2008年，32歲，我去了一趟印度。

其實個世界都係好人壞人參半。
係印度我的確成人有人想昆我

但同時都好多人真心幫過我，例如第二日新德里個巴士站咁。冇當地人主動幫手，我實買唔到車飛。因為我根本唔太聽得明售票講乜。

正如香港，我相信大部份都係熱心好人，但係尖沙咀都有唔少想昆遊客既人搵食。亦唔一定係印巴人專利。

不過而家科技太好，只要有google map 同translate。仲有叫的士app ，幾乎唔駛怕。
我諗只有古巴北韓至少小心準備多啲

留明
雖然我呢世都唔會去印度，但好想睇樓主嘅遊記

Live咗

第五天
大約六點就到左agra，之後去左附近搵地方住，不過今次冇寫低，所以都唔記得個酒店名，不過其實我住既所謂酒店，都只係等於香港既賓館再差少少。只係佢地改個名叫xx hotel

不過就好記得，有超大隻，成個成年人手臂咁大條既壁虎係大廳同房行。因為間野只有地下有房係連二樓都冇既。但冇所謂。佢地又唔食人肉。仲好一定冇虫虫。

跟住又係食過早餐。又係蛋薯仔多士。老實講，我已經唔多記得香港既野食味。係呢度，真係食得好簡單。
係房休息左一陣，大約十點幾就去左附近行，沿途經過一間郵政局。不過未買明信片只能去睇睇，見到vodafone個牌突然有少少違和感。

之後坐auto去左agra fort，非常大既地方，加上又熱又曬，我諗又行又休息。大約都睇左幾個鐘至走，但無所謂啦，一個人既旅行，本來就應想點就點，唔駛就人，亦唔駛話一定要去十幾個景點睇好多野。最記得就係佢有一邊，可以望到泰姬陵，咁遠望住都幾靚。

睇完就做左野好白痴好白痴既野，係咁曬又熱既情況下，我唔係坐車去第二度shopping，而係就咁由某一方向行。老實講，lonely planet 只有景點或者一個地方既大地圖。我又冇去咩旅遊局之類拎個map，其實我行左去邊，到今日都唔知
如果有巴絲見到下面既相知邊度。可以話番比我知。我諗大約行左一個鐘，實在太累，就是但入左間餐廳食野，竟然係第一餐覺得好食既一餐，真心好味。
不過可能果度根本唔係遊客區，啲印度人對我都好好奇。老細都走埋黎同我傾計，問我係咪日本人，韓國人，之後話唔係就問我係咪中國人，咁我就答我話係香港人。
係2008年，你話你係香港人好合理，今日，就會比人話你攪港獨。

咁其實都係傾堆必問問題，例如你係做咩呀，黎印度做咩，屋企有咩人咁。咁我又問番佢係咪好少亞洲人係度出現呀咁，其實。邊度都有好人壞人。等於香港既遊客區，都唔少香港人係度搵食。做既野，同呢度想昆我既印度人冇咩分別，只係手法唔同。呢度可能係本地人社區，都唔會又話帶我去睇乜睇物。

食完野吹完水，就搵左架auto番酒店了。我諗大約六點幾掛。我唔知有咩夜生活，只係覺得條街都幾黑。所以都冇周圍走，仲好記得，夜晚開住個電視，播緊印度配音版既mad max 第二集。北斗之拳班雜魚既設計都好似引自呢套野。

第六天
一早就退左房，去左住另一度，間野果度二樓房幾光猛乾淨，今日，終於黎到我最想去最想睇既泰姬陵，入場費成七百幾rs，都幾貴，不過見本地人幾十rs，都係靠遊客補貼架啦。
的確，泰姬陵好靚又保養得好好，好乾淨。係呢度，終於見到中國團黎，不過依然一個香港人都冇。

太正唔捨得走，都唔知留左幾耐。見到有個鬼仔係條柱度坐低唔知寫緊乜，可能寫緊詩或情信掛。
夜晚去左一間lonely planet 介紹既餐廳，今次係冇伏既，都幾多鬼佬食。野食又好幾，呢兩日，總算覺得冇辛苦到個胃

第七日
我住既地方都係背包客集中地，所以有好多餐廳，我就去左其中一間食。不過似乎度度既早餐都係蛋同多士，而且味道麻麻，唯獨杯奶茶真係好掂。
然後就去左帝國之柱陵墓(Itimad-ud-Daulah) 又稱為「小泰姬」(Baby Taj)既地方。呢度好靜好少人。令我一路行一路想起香港種種往事。

走時，記得住既地方就係望到泰姬陵，咁我諗，只要向住泰姬陵既方向走，就一定可以行返去酒店，反正都仲有好多時間。點知就梗係瀨野啦。
嗱各位巴絲，你地而家有google map ，千其咪學我咁浪漫。行死你唔關我事。

咁樣行，結果都係偏離晒要去既地方。不過就意外咁。行左入真正本地人既購物街。
點解我會知？一來連一個鬼佬都冇。沿途所有人都對我投已極好奇目光。
又冇好心人走黎話幫我呀，問我邊度黎呀，請我去飲野，係一個都冇

而且見有標價既野明顯比遊客或背包客去既地方平一半，例如henna art 用既顏料，價錢就講唔番啦，但一定比我係遊客去既地方平成半有多。買支水都係5rs。

但咁點算呢？我諗番轉頭仲麻煩，就唯有直線行晒成個market 再算。
好彩，穿過後原來再行多十五分鐘左右就番到去背包客區，可惜已經差唔多要執野走。
大家睇相都見到有間野寫住吉野家，應該都有啲日本人係呢度住。

走前係附近一間hotel食左個磨菇卷，雖然好食，但果陣既我仲係食肉獸，但數埋都係食左幾餐肉。
之後就叫左架的士，去邊境一個火車站搭去Varanasi

巴打呢十幾年去完印度仲去咗咩地方？

都係香港人都鐘意去既好玩地方啦，沙巴呀，北海道，歐洲咁囉

咁突然地，有個女仔聲叫左我一聲。

有個女仔走埋黎，用英文問我，頭先個女人同我講乜。
咁我就話番佢知個女人會祝福你，你就比一百rs 佢做費用就得，原來個女仔仲有個同伴。
我問佢地邊度黎，佢地話韓國。

當佢地係首領處得到祝福後，我地就傾起黎，一個幾多野講既叫Jin，另一個不時雛著眉帶點不安四處張望既叫Hye。

原來大家都係坐九點既火車到Varanasi，我問點解唔係Agra直接去。Jin話我知，佢黎到印度後參加本地旅行團，話現在火車飛好緊張，冇直接由Agra到Varanasi的火車票，仲話去到Varanasi後會有本地導遊接待。

但而家四月又唔係旺季，旅行社點可能冇大城市間既車飛？睇黎佢地應該比印度機會主義者狠賺一筆了。

「你地點解想黎印度？」呢個係我一直很想知問題，沿路遇上唔少後生日本／韓國人。
「因為平，呢度既人好又熱心。」Hye依然不發一語，由Jin答話。
黎到印度後，遇上不同人，不同背景文化，同佢地傾計都幾有趣。有部份想法，我實在冇想過。我諗，唔知香港女仔會唔會因為便宜又熱心既人而想黎這國度。

大約九時左右火車準時到，首領提我地上車，仲話火車只會停留三至四分鐘左右。我地當時在月台接近車頭處，而我地要上既車卡卻在車尾。背著沈重的背包跑，感覺好似西部牛仔片中越獄囚犯抱住巨大鐵球跑步一樣，真係好想掉左佢。可惜入邊放左衫同各種應急物品的背包，大慨跑到剩三卡車的時候我回頭一看。

真好野！Jin和Hye同我至少隔左差唔多兩卡車距離，佢地以為而家公主出巡？架火車走左，今晚點渡過都係好大疑問。不得已跑回去，叫佢地跑快啲。

Jin喘著氣話冇晒力
無計我拎起佢地兩個人背包，就叫佢地快啲跑埋去。

就咁我拎住三人份的背包跑上卡車，佢地就係”愉快的漫步”中上了車，火車大約三十秒後便開行。

我同佢地講好險
「我同Hye，呢世人都冇跑咁長既路。」雖然印度四月晚上有點冷，但Jin滿頭大汗而且面色蒼白。原來韓國都有公主病女，仲以為個個都係 女漢子。

我就叫佢地，返到韓國好好鍛鍊吓。佢地就話辛苦咪搞。
之後就各有各去返自己床位休息了

今晚，是我第一晚長途車訓有冷氣的地方。
Jin返去前，同我講明早請我食早餐。跟住佢就返去佢地個位訓了，雖然同卡，但幾乎一頭一尾。

註RS=盧比，印度貨幣單位 100RS 大慨等於14元港幣

唔敢再去落後地方？

冇長假啫，我最想去南美同古巴，仲有西藏
但我只係普通打工仔一個，唔辭職好難去。
去呢兩個地方，至少我一定要留幾個月。如果只係十零日就不了。

同埋而家去，點似果陣咁乜都冇，至少盪失路冇咁易。
住既又可以上網book定，唔駛驚

樓主有冇肚痛
泰姬陵好靚 為咗泰姫陵去次印度鬼國好似幾唔抵咁

好好彩，乜事都冇，超級正常。只係覺得食得好簡單。同埋唔係每餐都咖喱。最差都係頭幾日，乜都唔知就求其食。越後會食得越正常

如果你只係想去泰姬陵，你應該跟團，又安全又快。我都同朋友講，只係想睇景點，一定跟團最好。自由行其實都用唔少錢。而且時間又難就，只係跟團好似隔左塊玻璃睇一個地方咁。

08年既印度好似靚過而加既印度

巴打好勁 仲記得12年前咁清楚

仲要32 辭埋職去 相信要過好大心理關口

依家20中先去過一次 先發覺去旅行好重要

如果一早識諗 18就應該存錢周圍去 真係爽

其實冇咩勁，第一大部份野我有寫低

唔似其他巴打，我冇咩夜生活，所以夜晚係旅館就寫低果日既野。
仲有辭職睇你點睇啦。有時去到某一個位。
你會知，有啲野唔做，呢世都唔會做，得個講字。

其實依加如果你無上網plan就去旅行嘅話
都係差唔多
只不過張地圖變左offline map

試過喺荷蘭行行下 行出左地圖
問路嗰陣 個當地人好好教我行番岩路

第八天

終於到達Varanasi，時間已不早，比預定時間遲左差不多兩小時，心想都係儘快搵旅館吧。

在火車站出口我向jin同hye道別。
jin問我會去邊度住，話仲欠我早餐。
我就話唔駛啦，何況佢地個導遊已經係出口等緊佢地，果陣大約十一點。
jin提議，不如去佢地訂間酒店住。我問幾多錢一晚，佢話好平只係百二蚊美金。。。。。
仲話係城內好方便

雖然住得起，但一開始已經決定唔會係一場享受之旅，就多謝佢地，我指住Lonely Planet推介既旅館。話你果度對我太貴，我會住呢度
不過jin堅持，話佢老豆講過唔可以欠人野，其實佢地都冇欠我任何野。
結果佢拎左我電話，話一個鐘後打比我，就坐住佢地包既房車型的士走左。

而我離開火車站附近坐Auto Rickshaw去Shanti Guest House，一間好近Manikarnika Ghat(即火葬場)既guest house，所有Ghat都係恆河邊，選擇住果度可以方便地由一端南下去河的另一端。

但要走到Shanti Guest House途中要穿過很多小巷，左左右右的轉了好幾個彎才到，敢講冇本地人帶肯定迷路。其實結果我都係迷了路，我遇上一個賣明信片既小女孩，佢帶我去，當然地我幫佢買左張明信片作為謝意。

呢次係第一次住Lonely Planet介紹既Budget hotel，真係好便宜，200RS(大約38港元)一晚一個雙人房（其實只係一張雙人床）。但冇冷氣，只有一把風扇，而且洗手間好污糟，花灑水只能話係流出來。不過四樓有露天餐廳，可以睇到恆河，係好平份上就決定租下。

大約一點，jin打黎問我做緊乜，大家要記住，果陣係冇咩data sim / wifi 蛋，當然冇whatsapp / line / wechat，打電話既意思就係漫遊。呢分幾鐘好似就跌左十幾蚊。

我答佢正係露天餐廳望住恆河
佢就話係Manikarnika Ghat，導遊帶佢地去睇印度人葬禮，仲叫我快啲黎，話就快曬死

我就話，咁等我一陣，大約十五分鐘後見，好彩。本書有幾詳細地圖，應該唔會搞錯地方。

收線後，呢度既體驗強烈話我知，一場蠻不講理既欺詐快將開幕。

執好野後就落去manikarnika Ghat，睇到好多木材堆，應該火葬時用吧。
亦睇到全身包著白布遺体比人抬著走過，不過我地未行到火化地點，只見到不遠處有很多白煙飄著。

當我一想到離開時要比既入場費，我實在好難善意咁去想佢地公開火葬並給遊客參觀既背後動機。對著堆遺体，我只覺得佢地最後剩餘價值都比在生既人利用殆盡，究竟尊嚴這東西係呢度是怎樣定義架呢？

跟著Jin個導遊行上一座塔，係果度，另一個印度人不停介紹堆儀式。班逝者將會火化然後靈魂直去梵天懷內，因為火化是在露天地方進行，所以要廿四小時不停燒，大慨燒個兩三天完成。有一部份會進行水葬，因為恆河是和天連接既地方，它會將逝者既靈魂帶上極樂。聽住果個包住頭巾個樣似足吳耀漢既印度人不停咁解釋，令我覺得，似乎去天堂既路都幾多。

不過睇呢味野我實在冇乜興趣，正覺得悶時望吓Jin佢地，反而佢地聽到好入神，但Hye不止入神，仲好似好感觸咁，唔會有親人剛離逝而觸景傷情吧?

當終於聽完打算一齊走時，吳耀漢向Hye示意。

佢指住係一角既女人，話果個女人係個寡婦剛失去兒子，話佢好可憐要我地捐獻多少比個女人。
仲要每人三百rs，個導遊不單會擋住條友，仲加埋把口係咁嘈唔知講乜。

黎到呢度已第八天，我清楚知道同佢地講道理只會沒完沒了，清清楚楚表達需要表達既就得，況且我知道，雖然不能算是絕對，但佢地認為比左服務，要收回金錢好應該，當然服務價錢冇準則既，不過至少我知道佢地唔太敢對遊客使用暴力。

對著佢地，我冇開口，亦冇理會佢地。只係遙遙頭，默不作聲，甩開佢捉著Hye隻手，然後我將三百RS放入吳耀漢個衫袋就拉著Jin和Hye行。

吳耀漢一路叫一路想將錢比番我，我就好大聲叫don’t ，就再當聽唔到行出去，果然吳耀漢唔敢跟上來。

導遊跟住我地，話我好唔尊重死者，話佢地都想在生既人得到平安，我笑左聲。你講既平安咪又係錢。

之後我同jin講，都成兩點幾，我好肚餓想去搵地方食飯，你地跟著個導遊去下一個地方啦

點知jin話個導遊好悶，話同我一齊去睇吓有咩食，就叫個導遊走了。當然邊有咁易，人地係要搵著數點會比條大魚走。結果jin比左500rs佢打發佢走了。

我地差唔多行到Dasashwameth Ghat附近都見唔到咩餐廳，就決定走入去市內睇有咩地方食飯。穿過好幾條橫街窄巷，入到市內又唔覺邊間餐廳好食，Jin睇著佢本旅遊書，書內寫著有間餐廳係Station Road側。

佢問我好唔好，我只係話，只要有冷氣同可樂就得了。

到左間餐廳，果度連室燈都冇只靠日光，好彩冷氣開著，我點左三文治，佢地點了咖喱吃。
jin問我咁就夠？我話分一半比佢地都仲得，其實我完全唔肚餓，只係單純想抖吓。

之後大家傾起計黎，佢問我，點解唔可以比多啲，其實計番數目都唔太多，大家開心唔好咩？
可能我係正宗港仔又冇搵咩大錢。個人計較又討厭比人搵笨。所以就算明知條數唔大，但就好唔鐘意比人搵笨果種感覺。

我就解釋比jin知。我地食一餐點多都係幾百rs，但一個人就要比三百，點講都太過份。

「咁我明白啦...你唔鐘意比人當傻瓜？」jin咁回應我。我無答佢。反而講左第二樣野

我指住佢個咀，笑鬼佢好多咖喱，叫佢食完飯至講野比較好
其實我以為佢會嬲，有時我會做啲自殺行為，係香港，咁樣串個女仔一定出事。
點知。。。。佢仲係度笑，話係咪比佢估中左所以我唔應佢。
果種笑，就好似估中答案咁。女仔都好鐘意估人野，估中就好鬼開心。

笑完後，佢同我講，話佢地都係因為窮至要咁做。而家佢地嬲豬都有理由，佢地連親人都賣但得唔到你同情。而且啲錢可能要養全家。
我諗左諗，就同佢講，我諗你前排，應該好慷慨啦。

jin話，只係覺得佢地好多人可能窮到成世都走唔出呢個地方，我地就有能力四圍去，係咪應該寬容啲。
估唔到黎到印度，我比一個廿歲出頭既女仔教訓。
我問佢，既然你覺得我咁冇同情心，又點解要跟我走呢？其實我仲想話我好計較，但果陣冇google translate又冇得google 大神問，我都唔知計較既英文係乜。
jin話，我或者係咁既人，但同時好take care 其他人。

咁都幾矛盾喎，我話。

jin話，人生唔係多方面都好矛盾咩？
咁我問佢，咁做乜要打發個導遊走又同我食飯。
佢話想對我表達謝意。佢地係車廂時都覺得，如果我冇幫手，應該上唔切架車。
另外。。。佢話我應該唔介意同兩個後生女食飯喎。

見到Jin既笑意好似將世事都看透咁，很討厭。
唯有唔出聲食住三文治。我諗我真係唔識同韓國人打交道。

留名
用咩影相