<我嘅職業係專溝人地個女朋友>

喺餓文既時候我已經睇晒巴打咁多個故，暫時最好睇係貓同純愛

屌啦星返緊工睇到眼濕濕

多謝支持

多謝多謝

嘩 好感動
多謝支持呀

其實我寫果陣都有少少...

7.9

我地一直行，但就一直大家都無點出聲。

「潼潼，對唔住…」寧靜咁行左段路後，我終於忍唔住講。

「???」善潼一臉不解咁望住我。

「你家家走左後我完全無喺你身邊陪住你…」我歉意地說。

「你都知自己衰呢… 明明果段時間應該係我地最需要互相扶持大家…」善潼望一望我，然後幽怨咁望住前面講。

「因為當時我想逃避現實，我想逃避所有會令我諗起佢嘅人事物…」我解釋。

「我明… 所以我知你之後都好少留喺屋企，到有能力果陣就即刻搬左出去。咁衣家呢? 你仲有無不時諗起佢掛住佢?」善潼問。

「你知唔知點解人發夢呢，就算個夢幾神奇古怪幾咁唔合乎邏輯，你都唔會諗自己係發緊夢?」我無直接答佢而係諗左陣後問。

「我無特別諗點解，但我知你想講咩…」

之後我地互望左對方一眼，然後一齊苦笑左下。


傳聞我地個腦其實係有兩個主要部份運作，一個係負責想像神遊，毫無自我意識而只係純粹自己快速運行，而另一部份則係負責邏輯思考，判斷問題。

第一個部份係我地完全控制唔到，亦根本無辦法熄左佢要佢停止運作，所以就算我地訓覺果陣佢都仲會繼續自主運行。

至於第二部份，就需要我地集中投放注意力先會工作，而且唔可以長時間運行，唔係就會疲累降低佢嘅效能，所以喺我地訓覺果陣衣個部份會休息。

因為缺少左第二部份，而第一部份幾乎係唔識邏輯，所以我地發夢果陣並唔能夠對夢裏事物發展進行合理嘅判斷，亦因而唔會因為夢裏出現唔合理嘅地方而提出質疑，懷疑自己正置身於夢境。

不過，人喺夢入面係咪真係完全無可能意識到自己其實係發緊夢呢?

自從善柔死後，我成日發夢都會夢見善柔。喺夢入面我地好開心好似以前咁成日去玩，有時甚至會反映左我內心入面嘅渴求佢會做左我女朋友衣個角色添。

夢中嘅我真係好開心，就算訓緊覺我相信我都係笑住咁訓。但過來人就會明白當你喺夢入面有幾開心，夢醒嘅時候你就會有幾痛苦同失落，然後流下串串哀傷同失望嘅熱淚。

而當你不斷咁經歷希望再失望，開心再傷心，不斷重覆一次又一次，久而久之原來唔再需要任何邏輯，單純衣種痛楚嘅記憶已經足夠話你知眼前一切嘅境象都係假，只會喺夢境先出現。

唔知由幾時開始，當我一見到善柔，我就已經立刻會意識到自己係發緊夢，因為喺現實世界我係無可能再見到佢衣個訊息已經透過一次又一次嘅痛楚深深咁刻左入我嘅意識入面。。

而有趣嘅地方係，原來當夢入面嘅你知自己係發夢，你就會可以喺夢入面隨心咁控制自己做d咩。所以喺夢入面我同善柔可以隨心咁有好多互動，只係同一時間，我心入面會不斷祈求個夢唔好咁快醒，最好一直都唔醒等我可以繼續留喺果個世界一直都見到佢…

然後每一次夢醒，我發覺自己塊面都係保持濕潤狀態，隨之而來係一陣滿滿嘅失落感…

7.10

不知不覺我地就保持沉默咁行到樓下公園入面一個比小朋友玩嘅搖搖板度。

「嘩，你仲記唔記得衣個搖搖板呀?」善潼見到個搖搖板就略帶興奮咁行左過去，露出懷緬嘅神色。

「點會唔記得呀，細個我地三個成日一齊玩，果陣我地仲成日笑你話我同你家家要坐一邊，你自己坐另一邊先玩得到…」諗起當年嘅畫面我都不禁啞言失笑。

「哼，仲好講! 就係因為你地成日蝦我攪到我童年有心理陰影呀!」善潼不滿講道。

「明明果陣你先係最開心果個覺得自己一個打兩個好勁~」我笑道

「果陣係我未明白原來唔係所有野都係越高越好啫...」善潼諗起都不禁苦笑。

「不過衣家再玩就唔同喇，你瘦左咁多，可能要兩個你先等於一個我...」望住衣家身型苗條嘅善潼我講。

「咁你又誇張左d… 當我100磅兩個加埋就200磅架喇喎，你咁fit都無200磅啦...」善潼竟然咁認真去否認。

「做咩咁認真...我都係想用誇張手法兜個圈讚下你瘦啫，衣家實大把人追啦~」我繼續取笑佢道。

「唔多呀，由中大排到去港大啫…」善潼仍然一臉認真咁講。

「… 咁少呀? 咁你要逐個逐個睇應該都唔洗行足一日嘅...」我只好亦認真咁回應佢。

「下，佢地要爭取就應該自己排好隊然後逐個逐個衝去我面前啦，仲要我自己行?」善潼終於扮唔到落去忍唔住笑左笑講。

「咁你衣家條仔咪應該好高質?可以係咁多人之中突圍而出。」我乘機問下睇下衣個Tony到底咩料子做左d咩迷到我個妹咁。

「呀...ok la，我唔係咁膚淺淨係睇樣嘅~」但善潼就咁答。

「咁佢有咩吸引到你?」我問。

「感覺有就有無就無架啦~ 如果真係要講，可能佢好識照顧我，比到一種好強好安心嘅感覺我掛...」潼潼望住我講。

(又係安心感? 真係兩姐妹都一樣，連結果都一樣…)我心入面諗。

「咁請問佢到底點識照顧你，做左d咩呢?」我口裏追問。

「我唔開心佢會講笑話我聽氹我開心，課堂上我唔識嘅野佢會耐心教我，試過一次我有危險果陣佢會奮不顧身咁救我….」潼潼邊回憶邊講道。

「嗯，咁好似真係好唔錯喎佢… 係呢，潼潼，黎緊有無咩地方想去玩?」

英雄救美都發生過，難怪善潼對個Tony好似咁死心塌地啦… 睇黎我真係要出盡全力先有機會。

「做咩呀? 想帶我去玩呀?」潼潼笑住反問。

「係呀，好似好耐無同過你去玩?」

「真係好耐喇，你都知哩!」

「所以為表歉意，比你話晒事同你去玩返日啦~」

「算你啦~ 咁我plan好再話你知啦~你預左果日要由朝陪到我深夜架!」潼潼雙眼發光好興奮咁講。

「...」

「做咩呆左呀，想反口呀?」見我有d呆濟善潼用手喺我眼前移動左幾下問。

「唔係，諗起d野啫… 咁等你諗好再話我聽啦~」我回個神來提起笑容應道。

「咁一言為定喇!」

「一言為定~好啦，夜喇，送返你去樓下早d訓啦。」

「好~」

7.11

送左善潼返去後，我又諗返起頭先嘅畫面。

我剛才之所以呆左陣，係因為剛才果幕情境好有似曾相識嘅感覺。



「算你啦! 咁我plan好再話你知啦~你預左果日要由朝陪到我深夜!」

以前細個有次我記得我因為爽約激嬲左善柔後，為左氹返佢我都有同佢講話搵日陪返佢全日補數，然後佢都係笑住咁同我講左衣句相同嘅說話。

頭先，我好似又將佢地兩個嘅影象重疊左。

突然間，我有左另一個諗法。



其實對於要扚起心肝追潼潼令佢鍾意自己衣件事上，我心入面一直都有好強嘅牴觸同保留。

始終一直都當佢係自己半個阿妹，好難突然好投入咁就話要追佢令佢鍾意自己，情感上係好有種強烈嘅排斥同罪惡感。

一來真係有少少亂倫感覺，二來亦覺得自己好似要呃佢傷害佢咁，心入面潛意識有種抗拒。

但面對佢對佢男朋友如此情根深種，我半調子嘅努力係絕對無可能可以成功。

所以再咁落去其實都可以預見係唔會有任何結果。

不過岩岩一剎那將佢同善柔混淆左一齊後我有左另一種感覺。

對我黎講，當年無同善柔表白無努力追佢成為左我人生一個遺憾，甚至係間接害死左佢，為此我亦一直耿耿於懷。

衣家善潼同善柔咁似，會唔會係上天都想比個機會我修補遺憾?

如果我當善潼係善柔，重新努力追佢一次，咁某程度上我都算填補左自己當年嘅遺憾，同時亦更有機會可以救返善潼出黎，做成救佢又救自己衣個雙贏局面。

突然間我又好似無咁抗拒，仲有種蠢蠢欲動嘅感覺…


令善潼移情別戀鍾意自己
令善潼放棄模仿善柔做返自己
將善潼當成善柔努力追佢，將以前失去嘅一切都追返返黎

衣三點係我希望透過衣個委託可以完成嘅任務，雖然貌似第二點同第三點係存在著好大嘅矛盾…

我陷入左另一種嘅天人交戰。

7.12

「想睇咩戲呀? 奇異博士上畫喎，就睇佢?」對於玩足一日嘅行程最後善潼話先想去睇戲所以我就問佢。

其實初初我以為佢會約我去玩下d戶外活動無諗過係睇戲咁普通嘅野。

「但我想睇月老多d喎…」

「竟然? 你以前唔係最鍾意睇d科幻戲，英雄片同動漫架咩?」我有d驚訝。

「以前啫，衣家我鍾意睇d愛情小品多d…就咁話啦~」

自從細個果次同佢睇完龍珠後，善潼當年就愛上左睇漫畫，所以我屋企入面所有漫畫佢都睇過晒，而同時間佢亦愛上左睇動漫同d科幻動作片。喺衣方面我同善潼嘅交交流係遠高於同善柔，成日會一齊睇同討論劇情。

至於衣d愛情小品浪漫戲，應該更加係善柔嘅style…


「但我都想睇marvels喎… 一係我地睇晒兩套?」

我希望善潼可以做返自己唔駛刻意模仿佢家姐，逼佢同我睇返套佢自己真係鍾意嘅戲，我估應該有用掛?

「咁好啦，一人揀一套，公平。」善潼都無堅持拒絕，咁証明佢至少應該唔抗拒。


因為場次問題，所以我地朝早先睇奇異博士，之後就lunch，然後晏晝再去睇月老。

對於奇異博士我就唔評論太多，大制作通常都唔會話難睇得太誇張，至少觀感同場景震憾性唔會太差。如果覺得好差，通常係因為一開始期望太高。

我原意係希望衣d視覺效果會可以刺激到善潼埋藏深處嘅”血性” 從而令 真正嘅”善潼之血’ 復甦。

始終要扮另一個人嘅喜好並唔容易亦唔舒服，如果可以用一d佢本身真係鍾意嘅野刺激佢，我相信對佢回復本性係會有幫助。

不過我似乎低估左佢嘅改變，因為整齣戲我都唔覺佢有任何特別興奮嘅感覺，甚至連一句聲都無出過。

當然，我唔排除同套戲本身質素都有d關係嘅…


「Marvels d 戲真係越黎越唔掂…」睇完戲當我地去lunch嘅時候善潼講。

「你以前好鍾意架喎，會唔會係你口味唔同左咋?」我提出質疑。

「所以你覺得好好睇?」佢反問。

「又唔係…不過Marvels d 戲不嬲係咁上下架啦，都係睇特技效果同視覺享受為主，唔會對劇情有太大expectation。」我解釋。

「音符打交都出埋喎… 而且以前都叫有d靚仔同大隻佬好似雷神同美隊衣d睇下呀，Dr. Strange就咩都無囉…」善潼一副嫌棄嘅樣子。

「有呀，你可以睇Wang呀~」於是我拋出一個gag。

比著以前嘅善潼應該會比我引到大笑一餐，但今次佢卻只係向我反左一個白眼。

衣個白眼感覺好熟悉….

以前善柔對我嘅爛gag，都係成日會露出衣個表情，但善潼笑點比較低就成日會比我引到笑…


「不過你信唔信衣個世界真係有多元宇宙?」反完白眼後過左一陣善潼突然問。

「…」

「喂!」見我無反應善潼向我大叫左一聲。

「嘿?」被善潼驚醒我先從剛剛善柔個白眼回憶裏回返神出黎。

「做咩又突然發晒呆呀?」佢不滿問道。

「無，岩岩諗起d野啫… 你岩岩講咩?」我有d唔好意思咁講。

「古古怪怪咁… 我岩岩問你信唔信衣個世界真係有多元宇宙呀?」善潼帶有少少不滿咁重覆問。

支持樓主寫得幾好
一口氣睇曬 睇到眼濕濕 而家無心情做野

多謝支持
無心情做野就可以試下睇埋其他故然後放工

7.13

「咁衣d concept其實都好common嘅，好多故仔都有用。個人黎講好難想像衣個世界外有另一個世界存在，但真係有我又唔會覺得出奇…」我好快就答。

「咁你覺得平行世界同多元宇宙邊個真實性會大d?」唔太滿意我嘅答案善潼又問。

「兩者有咩分別?」我試探性問道。

「平行世界應該係講緊同一個世界原點下因為一d原因，例如人嘅決定而產生左唔同嘅分岔時間軸。例如Dr. Strange係Avenger最後睇晒所有平行世界下搵到解決Thanos嘅唯一方法。

至於多元宇宙就直程係兩個元宙一開始嘅原點已經唔同而唔係中間衍生左唔同嘅時間軸。理論上多元宇宙一開始大家嘅原料都係相同，但就有其他因素改變，例如基因排列等等因而可以係另一個截然不同嘅宇宙。例如Wanda真係有對仔女，美隊變左係女人等等…」

聽完善潼嘅解釋，我有d呆左咁望住佢。以前嘅佢睇完就算，唔會咁深入了解背後咁複雜嘅concept，但衣家佢竟然可以咁清晰咁講解兩者嘅分別。

佢似乎真係比我想像中嘅改變更多…

「估唔到你真係講得出喎…」我苦笑講道。

「以前我費事諗啫… 其實以前睇完Avengers我有問過家家，而佢都好有耐性再畫埋圖咁解釋比我聽…」

雖然善柔並唔係點鍾意衣類電影，但基本上次次佢都會陪我同善潼一齊睇，所以佢唔係對Marvels系列一無所知，相反甚至對戲入面一d concept會比善潼更加了解。

如果係佢，咁佢有以上嘅分析就好合理…


「原來係咁… 咁你家姐分析衣d野係好叻嘅…」我邊回想邊說道。

「係呀，佢真係好叻…」


如果要將衣兩個concept代入我個故事黎講，係平行時空下，我可能因為有喺黎生出現前同善柔表白然後搶左佢返黎，咁佢就因為同左我一齊而無為情傷自殺死左，我地仲好開心咁生活落去。

至於喺多元宇宙下，可能由day 1開始，我同善柔就已經無交匯唔再係青梅竹馬而只係兩個唔識嘅人，甚至變左佢係男我係女，亦因而完全唔會有屬於我地兩個之間以後嘅故事…


「雖然我唔知衣個世界係咪真係有平行世界，但心底裏我會希望真係有…」我感觸地說。

「知唔知你點解會有咁嘅諗法?」善潼望左我一陣後問。

「因為… 係衣個世界我有好多遺憾或者後悔嘅事…」想有平行時空，通常係因為喺衣個世界自己過得並唔理想所以希望可以喺另一個時空可以過得好d，又或者係因為曾經一d錯誤後悔嘅決定希望喺另一個世界可以改變衣d錯誤。

「仁哥哥，家家唔會想我地因為佢而咁…」知我諗起善柔善潼想安慰我。

「係嘅…」但唔會有半點作用。

「之後到睇我想睇果套戲lu~」見我仲係有d愁眉不展善潼就轉話題。

「以前你唔係好唔鍾意衣d愛情片架咩?」我問。

「咁人會變架嘛~ 或者因為衣家有拍拖個人同愛情觀都唔同左掛…」善潼解釋。

「係喎，咁你唔搵佢陪你睇?」我又乘機問。

「佢近排好似好忙咁… 費事等佢lu~ 等佢得閒咪睇第二套或者同佢睇多次囉~ 而且陪你都好重要架嘛!」

7.14

九把刀嘅電影我只係睇過兩三套。作為經典嘅<那些年>，確實令唔少男生產生年輕時喺學校鍾意人嘅果種回憶同共鳴。

歌都有得唱啦

” 現時大了 那種心跳難重演 極燦爛時光 一去難再遇上一次”

始終中學時期果種心動同戀愛嘅感覺，就真係中學時期先會有，過左就好難再有相似嘅體驗… 不過衣套<月老>比我嘅感覺就只係一般水平。

故事性其實唔錯，純講故事我會比幾高分，不過佢拍得就有d R頭嘅感覺。或者係因為要將太多想表達嘅野濃縮加晒落去，結果反而樣樣唔到位令人摸不著頭腦。

柯震東同宋芸樺嘅故事我覺得還算不錯，前者由小五第一眼開始就鍾意左後者，然後一追就追到去大個，最後終於成功感動對方係埋一齊。不過命運弄人一齊無耐男主角就突然被一道突如其來嘅雷電劈死 。你無睇錯，係真係無啦啦一道雷劈落黎劈死左佢，二人因而陰陽相隔。

但之後到柯震東化身鬼魂同王淨成為月老衣條感情線就描繪極度不足，總知女仔突然間就鍾意左個男仲係好鍾意果隻。結果令最後宋芸樺因為紅線最後終於放低男主角同另一個一齊，而男主角就貌似同王淨成為一對衣個結局令我感覺有點不是味兒。

至於鬼頭成果d劇情就更加有d唔知做乜… 可能真係用太少篇幅去講，令衣部份變得有d多餘同格硬。

不過宋芸樺原來一直見到男主角果部份係有少少驚喜，而隻狗阿魯同男女主互動亦算幾感動。

只係雖然我個人覺得麻麻，但我隔黎果個就睇得好投入，有d位佢仲睇到眼濕濕，然後就撓住我隻手伏左係我膊頭，當我件衫係紙巾。

而衣一個情境，又令我諗起善柔…

當時因為佢陪我睇左EVA劇場版，作為交換我就陪佢睇返套”比悲傷更悲傷嘅故事”。去到最尾，佢都好似衣家嘅善潼咁挨住係我膊頭係咁喊…

「傻瓜…唔好喊啦…戲黎架咋…」

我輕撫著善潼嘅秀髮，正如我當年輕撫著善柔嘅秀髮一樣，但突然間我好似自己都分唔清自己摸緊果把到底係善潼定善柔嘅頭髮。

然後我發現我嘅視線不自覺間都開始矇糊起黎…


「套戲好感動咩? 最後做咩喊呀?」散場後我問善潼。

「唔知呢… 或者係因為替小咪開心可以放低阿綸同另一個一齊，而阿綸為小咪付出左咁多努力嘅同時最後都可以有返Pinky掛…」善潼邊諗邊講。

「係咩? 我反而覺得最後好格硬同好怪…」我講出自己感受。

「可能你睇埋小說會感覺好d…」

「你有睇?」我又有d驚訝。

「有呀，就係睇完小說先想睇埋套電影…」

「你幾時變得咁鍾意睇書架? 以前明明睇漫畫有時都嫌字多架喎…」

「唔好再成日講以前啦~ 衣家咁唔好咩? 唔係似女仔多d咩?」可能近排講得太多以前，善潼唔想再討論衣個問題。

「咁又無話好唔好… 不過做返自己始終最舒服，唔駛刻意咁將自己變成另一個人…」

「放心啦，我好舒服~」

見善潼講到咁，我都唔知仲可以講d咩…

7.15

睇完戲陪善潼行左陣街，睇佢買左兩件衫再食埋晚飯我就送佢返返屋企樓下。

「多謝你陪左我成日，我今日好開心呀~」臨別時善潼笑得好開心咁同我講。

「傻妹，我都好開心。以後悶果陣隨時可以搵我架~」我為定下次約會作伏線。

「係咪真架?」善潼聽到我咁講笑得再開心d。

「梗係啦，如果你唔驚你男朋友呷醋嘅話~」我又乘機想作出試探。

「哈哈，佢唔會嘅~」善潼好有信心咁講。

(佢係唔會呀…佢恨不得你以後日日陪住我添…) 我心入面忍唔住諗。

「咁有信心?」我口當然無咁講。

「佢一直都好信我同唔會點限制我，衣樣都係我鍾意同佢一齊嘅其中一樣野。」善潼解釋。

不過善潼嘅說話，令我諗起善柔曾經嘅說話。


「仁仁… 其實浩明好好架，佢知我同你熟佢都完全唔介意，講明信我唔會限制我同你嘅關係，可以keep返以前係點就點。但調返轉當我見到你果陣你就次次都要講佢壞話，成日話佢衣樣唔好果樣唔好，咁你叫我以後點同你相處呀…」

突然間我有d傷感之餘又有d嬲。


「真係咁信你? 咁你估你去我度煲晚劇過一晚夜佢仲會唔會信你?」我帶有挑釁性咁問。

善潼聽完後有d愕然，無諗過我會講d咁嘅野。

「仁哥哥，佢信我唔限制我係一回事，但都唔代表我可以任意妄為唔理佢感受唔顧及自己身份…我地唔可以濫用人地對自己嘅包容同感情架，唔係只會令自己親手傷害同破壞左衣段關係….」佢收起晒笑容好認真咁講。

係嘅，當年其實我都係濫用左善柔對我嘅好同包容，做左好多小學雞嘅野，結果最後自己親手破壞左衣段關係…

「對唔住… 我都係一時口快講下笑架咋…」冷靜有返理智我就道歉。

「咁又唔駛對唔住… 雖然唔會去你度過夜，不過你提議煲劇又幾好喎~ 我地搵套長劇以後得閒就去你度一齊煲下啦~ 我地都好耐無一齊煲過劇喇…」善潼見我道歉好快就無晒事咁。

「哈哈，以前都唔係煲劇，係煲動漫咋嘛… 我記得有次暑假同你連續煲左幾晚龍珠GT，你果陣成日都唔肯訓，攪到Aunite要黎拍門捉你返屋企呀~」我笑道。

「明明係你教壞我導我睇漫畫先嘅! 而且都唔係淨係我呀，你果陣都有成日黎我地度陪家姐煲果d台劇美劇架，不過Auntie唔理你唔會捉你返去咋嘛~」善潼又笑住講。

「又係我錯囉~ 你之前唔鍾意睇衣d成日一齊睇睇下果陣自己訓著左咋嘛…」

「今次唔會喇! 咁一言為定，我得閒就搵你~」

「好呀，隨時歡迎~」

「同埋有套落左畫嘅戲，其實我都好想同你一齊睇架…」靜左陣善潼望住左我然後又突然間講。

「咩戲?」我好奇問。

「un…適當時候再話你知呀，我返上去喇，拜拜~」善潼無答我然後就同我講再見。

「車，懶神秘…拜拜~」而我亦同佢揮手道別。

7.16

睇住善潼返左上樓後，我並無即刻返屋企。因為個心有d煩，於是我就企在係一個欄杆旁邊，然後下意識拎左包煙出黎。

突然間，我想要尼古丁平靜下自己個心。

不過食食下，我就見到鄺氏夫婦出現係遠處位置行緊返屋企。

喺我躲避下好彩佢地見唔到我，唔係見到我食煙肯定有排哦我，我都唔想自己乖仔嘅型象變成左個曳仔。

見住鄺生鄺太拖住咁返屋企，我個心都不其然有種羨慕嘅感覺。其實每次喺街見到d老夫老妻去到六七十嘅年紀都仲可以拖住手行咁恩愛，我都會有種莫明嘅感動，覺得衣個世界真係有一生一世嘅愛情。

--------------------------------

「嘩你睇下前面對公公婆婆，成八十歲人個公公都仲會拖住個婆婆行街，真係好恩愛呀，每次見到衣d畫面我都覺得好難得好感動。」

有次我同善柔行街果陣係街見到對公公婆婆就同佢講。

「哈哈，咁誇張?」但善柔就無咩大感覺。

「咁平時係街真係好少見嘛…」

「或者因為我屋企就已經有一對模範夫妻，所以成日見無你咁大感覺掛~」善柔笑笑口講。

「你講開又好似係喎… 好似真係從未見過你爹哋媽咪鬧交，而且每次出街你爹哋都實會拖住你媽咪，唔似我屋企果兩個成日都分得好開咁行…」善潼講開我再諗諗下就講。

「係呀~ 我有無講過你聽佢地係大家嘅初戀，一齊之後就一直到衣家感情都係咁好? 係愛情衣欄，佢地所有嘅第一次都係屬於地方架~」善柔頗為驕傲咁講。

「嘩，咁真係好sweet好幸福好犀利喎!」我由衷讚嘆道。

「我都覺! 所以我好有信心佢地到80歲果陣都會好似前面對公公婆婆咁~」善柔自信滿滿咁講。

「咁我都相信係嘅~ 」我同樣有自信咁講。

「咁你估你80歲果陣會唔會都可以同另一半仲咁sweet? 」善柔望一望我然後問。

「咁長遠好難講喎，連對象都未出現… 你呢?」對於衣個問題我都唔知點答好。

「我就話一定會~ 如果我無咁嘅信心，我就唔會同果個人一齊甚至結婚~ 所以如果80歲後無人拖我行路，應該只得一個可能性就係我仲係單身喇…」

「哈哈，咁好似都唔細機會喎!」我講笑咁講。

「李立仁，你講咩呀! 你想咒我無人要?」善柔聽到就好似好嬲咁。

「唔係~ 不過如果你到時真係單身而我又未死加單身，咁我就行下好心拖住你過馬路啦~」我取笑道。

「多謝喎! 不過我覺得到時係你自己一個單身孤伶伶嘅機會最高!」善柔笑返我。

--------------------------------


(估唔到真係比善柔講中，照咁睇，如果我有80歲命，好可能都真係只可以自己一個孤伶伶咁過馬路喇…)

突然間，我諗起一樣野，然後就望向鄺氏夫婦。

果然睇唔到任何嘅切入點。

鄺氏夫婦應該都算係衣個世界入面作為一對情侶同couple嘅完美典範，過左咁多年都仲係咁恩愛。

邊回憶邊食完支煙後，我就返屋企。


衣日之後，善潼間中就真係會黎搵我話要上黎一齊煲劇，而我同佢見面嘅頻率亦慢慢變得密左。

每次同佢見面，我都會成日諗返起同善柔以前嘅畫面。我發覺我慢慢由想勸佢做返自己，變成左眷戀衣家佢似佢家姐嘅衣一面。因為衣d時間，我都有個感覺善柔好似仲生歐歐咁係衣個世界上陪住我咁。

然後，我開始會掛住善潼，期待住同佢見面。

但到底我係掛住善潼，定係掛住善柔?

我自己都唔知都唔知真實答案係咩…

7.17


「唔好意思，我唔太舒服今晚過唔到黎喇...」過左段時間後有晚本身善潼話上黎我度煲劇，不過黃昏時就收到佢個message。

「唔舒服？有無事呀?」我關心問道。

「無咩野嘅，應該休息下無事，唔駛擔心。」

「但我記得uncle auntie衣幾日去左旅行喎，得你一個自己喺屋企得唔得呀？」醒起早幾日佢講佢父母黎緊去個short trip所以我再問。

「屋企仲有d野食，無問題呀。」

「咁你男朋友呢？有無叫佢黎照顧你?」我又試探問道。

「佢公司趕緊project，我唔騷擾佢喇，又唔係咩大件事... 」果然一如我所料嘅答案。

「佢好似成日都好忙喎...我一陣過黎睇下你，順便買d好味野比你食啦~」

「真係唔駛麻煩你專登過黎啦，我無咩事架咋…」

「唔睇下你我會擔心架，反正我今晚本身都係約左你無野做，衣家咪當轉場囉~」

大好機會刷好感我當然唔應該放過，而且如果唔係真係好唔舒服我唔覺得善潼會選擇唔黎，所以我相信佢應該係幾唔舒服下，心入面都有d擔心。

「咁好啦唔該晒仁哥哥...」

「你都識叫我仁哥哥啦，我地咩關係呀，仲講衣d...」

「><」


之後我就買埋外賣上去善潼屋企探佢。

「唔該晒仁哥哥...」善潼開門見到我拎住兩袋外賣就講。

「嘩，你面色好差喎...到底咩事呀？」見佢個樣真係幾唔舒服我就問。

「我...個肚痛啫...」善潼有少少唔好意思咁講。

「肚痛？食錯野？」我追問。

「唔係呀...」今次善潼塊面有少少紅咁。

「哦...咁我知咩事喇，你去梳化坐低休息下先，我攪掂d野就過黎。」睇佢個樣keep住有少少尷尬我就估到係咩事。

「好...」


「嗱，你用衣個敷住個肚先，我再落去買少少野。」我整左個暖水袋比善潼敷住個肚，然後又預備開門出去。

「唔駛咁麻煩啦，我抖晚無事架喇。」善潼想阻止我唔想麻煩我。

「好快架咋，等我!」然後我無理佢我就出左去。


好快買完返黎我就開始處理返之前買果d外賣。

「食得喇，敷完有無好d呀?」我整好晒d野食係枱就問。

「好返d無咁痛喇…」善潼微笑住咁答。

「咁過黎一齊食野啦~」

「好…」

「你成日M痛都咁嚴重?」我邊食邊問。

「都唔係… 係間唔中一次啦…」善潼好似都係仲有少少尷尬。

「你平時準唔準?」但我就繼續毫無避忌咁問。

「唔太準… 有時會遲成個月都唔奇…」

「之後得閒就去搵中醫睇下調埋下身體啦，亂晒對女仔身體唔好架… 如果真係成日痛就要搵西醫檢查一下。」我少少擔心咁講。

「知道…」

「我專登買左d核桃同豆腐，你食多少少啦，可以舒緩不適同減輕炎症無咁痛架，一陣食完我再幫你按下幾個穴位等你容易訓d。」

「仁哥哥你真係好細心呀，你以前成日咁照顧女朋友架?」善潼聽完我講就突然問。

「多事啦你…」我心入面比左個答案但口就咁講。。

「咩喎… 咁人地奇怪點解你識咁多野嘛…」善潼得唔到答案就扁晒嘴咁。

不過我無再答佢，食完飯後佢就坐返去梳化休息，而我執拾完後就坐左係佢隔黎捉住佢隻手掌開始幫佢按摩。

7.18

「生理痛有三個穴位可以幫你舒緩痛楚同調理身體架，一個係衣家幫你按緊手背側邊有個叫合谷穴，一個係腳踭外有個叫三陰交穴，仲有個係大脾內側位有個叫血海穴。你自己平時都可以幫自己按下架...」我捉住佢隻手一邊輕力咁按一邊講。

「咦… 好似係無咁辛苦喎…」善潼慢慢就合埋左眼講。

「衣段時間唔好食刺激性食物，涷野辣野咖啡全部唔好掂。 同埋點解你枱面有咁多朱古力架？」我之後又講。

「d人話m痛食朱古力會好d嘛...」善潼繼續閉上眼咁答。

「朱古力都分好多種，你衣d白朱古力會弄巧反拙架！」我略帶生氣咁講。

「下？點解？」有d驚訝善潼打開左眼睛問。

「雖然朱古力有鎂可以促進你吸收鈣，幫你舒緩緊張情緒同減輕頭痛及經痛等症狀，但你食d咁高糖量嘅朱古力可能會刺激子宮肌肉收縮，造成反效果令你更加痛架... 所以想食朱古力就要食黑朱古力。」我一輪嘴咁解釋。

「原來係咁!真係唔知添…」善潼一副如夢初醒咁嘅樣。

「你咁大個女無人教過你架咩?」我問。

「無呀，或者有人講過都唔記得掛… 通常喺屋企抖兩日佢自己會好~」善潼有少少以笑遮醜咁。

「唉，真係無你乎… 我頭先買左鮮奶衣家整返暖，一陣比你飲埋就早d休息啦… 如果真係好痛我都買左止痛藥比你，不過唔係好嚴重就唔好食喇…」

「仁哥哥，做你女朋友應該真係好幸福呢~」善潼望住我笑住咁講。

「匿埋眼休息下唔好諗咁多無謂野啦!」我無佢乎咁講。

「唔舒服好難訓得著架…」善潼突然露出一個委屈樣。

「都要努力試下架，訓著左你就無咁辛苦架喇…」我勸道。

「一係你好似細個果陣咁講故仔氹我訓覺?」然後佢雙眼碌左碌突然講。

「嘩姐姐，你廿幾歲人仲要人講故仔氹你訓? 你真係仲好意思講出口喎…」我忍唔住取笑佢。

「咁人地真係訓唔到嘛… 而且你唔係話你係我大哥哥黎架咩? 都咁耐無試過咯，當補償返你之前咁耐無理我氹下我囉~」善潼對住我竟然開始撒起嬌上黎。

「怕左你… 想聽咩呀?」見佢咁扭計我竟然有d心軟，而且亦確實有d懷念起以前大家仲細嘅日子。

「三隻小豬~」

「…咁你飲左杯鮮奶先啦…」我入廚房拎左杯岩岩整暖左嘅鮮奶比佢。

「好~ 飲完!」佢好快飲完就遞返隻杯比我。

「… 從前有三隻小豬同一隻母豬，有一日母豬就同三隻小豬講…」我幫佢放好隻杯，然後就一邊幫佢輕輕力繼續按摩一邊講故仔…

過左唔知幾耐，善潼終於不自覺咁訓著左。

望住佢臉帶微笑嘅睡容，我不其然又諗起另一段往事。

7.19

有次應該係中學某年放緊暑假果陣，我記得我因為太悶無野做就諗住去善柔屋企搵佢一齊落街行下，點知襟左段時間門鐘都無人應，直至當我轉身打算走果陣大門先終於被大開，然後我就見善柔臉帶痛苦嘅樣子。

「咦，你唔舒服?」我擔心問道。

「係呀，個肚唔舒服...」善柔面容有少少扭曲咁講。

「食錯野?」我自然反應咁問。

「唔係呀…」

「咁係咩事? 除左食錯野要去廁所仲有咩會肚痛?」當時天真的我問道。

「… 仁仁你會唔會太可愛呀? 女仔先會有嘅生理痛呀，即係M痛…」善柔真係當教細佬咁講。

「哦... 你無事嘛? 屋企得返你一個?」我終於如夢初醒。

「係呀，嗲哋媽咪同潼潼約左潼潼d同學一齊出左去玩呀...」

「咁咪無人理你? 你面色真係好差喎，我有無野幫到你呀?」我好心問道。

「你可唔可以幫我落樓下買支鮮奶?順便幫我買d朱古力呀...」善柔臉帶痛楚咁講。

「衣d我屋企有呀，我返去拎比你啦~」跟住我轉身就返去屋企拎。


「嗱，牛奶同朱古力~」好快我就拎住支牛奶同袋朱古力入左善柔屋企。

「唔該晒... 鮮奶可唔可以幫我”坐”返暖佢? 咦?朱古力得白朱古力咋?」善柔望住我岩岩拎黎嘅野講。

「係呀，我諗住白朱古力甜d你會舒服d開心d嘛... 黑朱古力咁苦我唔鍾意食…」我嘗試解釋。

「仁仁，女仔M痛唔可以亂食朱古力架，因為糖份高嘅朱古力會增加女仔前列腺素水平刺激子宮肌肉收縮，會令佢地更加痛架… 所以要食就只可以食黑朱古力，因為佢有鎂可以增加鈣嘅吸收，舒緩到d症狀...」善柔耐心解釋。

「真係唔識喎...咁我落去買比你?」我當時其實無乜邊句聽得明﹐淨係明唔可以食白朱古力，要食黑朱古力。

「算啦，唔駛特登落去喇... 一係你黎幫我按下隻手同隻腳啦，上網教有幾個穴位話可以令我舒服d架…」

之後善柔就喺電腦開左個page比我叫我自學然後再試下幫佢按。

「嗯… 好似真係有d用喎… 仁仁，你要記住女仔M痛有時真係好辛苦架，所以你學識點照顧佢地第日識女朋友實加好多分~」望住我細細力咁幫佢按緊隻手仔，善柔閉上眼好溫柔咁同我講。

「哈，多謝晒喎~ 咁我學業有成出師前係咪要一直搵你幫手做我實習對象?」我帶點不屑咁講。

「咩喎，同你friend為你好先講咁多比你聽咋! 第日潼潼男朋友如果唔識照顧潼潼我都一樣會教佢~你都知教完潼潼佢都實聽唔入耳轉個頭咩都唔記得架啦… 不過我都唔介意你有女朋友前搵我做下練習對象嘅~」善柔果然好了解佢阿妹。

「車! 搵我做阿四仲要講得咁好聽…不過你都真係廿四孝家姐黎嘅~ 只係要等潼潼拍拖，都唔知幾耐之後lu~」我講笑道。


之後每逢善柔M痛，我都得到珍貴嘅習實機會。只係我最後要滿師出關，並唔係因為我有左女朋友而係因為善柔有左男朋友。

當黎生出現後，善柔就再無搵過我幫手。

唔知係因為佢有拖拍後就再無M痛過，定抑或佢搵到另一個更加合適嘅人去照顧佢呢?

----------------


「琴日唔該晒你呀，今日我好返好多喇~不過唔好意思你走左我都唔知添…」第二日朝早就收到善潼嘅message。

「咁就好喇，無咩嘅就好好休息多日啦」

「知道，晏d Tony應該都會黎搵我~」

「等我有機會見到佢就教下佢要點照顧你啦~」

「好呀，辛苦仁哥哥~」


(唔辛苦，以後我都會代替你家家教你男朋友點照顧你架…)

7.20

「Yeah~ 終於黎到喇~」

跟住個週末，善潼話要慶祝佢痛完就約我出去玩，於是我地就搭快艇由西頁碼頭出發去環島遊。

早喺唔知幾多年之前，善潼善柔同我曾經有一日都打算去西貢搭船環島遊下，點知去到西貢突然就落超大雨。一來船家唔肯出海，二來咁大雨就算出到海都無咩意思，所以我地最後就只好喺暴雨下嘅西頁周圍行下食下野咁玩左一日，失望而回。

或者因為上次去唔成，所以今次善潼就提議去返衣度玩下。

成個行程可以有好多地點落船，不過我地主要就集中喺橋咀島，因為當中我地可以去到連島沙洲同半月灣衣兩個熱門打卡聖地。

應該唔少人都見過，連島沙洲係潮漲果陣就好似兩個獨立嘅島咁，但到到潮退果陣因為水位下降，連接兩個島中間嘅一條小石路就會重新浮出水面，令我地可以喺兩個島中間來回行走。

所以去之前要特別預先去天文台睇下當日潮漲潮退嘅時間先可以揀到最合適遊覽果度嘅時間。

最好去到係潮退可以見到同行到兩島中間條沙石路，然後到到潮漲見証住條路好快就被海水淹沒後，就可以睇到晒兩個截然不同嘅風景。

而係果度我地仲可以見到好有特色嘅菠蘿石，因岩石受到風化侵蝕，呈現出奇特的裂紋。

我地預岩時間去到岩岩係潮退嘅時間，所以可以浴路行到過去對面果個島。


「哎吔…」可能因為路面唔平又有少少濕，善潼行行下突然輕輕跣左一跣，好彩無跌親。

「你睇你，咁大個女都仲咁論盡架! 比隻手我啦~」驚佢又再跣親我慣性遞起左隻手示意佢拖住我。

善潼見到我隻手有少少面紅，稍為猶豫左好短時間就張佢隻手搭左上黎。

其實我好快到意識到咁可能有d唔妥，不過一來以前細個果陣我都成日咁拖住佢行習慣左，二來我都想透過咁增加我地嘅親蜜度，所以我就照樣遞高隻手無收返埋，而當佢隻手搭左上黎後我就合上我隻手掌將佢拖實。

係路上望住兩邊清澈嘅大海，風景真係一流。再加上手心傳黎善潼嬾滑小手嘅觸感，我個心都忍唔住傳黎左少少同往常唔同嘅律動… 明明以前細個拖住佢果陣都係唔會有。

緩步行左個圈又影下唔同嘅相後我地就返返去原本個島然後睇住潮漲慢慢開始將我地岩岩先行完嘅果條路淹沒。

睇住潮汐，我不其然諗起五月天嘅一首歌，一首我同善柔曾經都好鍾意嘅歌。


就算是整個世界 把我拋棄 而至少快樂傷心我自己決定
所以我說 就讓他去 我知道潮落之後一定有潮起 有什麼了不起


而說也巧，我諗緊時候隔黎就傳來衣首歌嘅歌聲。


「你都諗起衣首歌?」我仍然拖住善潼隻手，臉有少少震驚咁問。

「係呀，家家以前好鍾意衣首歌架，一有咩唔開心或者遇到困難挫折果陣佢就會播衣首歌…」善潼無再唱然後答。

「我知呀，當年係我介紹佢聽先嘅，點知佢一聽就超鍾意仲變埋真正嘅五迷，仲沉迷過我…」諗起當年嘅事我都啞言失笑。

只係一提起佢，好快大家又會陷入一種莫明嘅傷感。

Lm

7.21

---回憶---

「琴日聽完首人生海海我忍唔住成晚聽晒佢之前嘅所有歌，真係好正呀! 仁仁，難得你有一次係咁有taste喎!」有次我係屋企咁岩播緊衣首歌善柔聽到後就表示好鍾意，然後第二日佢就同我講。

「不嬲我都咁有taste架啦，係你一直發現唔到啫… 不過佢d歌真係好青春熱血，聽落好有共鳴~」我地青春嘅年代好其實難唔鍾意當年同樣青春嘅五月天。

「係囉~ 第日大個d我地要一齊飛去台灣睇佢地演唱會至得!」善柔好興奮咁講道。

「哈哈，睇黎你真係淨係聽左佢地d歌而無了解過佢地喎… 佢地同香港有五月之約，每年五月都會黎香港開演唱會架，所以唔駛特登飛去台灣~」我邊笑佢邊解釋。

「真架? 咁就好喇，下年我地一齊去睇呀!好想現場聽佢地唱live呀!」善柔聽完就更加興奮。

「好呀，不過買到飛先算啦，佢地d飛好難買架…」但我就潑左佢少少冷水。

「大不了咪去排通宵! 只要有心，無野係阻到我地嘅!」不過善潼應該受五月天影響仲係喺超熱血mode。

「睇黎你真係上晒腦喎… 咁下年靠你喇，買到我唔介意陪你去睇嘅~」

「李立仁，你係咪男人黎架! 要個女仔去排通宵… 你忍心咩?」善柔突然望住我露出個水汪汪好委屈嘅表情。

「你無睇鋼鍊架咩? 要得到一樣野就要付出相應嘅代價嘛~ 要我幫你買都得，除非你承認我係大哥啦，咁大哥幫阿妹買就天經地義喇~」我當然唔會中佢計乘機敲詐。

「你就想! 唔駛旨意呀，我先唔會因少失大~ 唔駛講咁多喇，下年我地一齊排隊去買啦，唔係一個人排通宵其實好悶好慘架…」佢當然亦唔會就範。

--------


「行喇，我地夠時間去半月灣喇~」或者唔想沉溺於果種氣氛，善潼好快就打破左寧靜講道然後亦襯機鬆開左我隻手轉身就行。

從回憶被拉回現實嘅我亦只好收拾心情立即緊隨其後。

7.22

半月灣浴海邊行可以去到心形天池以及象鼻洞兩個有特色嘅景點，而影完一堆相打完咭後，善潼就喺海灘邊突然將佢嘅外套同短褲除左落黎。

個衰妹原來有備而戰入面竟然著左套比堅尼泳衣。

而佢一除衫之下我先發現有d野原來我一直無為意，就係佢衣家原來咁有睇頭，身材好到不得之了。可能因為之前肥，所以佢上圍都幾豐滿，而衣家瘦身成功後上圍又無咩點細到，所以絕對可以用玲瓏浮突黎形容，只係我自己一直無留意…

一見到果下我真係嚇親，然後我發現我開始流鼻血，於是即刻擰轉左個頭唔比善潼見到我嘅”醜態”。

「做咩個頭擰左去另一邊唔望我呀?」善潼見我眼神閃閃縮縮又擰轉左面唔望佢就略帶不滿咁問。

「細路女做咩著到咁性感呀你!」努力整理好自己嘅鼻血同表情管理後，我就仍然背住佢咁用一副兄長嘅口吻話佢。

點知佢聽到後亳無懼意，仲用兩隻手夾實我個頭，再用力擰返我個頭返黎等我可以面向住佢。

「阿仁哥哥，其實我唔係細路女好耐喇，唔該你好好睇清楚，我已經係一個不折不扣嘅成年女人，唔好再當我係少妹妹喇，知唔知? 唔係我就要你一直望望到你清楚為止!」個衰妹講到最後仲要專登挺起個胸好似想向我示威咁。

比個妹妹咁話我個心即刻有d唔衰得，我知佢有心想整蠱我想睇我出醜。

「好呀，我就望實你睇下你有幾女人!」

於是我地就四目交投，互相望實大家，互不退讓。

不過唔夠一分鐘，大家其實就開始已經想縮。

曾經有人講過如果你同另一個人互相對望一段長時間，咁慢慢你就會對對方心動然後愛上對方。

衣刻可能因為時間尚短未必談得上愛，但唔可以否認咁對望左一段時間，除左尷尬，我個心都真係越跳越快，加上對方仲只係著住套咁少布嘅泳衣，所以生理反應嘅壓力亦令我開始敗陣落黎，始終我接受唔到自己對住自己個妹有生理反應。

見我眼神開始閃縮迴避，善潼如釋重負嘅同時亦露出一個勝利者嘅笑容。

「記住以後唔好再睇少我喇!」

事實上經過頭先果幕，我心入面好似真係有d難再當佢係我嘅半個小妹妹，所以只可以唔爭起咁哼左一聲。

好彩佢都無得寸進尺，之後就撓住我lur我同佢落水玩。

「我…無帶泳褲唔落水喇…」我拒絕落水。

「攪錯呀! 明知黎海灘都唔帶泳褲!」善潼抗議。

「黎海灘都可以淨係曬下太陽唔落水架嘛，無諗過你咁進取…」

「費事睬你!你唔游我自己游!」

於是佢就自己出左去游水而我就係岸邊曬太陽睇下風景，然後不時就拎部相機出黎影下相。