［短篇］香港都市傳說 - 一筒歸西

幾吸引留名

奇幻潮

等緊

原來都有人知呢套嘢

（三）迎新營

「一同歸西？咁唔吉利啲人見到會唔會走㗎？」

「係囉，陣間無人參加點算。」

「同埋會唔會過唔到學校㗎？陣間唔批我哋無得招人，我唔想啱啱成立就解散囉。」

三人你一言我一語，盡是反對的聲音。

「你哋冷靜啲先，我哋個學會本來就係去探討啲奇聞異事，入得我哋學會嘅，相信都好似我哋四個咁，對啲奇奇怪怪嘅嘢有興趣先加入啫。」

阿軒嘗試說服大家，但大家眉頭深鎖，看來還是有點顧慮。

「仲有，我話『一筒歸西』做主題，其實都係想用啲大家有興趣嘅活動去吸引人。你哋諗下有幾多大學生係唔打牌㗎？應該好少啦。至於個名怕過唔到學校嘅，咪改做『傳統牌類奇聞探究』呢啲類似嘅名囉，而且話就話『一筒歸西』做主題啫，其實咪又係迎新營其中一個活動，到時等大家打下牌玩下增進下交流，第時啲活動先有學生肯參加㗎嘛。」

在經過阿軒那長篇大論後，三人最終都被說服，便開始著手準備迎新營的事情。

「好多謝大家參加我哋嘅迎新營，相信加入我哋學會嘅，都係某程度相信呢個世界有啲嘢，係現今科學難以解釋嘅。呢兩日三夜嘅迎新營，除咗希望你哋可以了解下我哋學會之外，亦都希望可以同大家一齊分享，經歷一下一啲平時唔夠膽，或者唔夠人數做唔到嘅活動，希望大家可以玩得開心啦。」

阿軒以會長的身份歡迎各位新生後，迎新營便正式開始。

迎新營的活動跟其他學會沒有太大的分別，只是遊戲內容和一些問題，會以世界各地的奇聞異事做主題而已。

例如在傳統的Treasure Hunt裡添加了香港都市傳說的完素，營火舞的歌曲都是一些曾經傳出過奇怪傳聞的歌曲，例如Gloomy Sunday。

迎新營順利的迎來第二個晚上。

「好啦，相信經過噚日，大家都已經熟落咗好多，亦都應該知道我哋做嘅都係一啲體驗。而今晚呢，我哋會有幾個項目，分別係『百物語』、『一個人捉迷藏』同埋『一筒歸西』。」

接著阿軒的發言，怡欣向在座的人補充。

「為咗大家更加了解呢幾個項目，呢度有啲資料係關於呢幾個都市傳說嘅。當然，我哋學會係以體驗為主，每個項目我哋都會有工作人員睇住你哋，亦唔會真係跟晒所有步驟，舉例『百物語』我哋唔會真係講到一百個鬼故先完，所以大家可以放心，呢次活動都係絕對安全嘅。不過，中間為咗增加氣氛，我哋會添加啲驚喜畀大家。當然，呢幾個活動唔係強制參加嘅，如果有人係唔想參加嘅，可以同我哋講聲，我哋會再有安排。無問題嘅話，我哋九點再喺度集合啦。」

就在其他人都離開後，會場內有一位女同學留了下來。

阿軒看她的樣子有點發白，身體在微微發抖，便跟怡欣一起走到她身旁。

「你好似係正宇個組女，蔡，蔡安映？」

女生微微點了一下頭，身體仍然在發抖。

「你係咪有咩唔舒服呀，駛唔駛返房休息一陣？或者去醫院？」

怡欣擔心地看著安映，安映只是輕輕搖頭，但沒有說話。

阿軒看到剛剛發給同學的資料都散落一地，只有「一筒歸西」的資料被她緊緊握在手裡。

「你無事呀嘛？你如果唔鍾意呢個『一筒歸西』嘅活動，可以參加其他，或者唔參加都得㗎喎。」

「我......我......」

安映努力地想說話，但全身發抖的她無法再擠出下一個字。

「怡欣，你同佢去我哋個活動房先，畀啲熱嘢佢飲，我去同其他組員講聲等佢哋繼續進行活動，搞掂會過返嚟搵你哋。」

「我入嚟啦，蔡同學，你有無好啲？」

阿軒跟正宇一起進入活動室，安映的臉色雖然仍然有點蒼白，但已比剛剛好多了。

「叫我安映得啦，我......我好啲啦，唔好意思，麻煩到你哋。」

「唔好咁講，最緊要你無事啫。正宇你點做嘢㗎？唔睇住你組女！」

怡欣看著正宇，正宇則露出一臉無辜的神情，不知如何應對。

「唔......唔關佢事，係我自己問題。」

「聽到未呀怡欣，唔關我事呀。不過安映，如果你真係有咩唔舒服出聲得㗎啦，唔駛收埋㗎。」

「我，其實......」

「係咪同『一筒歸西』個活動有關？」

阿軒看著說不出口的安映，拿出了剛才發給會員們的資料，安映看到後，身體又開始微微發抖。

怡欣在旁邊嘗試安撫安映，好一會後安映總算停止顫抖。

「你哋......信唔信『一筒歸西』，係......真有其事？」

好耐無見

都有差唔兩年

你知就好啦
心巴安好嗎

（四）安映的恐懼

三人聽到安映的說話，沒有即時回答，而是認真思考。

「我唔敢講相信或者唔相信，始終未經歷過嘅嘢都好難講。但比起白或者黑，我諗我哋幾個嘅諗法都係偏向灰色。」

伴隨著阿軒的說話，兩人都默默點頭。

「咁講法，其實你哋都係唔信啦......我仲以為......算啦，我都係有啲唔舒服，我想返房休息先。」

安映看到三人的反應後，明顯露出了失望的表情。

「咪住先安映，雖然我只係做咗你一日組爸，但你畀我嘅感覺唔係啲會隨便亂講嘢嘅人。如果你真係有煩惱，或者有啲嘢驚我哋唔信而唔敢講，我可以應承你，我哋幾個唔會一嚟就否定你講嘅嘢，我哋只會同你一齊分析返個實際情況，再去做判斷。你唔介意嘅，不如同我哋講下你係咪有啲咩煩惱啦？」

安映想了一想，又搖了搖頭。

「算啦，就算講出嚟，你哋都幫唔到我。對唔住，阻住你哋，我返房先啦。」

三人只好無奈地看著安映離開。

「你哋點睇？」

「我同佢都叫相處咗一日，佢比我感覺雖然有啲靜，但都玩得幾投入，無咩奇怪嘅感覺。」

「我啱啱陪佢嗰陣，都覺得佢無咩嘢，又唔似係啲會整古做怪嘅人。」

「啫係你哋都覺得，佢可能真係知道啲關於『一筒歸西』嘅嘢？」

兩人互望了一眼，便點了點頭。

「而且我覺得，佢可能已經同其他人講過，不過無人信佢。所以頭先我哋唔係好肯定信唔信佢嗰陣，佢好似都幾失望。」

「你估我哋依家同佢講返，其實我哋信佢得唔得呀啦？」

「咪玩啦怡欣，幾分鐘前我哋先一齊話有懷疑，依家又話信佢，比著你都唔信啦。」

三人又再討論了好一陣子，但也得不出任何有用的結論。

「算啦，既然佢唔想講都無辦法，呢件事就咁算啦。怡欣你陪正宇去搵安映睇下有無嘢要幫手，我諗有個女仔喺度會方便啲。我去同其他工作人員打點下，希望今晚無其他事啦。」

「收到。」

就在三人準備各自去處理事情時，房門突然被哲瑋推開。

「正宇！咦，你哋三個都喺度？快啲過嚟啦，出事啦。」

三人一臉茫然，哲瑋則拉著他們邊走邊說。

「發生咩事？」

「我咪負責『一筒歸西』嗰部份嘅，本來都好哋哋，跟住輪到個女仔嗰陣，佢突然好似發咗癲咁掃晒啲牌落地，搞到其他人都嚇親。」

「個女仔唔會係安映啩？」

「應該唔係啩，佢話返房休息㗎嘛。」

「但唔係佢仲有邊個？」

「你哋三個講咩呀？安映係邊個？」

「陣間再同你講返件事，咁依家嗰邊點？」

「我已經同其他人講咗個女仔係我安排嘅Spy，負責搞驚嚇部份，雖然啲人仲有懷疑，但大致上個活動都仲進行緊，應該無太大問題。個問題在於個女仔，你哋見到佢就明。」

哲瑋把我們帶到遠離其他活動的休息室，還未開門已聽到室內傳來人聲。

我們跟在休息室外的工作人員打了聲招呼後，便推門進去，只見安映瑟縮在一角，頭髮髒亂，口中不斷重覆著「係真㗎、係真㗎」。

而最令我們三人震驚的是，和安映分開後不過一小時不到，她的臉色明顯變得比之前蒼白，而且感覺上好像比之前消瘦，簡直像是突然惡化的病人一樣。

「安映，安映，係我呀，你組爸呀，你冷靜啲先。」

正宇慢慢靠近安映，半蹲在她的面前，以溫柔的聲音嘗試安慰她。

但安映似乎沒有意識到正宇的存在，仍然喃喃自語，近距離看著她，更能感受到她的眼神空洞，應該是受驚過度。

「我頭先好辛苦先帶到佢過嚟，到底佢發生咩事？」

阿軒簡單交代了剛才安映的事後，便向哲瑋提問。

「佢頭先話返房休息，但點解會去咗你個場度？你有無留意到啲咩奇怪嘢？」

「我記得頭先佢入去場嗰陣，仲有兩個人陪住佢。我諗係佢同組啲人或者朋友啦，佢除咗臉色有啲差之外，都無咩奇怪嘅地方。因為係我負責佢嗰組，帶佢同另外兩個人去咗預先準備好嘅位置，我照舊講解個遊戲嘅細節，嗰陣佢個人開始有少少震，但佢又無出聲話唔玩嗰啲我咪無理佢繼續講囉。」

哲瑋頓了一頓，回想著剛剛的情況。

「你哋都知為咗畀佢哋體驗個傳說，規則係會試打五鋪，有西就一定要打西，如果開局嗰個無西或者中間斷開咗就開另一局。咁最後一局係設定好每人有一隻西㗎嘛，頭四局我已經見佢好似愈嚟愈驚，到最後一局佢做尾門，但等極佢都唔肯打隻西出嚟。我見佢應該真係好唔想打出嚟，咪諗住打圓場話如果真係唔想打嘅就算啦，我都未講出聲，佢就已經推開晒啲麻雀，不停話『一筒歸西係真㗎、一筒歸西係真㗎』。好在我即刻當成件事係事先安排好，先無引起好大騷動。」

「阿軒咁依家點呀？佢真係好似好唔掂咁喎？」

怡欣擔心地看著安映，阿軒則眉頭深鎖，看來也想不出甚麼好辦法。

正宇看著一直顫抖著的安映，實在看不過去，緊緊地把安映抱在懷裡。

「冷靜啲，冷靜啲！無事嘅，無事嘅，有咩我哋都會幫你，無事嘅！」

三人看到正宇的舉動，不禁嚇了一跳，畢竟正宇一向都是比較冷靜和守規矩的人，身為組爸的正宇應該不會像這樣擁抱著自己的組女才對。

雖然在此時不應該想太多，但怡欣還是露出了意會的微笑。

就在三人的思緒被正宇的舉動扯到其他地方的時候，安映總算有所回應，她抓著正宇的手臂，眼泛淚光地說。

「『一筒歸西』係真㗎！」

所以出返嚟寫下嘢等大家盡量唔好忘記我

呢一年都無乜正常人會覺得好㗎啦，愈動蕩靜落嚟嗰陣愈想寫嘢

（五）恐懼的緣由（１）

「安映，你冷靜啲，深呼吸先。」

正宇扶著安映到梳化位置，讓她稍為安定一下情緒。

「正宇，我哋出去同其他人處理埋啲嘢先，你睇住安映。」

阿軒向兩人示意後，便一起走到屋外，亦好乘著這機會向哲瑋交待之前的事情。

「唔係呀？唔係一嚟我哋就遇到堅嘢呀？」

「堅唔堅我都唔知，始終要聽安映講晒成件事我哋先可以分析，我依家反而諗緊，應唔應該跟落去。」

哲瑋和怡欣難以置信地看著阿軒，仿佛不相信他會說出這樣的話。

「你哋唔好咁望住我先，我有原因㗎。因為佢係入咗我哋學會，仲要喺迎新營入面做咗啲咁嘅嘢，有咩事上嚟我哋學會，特別係哲瑋你，可能會好麻煩。」

「吓？點解係我？」

「你唔記得頭先同其他人點講咩，你話安映係你安排嘅Spy嚟㗎。」

哲瑋這才如夢初醒，明白自己的立場。

「第二個原因，我哋幾個話就話對啲奇怪事有興趣啫，但係我哋又可以幫到啲咩先？」

阿軒的說話其實不是沒有道理，但事情發生在自己眼前，要完全無視也是很難做到。

「不如咁啦，我哋聽下安映究竟發生咩事先，之後先決定繼唔繼續跟囉。」

「係囉係囉，我覺得怡欣講得有道理。」

阿軒眉頭緊皺，明顯不能完全認同，但還是無法改變兩人，只好點頭認同。

就在三人勉強獲得共識後，正宇剛好推門走了出來。

「安映佢點呀？」

「佢冷靜咗啲啦，同埋......佢話想我哋幫佢手。」

三人聽到後，心中都打了一個突，安映和他們認識才不過兩天，嚴格來說連朋友也稱不上，但竟然要求助於他們，事情絕不簡單。

「佢話佢已經搵過好多人，但根本無人信佢。」

正宇看著三人，等待著回應。

阿軒雖然仍然有點勉強，但在怡欣和哲瑋的眼神脅逼下，亦只好無奈點頭。

「我講多次，我聽下佢講嘅嘢先咋，無話做啲咩㗎。」

「得啦得啦，入去啦入去啦。」

阿軒的最後掙扎被他們無視，半推半就地進入休息室。

安映看到四人進來，眼神卻是在水裡看到最後一根稻草一樣，恢復了一點生氣和希望。

「安映，我同佢哋傾過，大家都應承可以幫你，不過都要先知道到底發生咩事先。」

正宇走到安映身旁，緊抓她的雙手說出這些說話，阿軒看到這個樣子，也無法說出不會幫忙。

怡欣和哲瑋則偷偷看了阿軒一眼，像在暗示現在只好硬著頭皮上了。

「無錯，我記得頭先你都講話『一筒歸西』係真嘅，我想知道，到底發生咗咩事？」

阿軒的話音剛落，安映便又顫抖起來，看來『一筒歸西』這事對她造成的心理創傷十分嚴重。

「其實，呢件事係發生喺我阿哥，韋洛同佢啲朋友身上。雖然我無親身經歷，但......我同阿哥親眼睇住，佢嘅朋友......離奇死亡......」

安映簡單交代了韋洛和朋友在家打麻將的情形，在打出了『一筒歸西』後，牌局所發生的異狀，導致最後沒有完成牌及發現不見了四隻「西」的情況。

韋洛發現麻將離奇失踪後，也緊張了好幾天，但眼見一直也沒有奇怪的事情發生後，也慢慢放下了那種莫名的不安感。

就在以為事情落幕時之際，韋洛卻接到了一通電話。

==

「阿洛，呢次大鑊啦！」

「咩事呀？咩大鑊呀？你講清楚啲先啦。」

「輝仔，輝仔佢死咗呀！」

「吓？唔係呀？發生咗意外呀？」

「唔係意外，係自殺！總之今次麻煩啦，你出嚟先講啦！學校見。」

「喂！喂！」

韋洛還想追問更多細節，但不料對方已經掛斷了電話。

然後即使韋洛發出訊息，也沒有得到任何回應。

無計可施下，韋洛只好先回到學校。

本來韋洛還在擔心不知道怎樣才找到他的朋友，但甫來到校園的正門，便已看到有兩個人看似在爭吵著甚麼似的。

「都話咗嗰日要打完四圈㗎啦，依家出事啦。」

「嗰日你自己都話走㗎仆街，仲成晚講埋啲鬼鬼怪怪嘢，講咗打牌唔好提呢啲㗎啦。」

「你咪一樣又搭膊頭又十三么。」
「喂！阿邦，阿榮，你哋兩個喺度做乜呀？叫我出嚟又唔講邊度等，發生咩事啫？」

「輝仔死咗呀！」

「我知，阿榮電話講咗我知啦，我係問到底有咩咁大鑊先得㗎？」

兩人聽到後臉上像是蓋上了一層灰似的，神情變得異常緊張。

「我頭先咪話輝仔係自殺嘅，佢......佢好似係夾硬塞啲麻雀落肚自殺。」

韋洛聽到這裡差點要笑了出來，畢竟自殺方法成千上百種，誰會選擇吞麻將自殺。而且吞了一隻麻將下肚也會不舒服吧，哪有可能繼續吞下去。

但兩人緊張的模樣亦不像在撤謊，而且亦不用這樣去說一個可以一語道破的謊言吧。

「我唔係好明，你話佢......吞麻雀自殺？我想像唔到點樣可以吞麻雀吞到......死。」

「我都估到你唔會信㗎啦，你嚟之前阿榮同我講我都唔信，不過......阿榮你畀張相佢睇啦！」

「吓？呢度？」

「咩呀？咩相咁神秘呀？」

「你睇完冷靜啲，唔好太大反應呀。」

韋洛點了點頭，三人在校園內找了一間閒置的房間後，便把手機螢幕展示到韋洛眼前。

摩牙

（六）恐懼的緣由（２）

「點解你會......」

韋洛嚇得差點大喊出來，阿榮和阿邦像是預料到一樣，邊捂著他的嘴巴邊示意他冷靜下來。

擾攘了一會後，韋洛總算回復了冷靜。

「點解，你會有輝仔，輝仔死嗰陣啲相？」

雖說回復了冷靜，但驚嚇的部份仍然沒有改變，剛剛阿榮手機顯示的，正是輝仔死時的模樣。

只見輝仔雙目反白，臉色發紫，嘴裡被塞得滿滿的，白沫和鮮血在嘴邊溢出，死狀甚是可怕，但全身看起來卻是完好無缺。

而最詭異的，可以看到輝仔在死前，右手還緊緊地抓著數隻麻將不放，若是他殺，要做到讓輝仔完全不掙扎怕是不可能的；若是自殺，誰又能把麻將一直往嘴內塞直至氣斷身亡啊。

韋洛想破頭也想不通這個情況是怎麼發生的，亦想不通為甚麼阿榮會持有輝仔死亡時的照片。

「我有輝仔死嗰陣啲相，係因為，佢係喺我面前自殺。」

「咩話？」

韋洛難以置信地看著阿榮，如果真如阿榮所說，輝仔是在他眼前自殺，那阿榮為甚麼沒有阻止他？

「你唔駛望我啦，我有試過阻止佢，但當時佢簡直好似大力士咁，點拉都拉佢唔住。」

原來那天四人從韋洛家裡離開後，也是很擔心有甚麼事情發生，最初數天還是有互相通話或者發送訊息。

特別是輝仔和阿榮，兩人本來就是中學同學，而且住的地方也十分靠近，所以兩人連續數天都有碰面。

在過了大約一星期，所有人都開始忘記那天牌局發生的事情，亦沒有再特意互相聯絡，各自回到自己的生活中。

怎料牌局後的第七天，阿榮接到輝仔的來電。

「喂，點呀？」

電話裡沒有傳來輝仔的回應，但隱約能聽到很小的聲音。

「喂，輝仔，做咩唔出聲呀？喂！」

沒有得到回應的阿榮，再次仔細聆聽電話裡的聲音，他總算弄清楚，那是在打麻將時，洗牌的獨有聲響。

「輝仔你係咪揞錯制呀？再唔出聲我收線㗎啦！」

阿榮以為輝仔誤撥打了給他，正準備掛線之際，阿榮卻發現電話裡傳來輝仔的聲音。

「西。」

聽到輝仔的聲音，阿榮沒有像剛才一樣作出回應，而是豎起了耳朵仔細聽著輝仔的說話。

電話裡一直傳來輝仔那緩慢又帶點詭異的聲音，總共說了四次「西」。

「輝仔你咪玩嘢啦，嗰日單嘢完咗，完咗㗎啦！咪再玩啦！你再玩朋友都無得做呀！」

阿榮以為輝仔特意打給他惡作劇，又想起已經提心吊膽了一星期，不禁有點生氣起來，話也說得比平常嚴厲。

「唔係玩，『一筒歸西』係真㗎。」

輝仔用毫無起伏的聲音說話，感覺令整件事更加詭異。

「痴線，你知唔知自己講咩呀？唔好再玩啦，朋友都無面畀！」

「我無玩，你哋唔信只係你哋無知，『一筒歸西』肯定係真嘅，你唔信嘅話，你過嚟搵我就知道㗎啦。我喺屋企等你。」

「痴線，我唔會過嚟㗎，你聽唔聽到呀，我話唔會過嚟呀！喂！」

沒有待阿榮把話說完，輝仔便已自行掛線，也不曉得到底有沒有把訊息傳達給輝仔。

阿榮在掛線後，本來鐵了心不會過去找輝仔。

但掛斷電話後，阿榮有點放心不下輝仔，因為平常的輝仔絕不可能開這種玩笑。而且剛剛輝仔在說話的時候，不管是語氣、用詞還是態度，都不像是認識的他。

經過了好一陣子的內心掙扎後，阿榮還是決定到輝仔家裡一趟，畢竟兩人就住在附近不遠處，而且阿榮亦很想證明，輝仔只是不知道受了甚麼刺激在胡言亂語而已。

阿榮就這樣懷著複雜的心情，出發到輝仔的家裡。

留名 樓主文筆好好！ 之前個個故都追到好心寒 仲要最近成日打牌

推

Live 咗

多謝多謝
啱睇就好

未完

你應該習慣Live咗

三萬，thanks！

咁又係時候追文