十七天 即影即有日本中部（名古屋、福井、金澤、高山、岐阜市）

上個Post差不多一個月前，講到訂民宿床位，最後嗰晚得我一個客，老闆有事又要返屋企訓，成間屋得返自己一個，落雪又落雨，又有人講鬼故，嚇到成晚都訓得唔好



今次帶埋兩老去，除咗落機當晚住宿同合掌屋，其餘住宿都係入住前幾日上網訂，所以會出現上面福井咁，搵唔到價錢相宜既三人房，就會分開訂一間雙人房俾兩老，我再訂另外訂床位。但整體住宿都非常滿意

https://lihkg.com/thread/985290/page/1

因為每個地方停留時間比較長，無買周遊／巴士套票，交通費佔總支出約一成三，五千左右。住宿、交通等後面再講，行程如下：

第一天：抵達名古屋
第二天：名古屋城、大須、榮
第三天：犬山城

第四天：抵達福井市
第五天：丸岡城、東尋坊、蘆原溫泉
第六天：恐龍博物館、勝山市（越前大佛、平泉寺、勝山城）
第七天：福井城址、養浩館庭園，離開福井市、抵達金澤市

第八天：金澤城、茶屋街、尾山神社、近江町市場
第九天：富山市（富岩運河環水公園、富山城、富山県美術館、富山玻璃美術館）
第十天：21世紀美術館、兼六園，離開金澤市、抵達高山

第十一天：新穗高纜車、平湯溫泉
第十二天：宮川朝市，離開高山、抵達白川鄉

第十三天：白川鄉，離開白川鄉、抵達岐阜市
第十四天：養老公園
第十五天：岐阜城，離開岐阜市、回名古屋

第十六天：名古屋市科學館、東山動植物園
第十七天：名古屋港、金山，離開日本返港



去之前都問過唔少人意見，話高山、岐阜市唔洗過夜，名古屋無野好玩云云。但我覺得歸根究底太多人受交通PASS限制，為咗用盡張PASS而走馬看花。旅程中遇到班香港遊客嚟玩九日，都唔算短日子，但為咗用盡張PASS， 白川鄉、金澤，都只可以停留兩個鐘，作探路式旅行，白川鄉可能街尾都唔夠時間行過去

一開始名古屋留三晚，最後再補兩晚，好多朋友第一時間會覺得好悶，但其實頭尾兩日花咗係交通上面，其實得返中間一至兩日玩，日本觀光項目相當豐富，放鬆心情去周圍行下，總會搵到屬於自己既角落

另外因為立山黑部未開，由金澤抽咗一日去富山，無過夜。



旅行都會帶兩部即影即有相機，上次緬甸帶咗Fuji FP - 1同Fuji Wide 300

https://lihkg.com/thread/945981/page/1





Fuji Wide 300作為旅行相機有個大問題係強制閃光燈，今次買咗部Lomo Instant Wide，總算有一部相當滿意既旅行機

可以換上廣角鏡之餘，有個非常有心思既快門搖控鏡頭蓋
不過測光方面…









今日好多時間慢慢打

第一天：



嚟到名古屋或者日本中部，成日聽到「昇龍道」。「昇龍道」其實代表日本中部北陸地帶，因為其地形好似一條龍，就取其名為「昇龍道」。

今次行程都走過幾個「昇龍道」城市。




一落到名古屋機場就見到兩個中東人俾警察查牌





好快搵到地鐵出返市區，第一晚係名古屋站附近住，先去著名購物中心BicCamera買兩張 30日 1.5 GB上網卡，大約百五蚊一張。第一晚同兩老分開住，我個間叫First Cabin TKP ＠ Nagoya Station，設施相當好既一間膠囊酒店，係我係日本住過頭三位舒適。



大堂有早餐餐廳，早餐時間以外任何住客都可以入去坐，外面亦有自修室式單人位可以食麵睇書，有個漫畫角落。大堂以外樓層分男女使用。



地下一樓有浴室外，仲有個大浴場，比你同一班男人玩水 而我亦好鐘意佢將浴室同洗手間擺得好近，只係一牆之隔，有啲膠囊會分兩層樓擺



每間膠囊房都有獨立暖氣、電視、鎖櫃，每日都換新毛巾、鞋、浴袍比你 下面啲圖係佢網站搵，始終有啲地方唔方便影相









一晚大約二百蚊，唔包早餐，價錢中等
但講返位置，離車站十分鐘內腳程，但名古屋站附近食店同景點唔多，建議住過一個站去榮、大須會更好

欠欠

第一天 乙：





住呢種酒店最好當然係可以同其他住客多啲交流
傾咗陣計，將背囊廿幾盒相紙放入櫃，就出去搵埋兩老食飯。又巴士又飛機又地鐵大家都攰，見到有間松屋二話不說就入咗去，由馬鞍山到名古屋第一餐，已經覺得世界唔同哂



食碗細飯其實唔夠飽，上網搵名古屋美食，個個都介紹雞翼，睇返資料有兩個集團比較出名，其中一個就係今晚會試既世界の山ちゃん。相信係老闆既男人甚至將自己個樣畫落隻雞上面，相當日本人既做法，大家食可以參考下



佢標準係五隻為一人份量，無限叫幾多隻，分別叫左兩款唔同味既雞翼，一客茶漬飯，兩杯酒。香口野又新鮮就一定多汁好食，但係唔係出色到做一個市既特產美食就…



調味落手好重，辣度一般，但非常咸，飲哂兩杯酒都覺得好咸，連茶漬飯都好咸 我覺得鄉音米線隻雞翼比佢會好少少

第二天 甲：



起身出去食咗個早餐就起行，名古屋早餐出名多士配咖啡，第一次試個間叫Cafe de Crie，連鎖咖啡廳，就唔係到詳細介紹

第一站係名古屋城，腳程大概半小時，打算名古屋城＞大須＞榮，圍繞一圈再返去



沿途見到好多消防車



可惜既係名古屋城維修緊短期內都唔入得





城區唔大，兩三個鐘都行哂，仲有幾個細建築物可以參觀，有部份要除鞋入，如果冬天去記得記得著佢對拖鞋，真係會凍到腳痛



每日指定時間都會有武士、忍者出沒，但因為有兩個門口，唔知係邊個行出嚟，係呢段時間內會行遍整個名古屋城區，由另一個門口離開，有心總會見到佢



驚棵樹凍包住佢



日本好多地方有既記念幣機，旁邊就有部刻字機，相信去過日本旅行既巴打都見過，而呢部機就多一款日本古金幣形狀



好快就行完成個園區，出口旁邊有幾間餐廳，食咗個普普通通沾麵就起行行去大須

經過護國神社



又經過公園

欠巴
推

第二天 乙：



大須大致上分兩部份，一部份係大須觀音，每年都好多祭祀活動，18號、28號會搞古董市場，2月亦有寶船遊行。附近有啲餐廳就係18、28唔開門



另一部份就係井字形商店街，服飾、動漫、電器、飲食等等應有盡有，亦有間大鋪賣二手相機同相關配件，我都買左個自動快門



貨品五花百門，就算賣服裝都有各式各樣選擇，唔似廟街咁幾間鋪賣緊同一件I LOVE HK Tee。如果想搵靚仔二手皮褸、西部牛仔鞋、英式配搭，可以要花幾日時間慢慢行，建議可以係到住返兩晚。尤其日本店鋪好鐘意一星期休三日，每日開兩個鐘，行一次會錯過好多店鋪，所以行程尾聲都係返大須住



賣二手衫門口見到呢樽奇怪野





行左咁耐都開始餓，打算過榮食晚餐。榮又係分兩部份，一邊係夜晚幾個主要建築都會亮起色彩繽紛既燈，包括名古屋電視塔同綜合公園 OASIS21，所以揀左晚夜去，可惜到發現名古屋電視塔無開燈

另一部份係榮地下街Central Park，見唔到盡頭既商鋪，但好多鋪頭都好早收

老實講燈光比較俗，外面亦好凍，醫飽左個肚行返酒店

榮街道邊幾個人偶



好似酒吧





自己住有樣好，可以買本六十路甜書返去慢慢睇

天氣麻麻 但啲相都好靚
已經期待你下次去旅行啲即影即有

強勢追欠欠POST

聽日繼續

四月頭打算去自駕睇櫻花
支持樓主繼續分享

相機同相紙分別幾錢
咁樣玩好燒銀紙
我都想去立山黑部 次次都撞唔啱開山
早排都一個人去咗6日中部
落住雪既白川鄉同高山真係 嗚啊

推

留名
五k幾交通係三個人？

留名
下個月去名古屋七日

lm 4月睇con去名古屋7日

呵欠欠

留明

我都諗緊四月去睇櫻花，你去邊頭

Lomo Wide做緊情人節優惠，1480 不過無女唔俾買

相紙九十九蚊 二十張

係，三個人總交通費～＄5158，可以抽一小段行程對比PASS

以昇龍道高速巴士 3 日 券（＄479）為例：

・【3 日 - 高山、白川鄉、金澤路線】使用範圍：
　名古屋
　高山
　白川鄉
　金澤
　富山

如果唔趕行程，三日其實只可以揀兩個地方夾住白川鄉玩，以我為例應該係高山＞白川鄉＞名古屋呢條線，2470 yen + 3250 yen，約港幣$415。

當然你可以選擇白川鄉唔過夜，名古屋一早入白川鄉玩幾個鐘，返高山訓兩晚，第三日一早返金澤，就賺多一程車，高山＞金潭，大約百幾蚊。

如果旅程日子短，我會選擇放棄去多個地區，而花多少少時間係同一個地方，錢其次，但浪棄左時間就好可惜

立山你有明確目標，名古屋有前後應該夠去榮、大須，一日淨係留俾高山市內宮川朝市、陣屋、老街都有充足時間。反而金澤要取捨一下，因為金澤好多景點又集中。唔知你興趣，最主流會去兼六園、金澤城、東茶屋街、21世紀美術館、近江町市場。除左近江町市場我覺得流流地，其他都幾有觀光價值，但另外幾個地方既觀光時間都非常長，因為地方確實幾大。

兼六園就日本三大庭園之一，不過以「雪」而聞名，你去得立山可能兼六園都無乜雪，雖然都係好靚，但可以作為篩選考慮原因。

另外係21世紀美術館，參觀起碼花兩小時，但如果對呢方面無興趣，可以考慮一早去東茶屋街，接住金澤城，旁邊係兼六園入口，最後係21世紀美術館出口離開兼六園，係美術館影張相就走

btw 金澤車站有非常抵食既海鮮可以一戰，後面會講