2008年，32歲，我去了一趟印度。

第三天
正式講，今日至開始叫行街睇睇印度呢個地方，係Jaipur今日行程其實唔會去咩景點，都係周圍行，然後去巴士站買去agra既車飛，首先去左附近一間cafe 食左個早餐，個多士三文治入邊係磨菇黎，味道就不錯，不過就奇怪地有兩塊薯片!?
雖然都係人多車多，但感覺建築都唔太舊，不過附近就連一個亞洲人都冇，結果沿路我都比唔少人「問好」，可能出門少，又有第一二日既經驗，就唔鬼理佢地。

然後去左風之宮HAWA MAHAL條街行
我黎印度，對我有兩個目的，固然我真係好想睇睇印度既建築，雖然我都唔太答到點解，第二係當呢個旅程完後，我就要接受一個幾大既挑戰，在此之前， 我最大既自由行就係去東京。
比起好多巴絲打廿幾歲就環遊世界，我的確嚴重不足。又覺得如果再唔聽從心底既說話去做，再年紀大就乜都唔敢的了，或者到時結婚生仔，想有此衝動都無法實現。

之後去到巴士站，本來我點都想買有冷氣巴，因為我會坐夜晚巴士去到agra 應該係早上，咁點都訓得好點，無奈寫住ac 既都比較早開，去到agra係零晨三四點，我就唔想係車站等到日出。
問佢deluxe係咪冇冷氣，售票果個又話有。只係冇咁勁。咁我就買左deluxe 車飛。有經驗既巴絲應該估到後果如何。

之後都係市中心行，見到有戲院就睇左場戲。講真戲院內真係勁多印度味，非常濃烈。
套戲其實幾老土，就係九十年代既B級港產動作片，不過男既型女既索，當時對印度好唔了解。以為好保守，唔明點解可以著得咁性感。但有樣野好老土，一有動作場面，例如有 a跳去b ，會重播幾次個動作，不過用唔同角度，同埋慢動作。至少播三次。

睇完戲就去左麥當勞食野。係十幾年前，香港已經冇左麥當勞叔叔，呢度見到好親切，門口有保安，可能太多窮人，入邊又有冷氣，所以就要保安守住。好記得有炸素餅包，但今次冇食，因為冇牛同豬既漢堡，就食左個雞包，而家都記得，個包好乾
同埋大開眼界，果度既人喜歡將茄汁唧係個包度食，可能印度人就係咁鐘意醬汁呢樣野。
就係咁今日就係咁過了，冇記錯八點左右就返到酒店，整理吓映既相就睡了，寧願第二日早點起身去玩。

要講既係。當年好似冇高登，但要搵網上遊記或問題既，冇記錯都係背包客棧。
而家的確，只要一上網就知一個地方最熱門地

但當年，我對印度景點就只係知泰姬陵，咩風之宮/紅堡之類係唔知既
都係去前睇睇書，睇睇背包客棧推介路線/景點有個大慨，但就上網搵圖都冇而家多，多數係政府旅遊網搵到既低清圖。

所以呢次旅程係充滿好奇同有少少冒險感覺。
而家就唔駛啦，上網就大把 youtube 比你睇。都冇乜好期待。

做咩由書面語變左口語

G持 幾有趣

果陣好似仲正 而家太多device幫到手 太方便

風之宮都好似冇乜點變

支持

好有味道既遊記

係咁俾人昆都幾冇癮

就咁攞住本lonely planet就去印度真係好刺激永遠唔知佢幾時會幫到你幾時會害你 LM等更新

好好睇

第四天
今日主要去兩個景點，所以只講重點算，反正景點而家聽我講，不如你地上網睇片仲好

一早，就去左隔離間酒店天台食早餐，價錢我就唔記得啦。間酒店我記得都係六七十美金一晚啦，眼見食野既都係鬼佬黎，個早餐係香港實比人屌晒鬼。冇肉，全熟蛋。
不過個印度奶茶超好飲，係印度，我幾乎每日都要飲。

然後坐auto去左風之宮，原來好鬼大，加上算係第一個正式去既景點，我記得留左成兩個幾鐘至走。天氣好熱好乾，所以其實都冇咩食慾，只係飲吓水就夠，不過我個人就覺得好靚，有一種超整齊既感覺，樣樣都好公整咁。啲公仔圖案又得意。

其實都唔少本地人入去參觀，好多細路仔對我都好鬼好奇咁，唔識講都笑住望我。又捉吓我隻手咁，我就同其中一個細路映相。講真佢地對眼都好大好靚。

之後都冇食野，搵auto 上山去左琥珀堡Amer Fort。

坐auto 又遇到趣事，係上山途中，個司機又不停話佢點有誠信，仲比本筆記我睇，入邊有唔同國家既鬼佬寫低話對司機服務幾好幾滿意。我唔知真定假，不過包佢來回都好平，佢又叫我慢慢睇一兩個鐘都等冇所謂。咁就包佢叫佢係堡外等我。

去到琥珀堡，果日天陰，中間係突然會有超大雨，又會有狂風沙。香港我就真係未見識過狂風吹起成堆沙。係印度就係第二次見識，係堡內，見到有人塗鴉，唔知係本地人定鬼佬做。不過我始終好唔鐘意呢樣野。

避雨時去左一個亭，入邊企左兩個印度女仔，幾靚但應該十幾歲，著住超靚既印度服裝，即係金光閃閃果種，係咁對住我笑，唔識講英文，伸手出黎，我又伸手出黎比佢地望。有時我真係唔知我係咪變左外星人。如果用呢兩年說法，我就似進入左異世界，我就係異世界內唯一人類咁既感覺。
仲有一樣好深刻，就係佢地手背既Henna art都好靚，不過我唔敢摸，唔知會唔會有咩麻煩。比起見慣世面既連登巴絲，我的確冇乜膽。
避完雨行多一陣，見到有個印度家庭，個男人不停同幾個亞洲女仔講野，本來我都唔想理，但見到幾個女仔走時個男人擋住佢地，我就唔知邊度黎勇氣，走埋去問乜事。
原來個印度男人，竟然想用佢手上部垃圾菲林機，去換個女仔手上部sony dc ，其實型號就唔記得，但係一定係賣緊四五千果種。

呢度要停一停解釋，係印度，因為宗教我估，全程我都算安全，冇偷冇搶，但佢地好鐘意呃，但係佢地角度，咁唔係呃，佢地比左服務，就值得收錢，收到幾多係佢地本事，即係我認為件野值一百，佢地開五百，有人比係佢地本事，不存在呃

等於果刻我見既，個男人覺得已物換物冇任何錯。而且佢仲覺得好公平，所以就想做成呢單「生意」。

係印度，識好多英文其實冇用既，你同佢地講，佢地一係扮唔識不停講東講西，一係就勞勞嘈嘈，最快最有效方法，就係直接表達想點，任何語言技巧都唔需要。

當下我直接fuck條印度佬，只係大聲講左聲don’t，然後拉走果幾個女仔。佢想跟黎我就回頭指住佢叫佢stop。咁佢就冇再跟住黎。
之後果幾個女仔多謝左我，不過我又再細膽起黎，好瀟酒咁講左聲welcome就走了，今次係我第一次見到亞洲人，係三個韓國女仔。


呢張係由風之宮望出去

到落山，果然個司機有古惑，不停話要車我去佢朋友度飲奶茶，我已不停話有事。但佢不停講，去到落山。大約係水之宮附近停左，又話要去洗手間，就落左車閃左人，果陣都心諗如果佢搵多幾個人圍我，最多立即落車走人。
好彩之後都係佢一個返黎，不過又唔開車不停叫我跟佢去佢朋友度，又話呢個時間要食tea，我就只係不停話約左人。叫佢開車去番市中心老麥度。
最後佢都無奈開車。不過我落車都比多一百佢。仲同佢握手笑晒口話實會介紹朋友比佢。

係市中心行左陣，睇有冇咩手信買，但就冇咩啱心水。到六點就去食飯。
我就冇睇書，就咁係街行睇邊間想食。我諗當時有少少井之頭果種周街探險搵食感覺。
見到有間餐廳好似幾靚。連侍應都著晒老西咁。就諗住點貴都要食餐好。

就走左入去。結果你地可以睇吓相就明。雖然醬汁唔錯。菜又新鮮，但個咖喱雞肉。
件雞好鞋又老咁。。。。。真係有少少灰爆，不過就環境唔錯坐得舒服。
食到咁。結果都係港幣二百元左右埋單。我就覺得好平。

以前買車飛都唔駛網上做, 唔駛信用卡
去到walk-in買都得

冇記錯，大約九點我就去左巴士站，坐長途巴去agra，在休息室坐等車時，我忍唔住好奇，問左隔離坐既印度妹，deluxe 同ac有咩分別，佢話deluxe 係冇咁多冷氣既巴士。。。。。
我心想仆街了。

果然，邊係冇咁多冷氣，係直頭冇冷氣。仲要有班印度人。不停大聲嘈傾計係度笑。就係咁熱左成晚。幾乎訓唔到度。班友我諗嘈到十二點一點至收聲訓。但間唔中又大聲笑幾句。

不過架巴士完全熄晒燈咁行。中間好似有停過但太累冇理到。。。。

大約早上六點，就去到agra了。就係咁完左第四天

留名 幾個月前係烏克蘭撞到個50歲香港叔叔流浪 講開佢以前係帶埋地圖+搵當地人傾計 然後就四圍去 好佩服以前嘅backpacker面對嘅一定比而家困難好多respect

有左手機有地圖，可以係緬甸個景區自己一個人半夜行，冇地圖真係點死都唔知

佩服樓主記性咁好

因為大部份有寫筆記，不過如果你見寫得比較快既。
就冇寫到，只係睇相記番起