［短篇］香港都市傳說 - 一筒歸西

推

再推

唔好潛水啦

樓豬去咗邊

樓主消失咗六日啦

大家好啊
我係心層次個朋友
佢叫我同大家講 佢唔記得咗連登嘅密碼
搞到大家擔心佢 真係唔好意思
佢聽日為咗補償大家 會連出10篇㗎喇

（五十五）再訪天命道堂

在決定了再尋求天命道堂幫忙後，正宇和阿軒便馬上出發。怡欣和哲瑋則分別留在醫院照顧安映和在醫院附近尋找可能見過韋洛的人。

正宇跟隨阿軒來到天命道堂，推開大門時，內裡傳來一陣惡寒，向兩人襲去。

兩人沒有預料到會有這情況，恐懼的情況油然而生，沒有人敢再向前踏出一步。

正當阿軒受不了這種感覺，打算關上大門時，正宇卻不知哪來的勇氣提起右腳，踏進道堂範圍。

說也奇怪，當正宇踏入道堂後，那股惡寒竟隨之而消失，像從來不存在過似的。

阿軒亦有同樣的感覺，便跟隨正宇的腳步進入到道堂裡。

二人進來後，卻發現除了中間的道壇外在閃著紅光外，其他地方都烏燈黑火，好像沒有人在似的。

「天命叔，子鋒，有無人呀？」

阿軒對著道堂大喊，但沒有人回應。

「會唔會未夠鐘開檔？」

「無理由㗎，上次同怡欣佢哋都係咁上下時間嚟到。可能係入面間房啫，我去睇下。」

阿軒向著道壇後的房間走去，正宇則在道壇前等候。

等了好一會兒，阿軒卻沒有從房間裡走出來。

「阿軒？搞咩咁耐呀？」

沒有回應。

「喂，阿軒，應我呀？」

還是沒有回應。

「你唔係有咩事呀？我入嚟啦。」

正宇小心翼翼地走進道壇後的房間，卻發現房內一個人也沒有。

「阿軒？唔好玩啦，出嚟啦。」

正宇抱著一絲希望是阿軒的惡作劇，但一眼能看完的房間裡的確是甚麼也沒有，難道又是那臭道士弄出來的？

但不可能啊，那道士分明在子鋒面前自溢而死才對。

百思不得奇解的正宇，只好從房間裡退回道壇前，本來應該是道壇的地方，卻變得漆黑一片。

察覺到異樣的正宇，強行把內心的不安壓下，嘗試找尋著出口。

在黑暗中不斷摸索的正宇，失去了時間和方向。

就在正宇快要被逼瘋之際，眼前突然出現了一片亮光，隨著光的到來，正宇總算能看到眼前的景物。

眼前出現的，是一個對正宇來說十分熟悉，但又非常陌生的地方。

只因眼前出現的，是正宇的舊居，理所當然地十分熟悉；但陌生的原因，是正宇早已離開舊居多年，而舊居亦應該已拆卸重建，不再存在才對。

但很快，正宇便知道，眼前的確是他的舊居，亦是他離棄了安映的地方。

而在他眼前，則重覆著當天正宇離棄安映的景象。

「呀～～～！！！」

阿軒看著正宇跪在道壇前大喊，緊張地抓著天命叔的手臂。

「天命叔，你搞咩嚟呀？正宇佢嗌到咁嘅？」

「唔駛咁大驚小怪，佢只係面對梗自己內心嘅黑暗啫。」

「吓？無啦啦面對咩黑暗呀？我哋嚟問你安映阿哥走咗去可以點搵返佢咋喎。」

天命叔看了看阿軒，搖了搖頭，便轉過頭看著坐在一旁的子鋒。

「做咩呀？又我嚟呀？」

天命叔點了點頭，便繼續在正宇身旁不時撒上白米。

「阿軒，你過嚟，唔好阻住維園阿叔先。」

阿軒慢慢走到子鋒身旁，指了指正宇，然後不解地看著子鋒。

「你覺得，點解你哋幾個會遇到呢件事？」

子鋒沒有回應正宇，自說自話地向正宇提問。

「吓？點解......咁啱囉，又或者，時運低囉，我一向都黑仔。」

「黑仔當然係其中一個原因啦，不過能夠將你哋幾個全部牽扯入呢件事度，絕對唔係單純一句黑仔可以解釋得晒。正所謂事出必有因，你哋之所以被卷入呢件事度，某程度係因你哋同正宇熟，而正宇之所以被卷入呢件事，係因為，佢曾經欠咗安映，呢個就係佢內心嘅黑暗，亦係點解你哋會無啦啦被呢件事纏上嘅原因。」

子鋒的話分明每一個也聽得懂，合起來後阿軒卻有點無法理解，但阿軒大概能夠理解的是，他、怡欣和哲瑋都被卷進此事件中，全都是因為正宇。

「咁但係要救安映阿哥同正宇要面對自己內心有咩關係呀？」

「梗係有關啦，雖然我哋可以就咁破解咗呢個詛咒，但如果日後安映又有咩事，只會再一次將大家捲入新嘅事件入面。只有當正宇面對內心的黑暗，並且解決佢，先唔會再遇到呢啲危險嘅事。」

就在子鋒解釋到最後，原本還發出痛苦呻吟聲的正宇，突然安靜下來。

「後生仔，感覺點呀？」

天命叔看著正宇，正宇呆呆地點了點頭，然後發現困擾了他一段時間的感覺，好像消失了大半似的。

「大師......點解我會喺度嘅？我......」

「唔駛我啦，我知你有好多嘢想問。不過，有啲嘢，你係咪應詃去做咗先呢？」

天命叔意有所指地看著正宇。

「係，雖然唔知你點做到，但我真心多謝你，我要走先啦。」

正宇向天命叔道謝後，便頭也不回地離開，遺下一臉錯愣的阿軒在道壇裡。

「吓？佢就咁走咗去？咁韋洛點算呀？」

「佢唔係走咗去，佢係去解決佢自己種下嘅因啫。至於韋洛，你唔駛心急，時間到佢就會自己出現。」

只見天命叔說話時，手上拿著兩隻麻將，分別是一筒和西。

到底，韋洛會否如天命叔所言自行現身呢？

幾日無上嚟，我差唔多寫到結局
原本諗寫晒一次過貼上嚟
但今日寫唔晒，睇住一篇先
今晚趕工寫埋佢再一次過貼

終於有文

臨結局前追到live
細膽嘅我前面飛住睇 真係寫得幾恐怖 好在有人留言吹下水distract下
到子峰出現開始幾有趣 99地咁 有啲想追返之前嘅故
Btw希望結局唔使一個禮拜後入黎先有啦

（五十六）等待

「阿軒，點呀，搵到方法救韋洛未呀？」

「係囉，聽安映講韋洛得返幾日時間，趕唔趕得切救佢呀？」

離開了道堂的阿軒，約了怡欣和哲瑋碰面。

「呢層......天命師傅淨係叫我哋等，話咩時間到韋洛自然會出現。」

「吓？唔係啩，陣間會唔會又好似之前個臭道士咁㗎？」

「我諗唔會嘅，既然子鋒救得到安映佢哋，天命叔係佢師傅應該更加犀利，我估無問題嘅。係啦，正宇呢？」

「佢？咪講咗囉，佢知道安映精神返啲之後，就趕咗我出房啦。我見佢表情有啲嚴肅，唔係有咩事呀？」

聽到怡欣的說話，阿軒簡單地交代了在天命道堂發生的事情。

「啫係我哋幾個無啦啦叉隻埋嚟，其實係因為正宇條衰仔之前對唔住過安映？」

阿軒對哲瑋點了點頭。

「所以天命師傅話要正宇解決佢以前種下嘅因，咁之後先會無事。」

「算啦，我哋幾個都無穿無爛，我反而擔心正宇咋，佢頭先個樣係勁認真，我驚佢同安映傾唔掂會做傻事。」

「條衰仔好硬淨，無事嘅，就算被安映飛咗都好快復原，何況佢哋都未正式一齊，都唔算被女飛呀。」

哲瑋話音剛落，便被怡欣施以鐵拳制裁。

「亂講嘢呀啦！希望佢兩個可以無事啦。」

「咩啫，我講事實咋嘛。嗱，唔好再打呀。」

兩人吵鬧期間，電話同時傳來了收到訊息的聲音。

「我搞掂啦，你哋可以上嚟。」

三人看罷，便一起走向安映的病房，只見正宇緊緊抓著安映的雙手，臉上散發著幸福的笑容，而安映亦有點羞澀的樣子，看來是沒有問題了。

正當哲瑋又想亂說話時，腹部已中了怡欣一拳，痛得不能說話。

阿軒也沒有理會胡鬧的二人，徑自走向正宇和安映。

「安映你好似好返啲啦喎？」

「係，雖然仲係有啲攰，但基本上都無乜嘢。係呢，我想問我哥哥嘅情況。」

阿軒聽罷，看了正宇一眼，正宇肯定地點了點頭以作回應。

「天命師傅話無問題，叫我哋繼續等就得，佢話時機一到你哥哥就會出現。」

「嗯......」

「安映你放心啦，我親身同天命師傅個徒弟一齊去搵你，佢哋係有真材實料，唔會有事㗎。」

「我信你......只係，一日件事未解決，我一日都唔放心啫。」

安映輕輕嘆了口氣，即使正宇緊緊地抓著她雙手，似乎並未能令安映完全放心。

「咁啦安映，呢幾日我同怡欣，哲瑋會再去搵下韋洛，如果早啲搵到嘅，我哋會通知天命師傅幫手㗎啦。」

「係啦安映，你諗下你哥哥有機會去咗邊，我哋盡量去試下搵唔搵到佢。」

聽到正宇的提議後，安映陷入了沉思，然後提出了好幾個地方。

「好啦，咁你休息下啦，我同佢哋出發去搵你哥哥。」

「好，你哋自己小心。」

眾人跟安映說了幾句後，便識趣地離開了病房，讓正宇多陪安映一陣子。

待正宇也歸隊後，四人商議了一會後，便出發尋找韋洛。

（五十七）擔憂

任眾人如何努力，事情卻沒有半點進展。

時間一天一天的過去，安映的擔憂也一天比一天嚴重。

雖然安映沒有說甚麼，但正宇仍能感受到安映那焦慮的情緒。

「你哋幾個有無收鑊？」

「無啦，香港話大唔大，但話細都唔細㗎。一個人有心要匿埋，點會咁易被我哋搵到先得㗎。」

「咪嘈啦哲瑋，搵唔到都要繼續搵㗎，依家已經第五日，安映哥哥時間無多㗎啦。」

「計我話我哋駛鬼搵咩，既然嗰個咩天命師傅咁勁，我哋咪聽佢講慢慢等下囉。」

「你個死懶鬼唔想搵就咪鬼咁多藉口。」

怡欣和哲瑋你一言我一語，阿軒忍不住說。

「你哋兩個靜下啦，畀正宇抖下，佢又要搵人又要照顧安映，已經好攰㗎啦。」

聽罷，二人不好意思地看著正宇。

「唔會，我無事，多謝你幾個陪我搵就真啦。係啦，大家都攰㗎啦，今日我哋暫時停一停，各自返屋企休息下先啦。」

「吓，咁又唔駛，我頭先講下啫，我仲可以繼續搵㗎。」

「係囉，你咪聽個死人哲瑋講啦，我哋仲可以繼續㗎喎。你......係咪嬲我哋頭先咁講嘢？」

「唔係，我無嬲，不過我哋已經搵過晒安映講嘅地方，再咁樣漫無目的搵落去都唔係辦法，你哋返去抖下啦，我有咩會打畀你哋㗎啦。」

二人再向正宇說了幾句，但正宇已下了決定，二人只好無奈地離去。

「阿軒你都攰啦，你都返去先啦，我留喺度陪下安映。」

阿軒像聽不到正宇的說話，眉頭緊皺像在想甚麼似的。

「阿軒？阿軒？」

「吓？你叫我呀？咦，佢兩個幾時走咗㗎？」

「無，我見要搵嘅地方都搵晒，同埋大家都搵咗咁多日，我咪叫佢哋走先囉。你無嘢呀？諗嘢諗到出晒神咁。」

「其實，我頭先喺度諗，之前我去搵天命師傅嗰陣，安映咪被個臭道士捉咗嘅，當時我見子鋒只要有你嘅物件，已經可以搵到你，我唔明點解要等啫。」

「你咁講......唔通佢哋根本無辦法救到安映哥哥，所以求其講啲嘢拖住我哋？」

正宇聽到這裡，內心不禁著急起來。

「你冷靜啲，我唔係咁嘅意思，我只係奇怪點解佢哋唔主動搵安映哥哥啫......」

阿軒說罷，也感到自己話裡的矛盾處。

「係囉，你自己都解釋唔到！咪啦，我去多次道堂搵佢哋，今次無論點都要捉佢哋嚟幫手。」

「喂，正宇，等埋我呀！」

兩人想到不妙之處，便即時動身來到天命道堂。

「天命師傅，天命師傅，開門呀，我喺正宇呀，早幾日嚟講呢度㗎。」

「正宇你冷靜啲先，可能咁啱出咗去啫。」

正宇沒有理會阿軒的說話，繼續拍打大門。

「喂，嘈完未呀！」

正宇的叫喊和拍門聲，驚動了道堂旁邊的住客。

「唔好意思，我朋友佢有啲急事要搵道堂個師傅，所以先會咁嘈，搞到你哋真係唔好意思。」

在阿軒向旁人賠不是的期間，正宇依舊拍打著大門。

「吓？你搵天命師傅？佢早兩日同佢個徒弟執晒嘢拖晒喼咁，似係出咗去有嘢做喎。」

「係咁你知唔知佢哋幾時會返？」

「呢層唔定㗎喎，佢哋有時出去幾日，有時出去幾個星期，最長嗰次好似都成半年唔喺度。」

「咁唔該晒你先......正宇，走啦，天命師傅唔喺度呀。」

「我唔走，依家無時間再諗其他方法，得返佢可以幫到安映哥哥，我一定要喺度等佢返嚟。」

「就算要等都唔駛喺門口等㗎，走啦。」

阿軒好不容易把正宇拉走，但事情突然出現這戲劇性的轉變，這下真的是無計可施了。

（五十八）韋洛現身

離開天命道堂後，兩人漫無目的地在街上徘徊。

途中安映曾發短訊給正宇，正宇只是簡單回應了兩句，沒有提及找不到天命師傅的事情。

「死啦，咁依家點算呀？韋洛又搵唔到，師傅又唔見埋，我仲點面對安映？」

「冷靜啲先，搵唔到人都唔係你問題，你唔駛咁自責，安映佢都會明嘅。」

「就算佢真係明，我都無辦法接受。係天命師傅叫我去解開心結，我做完之後佢先嚟失蹤，咪啫係要我再傷害安映多一次。」

「唔好咁諗啦，發生呢啲事都無人想。而且，天命師傅叫我哋等㗎嘛，話唔定時間一到佢就會出現呢。」

阿軒用他那連自己都不相信的說話安慰著正宇，腦海則思考著整件事。

「咁萬一時間到咗但佢無出現呢？」

正宇的提問十分合理，從天命道堂沒有開門的狀態，加上附近住客的證言，會有這樣的懷疑可說是無可厚非。

只是，事情到了這地步，他們已沒有甚麼可以做了。

「喂，正宇，你望下。」

「望咩呀？係咪天命師傅呀？」

正宇回頭一看，只見不遠處有一個熟悉的身影走過。

「阿軒，我無睇錯呀嘛？嗰個咪......韋洛？」

「我都見到，唔好灰心住啦，追上去啦。」

雖然兩人知道，天命師傅不在的情況下，即使找到韋洛也沒有甚麼作用。

但能做的事情就是要先做，兩人有默契地接近那熟悉的身影。

由於兩人不知道韋洛發現他們後，會做些甚麼，也不肯定能確實抓住他，故兩人小心翼翼地，在不被發現的前提下追了上去。

在跟蹤了一段時間後，韋洛獨自進入了一楝舊式的唐樓。

兩人在外面等了一會，卻未見韋洛再次出現。

「依家點算，追上去？」

「我驚一上佢就發現我哋，一係我哋再等下。」

「都好，不過呢度望落有啲熟。」

阿軒四處將望，總感覺有種熟悉的感覺。

「呢度過兩條就係安映住嗰間醫院，上次我哋周圍搵韋洛都有嚟過呢邊。」

「原來係咁，到底韋洛做咩要玩失蹤之後又匿埋喺呢度？佢唔會好似阿邦咁，想搵安映做替死鬼啩？」

「我諗唔係，好似我嗰日咁講，佢係特登離開唔出現喺安映面前。或者，佢係想喺走之前見安映最後一面。不過我哋一直都有人陪安映，所以佢搵唔到機會。」

「咁嘅話，我哋今日唔喺醫院，佢咪......」

「無錯，好有可能佢會襯我哋唔喺度去醫院搵安映，到時我哋就可以知道佢想點。」

「咁我哋唯有繼續等啦。」

兩人互相交換想法後，決定繼續在大樓外樓等待韋洛。

在等待的過程中，兩人都想到同一個問題，但又強逼自己暫時拋諸腦後。

又或許，兩人心底裡還是寄望著天命叔所說「時候到就會出現」的說法。

等了又等，等了又等，兩人不知不覺已經等到了深夜。

「正宇，你睇！」

阿軒拍了拍正宇的手臂，才注意到韋洛明顯經過喬裝才從大樓走出來，要不是兩人一直守在這裡，恐怕走在街上不會認得出來。

只見他鬼鬼祟崇地向著醫院前進，然後襯著醫護人員不注意，偷偷走進大樓裡，而在進去前，韋洛穿起了另一件外套和戴上了帽子，明顯不想讓人知道他有來過。

「佢入咗去啦，我哋兩個咁礙眼好難跟上去。」

「交畀我啦，我陣間去吸引啲人注意，你承機追上去啦。」

阿軒說完，就大搖大擺走進醫院，把還在當值的職員視線都吸引住。

正宇則襯著這時間跑到大樓裡，然後很快來到安映的病房前。

果然猜得不錯，韋洛真的來到安映的房間，但，他到底想做些甚麼呢？

（五十九）時機未到

正宇和阿軒俏俏躲在病房外，不敢貿然行動。

在等待的過程中，只見韋洛靜靜地坐在安映身旁，一聲不響，完全無法猜透他的想法。

「阿妹，睇到你識到一班好朋友，我就安心啦。就算以後無我陪你，你都應該無問題嘅。」

病房內傳來韋洛的聲音，在外面的兩人屏息以待，嘗試聽取韋洛的說話。

可惜的是，除了第一句說話外，韋洛像是有意把聲音壓低，令兩人無法得知說話內容。

「正宇，你聽唔聽到佢講咩呀？」

正宇皺著眉搖了搖頭。

阿軒嘗試集中聆聽韋洛的說話，但只隱約聽到說話聲，卻無法得知說話的內容。

過了一會後，韋洛輕輕撫摸了安映的頭。

「好啦，阿哥要走啦，以後要好好照顧自己啦。」

安映雖然仍在入眠，但眼皮跳動了一下，右手輕輕抓著韋洛的衣服。

「哥......」

韋洛輕輕撥開安映的右手，然後右手輕輕在安映臉上晃動了一下。

本來意欲醒來的安映，眼皮停止了跳動，又陷入了昏睡的狀態。

正宇看到這裡，再也按捺不住，走到病房裡。

阿軒本想阻止正宇，但無奈正宇行動比阿軒更快，阿軒只能睜眼看著正宇進去，而自己則繼續躲藏起來，準備隨時支援正宇。

「你對安映做咗啲咩？」

韋洛轉過頭來看著正宇，似乎對他的出現並不意外。

「我只係令佢可以瞓返覺好嘅啫。放心，佢係我個妹，我只係嚟同佢講聲再見，唔會對佢做啲咩。」

「再見？韋洛，你聽我講，我哋搵到個師傅，佢話可以幫到你。」

「無用㗎，我唔想好似阿邦咁，又要搵人做替死鬼。」

「你放心啦，個師傅話有辦法解決，而且唔駛將個詛咒轉去其他人身上。」

聽到這裡，韋洛突然停頓了一下，然後正宇感到房內氣溫好像變低了不少，而韋洛的語氣亦有所改變。

「係咩？咁個師傅喺邊？」

「個師傅暫時唔喺度，但我哋可以上佢道堂度等佢，佢應承咗時機一到就會幫你。」

「我係問你，個師傅喺邊呀！」

韋洛聲音突然變得十分低沉，說話裡有種刺骨的寒氣，令正宇不自覺地退後了一步。

「你，唔係韋洛，你係邊個？」

「我問你個道士喺邊呀！」

韋洛沒有回應正宇，繼續追問天命師傅的下落。

「我唔知，不過佢話時機到就會出現。你......收手啦。」

正宇幾乎已肯定眼前的不是韋洛。

「收咩手呀，呢個男人條命係我㗎！叫個道士唔好多管閒事，交返嗰兩隻麻雀出嚟！」

韋洛提高了聲量，說話的同時帶著一股無形的力量，使正宇不自覺地屈膝跪到地上。

「韋洛，我知你聽到㗎，你清醒下啦，我哋一齊去搵天命師傅幫你手啦。」

「我唔駛人幫！你唔話我知個道士喺邊呀嘛，我就用你引佢出嚟。」

只見韋洛從腰間拔出了一把小刀，慢慢走向正宇。

當正宇以為自己要命喪於此時，眼前突然出現一道溫暖的火光。

「急急如律令，欶！」

火光消失的同時，病房內只剩下韋洛和安映，正宇已然消失不見。

「臭道士唔駛旨意阻頭阻勢！」

韋洛一語既畢，便從病房離開，追尋著正宇的下落。

「子鋒，點解你會喺度嘅？唔係喎，頭先韋洛出現喺病房，你快啲去幫佢啦。」

「唉，今次你好心做壞事啦。天命叔咪講咗叫你哋等㗎囉，你哋喺都要搞咁多嘢。」

子鋒拉著正宇前行，口裡帶著責備的語氣。

「我哋諗住早啲搵到韋洛，你哋可以早啲幫佢解決件事。」

「天命叔咪講咗時機未到囉！唉，不過依家無辦法啦，唯有夾硬嚟啦。」

子鋒說話的同時，在地上撒了一個又一個的銅錢，明顯是給人引路。

「唔駛追得咁快呀？正宇，我哋要加速啦，目標係天台！」

到底，天台上會有些甚麼呢？

（六十）強行解咒（一）

正宇跟隨子鋒的腳步來到天台，甫開門便已見到天台已然變成了一個道壇。

只見天命叔站在道壇中心，壇上則放了一個稻草人偶，人偶上貼有一張甚麼也沒有的黃符。

人偶旁邊，則是早前出現在天命叔手裡的一筒和西。

「正宇，小心！」

子鋒話音剛落，正宇還沒有反應過來，已聽到背後響起了金屬碰撞發出的聲音。

只見韋洛悄然而來，在正宇不知情的情況下用小刀刺向其背，肯好子鋒察覺到異樣，取出金錢劍替正宇擋下了這一刀。

正宇被嚇得冒出一身冷汗，本能地向天命叔方向走去。

而身後的韋洛則不想放過這機會，用蠻力推開了子鋒後，便又衝向正宇。

「有我喺度你仲想搞佢？」

被蠻力推開的子鋒，穩住身體後便拿起金錢劍擲向韋洛，稍為阻擋他的腳步。

而正宇亦襯這空檔逃到天命叔背後，這才發現阿軒原來亦來到了天台。

「點解你喺度嘅？」

「頭先喺病房出面等你嘅時候，子鋒同天命師傅突然出現，仲話我哋搞亂咗佢哋嘅部署，叫我跟佢哋嚟天台，如果唔係就會好危險。」

韋洛追擊正宇不果後，便拿著小刀轉而向子鋒攻擊。

子鋒雖然能靈活地躲開韋洛的攻擊，但也拿韋洛沒有辦法，既奪不走他的武器，亦制伏不了他。

「正宇，你有無發現子鋒嘅動件好似愈嚟愈遲頓？」

阿軒點出了這情況後，正宇才注意到本來輕鬆躲避著的子鋒，小刀的利刃每次也靠近多了一分，雖然還未傷到子鋒，但感覺快能把子鋒弄傷。

「阿叔你得未呀？我就嚟頂唔順啦。」

子鋒邊閃避邊大喊。

「你頂多陣啦，時辰未到我都無辦法。本來要等到聽日丑時先可以，依家我已經夾硬提早十二個時辰，總之你撐到丑時啦。」

「丑時？點撐呀？」

「你自己諗下計啦，記住唔好被佢傷到你，陣間佢吸收你嘅靈力就仲難搞。」

「我夠唔想傷啦，做到先得㗎！」

子鋒說話的同時，韋洛的速度愈來愈快，子鋒的上衣亦被割破。

「子鋒，我嚟幫你。」

正宇正想上前幫忙，卻被天命叔阻止了。

「你兩個咪出去搞亂檔呀。依家道壇外面全部都係佢嘅邪氣，而且仲一直增強梗，你兩個喺道壇入面先至無事咋，一出去肯定會精神錯亂。乖乖地留喺道壇入面，佢就傷你哋唔到㗎啦。」

兩人總算明白，為甚麼子鋒的動作會愈來愈遲頓。

「但係，點解子鋒唔還手嘅？」

「可以還手嘅我哋就唔駛咁辛苦啦。本身諗住等到聽日個詛咒最強嘅時候將佢從韋洛體內分離，但你哋嘅出現令佢發現咗我嘅存在，亦逼到佢發癲要拎返呢兩隻麻雀，等佢可以完成成個詛咒。如果依家子鋒還手，制伏佢又好，傷到佢又好，我怕個詛咒會從此匿喺韋洛身入面，到時一係佢就搵間寺廟一世修道鎮壓住個詛咒，一係就等死。」

說到這裡，兩人才明白為甚麼天命叔會說時候未到。

「你兩個唔駛自責，有好多嘢人算不如天算，既然已經發生咗，我哋只可以盡力去做。子鋒你睇住呀！」

子鋒聽到天命叔大喊，反射性地向後一跳，躲開了韋洛的攻擊。

「你就喺入面風流快活，我就喺出面流晒汗！我都想入嚟避一避風頭。」

「你咪諗咁多啦，你一走入嚟，佢發現奈我哋唔何，就會即刻走，到時我哋想解咒都解唔到，頂多陣啦。」

子鋒向天命叔露出不滿的神情，但韋洛卻不給予他更多時間，小刀便從子鋒眼前掠過。

「仆你個街，好危險㗎！」

子鋒說話同時，右手向上一托，狠狠地擊中韋洛的手腕。

持刀的右手亦因此而鬆脫，小刀從手上掉下。

子鋒打算把小刀奪過來之際，韋洛的右腳已然到了眼前，要不是及時舉起雙臂格擋，這一踢至少令子鋒的行動力減半。

子鋒雖然順著韋洛的踢擊向後彈走，以卸去踢擊的力度，但韋洛用力之猛，竟能令子鋒雙手發麻。

要不是子鋒乘著這一踢拉開距離，他早已被重拾小刀的韋洛刺傷了。

「大叔，我真係唔係講笑，我唔覺得自己可以捱到丑時。」

「捱唔到都要捱㗎啦，仲有幾分鐘咋。」

愈接近丑時，韋洛的速度和力量便愈來愈強。

到底，子鋒能否順利撐到丑時呢？

（六十一）強行解咒（二）

本來還能勉強躲開的子鋒，此刻已難以一一避開，只見他或擋或卸，盡量不使自己受太大的傷害。

而那些小刀的攻擊則盡量避開，畢竟他可不想在這緊要關頭被韋洛吸收了自己的力量。

「碰！」

一聲巨響響遍整個天台，而聲意的來源則是子鋒和天台的大門。

就在剛剛一瞬間，子鋒被樓梯間傳來的聲響分了一下神，整個人便像斷線風箏般撞向大門。

雖然最後一刻子鋒勉強擺出了防禦的架式，但卻無法做到卸走力量，背部狠狠撞向大門後，子鋒不禁從口裡吐出了一口鮮血。

「碰！」

巨響再次響起，只見韋洛的右拳狠狠地打在天台大門上，門上出現了一個清晰的拳印。

「痴線㗎你，我避唔開嘅話死咗啦！」

幸好子鋒及時把頭部向右移，避開了這一拳，要不然應該不是受傷能了事。

「子鋒，係時候啦，制伏佢。」

只見天命叔在道壇前開始唸起口訣，然後用硃砂在人偶的黃符寫上像是咒語的文字。

「你話制伏就制伏咩！唉，我盡力啦。」

子鋒接收到天命叔的指示後，馬上轉守為攻，一時間竟與韋洛形成均勢。

但明顯在速度和力量上，子鋒並沒有佔到任何便宜，他現在只是憑著經驗和技巧，來跟韋洛對抗，要想制伏韋洛，尚欠一點火候。

「正宇，依家點呀？我哋係咪出去幫手會好啲？」

「我都想，不過天命師傅叫我哋留喺道壇入面，我哋出去唔知會唔會又打亂佢哋。」

正宇和阿軒在道壇裡看得十分緊張，很想幫忙卻又不知從何做起，只能默默地看著眼前的一切。

兩人正鬥得難分難解之際，天台的大門卻突然打開。

子鋒對此早有預料，剛剛被踢飛時就是感到樓梯傳來一陣聲響，才會被踢飛向大門。

而這次的小變化，則為子鋒帶來了轉機。

原來打開大門的人正是安映，本來一直注意著子鋒的韋洛，竟分神看了看安映一眼，而原本那暴走般的力量，亦因而減弱了許多。

子鋒襯著這麼的一瞬間，向韋洛的關節處施力，令韋洛無法站穩，然後再以紅線綑綁著韋洛，不再讓他亂來。

而同時間，正宇亦從道壇裡跑向安映，只因他記著天命叔的說話，道壇外充滿邪氣，並足以亂人心智。

擔心安映的感情化作行動力，使他跑向安映。

只是道壇外並未如正宇想像般惡劣，雖然仍有不適的感覺，但還不至於使人精神錯亂。

「哥！」

安映虛弱地走向韋洛，中途正宇已來到她的身邊，伴著她走到韋洛旁邊。

「哥，我係安映呀。」

韋洛聽到安映的說話後，似懂非懂地點了點頭，嘴裡發出了像是野獸的咆哮聲。

「仲垂死掙扎？」

子鋒用力拉緊紅線，韋洛那野獸般的咆哮聲愈變愈小，然後便發出像是悲鳴的聲音。

「我阿哥佢點呀？你哋係咪幫到佢㗎？」

「小姐你放心啦，多得你及時上到嚟，佢先可以有一瞬間拎返自己嘅意識，亦因為咁，子鋒先可以順利捉住佢。依家我就為你哥哥解開呢個詛咒，等佢以後唔會再被呢個詛咒纏住。你安心喺旁邊等下啦。」

安映本來還想繼續詢問，但旁邊的正宇肯定地點了點頭，安映也就沒有再說些甚麼，她選擇相信眼前的人。

然後，子鋒聽隨天命叔的吩咐，把韋洛搬到道壇上。

跟之前遇到的道士一樣，韋洛被搬到一個撒滿白米的陣式上。

每當天命叔向韋洛撒上白米和一些應該是水的東西時，韋洛便會發出怪叫。

而明顯地，每當韋洛發出怪叫後，他身體亦會排出一絲又一絲的黑氣，跟阿邦的情況十分類似。

當黑氣完全從韋洛體內排走後，韋洛整個人突然失去了力氣，子鋒馬上把他從陣式裡拉了出來。

然後天命叔把稻草人偶的黃符以桃木劍刺穿，被刺穿的黃符竟像被人偶吸收了般徹底消失。

隨後，天命叔把旁邊的一筒和西以同一手法處理，麻將便消失在人偶體內。

神奇的是，分明人偶裡面有兩隻麻將，從外面看卻完全看不到任何痕跡，就好像從沒有存在過似的。

在把黃符及麻將都放進人偶後，儀式總算來到尾星，天命叔拿著人偶走向飄浮在半空的黑氣，所有黑氣全都被人偶吸收掉。

而原本還瀰漫著不安感覺的天台，在黑氣消失後亦一併回復正常。

「係咪......無事啦？」

阿軒看了看四周，略帶不安地問。

略帶疲態的天命叔點了點頭，示意事情總算落幕了。

（六十二）完美落幕

「安映，太好啦，你哥哥無事啦，太好啦！」

正宇激動地抱著安映，安映亦不自覺流下眼淚。

「太好啦，多謝，多謝你哋幫手，無你哋我真係唔知點算。」

安映靠在正宇肩上大哭，積壓多天的壓力終於爆發出來。

兩人相擁著大哭，旁人也不好意思打擾他們。

阿軒識趣地來到天命叔身旁。

「多謝你哋，子鋒，天命師傅，唔係你哋嘅話，呢件事可能收唔到科。」

「客咩氣呀，你細細個嚟我度嘅時候，我就知道點都會再幫你一次。經過今次之後，唔好再同啲鬼神嘢走咁近啦。」

「盡量啦，不過我啱啱先成立咗個『奇聞異事學會』，應該無咁快可以走甩住。」

天命叔聽罷，搖了搖頭，語重心長地祝福了阿軒兩句，便沒有多說甚麼了。

「係啦，小姐。我有啲嘢想提醒你同你哥哥，佢應該休息一兩日就無事，到時你再同佢講啦。」

「多謝你幫我哋呀，我會好好記住你講嘅嘢，亦都會好好提醒我哥哥㗎！」

「唔駛咁緊張，所謂提醒其實都係啲小事啫。你同你哥哥都要記住，今生今世，唔好再掂麻雀，無論有無牽涉到賭錢都好，都一定唔可以再掂麻雀。」

「我明白，我會同我阿哥講㗎啦！」

安映聽罷，也沒有多問便照單全收，畢竟眼前的人可是幫助她哥哥從生死邊緣中拯救出來。

「唔係搞掂咗就無事呢咩？『一筒歸西』唔係應該從世界上消失咩？」

阿軒看來比安映更希望弄清全部事情。

「今次係搞掂咗，但我只係將個詛咒封印咗喺呢個人偶度，我會拎返道壇慢慢將佢淨化，但為免有任何差池，今生今世唔好再掂麻雀比較好。至於『一筒歸西』，如果咁易消失就唔會叫做詛咒啦。我今次只係將利用『一筒歸西』去害人嘅靈體消除咗，詛咒本身係無辦法完全消除。只要一日仲有人相信呢個傳說，呢個詛咒就會一直存在。」

「你嘅意思，所謂『一筒歸西』，其實係我哋人類畀咗力量佢而形成嘅現象？」

「可以話啱，亦可以話錯。事出必有因，無論我哋幾相信呢個傳說，呢個傳說都總有一個源頭，只係散播呢件事嗰個人係為咗咩而咁做，就不得而知啦。而呢啲傳說嘅可怕之處係，愈多人信，佢嘅力量就愈大。所以要徹底消滅一個咁古老嘅傳說，其實係無乜可能。」

眾人聽到後，也暗自點頭表示明白。

「不過點都好啦，件事已經完咗，你哋幾個就當發咗場夢啦。同埋提一提你哋，唔好再試玩呢個詛咒啦，今次咁啱我幫到手，下次就難講㗎啦，我諗其他人嘅死法你哋都有見過，應該唔駛我再多講㗎啦。」

其他人想起輝仔、阿榮及阿邦的死法，不禁打了一個寒顫，亦在心裡起誓不會讓「一筒歸西」的情況出現。

「好啦，你哋返去啦，我仲要同子鋒喺度執埋啲手尾。如無意外，我哋應該唔會再見㗎啦。」

天命叔向眾人揮了揮手，便和子鋒開始收拾道壇的物品，而阿軒一行人則扶著韋洛回到家中後，亦各自回家休息。

事情，總算來到終結。

「喂，阿軒，正宇，去打牌啦。」

重返校園生活後，阿軒一行人又開始了忙碌地履行大學生的義務。

其中一部份就是盡情的玩樂了。

雖然剛回來後，仍有點抗拒跟其他人打麻將，但過了差不多一個月後，四人已把事情忘卻，偶爾也會跟朋友打麻將耍樂。

這天，阿軒和正宇剛好受邀到宿舍打麻將，兩人沒有多想便答應了。

牌局來到差不多尾聲了，阿軒還輸了不少靠打工賺回來的錢。

而來到阿軒開局的同時，竟是整整齊齊的萬子組合。

阿軒二話不說便把手上的麻將打出。

「西。」

「西。」

「西。」

「西。」

牌過一輪後，阿軒和正宇看了看桌上的麻將，那以為早已忘卻的記憶，竟突然回來了。

好死不死的是，阿軒竟真的摸了一隻一筒回來。

阿軒看著自己那整齊的牌局，然後看了看手上的一筒，不自覺地發出了微笑，完全沒有半點猶豫，便把手上的牌打出。

「三萬。」

「食，三萬，thanks。」

「唓，三番牌咋，豪畀你囉。」

如果，你也喜愛打麻將，又剛好是第一個出牌。

在經歷了四隻西後，你，又會敢打出手上這隻一筒嗎？

完

一砲過

終於，一次過補返晒之前潛水咁多日嘅文啦
個故其實有好多位都可以執，不過今次係特登加入咗子鋒
子鋒嘅元素令個故仔可以多啲嘢睇，但同時令個故變得無咁「都市傳說」
呢點係令我有少少後悔將子鋒加入嚟
不過點都好，呢個故都完咗，重新大執又好，新嘅都市傳說又好，都係之後嘅事，如無意外我應該唔會再放太過脫離現實／子鋒式嘅元素落「都市傳說」系列度

最後，呢個故其實仲有隻小彩蛋，但我無力寫所以就唔貼住啦，之後喺呢度會再補返

嚟緊會同之前預告一樣，將陳子鋒個故仔埋尾，由於寫嘅字數應該會幾長，始終會覆蓋差唔多成個大學時期，所以只可以講我會不定期更新，到時希望大家多多支持

ＦＢ
http://www.facebook.com/insidemyheart2015

咩都嘔晒出嚟

唔駛一星期，我一日出晒，差啲死咁滯

子峰