【歷史】點解咁憎猶太人？

長年喺歐洲受到迫害嘅猶太人對困境感到絕望，佢哋期盼彌賽亞降臨打救。喺呢個背景下，猶太史上一大鬧劇由此上演。



一個出生嘅今日土耳其士麥那嘅人喺1648年宣佈自己就係彌賽亞。原名摩迪凱嘅佢為一名塞法迪雞商之子，佢為自己改名為沙巴泰·澤維，意為土星，喺猶太傳統中常與彌賽亞降臨連結。

據記載沙巴泰似乎係一個鬱躁症患者，仲有妄想症成日陷於幻想中，有好多菜刀插屎忽之類嘅怪異行為。

當佢發作嘅時候會自稱彌賽亞，仲話1666就係世界末日(可能覺得同魔鬼有關)。佢又話自己識飛，但就同Tommy保護嘅手足一樣無人見過。當佢同佢嘅支持者喺士麥那越來越離經叛道，拉比就提醒佢哋上一個自稱彌賽亞嘅人千鳩幾年前有咩下場。沙巴泰喺51年遭到驅逐。

此後沙巴泰輾轉流浪於希臘嘅塞薩洛尼基、君士坦丁堡同開羅，佢亦都娶咗一個烏克蘭猶太妓女為妻。沙妻因大屠殺淪為孤兒再落風塵，佢同老公一樣神神地，自稱命中注定要嫁比彌賽亞。

沙巴泰得知此事，就立刻娶佢為妻。據說係因為根據傳說，彌賽亞要同不潔嘅女人結婚(煮生炒骨的人有福了)。

當時正值猶太人喺烏克蘭被屠，沙巴泰嘅出現好似mirror咁令人民燃點希望。62年喺開羅佢得到富商嘅賞識，仲課金比佢，叫佢帶去比耶城窮困嘅同胞。

但當沙巴泰嚟到耶路撒冷並宣佈自己就係彌賽亞嘅時候，就受到好多人嘅質疑，佢一怒之下移居到加沙，宣告嗰度係新聖城。



加沙當時不單止冇打仗，仲係猶太宗教同學術中心之一，沙巴泰65年喺嗰度遇到一個人，改變咗佢嘅命運。



加沙嘅內森出身拉比世家，係阿什肯納茲人。佢自幼跟隨名師學習塔木德，喺社區中好有名望。博學嘅佢當時擔任靈魂療癒者，一個近似心理醫生嘅角色，佢會搵出病患心中導致病痛苦惱嘅污點，然後叫佢哋透過懺悔贖罪齋戒去修復心靈。

間中清醒嘅沙巴泰會知道自己其實只係人一個，佢希望能夠醫好自己嘅精神病，於是拜訪內森。

當內森見到沙巴泰，唔知係咪想好似鍾培生借白卡搵錢，佢以精神學權威身份堅持沙巴泰冇病，真係彌賽亞降世❗️❕️

內森仲以先知以利亞再世自居，話自己都睇到天啟，所以好肯定佢係堅料。內森嘅endorse令彌賽亞降臨嘅消息喺歐亞非嘅各猶太僑居地迅速散播，好多信眾都歡喜若狂，認為猶太人長久嘅苦難已經終結，亦有人賤價賣樓，準備移民返去應許之地。



此時群眾已經陷入瘋狂狀態，甚至開始自殘同絕食以證誠心。內森嘅宣傳越發誇張，佢宣稱沙巴泰已經比鄂圖曼嘅蘇丹更加接近權力核心，只要彌賽亞去到君士坦丁堡，蘇丹就會馬上向佢讓位。

沙巴泰當時已徹底陷入自己編織嘅謊言當中。就好似以為自己真係靚女嘅阿儀一樣，喺眾人慫恿下沙巴泰於66年3月抵達君士坦丁堡，同行嘅仲有三個拉比。

當時嘅蘇丹為穆罕默德四世，佢明顯唔打算讓出權位，沙巴泰被捕入獄。

彌賽亞嘅輕易被捕令支持者十分驚訝，但大部份人繼續呃自己，堅持係大計劃嘅一部份。由於有好多忠實嘅信徒幫佢行賄，沙巴泰獄中生活並唔難過。

當沙巴泰喺獄中嘅時候，各地猶太人不斷示威抗議，甚至爭啲爆發大型流血衝突。到66年9月，沙巴泰被帶到穆四世跟前，佢被要求施行神蹟----喺赤身露體下承受弓箭手嘅射擊。



沙巴泰話：我痴線啫唔係弱智，佢馬上誠懇地下跪，要求允許自己皈依伊斯蘭。仲即刻除低自己嘅猶太帽，喺上面吐痰兼踩兩腳。

穆四世對沙巴泰嘅表現非常滿意，並為佢重新冠名為“穆罕默德先生帕夏”，一個帶有濃厚伊斯蘭色彩嘅名字。沙巴泰被任命為蘇丹嘅守門人，並得到高薪厚祿。



沙巴泰嘅妻子同追隨者包括三個拉比都跟埋佢信咗伊斯蘭教。喺各地嘅信徒都感到不能接受，紛紛幫佢搵來各種藉口，例如係話佢其實升咗天，皈依係彌賽亞計劃嘅一部份，到適當時候佢就會接管蘇丹嘅政權之類。

喺君士坦丁堡嘅沙巴泰依然成日派膠，經常發出愚蠢嘅言論。可能係放唔低彌賽亞嘅光環，又或者佢始終唔想背叛猶太信仰，佢喺73年被指控暗中守安息日等猶太禮儀，想食兩家茶禮嘅佢被解除看更職務，並被流放到巴爾幹半島上嘅烏爾齊尼(今日屬黑山)，76年死喺嗰度。

內森餘生喺流浪中渡過，直至1680年去世。

終於追到live

高汁Post LM

好緊張樓主之後會點講

lm

呢心Po 啲圖最撚精警

幫樓主推推先

樓主

社運結束後猶太人又回復到被歧視同隔離嘅正常生活。喺17世嘅法蘭克福，幾千個猶太人居住在擠迫嘅猶太巷，嗰度環境惡劣堪比九龍城寨。



不過隨住資本主義嘅興起，猶太人終於搵到佢哋嘅專屬舞台。猶太人同資本主義幾乎係同義詞，佢哋天生就係社會嘅局外人，除咗希望有公平環境比佢哋奮發上進外別無他求。

16至18世紀嘅歐洲被稱為重商主義時代，各國為發展基建同購買武器都需要龐大經費，佢哋理所當然地向猶太銀行家融資，於是就出現咗宮廷猶太人呢個階層，當中就有維也納嘅薩繆爾·奧本海默。



薩繆爾係神羅皇帝利奧波德一世嘅銀行家，當1683年土耳其人兵臨城下，就係佢為皇帝提供大量軍費。佢被獲准喺維也納居住，唔駛住喺猶太隔都。

但宮廷猶太人始終係基督教政權嘅街外人，雖然佢哋依靠精明嘅頭腦同手腕為王室提供利用價值，但處景始終如履薄冰。1700年，因為有傳言薩繆爾同土耳其勾結，喺一名刀匠同煙囪清潔工帶頭下，一群暴民洗劫咗佢維也納嘅宅第。薩繆爾頗有先見之明，一早已經喺地道中逃走。

事件被認為係王室暗中唆使，以說服其免除債務。皇上為平息此事，將兩個帶路黨當CONDOM絞死，其他人被判監。

薩繆爾喺三年後去世，神羅以實力為由，拒絕還錢比佢個仔伊曼紐爾(600萬弗羅林)，仲倒轉頭向佢索取400萬😮😮😮，聲稱係佢父親早年欺詐所得嘅罰金。

不過比起同宗嘅蘇斯·奧本海默，佢哋下場已經算好。蘇斯係符騰堡公爵嘅財務官，一生樹敵眾多，當佢靠山爵1737年死後，佢被捕控以詐騙、貪污、叛國、與各路女性淫亂以及受賄。



最後蘇斯嘅淫亂罪名被駁回，但依然因為其他罪名被判死刑；喺帝都奧家被舊伙記森遜·維特海默取代。維特海默對塔木德有深厚知識，公認為匈牙利嘅首席拉比，喺宗教界嘅聲望令佢喺商界得到支持。佢代替奧家成為神羅皇帝嘅錢袋，因為權勢滔天而被稱為「猶太皇帝」。



因為眼見君王太過忘恩負義，自18世紀後期猶太金融家開始遠離王室，建立跨國集團以平衡風險，當中就有日後蜚聲國際嘅羅富齊家族。



羅富齊中興之祖邁爾喺57年為中落嘅奧本海默銀行工作，後來成為一名稀有硬幣經銷商。佢靠住印刷精美嘅宣傳單張而招徠好多客戶，並贏得了黑森王儲威廉嘅賞識。因為前人嘅慘痛經驗，佢派5個仔分別去倫敦、巴黎、法蘭克福、維也納同拿波里發展業務。

邁爾又以金融工具去掌控家族資產，例如股票同債券，財產得以在世界範圍內流通，唔駛比君主收割羊毛。

可唔可以爆post前講完呢

第一，希伯來人比人趕走果時仲未有伊斯蘭教。第二，伊斯蘭政教合一仲癲過天主教，將當地無走既閃族洗晒腦幾百年。第三，伊斯蘭教只有真主一人，係唔容納其他信仰。就係點解以色列當年立國，所有阿拉伯人開頭要將佢地趕盡殺絕，只係各懷鬼胎先輸比以色列。

留名

唔知樓主會唔會講沙俄柵欄區 pale of settlement

少少長

想知樓主講緊佢自己點解咁憎猶太人
定係
阿拉伯人點解咁憎猶太人

阿拉伯人自己都係閃族,
亞伯拉罕三教互屌哩啲唔好話咩,
伊斯蘭自己都分裂兩大派, 仲唔打到傻咩

以撒先係大婆生但遲過以實瑪利出生

樓主呢

世銀咪星球級貴利

終於有個正忠啲既歷史分析POST
我仲未睇哂樓主講既野
但我有個疑問
拿根據樓主開頭講以色列人既起源
首先亞伯拉罕第一個仔「以實瑪利」係同佢既「妾」夏甲係一個埃及人所生既。
咁點解以實瑪利係阿拉伯人既始祖？
佢應該係埃及人既後裔喎
而古埃及時期全部都係埃及人
直到現世紀埃及入面全部變哂阿拉伯人
咁阿拉伯人應該係埃及人既後裔喎
而阿拉伯人係由埃及開始演變出黎
照計以實瑪利既應許之地應該番埃及唔係耶路撒冷喎

不要問
經書冇講咪唔計/mandate of the god
信心1212

唔係牛頓晚年點解要去鑄幣廠KO金融騙徒

呢個post既原意就係歷史逐格睇
雖然聖經係好大爭議
但佢都係歷史記錄而黎
所以唔可以話神話同歷史分開
神話都係歷史記錄出黎架嘛
既然係咁樣
我地就要用一種批判角度去理解歷史同神話入面既差異性
咁啲野就會變得愈黎愈Make sense
呢個只係我聽過話普遍學者都唔認為以實瑪利係阿拉伯人既始祖
因為古埃及既地方由公元前4000年已經係到
而聖經舊約記錄上帝創造第一個人類亞當係公元前4026年。
咁即係埃及人已經存在耐過亞當出世
ok黎到呢點
咁究竟亞當係咪真係第一個人類呢？
定還是係第一個由上帝創造既人類呢？
兩者試吓分開批判性思考

照計以實瑪利既應許之地應該番埃及唔係耶路撒冷喎

我個回覆係針對呢句去講

至於你講嘅問題
Abraham umbrella下面同人作品多bug/神學家互相吃書都唔係第一日知嘅事

如果講歷史唔match
gobekli tepe呢座人類萬年聖地已經秒晒所有神話同人書

就算方舟大洪水故仔都有跡象係sumer神話二創黎，成本書冇乜邊度提過/解釋過predate嘅人類文明