先補漏一件事，德川家康在1601年論功行賞後，開始對關東地區大肆檢地，成為全日本 幾乎最後檢地既地方。因為德川初到關東時驚得罪地方勢力，落得像佐佐成政既下場，所以等到勢力穩定才檢地。
1603年德川家康開幕後，發佈「天下普請令」要求全日本大名派人力物力到江戶築城開發，並且修建大名宅邸，目標令江戶成為日本中心。另外，德川家康亦下將江戶城與江戶前島之間既日比谷入江填海，以擴大江戶城既城市範圍，呢項工程一邊發展，一邊修建城下町，直到1620年才完成。
日比谷入江。填海前
填海後
同年，因為關原之戰被沒收領地既丹羽長重恢復大名身份，分封地係常陸國古渡城。而立花宗茂兩年前飄泊各地，拒絕加藤清正及前田利長既邀請，抵達江戶城後受本多忠勝推薦，在德川家康手下仕官。而潛逃薩摩既宇喜多秀家亦被幕府發現，島津忠恆及前田利長為佢求情，所以暫時響駿河國軟禁。
1604年，既然叫全天下做自己幫工，跟住落黎當然要加強集權，所以仿效豐臣秀吉要求所有大名向江戶送交人質，以示效忠，連豐臣家本身既人質集權政策都取締。
5月，話說東方國家對絲綢需求較大，當時日本土產絲質較差，明朝既"made in China"係有品質保證，但係朝鮮之役後，日本與明朝斷絕貿易，咁日本就只能透過葡萄牙殖民地 - 澳門進口生絲，然需獨市令葡萄牙操控出口價格。所以，德川幕府安排御用商人 - 歷代「茶屋四郎次郎」在堺、京都、長崎等地發佈「絲割符」，指定三所日本商人決定進口及國內轉賣既生絲價格，壟斷日本生絲買賣。
絲割符
1604年7月，未來第三代將軍德川家光出世，由明智光秀舊臣齋藤利三之女 - 阿福擔任奶媽，點解要提阿福？佢後來人稱「春日局」，即係江戶聞名既後宮「大奧」既創始人呀。
除此之外，日本一直有維持與外國貿易，由豐臣秀吉向堺港、博多、長崎港商人發朱印狀，批准有朱印狀既船出國貿易，德川家康承襲秀吉既體制，1605年規定只有獲發朱印狀既商人、大名可以出國貿易，將長崎納入直轄地並規定只能透過長崎港出入，變相令堺港地位式微，而總共有百幾名日本、外國商人及大名獲發朱印狀，主要到越南、泰國、馬來西亞、印尼、菲律賓等東南亞地區貿易，進口砂糖、鯊魚皮、鹿皮等特產。
而日本由於石見銀山產量豐富、火山地熱多，以及日本刀鍛造精緻，所以主要出口白銀、硫黃、刀具、銅錢等物。順帶一提，明朝由於正實行「一條鞭法」需要大量白銀，但礙於明日禁貿，所以就同朱印船商人約定某個地點進口白銀-生絲交易，各取所需。
日本朱印船貿易圈
1605年，德川家康上洛，德川秀忠率領東國大名共16萬兵力參見，壯大聲勢。4月，豐臣秀賴晉升右大臣，同時德川家康向朝廷上奏，將征夷大將軍讓給德川秀忠，自己擔任大御所（即退隱既將軍）開始江戶時代初期既德川雙頭統治，家康負責對西國統治、秀忠負責東國。
然後德川家康要求豐臣秀賴上京祝賀，淀君極力反對，因為豐臣親自上京，將代表自己淪為臣下，德川家康亦認為豐臣系大名尚在，自己亦未穩固，故讓步派松平忠輝到大阪祝賀。之後，德川家康眼見由於貿易興旺，國內天主教傳教士急劇增加，崇尚傳統既佢當然不悅，就禁止天主教於江戶傳教
1606年3月，德川家康任命藤堂高虎正式擴建江戶城天守，並繼續發動普請要全體大名提供物料，打算疲勞轟炸佢地。4月，軟禁之身宇喜多秀家被流放到日本以南既八丈島，昔日響豐臣家顯赫一時既大名在此了渡餘生。
同年，德川家康認為市面貨幣複雜，所以發放「慶長通寶」，統一由中央鑄幣發行，嚴禁使用昔日流通既惡錢及永樂通寶，打算打擊大阪沿用既永樂通寶，但係當時大阪係最大經濟市場，習慣使用永樂通寶，而慶長通寶品貿更差，反而令更多惡錢流入，所以呢場對豐臣家既貨幣戰，德川幕府係輸左既。
慶長通寶
1606年9月，江戶天守改建完畢，正式擴大規模，而德川家康亦命人改建駿府城，準備將來到當地辦事，留低江戶城俾秀忠。
次回
慶長琉球戰爭
日葡貿易糾紛 - 慈悲聖母號事件
