5.1
開完兩個鐘頭無氧分又無結論嘅marketing會,我𢲡住部散咗嘅電腦行返入房。其實嗰個咁無建設性嘅會正好比我抖一抖氣,一路望住無重點嘅powerpoint,一路聽住無新意嘅presentation,我淨係望住自己部電話既whatsapp⋯
「Ken,我哋有啲誤會,需要傾下。放工後飲杯嘢?」
「呢種誤會唔會再有第二次⋯」
我响度諗,我會唔會真係誤會咗Thomas呢?點解我覆得咁快⋯如果同佢傾下又會點呢?我冇答案,唯一我知道嘅係,我一次過冇咗我嘅情人,朋友,工作伙伴⋯我打電話叫IT回收部散咗嘅laptop,之後我就挨咗喺椅背度合埋雙眼。
大概半個鐘之後,收到admin dept. 嘅message問我制服係著乜嘢size,我好驚訝咁打電話問「咩制服?咩size呀?」Admin個dept. Head好慢回答「你哋BD team參加咗SKY RUN嘛,下個月跑IFC,公司預備跑步衫褲比你哋,仲要印名呀!希望你哋跑快啲,有好嘅成績啦。CEO office都好重視今次比賽,話係一項好好嘅team building活動。」
空白咗幾秒之後先回想返頭先Brendon同我講嘅嘢,佢真係交咗名比admin參加比賽。我十萬個唔願意咁call咗佢入嚟我房,劈頭一句就講「你攪乜嘢,玩完未呀?做乜事樣樣嘢找我麻煩!」佢行埋嚟我抬邊,烏底身雙手撐住响枱,笑笑口咁同我講「冇養分嘅説話唔多講,我同埋CEO office講咗我哋reginal BD team會參加,呢次你想縮都冇得縮。」我火都嚟埋咁同佢講「你憑乜嘢認為我會參加呢啲咁無聊嘅活動呀,我⋯」「憑你好勝囉,有我響度我哋一定贏。」我都未講完佢就搶答。唔好諗咁多喇,聽日開始我哋特訓跑樓梯,有我操你,呀唔係,係有我幫你操,5分鐘內一定可以跑完廿五層樓。」
「如果輸咗咁點?」我問。
「如果輸咗我即刻伸請內部調職去上海office,以後都唔會煩住你。」佢好有信心咁講。「如果贏咗頭三位你要連續兩個禮拜請我食晚飯。」條件係每朝早同放工後都要同我操⋯練。我心諗儍仔,對腳生係我度,呢次你pack定嘢上上海啦!