推開餐廳大門,Brendon同侍應講兩位之後,我哋就沿往樓梯上二樓。Brendon係前面行,我就一步一步趷上去。Brendon響樓梯頂等我,我上到去之後,佢突然好快咁搭住我膊頭,好大力咁拎轉我個身,講「呢度唔好食嘅,我地⋯去過第二間啦。」我本能反應問「做乜嘢呀,玩完未呀⋯」我拎轉頭望一望,見到一個熟悉嘅身影,我⋯我見到Thomas同Kris響卡位度食飯。我即刻拎返轉身靜咗,耷底頭冇出聲。Brendon「都話咗呢度唔好食,去過第二間㗎啦,又唔聽。嗱宜家你慢慢行返落樓梯,乜事都冇發生過,乜你都見唔到。」我腦𥚃面一片空白,佢講乜我都照做。慢慢咁樣一步步行返落樓梯,點知Thomas響我轉身嘅時候已經見到我,佢行過嚟問我,點解你哋會一齊喺度㗎?你對腳做乜嘢呀?手指住Brendon問點解佢會同你一齊㗎?Thomas比平日顯得特別唔冷靜。我無言以對,明明應該係我問點解佢會同呀Kris食飯變成佢不停問我點解,我又唔知點解䆁先可以冇咁尷尬⋯Brendon用力咁搭住我膊頭,舉起另外一隻手比Thomas睇佢攞住我個公事包,嘻皮笑臉咁講「拍拖囉,點解唔可以響度呀!Kenneth鍾意食雞翼,我哋咪嚟食囉。」
現場Dead air 咗三秒,之後Thomas好緊張咁講「冇可能!每一次你同佢一齊都會整傷佢!」Brendon好得戚咁回應「點都好啦,事實就係你見到咁。」耷底頭扮溫柔咁同我講「BB,我哋去第二度食。」我冇言以對,本能反應咁回應「你⋯我⋯⋯」響呢個時候,發生咗最唔想發生嘅事⋯Kris攪事咁行埋嚟,不慌不忙咁講「食飯呀,不如一齊吖,做乜走啫?我哋嗰面有卡位呀,定係你唔想面對?反正我都好好奇,你又矮又瘦又普通,點解Thomas會咁care你。」「你⋯」Thomas一臉無奈咁想叫呀Kris收聲,好明顯失敗咗。
我突然好冷靜咁轉身「好,一齊食吖,順便開個會,反正board paper都未complete」响嗰一刻我見到Thomas同Brendon都呆咗一呆,而我就慢慢一步步咁趷過去張卡位度坐底。「喂!你唔好攪啲咁嘅嘢啦,好好哋食餐飯唔得嘅。」Brendon有啲惡咁講。「你話想食雞翼吖嘛,坐啦,我請!」我嘅説話不帶任何語氣。佢氣沖沖咁行埋嚟坐咗響我隔離,Thomas亦都鄒起眉頭,慢慢咁坐底。