【歷史】點解咁憎猶太人？

留名講多啲聖經以外猶太人同羅馬之間嘅張力

當時應該是離真實的不遠, 當然神個部份就鳩吹

推

推

樓豬喺邊

羅馬大軍殺到入耶路撒冷搵樓主啦

牙·詹在位廿幾年，佢臨終前為緩和兩黨紛爭，以及兩個仔嘅不咬弦，選擇由其妻莎樂美·亞歷山德拉(莎樂美兄弟係法利賽人領袖)繼位，佢係猶太人嘅第三位女王。



莎女王任內重用法派，親法派嘅長子海二世被任命為大祭司，法利賽人成為統治階級。

女王喺前67年病逝，王位由海二世繼承。但幼子阿二世不服，喺撒都該派支持下，與兄長爭位。

撒派勢力較大，阿二世成功逐走兄長，海二世逃至納巴泰王國(即約旦一帶)得其國王支持又返到耶路撒冷，同細佬僵持不下。

而喺呢個時候塞琉古好似冰塊咁融化咗喺如日方中嘅羅馬手上。前63年，三巨頭龐培滅塞，之後就留咗喺大馬士革。



鬩牆兄弟為爭取佢嘅支持，就派人爭相送禮擦鞋。同時亦有以法利賽人為代表嘅第三個使團，佢哋指出在座咁多(2)位都係垃圾，佢哋嘅要求比較理想主義，希望羅馬人廢黜哈朝嘅人治，恢復政教分離嘅神聖傳統。

但龐培話你哋嘅傳統關我撚事，點解你哋唔自己維護⁉️佢決定支持比較弱嘅海二世。阿二世心知羅馬軍勢大，準備投降。然而佢嘅追隨者唔願意獻降，反而裹脅佢頑抗。羅馬軍輕易將耶城攻下，入城後大肆破壞城市同神廟，死者過萬人，阿二世被帶到羅馬。

龐培恢復咗海二世大祭司地位，但就無恢復佢嘅王位。從此哈朝成為羅馬附庸，而海二世嘅權力亦好快落入權臣安提帕特手中。

安提帕特係以東人，屬於後來歸化嘅猶太人。佢又娶阿拉伯人為妻，以致佢終生不被猶太人認同。淪為羅馬屬國嘅以色列亦受到太上皇政治動盪影響，前49年阿二世被龐培政敵凱撒釋放，希望佢回到猶太地反對龐培系，但回國途中被龐培黨羽毒殺。

不過龐培自己都喺前48年被凱撒擊敗，逃到羅馬另一附庸埃及時被畏懼於凱撒嘅法老殺害。



次年凱撒為咗排解法老托勒密十三世同佢家姐兼老婆克莉奧佩特拉七世(即埃及妖后)之間嘅爭執，佢同麾下四千人因而被圍困於亞歷山大。以色列嘅安提帕特決定派人拯救凱撒，佢集結咗一支約一萬三千人嘅軍隊，同羅馬人聯手喺尼羅河畔打敗埃軍。
 
精明嘅安提帕特靠住呢個救命之恩而扶搖直上，得救後返到羅馬嘅凱撒封佢為榮譽羅馬公民，並將耶城交俾佢大仔法塞爾，細仔希律獲得以色列北部加利利。

上國嘅政治鬥爭繼續如蝴蝶拍翼咁影響以色列，前 44 年凱撒喺羅馬元老院被刺殺，安提帕特轉向效忠於凶手卡西烏斯。



但安提帕特嘅血統同奶羅傾向始終不被猶太貴族認同，前43年，佢亦被政敵收賣嘅侍酒毒殺。

雖然老豆被殺，但兩個仔依然控制以色列，直到3年後已故阿二世兒子安提柯得帕提亞人支持捲土重來，征服咗耶路撒冷。

帕人即發源於波斯北部嘅安息人，佢哋乘羅馬內亂入侵。安提帕特長子法塞爾同海二世被帶到安提柯面前，法塞爾被殺，而海二世則被侄兒割去耳朵，因為根據利未記：“凡有殘疾的，都不可近前來獻神的食物”(當時無平機會)，令佢失去祭司資格。海二世被帶到巴比倫。

安提柯成為新任國王兼大祭司，但希律及時逃走到羅馬，並得到凱撒愛將安東尼支持，以其援軍圍困耶城。前37年城破，安提柯被帶到安條克處死，結束咗哈朝嘅統治。

希律被立為猶太王，佢為加強正統性娶安提柯侄女米利暗為妻，而妻弟阿三世則成為大祭司，但佢好快就被希律害死。前30年，同劏豬櫈妖后搭上嘅安東尼不敵屋大維，夫妻兩人喺埃及雙雙自殺身死，希律又毫無原則咁投向勝者。



希律係經歷父兄死亡後變得心狠手辣，佢對舊王族心存疑慮，包括佢老婆。佢先後將米利暗、外母、以及同米生嘅兩個仔殺害，連佢靠山屋大維都話做隻豬做隻狗不做希律後人(因為猶太人唔食豬) 。

另外喺巴比倫嘅前國王海二世亦被佢誘使返到耶路撒冷，並於前30年被殺。

就如君王論所言，被人畏懼要比受人愛戴要安全得多。希律以其殘忍同六親不認為以色列帶來秩序，佢任內政績彪炳，將猶太人領土擴展到今日嘅以色列、約旦、敍利亞同黎巴嫩等地。另一方面佢亦都大興土木，擴建咗第二聖殿，而家最有名嘅聖殿西牆遺址(哭牆)就係佢起。



希律王一面殘酷地鎮壓反對者，一面又喺身邊聚集來自各地傑出學者同藝術家，令佢嘅宮廷成為希臘同羅馬文化温牀。希律時代國民生活富足而和平，佢亦因其豐功偉業被稱為大帝。

希律晚年受兒子奪位而困擾(米利暗兩個仔)，喺統治37年因腸癌而病逝。史載佢不斷流膿，甚至長出蛆蟲。佢喺公元前４年死喺自己嘅屎尿當中。

希律被葬喺佢為自己悉心打造嘅希律陵，身後被尊為奧古斯都嘅屋大維將佢嘅領土瓜分比佢三個仔同細妹。到公元前6年又以其子殘暴為由，將希律王國收為猶太行省，由羅馬帝國直接總督管理。

(off topic) 羅馬套劇好好睇

希律被蟲咬，就斷了氣。
原來是咁的

進入羅馬行省時代了

佢呢個公元前4年死既大希律應該唔係使徒行傳個希律，你講果個被蟲咬死果個應該係公元後4x年發生的希律阿基帕

短短幾十年幾個希律王，好易搞亂

你啱，我一見到37就load 錯左

以為係AD 37

羅馬帝國派總督管治猶太地，為削弱耶城影響力將首府設喺地中海沿岸嘅凱撒利亞(而家以色列嘅特拉維夫同海法之間) 。帝國為節制總督權勢，唔俾佢哋任期太長，但佢哋就如同所有流官一樣竭澤而漁，刮得幾多得幾多。佢哋唔單止比國王更貪婪，甚至比希臘人更甚。部份貴族同祭司亦助紂為虐。

羅馬時代嘅猶太人嘅負擔沉重，民不聊生，現實生活嘅苦難令佢哋睇唔到希望，開始將熱情寄託喺宗教上。佢哋期盼有救世主降臨，於是彌賽亞思想就盛行起嚟。而早喺公元前8世紀，先知以賽亞就講過會有處女生子，佢會係耶和華嘅道成肉身，下凡拯救世人。



耶穌生母為瑪莉，老母個老公係木匠約瑟，為大衛後代。佢生於耶城以南伯利恆，自幼就顯示出高人一等嘅靈性修養。出身基層嘅佢心地善良，關心民間疾苦，佢好似昔日嘅先知咁抨擊富人對窮人嘅壓迫，宣揚平等博愛。佢喺北部加利利吸納咗好多門徒，有十二個。



由於猶太人上層人仕自身嘅腐化，令佢哋失去底層民眾基礎；而耶穌嘅思想就好有傳染力，經過幾年傳道，信眾越來越多。

耶穌同佢嘅追隨者喺約公元30年嘅逾越節前夕嚟到耶路撒冷，受到熱烈歡迎。此時喺耶城塞滿各地嚟過節嘅猶太人，有成30萬至40萬。

當佢嚟到聖殿，見到嗰度變到好似嵩山少林寺咁商業化，啲人利用嗰度做平台大發其財，攪到烏煙瘴氣。

耶穌好嬲，佢以太子爺身份訓斥掌管聖殿嘅祭司長，警告佢哋再倒行逆施就會令到聖殿被盡毀，一嚿石頭都淨唔低。

民眾喺佢煽動下起哄，喺聖殿造成混亂。班廟祝見佢斷人衣食大感憤慨，加上當時耶城因過節人多口雜，怕佢真係搞出事，就喺客西馬尼園將耶穌逮捕，傳說係被佢門徒之一嘅猶大出賣。

祭司將佢送到羅馬總督彼拉多面前，控告佢妄稱神子基督褻瀆上帝、煽動猶太人違反羅安法、強姦隻豬。

彼拉多心知耶穌有群眾支持，並唔想對佢趕盡殺絕，加上佢嘅抗爭係和理非形式，睇落對政權冇咩威脅。而佢亦都只係一個官僚，最緊要唔駛孭鑊。佢以耶穌來自加利利為由，將佢pass俾希律王個仔加利利郡王希律·安提帕斯。耶穌對住希律junior十問九唔認，於是個波又交返比彼拉多。

彼督對呢個燙手山芋深感難為，當時正值逾越節，按照猶太人習俗可以赦免一個犯，彼拉多就將盜賊巴拉巴同耶穌交比猶太人選擇。

喺羅馬人心目中呢啲只不過你哋猶太佬鬼打鬼，但喺祭司眼中耶穌就係一粒粗過樑木嘅釘。同生態位競爭驅使佢哋選擇釋放清白無辜嘅巴拉巴，將十惡不赦嘅耶穌處死。

佢哋仲威脅彼督如果唔照做就告到去羅馬，等皇帝治佢嘅罪。彼拉多話大佬我打份工唔好難為我啦🙏🏻🙏🏻🙏🏻。佢喺祭司面前金盆洗手，以視清白。



彼拉多又問猶太祭司們，你哋咁樣怕唔怕禍延子孫，畢竟你哋本聖經都係咁講。祭司們以食子廢老式口吻回答：就等我哋嘅子孫承受罪孽啦。

彼督懼怕猶太人真係會作亂影響佢仕途，於是喺公元33年將耶穌押往各各他嘅刑場，將佢釘喺十字架上處死。



傳說耶穌喺死後四十日復活，後人為咗紀念呢個神蹟，都會去旅行慶祝(勞工假例外) 。

應該係死後3日復活？

off topic, 呢個猶太人comedian ok 好笑
https://youtu.be/y2YtIBYM4w0

有傳聞約櫃有法力
所以佢哋會攞埋去打仗

其實比拉多都冇福音嘅耶穌受難史講到咁好
佢本來就鍾意挑釁同鎮壓猶太人

路加福音就有一段「正在那時，來了幾個人把有關加里肋亞人的事，即比拉多把他們的血，與他們的祭品攙和在一起的事報告給耶穌。」(13:1)

呢啲咁嘅人 真係慌死佢唔會搞鳩耶穌咩

自此猶太人就背負弒殺主耶穌嘅罪名，二千年來不斷被基督徒歧視迫害。而耶穌雖然上返天堂，但羅馬殖民者同猶太人嘅矛盾依舊存在，數年後更因為暴君卡利古拉而更加激化。
 
卡利古拉唔係佢嘅本名而係乳名，意思係小軍靴，因為佢自細就跟住老豆喺日耳曼前線駐紮。卡利古拉類似現代涼鞋，通風涼爽，以免士兵生香港腳，但當時唔興配長襪。
 


卡利古拉喺掌權後開始亂鳩咁嚟，佢命令猶太人要為自己建造一座巨型雕像，豎立耶路撒冷聖殿中。喺猶太人眼中咁樣係公然侮辱佢哋嘅信仰，佢哋警告若皇帝一意孤行，會集體自殺。
 


好在佢最後都喺童年好友希律.亞基帕一世勸告下收回承命。亞一世係希律王個孫，自細喺羅馬長大，同貴族們嘅深厚關係令佢被分封祖父嘅舊領地，但到佢死後又重歸總督管轄。
 
倒行逆施嘅卡利古拉喺41年被近身禁衛軍刺殺，克勞狄一世被擁立為皇。克一世因小兒麻痺症而身體殘缺，但精神上較前任健全，佢行返奧古斯都嘅宗教包容政策，直到佢十三年後因食物中毒而死(有傳被老婆毒死)，繼子尼祿繼位。



尼祿又係一個有名嘅暴君，因為佢任命嘅總督富祿辣士太過辣殺，直接導致咗66年嘅猶太大起義。

事件導火線有二，一個係富督太過貪，佢以抵充稅款為名，直接喺聖殿金庫中擸錢走，此舉被視為嚴重褻瀆；第二個係因為凱撒利亞嘅猶太會堂有希臘教信徒踩場，喺門口獻祭雀鳥。



祭司階級乘機作反，佢喺耶城攻擊羅馬軍隊。亞一世之子亞二世出逃投靠羅馬軍隊，並聯同敘利亞總督加盧斯想奪回耶城。但喺貝斯和倫一役戰敗，被迫退兵。
 
而同時間喺北部亦有民眾起義，佢哋自稱為奮銳黨，即係狂熱派，顧名思義為狂熱嘅猶太信仰者及民族主義者。主要參加者為農民、手工業者同奴隸，喺當時猶太社會隨經濟發展呈兩極化，富人兼併土地，貧戶淪為佃農。佢哋嘅土地隨時被沒收以致無家可歸，因為自希律以來嘅大興土木，好多成為喺地盤之間流徙嘅盲流。佢哋由吉斯卡拉嘅約翰同西門·巴爾·吉奧拉率領，開始對羅馬侵略者嘅對抗。

另外以東地區嘅老兵亦因為對希律系統治者同佢靠山羅馬人不滿，亦加入奮銳黨行列，成為核心戰力。

67年，尼祿改任維斯帕先為帥，佢好快就平定咗北方嘅叛亂，奮銳黨數萬殘兵逃往耶城。此時撒都該派為主嘅祭司已經喺嗰度建立臨時政府，城中開始出現主戰同主和兩派聲音，由於猶太人一向都唔多團結，佢哋開始自相殘殺。

民粹主義者奮銳黨煽動群眾情緒，加上人數眾多而取得勝利。佢哋以清剿猶奸為名，實施恐怖統治。基於不絕對忠誠=絕對不忠誠原則，主和派被視為投降主義，被集體屠殺然後暴屍街頭。

無產階級革命者得勢後顯露出反社會本質，佢哋到處殺人放火，姦淫擄掠。為咗喺性事上得到更多樂趣，故意穿上女裝仲化埋妝，同受害者模仿磨豆腐，然後再將佢哋殺死。



奮銳黨將祭司殺害再任命自己人，仲喺聖殿酒醉狂歡，呢啲嘢even羅馬人都唔會做。

支持！樓主唔好停！

留名學野