰度
https://tinyurl.com/ya5ujxn9
我8點3去到，門口已經有5個西人等緊
佢地好鐘意狽住個超大個高過人既背囊都唔帶喼
到開門一刻，後面已經排左超過40人
Counter有5個，前面嗰幾個人都冇乜野搞
所以等左5分鐘就到我
我將MCO兌換卷，Passport同劃位紙俾左佢
佢都應該係熟手技工，好快督督督就出左個Pass
但係劃位嗰度佢禁禁下面有難色

我預定劃既班次係
1. スーパー北斗2号 札幌 6:00 - 新函館北斗 9:13
2. * はやぶさ16号 新函館北斗 9:35 - 仙台 12:29 (食飯)
3. * こまち20号 仙台 14:30 - 上野 15:58
*: はやぶさ同こまち係全車指定席冇自由席，立席都係指定席
-------------------------------------------------------------
駅員：(督督督) Sorry we have no こまち20号
：How about はやぶさ20号？ (因為こまち20号同はやぶさ20号係駁埋)
：(督督督) Sorry no，would you prefer standing ticket？
：How about はやぶさ16号 新函館北斗 - 上野？
：(督督督) Sorry it is also full (督督督) wait, I found another train
之後佢將部督督機轉俾我睇，可能知我係行家
個mon睇到14:30 - 18:30仙台開出既はやぶさ同こまち都滿哂
：There is an extra train from Sendai to Tokyo at 14:33, but slower
：OK, that one please (遲1個鐘到姐)
-------------------------------------------------------------
於是，Day3可以全指定席去東京

搞好哂聽日撤離既準備之後
就可以正式開始今日行程
諗住是旦搵間麵包店食麵包就算
係行去地鐵站中間見到VIE DE FRANCE
本身諗住買完拎走咬住食
但想坐係度慢慢食，咁好啦

我就夾左個炸咖喱半熟蛋麵包
可能因為時間尚早啱啱炸起冇耐
個包超級熱辣辣


一咬落去，個皮係脆脆地
入面隻半熟蛋真係半熟既，爆漿
但係個咖喱本身太過濃味，蓋過左蛋味
不過啲蛋漿配合埋個包口感唔錯


呢一日係星期日，咁啱得咁橋有Pass慳錢
札幌地鐵有一張ドニチカキップ
係星期六日同假期先有得買
520yen可以一日任搭所有札幌地鐵路線
(不過唔記得影相)

第一個景點係去白之戀人公園
係札幌地鐵站搭到去大通站
轉東西線搭去總站宮の沢
呢一程已經290yen，來回已經回本
去到站有個好醒目既logo教你經地底通道行過去


一出出口就係公園，之後跟人行就會見到

由於呢日星期日，入面好多人
成個公園充滿歐洲風情
有鐘樓有花園有噴水池
因為個公園7月先維修好
我9月去，樣樣野都好新淨






呢度基本上係所有旅行團必到既點
所以好多外地遊客，當然包括香港同台灣同祖國
唔難見到佢地打卡影相既時候擺既大媽Pose

白色戀人個個都去

LM

本身諗住俾600yen帶佢地入工廠參觀
--------------------------------------------------
：行完可以俾入場費去工廠參觀
：有乜野睇架，要成600yen咁貴
：入去影下相，睇下白之戀人生產線點整
：呢度影都好靚啦，做乜仲要入去
：睇人整做乜，你話有得食就話姐，唔入
：咁好啦
--------------------------------------------------
呢度有得賣白之戀人雪糕
我地每人都叫左杯細既，各350yen
佢地要白之戀人味，我要白之戀人朱古力兩溝
白之戀人味基本上就係佢個餡嗰隻味
但多左浸奶香，不過食耐左會覺得滯
朱古力我覺得真係甜左少少，麻麻地



每到整點成個公園會有表演
鐘樓同工廠外面有木偶做音樂表演


行到公園後面有一加英式雙層巴士
梗係要黎打卡啦


行到入商店入面
左手邊就整緊拉糖工場
2個師父好有心機一路解說自己做緊乜
不過聽得明一半only，都係唔知佢做緊乜


右手邊就係賣野既地方
由最typical既白之戀人全系列
到現場整既芭菲同限定商品
不得不配服日本人對品質既堅持
呢度每一杯野相似度都99%
但係我有排都未返到酒店
今次唯有影相當食左


佢有放啲tailor make既白之戀人產品
我估應該要訂好大批先肯同你做