卡比先生
2019-05-07 09:13:26
你冷靜下來並向她點了點頭,示意你願意聽她解釋;卻也同時不斷提醒自己,千萬不要輕信她所說的任何東西。
「就好似我啱啱咁講,我嘅任務係持續關注外國在港情報人員嘅動向,然後定時定候上報俾情報局知。九七交接之後,情報局透過各種威逼利誘嘅手段,慢慢整理出一份監察名單,其中有外國回流嘅專才、退役軍人、政治庇護難民,甚至係大學留學生等等。」她伸出了五隻手指,「而呢批人足足有成五百個咁多……榮叔佢哋只不過係五百分之三。」
「你意思係……佢哋三個唔係特定目標?」
「本身唔係,」莎姐搖搖頭說:「直到病毒爆發之後,政府透過控制水、電、煤同網絡供應,同時利用大氣電波宣布戒嚴,成功令到絕大多數人處於資訊隔離嘅狀態;而一小部份受過軍事訓練嘅人,佢哋唔單止識得點樣去互通消息,更加有能力係惡劣環境之下捱過一個禮拜。」
看到你聽得一頭霧水的樣子,她又補充說:「淨係靠病毒同喪屍嚟殺四百萬人,可能十年都未必做到;但人無水同野食,最多只可以捱到七至八日左右。換言之,只要令到全香港有一半人陷入呢種局面而又孤立無援,個計劃就會成功。」
「所以佢哋封鎖邊境,目的唔係防止病毒擴散,而係唔俾外面嘅物資運嚟香港!」你茅塞頓開,卻也愈發心寒。「所以榮叔佢哋嘅存在,就係最大嘅威脅……」
「無錯,No witnesses……中共唔會再犯六四嘅錯。」莎姐點頭回應。
「但係你無落到手,」你問,「點解?」
「我份糧唔包大屠殺。」她苦笑道。「我當初入情報局係無得揀,但依家我有。」
她伸手指向了你。
「等等先……咁即係如果我同浩南個日無出現嘅話,你最後咪會--」「呢個世界無咁多如果,」她登時打斷了你,「……亦唔係個個都咁好彩,可以淨係揀啱嘅嘢去做。」
「咁你依家揀咗唔做嘅嘢係咩?」
「幫兇。」