[帶住父母去旅行]12日橫越日本列島 (札幌 ~ 鹿兒島)

同意，樓主2老可能留係鹿兒島站個手信街就好開心

短暫係櫻島留左2個鐘就走了
有差唔多1個鐘係搭車


係船上面問左兩老對櫻島既睇法
-----------------------------------------------
：有乜咁好去，鄉下地方又曬又熱
：頭先抹汗連張紙巾都有灰
：火山都幾特別，不過冇噴野差左啲
：如果個山噴野你都黎唔到啦
：我覺得係浸腳嗰度望住個火山Hea好正喎
：把鬼，星期日人影都冇隻，姐係啲人都唔黎啦
-----------------------------------------------
去番鹿兒島呢邊突然勁多雲
老母話好快落雨，叫我地快啲去搭車


鹿兒島市最旺既唔係鹿兒島中央站嗰邊
而係天文館嗰邊，有商店街同百貨公司係嗰邊
行番去水族館口站搭電車去天文館通站就得
天文館商店街個規模比較細
有少少似岡山站隔離嗰個
雖然都有啲野行，但都好快行完

呢間白熊菓琲係鹿兒島都幾出名
專門係食刨冰既老店
不過食完飯冇耐仲未肚餓
唯有影相當食左



係Day 10既下午，終於都第一次落雨了
仲要係好撚柒鳩大雨
兩老自己有帶縮骨遮，但遮唔到我
所以借左阿媽把遮去前面7-11買把大遮


結果場雨落左1個鐘就停左
之後嗰幾日就再冇落過雨

佢地鐘意睇景得黎又有野行下
所以輕井澤呢type就fit哂佢地

熊本以前帶過老母去
嗰陣熊本城冧左冇耐
下通同城彩苑嗰邊得10幾個人行
荒涼得好恐怖

Bingo!
係嗰度行左成粒鐘逐間揀

上年9月去熊本城都仲修復緊 我諗起碼2 3年先攪掂

我有一年聖誕附近去咗
個xmas market正過博多嗰2個
感覺上有人情味d冇咁假
但係對熊本冇其他印象

感覺上都多野睇 但冇地鐵真係唔多方便

櫻島都叫少人，東北點算

完全搞掂冇二三十年都唔場得

我果時去完熊本返香港
一返到香港果日就話熊本大地震
最心酸係成個阿蘇神社爛晒

我黎親日本都會買把大遮，貪佢夠硬淨
我第一次去日本係Lawson買嗰把遮
拎到返香港到而家都未爛
今次買完就即刻俾人串
----------------------------------------------
：阿仔你買完把遮就停雨，浪費哂啲錢
：頭先咁大雨，冇遮點走
：反正日本啲遮咁硬淨，拎番香港用咪得
：做乜唔買縮骨遮，拎住行黎行去麻鬼煩
：日本啲縮骨遮不了，之前買過好快爛
：反正寄倉行李大把Quota，驚乜
----------------------------------------------

既然停雨就返鹿兒島中央站
唔係架架電車都上得
要搭2號紅色線先返到去
10分鐘就到
之後行番去九州新幹線閘口出面條手信街
設計類似百貨公司食品部，每間舖就1個專櫃
除左普通手信之外仲有急凍鹿兒島黑豚 (冇得拎番香港)
呢度我同兩老就分開行
因為呢度聽到好多廣東話，大把人翻譯俾佢地聽
同埋佢地自己都識出去搵野食，買野冇難度啦
我就用番我個速度行完買好哂啲手信
之後走左去綠色窗口搞指定席
返到黎佢地都行完，買左一堆九州限定卡樂B
----------------------------------------------------------
：做乜咁多野唔買走去買卡樂B
：九州限定呀嘛，又抵買
：俾啲姨媽姑姐小朋友當零食過下口癮
：你過去佢間舖啦，有得試食，好好食架

行左過去間舖度......
：衰鬼又幾好食喎
結果我都買左幾盒自己食
------------------------------------------------------

行完都差唔多5點
本身準備食晚飯嗰間野啱啱開門
所以帶佢地去食飯先
黒かつ亭，出名食炸鹿兒島黑豚
不過間舖搬左，唔好去錯


雖然呢度都有炸蝦同炸雞
但黎得呢度梗係要食佢啲豬
呢度有2個部位俾你揀，里脊同菲力
其實就係我地平時講既豬扒同豬柳
豬扒冇骨，外面有舊肥膏，比較鞋身
豬柳就細舊啲，冇肥肉，但係就比較滑


成個set好澎湃好多野
除左有炸豬扒同椰菜絲沙律之外
仲有飯有湯有小碟有醬有芝麻


唔知係咪有鹿兒島黑豚加持
呢度啲味噌湯又係好撚好飲
材料只係有白味噌，黑豚肉碎，蘿蔔粒同蒟蒻粒
但都係好香，飲落都充滿蔬菜既甜味
蘿蔔粒又係煲到好林，蒟蒻粒就增加口感
不過同いちにいさん比就差左少少
但都係我飲過既味噌湯排名頭10


呢個小碟就係豬腩卷，加左少少醬油
簡單得黎食到豬肉既原味


上等里脊其實就係厚切豬扒
1塊成cm厚，反光都睇得出佢好多肉汁
咬落去唔係好林，都要啲牙力咬開
趙落豬味好濃，但同時食到豬油既香味
如果唔鐘意肉味既人可能會覺得麻麻
豬扒醬酸酸甜甜，中和到啲豬味
之後偷左兩老舊里脊同菲力
里脊就薄過上等里脊，我覺得好趙啲
如果鐘意啖啖肉既滿足感就上等好啲
菲力就真係唔錯，瘦得黎唔會硬
不過就少左里脊邊既肥肉，冇咁香口



食緊既時候都有幾家人過黎食飯
全部都係香港人台灣人

食完飯6點，都差唔多天黑


頭先book左18:29呢班さくら572
仲有20分鐘，帶左佢地行左陣BIC CAM
但係果然係鄉下地方，冇乜野好買


九州新幹線專用800系つばめ - 燕
呢架車站站停要搭成2粒鐘，不了
搭番さくら就個半鐘多少少就到
當然みずほ最快，1個鐘15分鐘就到
不過JRP搭唔到


係車上面間兩老今日行程如何
----------------------------------------------------------
：把鬼，星期日人影都冇隻
：不過啲野都幾好食，尤其係lunch
：第一次睇火山冇野爆出黎有啲可惜
：但係我覺得松乃家個豬扒好食過頭先嗰間喎
：... (早知唔帶你地黎鹿兒島)
----------------------------------------------------------
下次搭肥薩橙去西出水先


返到博多就拎番行李去酒店
呢度又係World Rugby Cup主場戰
仲要我地係夾住2場大戰中間
分別係法國 vs 美國同加拿大 vs澳洲意大利
雖然都係世界杯魚腩隊
但係都多得佢地，搞到我搵唔到平酒店

美國都喺魚腩部隊 !?

今次book既呢一間酒店之前黎褔岡都住過
NISHITETSU HOTEL CROOM HAKATA
係筑紫口行5分鐘就到
酒店地下有Lawson

Checkin大堂就經扶手電梯上1樓
酒店價錢因為World Rugby Cup炒到貴哂
兩老雙人房3晚2600蚊，我單人房就1800蚊
不過我係Expedia金會員，送3日免費早餐
呢度有西式餐同和式餐，可以試哂



仲有一樣最煞食既地方係有溫泉浸
Checkin既時候會俾2張感應卡
1張係房卡，1張係溫泉浴場卡
位置係酒店地下，分開男女兩邊，要拍卡入
浸完可以經酒店住客專用入口去Lawson買奶飲
買完拍番房卡入番酒店


我嗰間單人房唔算好大，但都好舒適
張床同姬路嗰間比就細啲，但都有4呎床
廁所有個窗，方便去緊廁所嗰陣都睇到電視


單人房最大特色係有部按摩椅
辛苦左咁多日，沖完涼按摩下一流
兩老雙人房就冇左按摩椅變左梳化
但係多左部iPad可以睇天氣同上下網
呢度每日都會每人送1支水，都算係幾貼心


另外佢每日都會放1舊點心係枱邊
同時附有係邊間店出品同邊度買
應該都係啲合作廠家贊助
有時夜晚有少少肚餓都可以食下


沖埋涼plan埋聽日行程都搞到10點
唔落去浸溫泉了，都係早啲訓聽朝食早餐
Day9 完

Rudby分組賽打4場輸哂4場
仲要場場都俾人大炒

如果開番關我都想去番九州嗰邊
尤其係豐肥本線全線再開
就可以一個圈去哂阿蘇火山，由布院同大分別府
嗰頭唔算多人，但係環境好舒服

睇落黒かつ亭好似好D

由布院別府麻麻

lm

推

我都想去
當年跟學校團走馬看花咁去過之後已經想翻兜
但目前都只係翻兜過由布院一次

Day 10
呢幾日完全唔駛擔心朝早食乜
因為包早餐
今日食和洋buffet，係大堂另一邊
我地住3日，checkin既時候就每人俾左3張食券
食1次就用1張


和洋buffet呢邊入餐廳之前要除鞋
入面好大，枱都好大，位同位之間距離都好大
我地3個人就霸左張可以坐到8個人既枱


之前食過咁多間酒店早餐
呢一間係環境最好同最多野食
剩係飲既野就超過10種，你講得出既基本都有
湯就除左味噌湯之外仲有粟米湯
野食就超過20種
和食有有魚，炸物，筑前煮，咖哩飯，燒賣，玉子等
洋食有炒蛋，腸，煙肉，沙律，肉丸，薯餅，栗米片等
樣樣野都好好食


酒店入面都掛左旗


今日係小倉門司港一日遊
其實就係博多搭去小倉，再轉普通車去門司港
而博多搭去小倉有3條路
1. 山陽新幹線，15分鐘
2. 鹿兒島本線特急，~45分鐘
3. 鹿兒島本線普通(站站停)，~個半鐘

JRP已經用完，姐係要用自己課金搭
搭站站停就實俾兩老屌話呢度去岡山都到
自由席黎計新幹線其實同特急差唔多錢
都係差400幾yen，但係時間差3倍
不過新幹線佢地都搭得多
今次一於帶兩老搭下JR九州出名既觀光列車
咁啱有一張Pass啱哂呢個要求
就係JR九州鐵路周遊券(福岡廣域版)
可以2日內任搭褔岡地區既特急自由席
但唔搭得新幹線
呢張野係遊客先買到，所以都要預備Passport
https://www.jrkyushu.co.jp/chinese/widepass/info/

福岡呢度作為九州地區最大既城市
再加埋Rugby World Cup帶黎既遊客
我9點半去到綠色窗口條隊已經差唔多排到出門口
前面啲人1個人拎住10幾本Passport換Pass
啲駅員做慣手勢都做得幾快
不過有個好笑既地方係我見到個韓國人
佢買完Pass想碌卡，但用左5張卡都Fail，最尾屈服俾現金

排左半個鐘有多終於到我
個駅員個名牌隔離掛左個Tamama牌，應該係新人
-------------------------------------------------------------
駅員：What can I help you?
：3 Fukuoka Wide Pass please
：Please wait a moment
(之後佢轉左去後面問前輩，不過我聽得明，以下係翻譯)
：想問下Fukuoka Wide Pass擺左去邊
前輩：呢張野呀...好耐冇人買過喎...放左係邊呢...
前輩：，你睇下係唔係平時啲周遊券隔離啲櫃
：明白
(走左去搵好似唔係好搵到)
(之後入左Office搵先搵到，搞左成5分鐘)
：Sorry for waiting, here it is
---------------------------------------------------------------
咁又正常既，啲人買開Pass都係全九州/北部/南部
好少可剩係玩褔岡廣域，俾左難題個新人
張Pass都幾抵，當時3000yen，而家貴左60yen
博多去門司港來回都4000幾yen，1日回左本
第二日想encore去番都唔駛補錢

去到小倉既特急基本上係得ソニック音速號
係博多向北經小倉再向南以大分做終點站
架車都十分闊落，張椅都幾好坐
不過搭慣左新幹線，覺得特急好撚慢



今次架ソニック係885系
除左用係度仲會用黎跑博多-長崎既かもめ
以20年車黎講算keep得幾新淨
老豆問左一個好好既問題
-------------------------------------------------
：阿仔，點解架車咁似高鐵既
：梗係啦，個樣抄佢架嘛 (雖然最終大家都係參考德國ICE)
：...
-------------------------------------------------