一開始會諗，點燈，即係開哂所村啲燈姐，我係到住一晚，唔通你地成晚都唔開燈咩，十二點出去一樣影到靚相
事實佢地天黑真係全村都唔開燈唔出街
另一個問題係入夜，門口既熱水管就關上，唔洗好耐門口就積滿人咁高既雪 唯有乖乖地訓教 
早餐除左我地，全部人都唔見影
主要係味噌醬送白飯，已經可以食兩碗飯
食飽飽就要退房了，同老闆影左幾張相就離開
今日非常非常大雪，趁未有人一早就走去三小屋影相。原本前面係農地，雪好厚好深，本來唔打算行入去想放棄，點知有個台灣爸爸好勇行左入去，我就跟住佢腳步行
雖然我隻鞋係防水，但底下真係太深，仲有水泥，最後都係濕哂，之後結冰，痛到
奉勸各位有心影相真係要著高身防水鞋 
外來客八點已經開始湧入，但因為雪太厚，好多地方都空左一片地出嚟好適合影相
由高山開始已經有呢種情況，就係AirPods式手襪，係路邊成日見到隻影形單既手襪
見到屋頂鋪滿雪，決定走多轉展覽台，不過滑到仆街
因為腳凍到痛，係展覽台一間咖啡店坐低叫左兩杯野，走到旁邊紀念品鋪買左對印有白川鄉既襪換。
大雪下風景都比較矇矓，不過都比左1500Yen影左幅家庭照，都算幾靚，又快手，職員仲識講十八國語言
Lomo影背光真係唔得
落返大街間間餐廳都爆滿，就靠小食充餓，不過啲咩五平餅真係食唔慣
仲有最後四晚，唔想住哂名古屋，就移上少少係岐阜市住。景點同商鋪好足夠，近代變成名古屋衛星市有少少可惜，聽講當局開始大力推廣岐阜市。不過唔知係遊客太少定我唔好彩，只訂到一間離岐阜站相當遠既民宿，感覺麻麻就唔多介紹。
而由白川鄉去岐阜市既人真係少之有少，幫我地買車票既高山觀光職員都搞左好耐，辛苦哂佢。巴士係白川鄉往名古屋方向，途中要經郡上八幡轉車，每日得一班車夾到時間，我地亦係唯一一個咁玩
