[帶住父母去旅行]12日橫越日本列島 (札幌 ~ 鹿兒島)

追咗幾日終於追完，樓主同2老啲對話好好笑
2老真係幾精靈，會自己行同搵嘢食
有機會帶返老豆去HARUKAS啦

叉燒紙咁薄
同埋日本拉面黎講好貴下

真，同一個價錢大把選擇 ，重點塊肉

我發覺我有backup到幾年前第一次去日本既相上cloud
執番好啲相整番個懷舊之旅遊記先

一蘭都真係好撚貴
不過兩老未食過就帶佢哋去啦
費事佢啲fd話做乜去博多冇食一蘭

食完一蘭又係行街時間
行左去運河城嗰邊俾佢地慢慢行
入面啲舖頭好大，都算係幾好行
而且多老母鍾意既舖，所以都行左幾個鐘
然後老豆頂唔順自己走左去吸煙區食煙
行完就去番博多就繼續行商場
行到冇野好行，上埋HAKATA CITY天台
有個公園仔坐下，有俾小朋友坐既火車
仲有個鐵道神社
不過因為都幾多人，費事偷影喇

遊客中心擺滿哂Rugby World Cup啲單張
隻公仔好得意


話咁快又到晚飯時間
亦都係離開日本前既最後一餐晚飯
都盡量想落啲心思諗下食乜
於是去睇Tabelog望下博多有乜高分食店
點知10間有9間都係拉麵
食過2間我就唔想食多次
博多名物都好多
但老豆唔食牛就食唔到牛腸鍋
明太子嗰啲又好難當正餐
水炊鍋本身價位又太高
結果就揀左Tabelog評分相對高既はかた天乃
位置係KITTE博多 B1F嗰堆餐廳中間
主要係食和式料理，尢其係魚類料理
都幾多人食，我地6點半過去都差唔多滿座
老母叫吉豬定食，老豆叫銀鱈魚定食
我就叫燒鯖魚定食
全部定食都有飯，味噌湯，沙律，蒸蛋，醃菜同筑前煮
每個set都係大約1000yen，都唔算貴


湯同沙律就正常發揮，冇乜特別
筑前煮煮得好入味，啲菜林得黎但唔爛
蒸蛋滑到好似豆腐花咁，又好重蛋味
上面有一滴烏梅醬，我覺得太搶味
就咁食好食啲
燒鯖魚燒得好香口，個皮脆卜卜
看似好乾咁，但其實夾上黎都好嫩
但因為係東京食嗰餐魚實在太高質
呢餐魚就真係比下去
如果呢餐魚味道係10分既話
嗰餐起碼值80分
老母就話鹿兒島炸豬扒好食好多
老豆就話東京食嗰餐魚好食好多
早知就唔食咁多好野啦
冇比較就冇傷害



食完飯就自由時間
第二朝10點幾機，食完早餐就要走
所以趁而家買哂要買既野
上次去日本都買左把遮寄倉
翻到黎支骨斷左
尤其係嗰個時勢遮都叫做敏感物品
今次我就去左Daiso買較剪膠紙啪啪紙包實佢
順便睇住新聞執喼

Day 12 Last Day
話說前一晚老母去Tokyo Hands買左把遮
於是叫埋我包埋佢
以本人既美術造詣就包到咁撚樣
膠線較剪呢啲有刀片既野
我又唔會用完即棄既，就放左入喼


係酒店食左少少早餐就去機場
係博多去機場有兩個方法
一個係搭地鐵去福岡空港駅，5分鐘就到
但褔岡機場既國際線同國內線大樓係跑道打對面
而地鐵係去國內線，要去番國際線要轉shuttle
預多10分鐘等車同15分鐘車程，姐係半個鐘
另一個方法就係好似我咁，搭巴士
我住係博多巴士總站對面，過條馬路就到
而且可以直達國際線大樓
我夾好時間搭直行車，姐係中間冇站直到機場
本身驚返工時間會塞車，結果15分鐘就到左



去到機場就去左磅喼
我地搭華航去台北轉機，每人包30kg行李
結果3個人3個大喼+嗰舊物體加埋都唔夠40kg
跟住老母就塞番啲衫落去先啱啱過40kg
而且因為呢日係平日，我地又早到
Check-in只係用左5分鐘
不過地勤見到嗰舊物體投以奇怪既目光

過埋關入到禁區都係9點都未到
於是就係老母行免稅店既時候
而我就係將佢地剩低嗰啲散銀用哂佢
買左Royce同LeTao，啱啱好駛哂啲1,2,5yen


我地10:55機，班機10:45先到
結果遲左差唔多1個鐘先上到機
好彩我當日買唔到1個鐘內轉機既機票
如果唔係爆機位番唔到黎就有排搞

WELCOME BACK TO HELL

華航我又唔擔心，上次因為台灣打風搞到我喺高松返台北駁唔返當晚返香港嘅機，佢即刻安排第二朝早機畀我+賠咗晚plaza premium lounge嘅單人房

一路返工一路追更新, 睇到最尾都有種去完旅行返地獄既感覺
好想去旅行呀~~~仆街武漢肺炎!!!

呢間真係唔錯
睇完又想再去九洲上次冇plan淨係鳩行

今次架機雖然係大機，但係超爆
至少我望到前5行後5行都係坐爆既
隔離係一班戴住黃帽著哂校服既幼稚園學生
佢地揸住日本護照，睇黎係交流團
嘩乜啲學校咁撚有錢既
不過帶團啲老師Auntie黎，唔靚

因為遲起飛，所以12點半先有飛機餐食
今次係蕃茄海鮮意粉，餐包，栗子慕斯，沙律同蘋果
個意粉正常味道，不過意粉林左少少
栗子慕斯好撚好食，啲栗子味好濃
而且好香奶味，口感又細滑
沙律就係三文魚蕃薯沙律，又係好撚好食
因為蕃薯蓉夠甜，又雪得夠凍
餐包另上，空姐拎住個籃行黎行去問人要唔要
個包好熱辣辣又夠軟，就咁食都夠好食
隔離個正太食哂啲配菜剩係唔食個意粉
𡃁仔細細個咁撚識食




最後2點先落機
今次老豆醒目，冇帶火機
所以轉機安檢都好快搞掂
--------------------------------------------------------
：咁如果呢度冇火機賣你點食煙
：係吸煙室問人地先生可唔可以借個火咪得
：記住長著Wifi等我地搵到你
---------------------------------------------------------
原本睇機票既時候有2個鐘轉機時間
但係到我買機票嗰陣就應該賣哂
結果得番1粒鐘內同4個鐘後
咁唯有揀4個鐘後嗰班啦
我同老母去過台灣，可以搞入台證出機場
不過老豆未去過，嗰陣又搞唔切
無謂賴低佢啦，況且4個鐘台北市區來回都有啲忟
但今次老豆以一個冇入台證既旅客身份
成功踏足台灣2次，威俾啲fd子睇
係出唔到境姐

之後就帶佢地行哂成個航廈
桃園機場有2個航廈，都係呈H形
但佢地會上下駁埋變成咁：
H -> 1號航廈
H -> 2號航廈
係地圖度番1邊H既長度係1.4km
就咁睇相都知好撚長見唔到盡頭


行哂2邊+掘頭路返轉頭分分鐘行左4km
佢每個登機口都有唔同主題
側邊有唔同舖，有衫有免稅店有化妝品
不過最奇怪係佢冇便利店，想買唔同野飲都冇

最弊我第二日要返工，唔好搞喇

所以不嬲會預多一日做buffer+可以打遊記

對比日本，台灣機場禁區就失色好多
一黎冇便利店，想睇下雜誌買下飯團野飲都冇
下下要去啲明顯比較貴既餐廳買
二黎佢有嗰啲單向扶手電梯
可以令到啲人快啲去到登機橋
但係我地呢啲想行遠少少既
如果行番轉頭就剩係可以行路
咁就真係好撚遠
官方話一邊都要行成半個鐘



行哂2邊都係3點幾，但仲有2個幾鐘先上機
橫掂都冇乜野好做，唯有食下午茶
二號航廈H形大樓中間"-"個位
有個小型美食廣場有野食
呢度俾錢唔駛一定用台幣
悠遊卡同信用卡都俾到錢
黎得台灣我就梗係試牛肉麵啦
隔離有M記，但都要成200NTD
咁我貴少少食牛肉麵好過啦

禁區食野點都貴架喇
呢個半筋半肉牛肉麵餐要NTD300
除左有麵仲包左小食同飲品
呢個牛肉麵湯底好正好濃
飲完全身都會暖哂，姐係出哂汗
後面有一pat辣牛油
加埋落去個湯度除左香左之外
加左少少辣味既牛肉湯我覺得仲好食左
牛筋炆得好林，咬落去仲有彈牙既口感
牛肉雖然就得2舊，都係都好入味
不過可能火候勁左啲，硬左少少
麵就差啲，可能因為佢索湯，所以林得滯
小食係滷豆皮，麻麻地
飲品係冬瓜茶，都好消暑



食完之後行番去登機橋等上機

今次飛香港架機就好準時起飛
但今次係細機，得公家電視睇


頭先褔岡程飛機餐lunch咁豐盛
點解今次飛香港餐dinner差咁多既
可能得2個鐘機驚你食唔切


主菜係肉醬意粉
個汁都幾惹味，但個敗筆又係意粉
仲林過褔岡飛機餐個意粉
用叉夾起直頭斷既


呢舊甜品類似係方塊酥咁
甜甜地脆脆地咁，麻麻地好食


話咁快就2個鐘，就快到香港
咁就完左12日


以前搭開UO老母，拎行李每次都delay
今次搭華航拎行李就好快
過完關去到行李帶就已經陸續送達
20分鐘已經拎哂行李，但差左我嗰件藝術品
等到個mon寫住全部送達都未到
仲諗住走去睇下係咪去報失
--------------------------------------------------
：吓，海關係咪塔左我地把遮當係武器禁運
：我去報失係咪會俾人拉架
：把遮咁平，等多陣都冇就算啦，唔好搞咁多野
：阿仔，係咪嗰件 (用手指向遠方)
--------------------------------------------------
我望向老豆指嗰個方向
有個著住淺藍色衫既uncle
應該係搬行李嗰啲staff
唔知係邊度行出黎
雙手拎住我件藝術品行去行李帶放低
周圍啲人都眼望望呢舊乜撚野黎
我就拿拿聲拎完就過關
啲關員見到呢舊野又冇乜反應

雖然話政治形勢咁差
但機場都仲係好多人

後記

今次用12日帶兩老由北玩到南
本身都好撚驚中間斷纜
行程開頭打風真係嚇撚死
好彩用番自己以前積落啲分住免費酒店
再執番個行程令到個行程正常番
加上有晴天娃娃屬性加持，12日得1個鐘落雨
都去到哂大部分預定要去既地方

兩老本身都精靈同聽話
所以有時都可以放佢地去自由活動
搭車搭好耐都唔會有太多怨言
又唔會話訓到唔知醒搞到miss行程
更加唔會好似啲師奶四圍大叫咁
所以行程先至可以咁暢順

最重要係兩老覺得我帶團好正
滿足哂佢地想去既地方
揀親啲餐廳間間都好食，大部分又唔貴
酒店都好舒適，交通又方便
今次佢地都話1皮野團費駛得抵
搞到見到啲姨媽姑姐都嘈住請我去日本叫我帶團
但老實講，我就係知父母性格先會帶佢地去
姨媽姑姐嗰啲平時玩開大陸啲幾天團
再聽埋父母同佢地玩嗰啲豐功偉績之後
佢地都係包車去啦，實影衰香港人
我一定頂唔撚順佢地

至於會唔會有下次？實會既
今次佢地已經玩左好多地方
北海道有札榥，東北有仙台
關東有東京，輕井澤
中部有名古屋，關西有大阪，姬路，岡山
四國有高松，九州有褔岡，鹿兒島
搭齊哂大部分新幹線
應該呢幾年佢地都唔會chur我叫我帶佢地去日本架喇
可能變成台灣環島遊，帶下佢地食下野睇下風景咁
但係我睇肺炎單野下年都唔知搞掂未

[帶住父母去旅行]12日橫越日本列島 (札幌 ~ 鹿兒島) - 完。

BTW我仲有大把貨剩，以前啲相有backup
可以寫下我第一次plan行程去東京同京阪
你地想我寫邊一篇陳年遊記先
2015夏 - [毒撚日本自由行]兩個小生遊日本4天團(東京篇)
2016冬 - [毒撚日本自由行]兩個小生遊日本7天團(京阪奈篇)

兩個小生

揀寫第一次去日本

東京

又得姐
2014夏 - [處男親善訪日之旅]7天京阪鴨仔團
2015夏 - [毒撚日本自由行]兩個小生遊日本4天團(東京篇)
2016冬 - [毒撚日本自由行]兩個小生遊日本7天團(京阪奈篇)

東京

你d遊記好好睇 好羨慕兩老仲咁精靈可以周圍去 d對話又好好笑 通常帶父母去旅行都比較麻煩 樓主應該係幾有耐性既人黎

繼續寫多d想睇2014果個

處男