［短篇］香港都市傳說 - 一筒歸西

（三十三）援兵（９）

「喂，你哋無事呀嘛？」

就在眾人不知道怎樣離開之際，一道亮光突然從常寂園的入口處傳來，緊接其後的，是阿軒的聲音。

「霍振軒，你終於捨得出現呢咩！」

怡欣看到阿軒後，馬上帶著責備的語氣走過去，但眼神卻是求救的眼神。

阿軒看了看現場的環境，再看到哲瑋跟他打了眼色，雖然不清楚詳情，但大概也猜到沒有甚麼好事。

「哦，其實我頭先喺常寂園出面搵咗你哋好耐㗎啦，但一直都唔見你哋。跟住我啱啱見到常寂園入口有一道光出現，仲見到有兩個人好快咁樣跑走咗。原本我諗住追上去嘅，但聽到你哋把聲，所以入嚟搵你哋囉。」

安映聽到阿軒的說話後，激動地問。

「咁你見唔見到嗰兩個人去咗邊呀？我哋依家去追會唔會追得切呀？」

阿軒被安映的反應嚇了一跳。

「應......應該追唔切啦，頭先我見佢哋跑得好快，同埋唔知係咪錯覺，佢哋跑跑下喺我面前消失咗，完全見唔到佢哋個身影。」

「點會咁㗎？你頭先明明話見到佢哋跑出去㗎，點解又會唔見咗㗎？係咪你睇漏眼咋？你諗真啲。」

「安映你冷靜啲，出面雖然好黑，但兩個咁大嘅人我好難睇錯嘅，佢哋真係跑到一半就消失咗㗎。」

「啫係連佢哋走去邊都唔知......咁阿哥點算......」

阿軒看到安映滿臉愁容，不知如何應對，只好看著其他人用眼神求救。

「我哋都係襯依家離開呢度先啦，如果唔係陣間又走唔到㗎啦。」

哲瑋看著怡欣，要求協助。

「係囉係囉，我哋出返去先啦。正宇你幫安映手扶一扶佢阿哥啦。」

眾人從常寂園入口離開後，再回頭一看，那楝本應倒塌了的建築物，像被人用魔法修復好一樣，變得又新又漂亮。

「其實我哋頭先係咪發緊夢咋，成楝建築物冧完又起返，仲要變到咁新淨。」

哲瑋看到建築物，不禁感嘆起來，卻未料這樣一句話又勾起了安映的情緒。

「如果呢一切都係夢你話幾好，就算依家有幾恐怖，隔日起身都可以無事......」

怡欣怒視了哲瑋一眼，怪責他亂說話，但哲瑋則一臉無辜。

「安映，你放心，仲有一個禮拜多啲，我一定會幫你哥哥搵到方法，我應承你！」

正宇搭著安映肩膊，令安映有一種安心的感覺。

「好啦，大家都攰啦，正宇，你陪安映同佢阿哥返去先啦。」

正宇看了看安映，安映點頭表示同意。

「咁你哋幾個呢？」

「我哋仲有啲嘢傾，你送安映佢哋走先啦，有咩事打畀我哋。呀，仲有我會同你細佬講聲你無事㗎啦，你安心陪住安映啦。」

待正宇他們離去後，怡欣和哲瑋才把剛剛發生的事情告訴阿軒。

「吓？啫係個道士搞到一鑊粥之後，唔單只咩都做唔到，仲要無晒啲法力呀？」

「係呀，不過個道士臨尾又說服左安映哥哥個朋友跟佢走，之後會點就唔知啦。」

「佢都衰咗一次啦，仲跟佢走？」

「話唔係咁講呀，哲瑋，唔知你頭先有無留意到，個臭道士臨尾講咗啲嘢之後，佢有望咗安映一眼，我硬係覺得佢想對安映不利。」

「吓，唔會啩？我真係無留意佢係點喎，如果佢又出現嘅話，我哋應付唔到喎。你頭先都試過佢啲嘢㗎啦，佢雖然最尾轉移唔到個詛咒，但佢啲咩鬼仔呀，法術係堅㗎喎。」

「我都知，所以我先擔心安映佢哋咋。阿軒，你有無計呀？你個錦囊咁勁，會唔會可以搵個師傅幫手呀？」

「呢層......我都要問下我阿媽先知，因為嗰陣我都好細個，已經無乜印象，不過都可以試試嘅。」

「咁呢邊靠你啦，呢單嘢真係唔係我哋幾個可以應付。」

「我一早講叫你哋諗清楚先㗎啦！依家搞到咁都唔知點收科！」

「唔緊要啦，唔叉隻腳埋嚟都叉咗囉，頂硬上啦。你咪當幫正宇溝女囉，咁諗你會開心啲嘅。」

「係呀，呢次我撐哲瑋，最多下次你有咩麻煩嘢我哋都照叉隻腳埋嚟囉。」

「我啋過你把口！得啦，天一光我問下我阿媽啦，咁好未呀？」

三人邊說邊離開常寂園。

而被遺忘的中年男子，於翌日被附近的晨運客發現倒臥在梅樹坑遊樂場附近，聽說死狀恐怖，而屍體口裡能看見一隻麻雀「西」，手上則握著一隻一筒。

跟輝仔和阿榮的情況一樣，新聞報導出來只是小小的篇幅，照片亦沒有流出，看來也是給甚麼人壓下來了。

終於有文

比賽參加成點

盡咗力，依家等結果
我返出去寫文先

有緣嘅聽日見

Lm

正皮留言

（三十四）天命道堂（１）

「阿媽呀，有啲嘢想問你呀。」

「做咩呀衰仔，又洗大咗呀？」

「唔係呀。」

「咁今次衰咩呀？」

「阿媽，你可唔可以唔好講到個仔好似嚟攞債咁得唔得？」

「得啦得啦，講笑啫，咁咩事呀？」

「無，你以前咪幫我求過個錦囊嘅，我想問呢，個師傅係邊個，同埋你仲有無佢地址咋嘛？」

「呀，你個衰仔仲話無事！咪叫咗你唔好掂埋啲神神鬼鬼嘅嘢囉，你又唔聽講啦？你唔係同我講出咗咩事呀？」

本來還在和阿軒輕鬆談笑的軒媽，聽到阿軒提到錦囊的事，便馬上嚴肅起來。

「冷靜啲先，啫係嚴格嚟講就唔係我出事，但又唔可以話唔關我事咁囉。」

「點呀你，咪同我兜圈啦。」

「其實係我個朋友出事，好似話中咗啲唔知咩詛咒，咁我又諗起你幫我求過個錦囊好似可以趕走啲衰嘢，所以咪問下你囉，小事嚟啫，唔好太緊張。」

「你拎個錦囊出嚟。」

「吓？」

「吓咩啫，叫你拎出嚟就拎出嚟啦，快手啲。」

阿軒無奈地交出錦囊。

「呀，你個衰仔搞到個錦囊咁仲想扮無事？」

「吓，搞到點呀？個錦囊無穿無爛喎？」

阿軒嚇了一跳，馬上回應。

「你個人就無穿無爛，個錦囊啲色甩晒啦，你搞咩嚟呀？嗰陣個師傅話正正常常個錦囊夠幫你趕走啲遊魂野鬼唔嚟騷擾你，如果好勁嘅先會甩色甩到咁囉。」

「呢層......其實......」

阿軒被問得無言以對，也不知怎樣說起才好。

「唉，你咁大個人我都管唔到你啲咩㗎啦，你自己睇實啦。呢度有個地址，你去呢度搵師傅幫手啦。」

阿軒從軒媽手上接過一張泛黃的字條，上面寫了一個地址。

「天命道堂？個命咁好笑嘅？」

怡欣拿著泛黃的字條，好像不太相信這道堂能幫上忙似的。

「係囉，張紙條又殘又舊，個道堂會唔會執咗㗎？」

哲瑋也抱有懷疑地問。

「我唔知呀，我都係問我阿媽拎咋。佢話我細個有去過，但我已經無印象。係呢，正宇同安映呢？」

「我打過畀正宇，佢話安映阿哥仲未醒，佢想陪多安映一陣，叫我哋去住道堂先喎。」

「咦，到啦到啦，阿軒，哲瑋，呢邊呀。」

三人來到一楝舊式唐樓的其中一個單位，單位外沒有特別的佈置，那些常見的神主牌、香爐等等都看不到。

要不是大門上方有一塊殘舊的牌匾，隱約看見「天命道堂」這幾個字，否則肯定會以為這只是普通的民宅。

阿軒按了門鈴好幾次，但也得不到回應。

「係咪無人呀？」

「定個門鐘壞咗咋？我好似聽唔到有鐘聲喎。」

阿軒放棄了門鈴，改為直接敲門。

然後這次終於得到回應，大門緩緩打開，先映入眼簾的，是一名只比三人略為年長的男人。

這男人頗為高大，穿著亦不失時尚感，很是好看。

但偏偏出現在這個道堂裡，卻是完全不搭，而且更令三人懷疑這裡是否真正的道堂。

「你好，我哋想搵張天命師傅，唔知佢喺唔喺度？」

「哦，你搵我老豆，佢打緊座，仲有一陣就搞掂㗎啦，你哋入嚟坐住先啦。」

進入到道堂內，總算有種來對地方的感覺，除了在中央的地方有著一個規模不小的道壇外，室內飄蕩著一種很香的味道，感覺有種令人精神為之一振的感覺。

然後牆上有一些對聯和一些應該是道家先師的畫像，看著有一種安詳的感覺。

「我哋似乎搵啱地方啦。」

「但頭先開門個男人，好似同呢度格格不入咁，而且你睇，道壇隔離有個差唔多年紀嘅男人喺度打座，佢又係唔似修道嘅人，呢度係咪真係幫到手㗎？」

「我都唔知呀，不過見步行步啦，等張天命師傅出嚟再算啦。」

三人交頭接取交談著，原本坐在道壇旁邊的男人卻突然站了起來，並指著阿軒。

「將你身上面嘅嘢交出嚟。」

面對這男人的要求，阿軒會如何應對呢？

夢巴光臨

如果連登熄燈，巴打啲故會放邊？

等睇天命叔出場

（三十五）天命道堂（２）

「吓？交咩出嚟呀？」

阿軒一臉疑惑，不明眼前這名男人在說甚麼。

「我係話，將你身上面啲污糟嘢交出嚟。」

「咩呀？咩污糟嘢呀？」

阿軒仍然不明所然地看著眼前這男人，怡欣和哲瑋亦靠近阿軒，仿佛擔心這男人會對阿軒做出些甚麼事。

「子鋒你搞咩呀？你咁講佢哋點知拎咩畀你先得㗎。」

那名穿著時尚的男人走到那位名叫子鋒的人身旁，語氣略帶責備的感覺。

「呀，係喎。唔好意思呀，我係想叫你將你後褲袋舊嘢拎出嚟，呢舊嘢有啲唔係好乾淨嘅感覺。」

子鋒不好意思地看著阿軒。

「後褲袋......你係話呢個錦囊？」

「係佢啦，你畀我啦。」

「咪住先，你係邊個呀？無啦啦做咩要阿軒交個錦囊畀你？」

「話咗你幾多次，解釋清楚啲嘛。唔好意思呀小姐，我叫天賜，呢位子鋒算係你哋搵嗰位天命師傅嘅入室弟子。通常我老豆唔得閒嗰陣，佢都會幫手處理下啲小問題先嘅。」

穿著時尚的人原來名叫天賜，他耐心地向三人解釋。

「係呀，頭先係有啲唐突嘅。我諗住天命叔未出嚟之前幫你搞搞個錦囊先啫，你哋似乎帶個錦囊去咗啲唔係咁乾淨嘅地方。除咗啲小鬼之外，似乎仲有第二位識法之人想對你做啲嘢，不過個錦囊幫你擋咗。依家個錦囊有少少邪氣，你唔介意我幫你清一清啲邪氣先。」

三人聽到後不禁嚇了一跳，眼前這名看來比他們只大上數年的男人，竟能說出他們的情況，而且語氣堅定，一點不像在說笑。

「咁呀......」

「放心喎，呢個唔收錢嘅，反正你哋都要等，咪當善用下時間囉。」

「你會做啲咩㗎？」

「好簡單，你將個錦囊放喺個道壇前面呢個金色盤就得㗎啦。」

阿軒想了想後，反正也沒有壞處，就姑且把錦囊放到道壇前，亦正好看看這個道堂的弟子葫蘆裡賣甚麼藥。

隨著錦囊放到道壇後，那個名叫子鋒的男人，眼神從輕浮變成認真。

「天地自然，穢氣分散，洞中玄虛，晃朗太元......」

子鋒手上結印並默念口訣，跟那名想加害他們的道士做出差不多的動作，但從他身上卻能感受到正氣，讓三人有種舒暢的感覺。

「凶穢消散，道炁常存。急急如律令。」

只見子鋒口訣隨著手印一併完成，錦囊上隱約看到一股微弱的黑氣消散在空氣中，錦囊的色澤看上去比剛才更加光鮮亮麗。

「搞掂啦，你可以拎返個錦囊。」

阿軒取回錦囊，確實能感到有一種比剛才舒服的感覺。

「我想問，個錦囊係咪用得返㗎啦？」

「咁又未，我只係用<<淨穢咒>>驅散咗依附喺上面嘅邪氣，原本幫你喺錦囊上面施嘅法仲係無咗㗎，陣間你等天命叔出嚟再幫你搞啦。」

阿軒聽到後，雖然為錦囊還未恢復功用而感到有點失望，但看到子鋒的架勢，卻有種安心的感覺。

怡欣和哲瑋亦同樣增添了不少信心，看來似乎是找對人了。

「子鋒，你做咩唔幫佢個錦囊施返法落去呀？做一半唔做一半？」

「唔係呀，咁我拎晒你老豆啲嘢嚟做，陣間佢咪無得威威囉。同埋呢，個錦囊啲法術呢，都幾煩㗎，等你老豆出嚟慢慢搞啦。」

子鋒雖然說得小聲，但仍被人聽到他這番說話。

「你個死仔包又偷懶！」

伴隨著聲音的出現，一把桃木劍狠狠地敲向子鋒的頭上，而子鋒卻像早已預料到，右手往上一托便擋下了桃木劍的攻擊。

「擋？」

一擊未能成功，桃木檢從其他方向再次攻向子鋒，但子鋒熟練地把攻勢一一擋下，看來已經習慣承受這種攻擊了。

「好啦，老豆，子鋒，唔好再玩啦！有人要求救呀！」

在一旁的天賜看準機會格開二人，才終止了這場打鬥鬧劇。

「邊個求救呀？」

一名看上去有點像維園阿伯造型的大叔出現在眾人眼前，但撇除他的造型，這名大叔的眼睛神采奕奕，身體雖不算強壯，但亦能看出是久經鍛鍊，不像一般大叔般贅肉橫生，看來他就是天命師傅了。

「係我哋幾個想搵你幫手㗎。」

三人像夾好了般同時開口，到底他們是否能得到天命師傅的幫助呢？

我信連登撐得住嘅
真係無咗我會喺紙言，都無埋就喺我FB度繼續出文

粉墨登場
客串下都要嘅

你會習慣

熟悉嘅感覺

心巴

子峰天命叔客串

我寫嗰陣都有呢個感覺

好耐無見

無收錢，友情演出

真係好耐無係連登見了

（三十六）天命道堂（３）

天命師傅目光炯炯地看著三人，不發一言。

「大師，我哋真係好需要幫手，求下你......」

阿軒以為天命師傅沒有幫忙的念頭，馬上搶著說，卻被天命師傅截斷了他的說話。

「唔駛大師前大師後啦，叫我天命叔啦。細路，呢十幾年無咩唔妥呀嘛？」

阿軒一款難以置信的樣子看著天命叔，大概是想不到還會認得出自己吧。

「無，係偶爾有被鬼迮下啫。大......天命叔，你認得我？」

「經過我手做過嘅個案，我都唔會忘記嘅。今次又咩事呀？連個錦囊都被你玩到咁。」

天命叔從阿軒手上接過錦囊，仔細端詳著。

「今次唔係我有事，係我朋友。」

「嗯，即管講嚟聽下。」

三人於是安映哥哥的事情，以及在常寂園遇到的事情一一告知天命叔。

只見天命叔愈聽眉頭便愈是緊皺，然後又忍不住搖了搖頭。

「唉，依家啲後生仔真係唔識死，乜都走去玩。」

說話的同時，眼神一直盯著子鋒。

「嗱，唔好望我呀，我識個死字點寫㗎。不過呢，你哋講話有人死呢，我搵唔到新聞嘅？」

子鋒避開了天命叔的眼神，向三人展示手機螢幕。

「唔駛問，肯定被人冚住咗啦。我啱啱都試下搵『一筒歸西』啲資料，但似無乜流傳落嚟。」

天賜在一旁用平板電腦搜尋有關資料，但也沒有甚麼結果。

「梗係無結果啦，知道呢單嘢嘅一係就死晒，一係救返都殘廢，點會有資料呀。」

天命叔走到道壇前，點起了三支香，口中默念了幾句，便把香插到爐上。

「天命叔，你話啲人一係死，一係殘廢，咁我朋友咪......」

三人聽到天命叔的說話，都不禁倒抽一口涼氣，難道真的沒有人可以幫到他們。

「我未講完，後生仔就係心急，成日都唔聽人講晒先畀反應。」

天命叔說話的同時，又再一次盯著子鋒。

「我有聽呀，係你自己講得慢咋。同埋你都陰過我幾次啦，當無數啦。」

「哼！總之呢，『一筒歸西』唔係無得搞嘅，不過依家麻煩在你哋講嗰個道士。」

「吓？點解呀？個道士話佢啲法力被我哋搞到無晒㗎喎？點會難搞呀？」

「小妹妹你有所不知啦，我哋修道嘅人，如果要插手人哋嘅事，一定要收返啲報酬，多少唔係問題，但一定要收。只有咁嘅情況下，我哋先可以明正言順插手人哋嘅事，就好似立咗份合約咁。而我頭先聽你講，個道士從來無講話要收啲咩報酬，再加上你哋形容當時嘅情況，我懷疑佢根本就唔係幫手解咒，而係想好似養鬼仔咁，養住呢股怨念。雖然第一次失敗咗被你破埋佢嘅法，但你哋嗰位朋友以為可以幫到佢解咒，就分咗啲血畀個道士，咁樣唔單只令佢可以保得住佢嘅法力，仲可能會幫到佢控制股怨念。但無論佢成唔成功，你哋個朋友都只有死路一條。」

天命叔說到這裡停了一下，看了看子鋒一眼，子鋒便意會到並替天命叔拿出了一套卜卦用的工具。

「如果佢一次就成功控制到股怨念，對你哋可能無咩危險，但如果佢失敗咗，佢就要搵最後嗰個人嚟再嘗試。」

「呢套係咩嚟？」

阿軒好奇地問。

「呢套嘢用嚟起卦，本來應該對中咗咒嘅人起卦。但佢哋又無嚟，我只能幫你哋起卦睇睇個情況。」

「咁依家要幫邊個起呢個卦？」

三人同時問，天命叔指向阿軒。

「梗係你啦，仲有第二個咩？」

到底，天命叔起的卦象，會預示到甚麼呢？