除咗重建城牆，尼希米亦協助以斯拉嘅道德重整運動，衆民都喺上帝面前懺悔。
猶太人喺波斯開明統治下過上相對幸福生活，但佢哋都唔係下下順風順水，喺亞一世父親薛西斯一世時代，就差啲比人種族滅絕。
薛一世係居二世外孫，佢娶猶太女子以斯帖為后。以斯帖養父末底改係掃羅王後代，亦在波斯朝中為官，佢因為有後台而拒絕向宰相哈曼跪拜，得罪咗佢。
哈相心知猶太人勢力龐大，就想殺曬所有猶太人以絕後患，仲氹掂薛一世同意，抽簽(普珥)揀咗亞達月十三日行事。
但可惜疏不間親，哈希拉嘅奸謀敵不過以斯帖嘅枕邊風，王命人將哈相掛喺原本為末底改準備嘅木架上絞死，順便仲殺埋佢十個仔以絕後患，末底改則被擢升為宰相。
因為之前發出嘅屠猶諭旨無法取消，王於是允許末底改寫詔書，准許猶太人喺當日自衛同殺死敵人全家
。後世人為紀念呢個國定殺戮日，將新曆3月23日(亞達月十四日)定為普珥節，當日佢哋會朗誦《以斯帖記》，紀念呢位仁慈嘅皇后。
波斯猶太人從此被稱作「以斯帖嘅孩子」，此後佢哋一直留喺波斯，直至現代伊朗依然有數萬人。
亦有部份人喺巴比倫之囚後選擇移居到埃及，佢哋大多係身份比較低微嘅人，未被帶往巴比倫。佢哋選擇咗埃及南端巴忒羅省首府，尼羅河上嘅象島為移居地。
嗰度雖然無大象，純粹因為岸邊石頭形似而得名，但就有尼羅河肥沃嘅黑土地，算係比上不足比下有餘。然而先知對佢哋嘅行為大加鞭撻，話摩西咁辛苦帶你哋嘅祖先游水(紅海)落嚟，你哋點可以死返去！先知耶利米更話：你哋畏懼逃避嘅刀劍同饑餓，總有日會追上，你哋會死得好慘。
但移埃撚認為公元前六世紀仲分黃藍好out，當波斯帝國喺前515年佔領象島，猶太人就選擇為佢哋做傭兵，生活過得相當唔錯。佢哋同異族人聯姻，甚至公然違反聖殿只能夠起喺耶路撒冷嘅禁令，喺象島起山寨版聖殿。而猶太人長期同當地亞蘭人雜處，慢慢亦沾染上異教習俗，佢哋用拜祭埃及羊頭神嘅禮俗供奉耶和華，就好似去教堂上香同借庫咁。
先知們對埃及猶太人嘅離經叛道大為不滿。或者係佢哋嘅詛咒奏效，前486年象島爆發反抗波斯起義，猶太人被視為波斯走狗受到屠殺同迫害，連聖殿都被佢哋拆埋。後來象島猶太人雖然建咗聖殿2.0，但不久後就喺前四百年嘅全埃及起義中再被摧毀。隨住波斯人嘅失勢，象島猶太人亦同十支派一樣，消失於猶太歷史中。
