「咁墨龍先生!我哋就不如講番你地區賽‧‧‧仲有之後決賽嘅事?!」卡多回到廂房,繼續與墨龍談話。
「此地不宜久留。」我說。
「你返上去先‧‧‧我仲要睇埋決賽先可以離開。」忍蛋也有自己的目的:「我要去親眼確定一個人‧‧‧‧‧‧」
「你之前提過嘅百足半藏?」
「係‧‧‧個一嗰大會連霸得主,仲係好似對佢有啲印象。」
「咁好,我陪埋你,直到決賽完結。」
「你‧‧‧」
「反正得我一個都救唔到鬼匠。」
忍蛋點頭,然後我們二人便雙雙離開飯店。
到地區賽的一天,比賽場地移施到中原區域,是為人流最廣混集的地方,我跟忍蛋沒買到座位,只得透過攀登上去會場的圍牆,借此觀視比賽。
「嚟到九龍寨暗黑地下格鬥會嘅地區賽啦!唔知大家認唔認識我!點都好,我係今日嘅主持人!!出賽嘅選手分別有北部同南部三位三甲選手,而西部同東部就因為一啲問題,所以得東部嘅墨龍選手,有命參加依場地區賽!」我認得他,是上次中槍的主持,沒想到中槍後中氣依然。
「首先介紹一下,北部菁英選手分別有,香氏跆拳道門派嘅天才──香金娜,佢雙腿比雙手仲要靈活!可以喺不可思議嘅角度踢中對手!」
主持人介紹完後,香金娜選手立即出場,是位帶住亞洲臉孔的金髮美人兒。
「另一位選手,係元家嘅手劍部學會主將──元煥,佢雙手鋒利如劍,威力猶如劈地斬山!」
是個戴住藍色頭巾的普通男人。
「最後一位選手,美國已故拳王JS‧Baby嘅外孫──Peter!擁有美國雙碩士學位,但書生外表背後係擁有700磅力度嘅恐怖之鬼!」
是個外國書生模樣的人,可是左手顯然有特別練過。
「之後一位‧‧‧‧‧‧就係被稱為今年最有可能勝出嘅武術高手──墨龍!無論人氣、實力、背景,都十分令人著迷嘅超人氣選手!!!!!」
「喲?講緊我?」墨龍呆呆地站前幾步。
「最後後三位,南部嘅‧‧‧‧‧‧(下刪一百字)。」
主持人宣佈結束後,就有職員上前為墨龍縛住右手,主持人便立即解釋道:「由於上次分組賽中,墨龍選手作出干擾比賽結束行為,所以被罸只能單手應戰!」
「屌你咩!!叫人點打呀!!!」當場一大部份的墨龍粉絲隨即怒罵。
「好啊,有挑戰性。」墨龍卻毫不畏怕地,橫望會場眾選手:「反正‧‧‧‧‧‧在座各位,都係垃圾。」
「你講咩話!」、「你可以話我,但唔可以侮辱我師門!!」、「我要收番依一句!」
「哇哇哇‧‧‧墨龍選手未開賽之前,就激嬲眾選手!我勸各位冷靜啲啊!」
「垃圾就係垃圾,喲~唔記得你哋從未領教過中國古拳法。」墨龍淺淺一笑。
「你‧‧‧‧‧‧!」手劍門的元煥指住他,然後就衝上前伸出如刀片的手。
被綁住一隻手的墨龍飛身上前,面帶笑容:「喲!垃圾。」他跳起往上,雙腳把對方的手夾住再把身子扭側翻轉!
「格噠!」一聲除了斷骨之餘,墨龍更借此不斷踢擊對方的頭部,直至元煥沒有氣息為止。
「果然唔可以少看‧‧‧!But you will dead!!!!」Peter用極強的左臂往墨龍揮擊,一拳便打中了他的胸部。
沒想到墨龍只是閉住氣息,沒有半點痛楚的樣子,再反打一拳往對方的左臂,Ptere馬上彷如骨折一般倒臥於地上。
「仲有我!」最後一名北部選手,香金娜也出場了。
墨龍一點憐香惜玉之心也沒有,使出一記旋風踢就讓對方無從招架,最後被踢飛轉身幾圈落地。
「呼‧‧‧?北部嘅已經完結?」墨龍望望主持人。
「係‧‧‧係嘅‧‧‧‧‧‧」