<我嘅職業係專溝人地個女朋友>

12.36

同張啟光一齊咗兩年，李思柔已經完全習慣咗自己嘅身份，加上對郭子安徹底死心，所以對佢從前嗰種單戀嘅感覺已經淡化咗好多，反而郭子安心入面嘅唔舒服令佢哩兩年潛意識都習慣性想避開李思柔。

雖然張啟光求婚嗰日，李思柔腦海中都仲有浮現出郭子安哩個人，但一諗起郭子安放棄咗同自己嘅承諾，哩兩年又過住啲放蕩濫情嘅生活，李思柔發自心底對佢十分失望，所以理性好明確咁話比佢聽佢無可能仲會因為郭子安而拒絕張啟光嘅求婚。

「好似一段時間無見你喇喎，近排好忙?」見郭子安似乎似返個人李思柔就問。

「少少啦，依家間健身中心上晒軌道就得閒返啲，你想見我咪主動約我囉~」郭子安亦回復佢輕挑嘅性格，其實以前佢地兩個相處模式不嬲都係咁。

「好呀，搵晚食飯呀。」李思柔客套咁講。

「等你約呀下~」郭子安亦hea答。

哩個時候電話響起，郭倩婷就將手上嘅BB交咗比李思柔然後去咗聽電話。

李思柔有少少手忙腳亂咁抱住BB，但BB可能拍生保就開始喊起上嚟，嚇到李思柔即刻抱住佢彈起身好努力咁施展渾身解數慢慢將佢搖下搖下想氹返佢。

「BB乖唔好喊， 姨姨呵返你~乖~」

經過一番努力同轉咗超過十款嘅表情，又好似人肉搖籃咁不停擺動自己身體，BB終於肯唔喊仲對李思柔露出咗個甜甜嘅笑容，而當李思柔見到BB哩個足夠讓任何人個心溶化嘅笑容後自己都不自覺好warm好溫柔咁對佢露返出一個同樣嘅笑容。

喺側邊嘅郭子安望到哩幕畫面，突然間感覺到自己內心深處好似被某樣東西觸動到。

佢有個感覺，如果眼前哩個係自己嘅老婆同BB咁就好了，佢好似捕捉到咩叫”幸福”同埋發現自己好似搵到自己真正想要嘅野。

佢不禁一直呆呆咁望住咗李思柔同自己個姨甥，霎時間，佢首次生出咗一種攰同開始想定落嚟嘅感覺。


「有板有眼似模似樣喎~」郭倩婷傾完電話見到李思柔抱住咗自己個仔仲氹得佢幾開心就笑笑口講。

「好彩佢比面肯唔再喊啫~」見到郭依婷返嚟李思柔就立即將個BB比返佢。

「你同啟光都好快可以生返個啦~」郭依婷講笑道。

「...再算啦~」李思柔就有少少尷尬咁講。

「唔好浪費佢嘅基因呀，一 於佢一返嚟結婚果晚你地就不設防咁努力生仔~」郭依婷繼續無放過佢。

「你地... 諗住結婚喇?」對於故意避開對方又無人主動同佢講嘅郭子安，哩次係佢第一次聽到哩個消息。

「係呀，啟光返英國攪掂埋啲嘢就會正式移居返嚟香港，然後娶思柔過門，婚都一早求埋喇~」為免李思柔對郭子安還有難堪嘅感覺，郭依婷主動代佢答。

伴隨住聽到”係呀”哩兩個字，剛剛才喺郭子安心入面構成嘅幸福畫面轉眼間就被擊至粉碎，郭子安感到心裏一痛...

「恭喜你呀...」他勉強講出哩兩個字。

「多謝...」而李思柔亦有啲為難咁講出另外兩個字。

「要聚舊有咩遲啲再傾啦你地，BB 瀨咗尿呀，快啲過嚟幫手!」察覺到氣氛有異郭依婷就襯BB瀨左尿故意幫佢地轉移話題。

之後郭子安同李思柔都無再觸及哩個話題，但郭子安就一直有點心不在焉，而時間過到咁上下，佢地就一齊離開咗郭依婷屋企。

12.37

「去邊呀你?」落到樓下郭子安問。

「諗住返屋企呀。」李思柔答。

「一係我地就今晚一齊食飯?」今次一別唔知幾時再有機會見郭子安就突然提議。

「咁即興? 都可以嘅，你無約人咩?」李思柔諗咗諗後答。

「無呀~」本身其實有約咗個女仔，不過哩刻郭子安已經唔想再理李思柔以外嘅女性。

「但依家距離食飯仲有啲時間喎...」李思柔望一望錶講。

「無嘢做我地周圍行下先? 我地都好似好耐無一齊行過街了...」郭子安再提議。

「都好，橫掂我都想去商場買啲嘢。」李思柔諗一諗又答。

「咁Let’s go~」郭子安心頭一喜就同李思柔開始出發。


「係呢... 頭先都未講完，所以你同啟光嚟緊真係會結婚?」行咗陣後郭子安忍唔住再問。

「係呀... 」李思柔帶有少少唔自在咁答。

「拍咗兩年拖就結婚唔會太快? 」郭子安問。

「咁我地都識咗咁耐咁了解大家，而且其實我年紀都唔細㗎喇，佢對我又好好... 」李思柔少少尷尬咁解釋。

「你真係諗清楚喇?」郭子安仲係死心不息。

「哈，做咩呀? 你好似好關心咁喎?」見郭子安有啲唔妥李思柔反問。

「咁話晒識咗咁耐，我都希望你真係可以得到幸福㗎嘛~」郭子安臉一紅裝作無事答道。

「你又點呀? 三十幾歲人仲成日換女朋友，世界上真係無一個人可以令你定到落嚟咩?」聽到郭子安嘅說話李思柔不甘示弱還擊。

「本身或者無，不過啱啱我發現咗可能有一個人可以... 」郭子安諗咗諗後決定答。

「邊個咁犀利咁好彩?」郭子安嘅說話立刻吸引咗李思柔嘅好奇，佢好想知係咩人有咁嘅魔力可以令郭子安改變。

「佢係... 」郭子安本身想將頭先見到李思柔抱住BB嗰幕嘅感覺講出嚟，但突然間佢醒起返當日同父親郭非凡嘅對話，然後又醒悟到自己講咗出口後會有咩後果，結果就驟然收咗口。

「係邊個呀? 」李思柔見佢講到一半無講落去就追問。

「都係無嘢喇... 」再三猶豫郭子安最後都係決定唔講出口。

12.38

「車... 又係咁...」李思柔既失望又帶點不滿咁講。

「我想再用啲時間去確定下自己係咪真係得先...」郭子安答。

「睇嚟你真係有啲改變咗喎...」見郭子安個樣好認真，又似真係想心思熟慮，李思柔都感受到郭子安似乎真係有啲唔同咗。

「人總會變嘅~ 學你話齋，我地年紀都唔細喇...」郭子安苦笑道。

「睇嚟嗰個女仔真係改變到你喎...」聽到郭子安嘅說話，李思柔心入面有少少酸意同失落，因為嗰個女仔做到佢努力咗咁多年都做唔到嘅嘢。

「唔好講我住啦，到我確定嗰刻自然會講比你聽，講返你同啟光，佢對你點好法呀?」郭子安又繼續八卦咁問。

「嗯...基本上佢所有嘢都會將我放喺第一位，有咩都會諗咗我先，平時又會好照顧我，成日想氹我開心同唔想我辛苦，令我有種感覺佢好似生存嘅目的就係為咗令我開心同幸福咁...」諗起張啟光哩兩年為自己做嘅嘢，李思柔都不禁露出個甜甜嘅笑容，剛剛嘅酸意亦隨之消失得蕩然無存。

「有無咁誇張呀...」郭子安有啲唔相信。

「真係無誇張... 你都知我唔係一個會誇大嘅人...初初其實我都好唔慣，從來只有自己咁對人但就未試過比人咁對過...但當習慣咗後，我就明咩叫”幸福”同”被愛”嘅感覺。我接受佢嘅求婚，係因為我確信佢同佢一齊佢會比到我開心同幸福，哩世都唔會變，同樣地佢只要單純因為有我已經可以感到幸福，所以我地只要一齊就大家都會幸福... 我啲同事成日笑我話我上一世唔知做咗咩好事今世先會咁好彩遇到個咁完美嘅男人，我初初都係一笑置之，但慢慢我都越嚟越有興趣知道自己上一世到底做咗啲咩好事救咗幾多個人今世先會得到佢嘅寵溺~」

聽住李思柔一臉幸福講嘅說話，郭子安心入面僅餘嘅猶豫都消失了，因為他自問比唔到哩種幸福李思柔。見對方依家咁幸福，除非佢有信心令對方更加幸福，唔係嘅話佢依家再做任何嘢對對方都只會係傷害。

確實，一切都已經太遲...或者自己都係比較適合做浪子吧。


(估唔到啱啱先有咗定落嚟嘅念頭，轉眼間就幻滅咗...

既然比唔到愛情你，咁我地就做返一世嘅青梅竹馬啦。)

郭子安心裏默默咁諗。

12.39

哩日之後，郭子安再無避開李思柔，相反不時仲會主動搵佢希望大家可以回復昔日嘅關係，或者佢心入面想好好珍惜哩段最後嘅時光，因為當張啟光從英國返嚟後佢地就會結婚，之後，佢同李思柔都再無可能再好似以前咁。


兩星期後，因為郭依婷個仔就快半歲生日，郭子安就約咗李思柔出嚟諗住一齊揀禮物。

「半歲，到底買咩禮物好呢?」李思柔問。

「我都覺得好難諗呀... 玩具咁細個好似無咩玩到，衫又好快唔啱著好似好浪費咁，就咁比利是又好無誠意...」郭子安同樣覺得苦惱。

「一係公仔? 你唔覺得每個小朋友成長都總會有一隻公仔或者毛巾係一直陪住佢大?」李思柔突然靈機一觸。

「但男仔送公仔會唔會有啲...唔夠man?」郭子安有少少猶豫。

「邊關事呀... 小朋友男仔女仔都玩公仔㗎啦! 你以前細個咪一樣成日攬住隻美國隊長公仔!」李思柔反對郭子安嘅論述仲沒好氣咁提出有力嘅論証。

「又好似係喎... 估唔到你仲記得...」被踢爆的郭子安只可以尷尷尬尬咁講。

「點會唔記得，嗰陣你同隻公仔形影不離，而我都有隻Captain Marvel我地成日係度扮打交㗎~」諗起童年往事李思柔不禁露出笑意。

「咁我地一於去買公仔啦~ 我地一人揀一隻睇下佢鍾意邊隻多啲?」諗起同李思柔嘅往事郭子安同樣瞬間妥協仲開始覺得哩個提議好好。

「好呀~」

之後佢地就去咗間大型玩具店度搵公仔。

「嘩，哩隻咁得意BB實鍾意!」李思柔見到有隻公仔就即刻衝咗埋去攬住佢親身試驗舒唔舒服。

「咁女仔我覺得未必啱喎... 我覺得我哩隻好啲~」郭子安望咗望後又用同一理由搖搖頭，然後自己揀咗另一隻講。

「點會啫! 唔信搵啲小朋友嚟問下意見呀~」

然後佢就開始想周圍搵小朋友問。

郭子安本身都只喺笑笑口無阻止佢，但突然間佢察覺到李思欣側邊個層架正不斷傾斜預備向下墮，原來喺層架另一邊有兩個小朋友正喺度追逐然後唔小心撞到個架令成個架傾向另一邊下跌。

「柔柔小心呀!」見狀郭子安即刻衝前推開仲懵然不知自己已經身處險地嘅李思柔。

「哎哋...」

結果李思柔比郭子安推到成個人向前仆咗喺地下，但當佢回神擰轉面想問郭子安做咩嗰陣，一聲巨響伴隨往眼前嘅景象瞬間將佢嚇呆咗。

因為佢發現剛剛自己企嘅位置已經被啱啱仲喺自己側邊嘅玩具層架以一個倒塌形式霸佔咗，而層架下佢只係見到郭子安開始流緊血個頭，因為佢頭以下嘅身體已經完全比個層架壓住咗，然後佢仲見到兩個知自己闖下大禍嘅小朋友喺層架側邊嚇到目定口呆。

「子安!」

李思柔即刻衝前想幫手搬開壓住郭子安嘅層架但發覺自己完全唔夠力，哩個時候旁人同店鋪工作人員都趕到嚟就即刻幫手以及叫白車，好唔容易終於將成個層架搬離咗郭子安嘅身體。

「子安，你點呀? 唔好嚇我醒醒呀?」李思柔心急咁邊拍住郭子安塊面邊問。

「柔柔? 你有無事呀? 有無整親?」郭子安打開眼見到李思柔亦即刻問。

「我無事呀...」李思柔見郭子安醒咗就稍為放下心頭大石應道。

「咁就好喇...」點知郭子安聽到之後就如釋重負咁就再次合埋咗雙眼。

「喂，你唔好瞓返呀...醒呀... 喂!」李思柔見此就再拍郭子安希望可以叫返醒佢，但哩次任李思柔點叫佢點拍佢佢都再無醒過，然後白車嚟到就送咗佢去醫院。

12.40

「傷者因為比個層架擊中咗頭部受到重創出血所以昏迷，啱啱我地已經盡量幫佢清咗腦入面嘅瘀血，不過除咗哩樣之外，仲有另一個大問題係個層架喺擊中咗佢個頭後再順勢壓住咗佢個背脊，我地發現佢條脊椎某一個關節同樣受到重創，雖然我地已經盡量修復同拎咗d碎骨出嚟，但可能... 都會影響到佢下半身嘅活動能力...」

「即係佢醒得返都會癱?」

「現階段言之尚早，我地都會等傷者情況穩定返啲後再做個詳細檢查先知佢嘅受損程度，不過就現在觀察，哩個可能性非常之高...」

手術完結時，郭非凡兩公婆同郭依婷已經趕到咗醫院，當佢地聽到哩個消息都萬分傷心同擔心，而李思柔聽到後更加忍唔住喊起上嚟。

「都係我... 佢係為咗保護我先受傷㗎...」李思柔萬分自責地說。

「意外嚟無人想，你唔好怪自己啦，依家最緊要係希望阿哥無事...」郭依婷見李思柔咁自責就立刻上前抱住佢安慰道。

「如果佢有咩事，我哩世都唔會安樂㗎...」李思柔仍然邊喊邊講。

「阿哥佢福大命大，實無事嘅... 你都喺度等咗咁耐，不如返屋企休息下先啦，醫生都話阿哥唔會咁快醒，你返去休息陣聽日先再嚟探佢啦，好無?」郭依婷勸道。

李思柔本身唔肯，不過經郭依婷再三勸喻就終於肯返屋企。


李立仁已經知道咗意外發生，雖然慶幸自己愛女無事，但知郭子安為咗救自己個女而受咁重嘅傷心入面都好唔舒服，希望佢可以早日醒返同康復。

可惜事如願違，郭子安之後一直都無醒，令大家都十分不安同難過，而喺哩段時間，李思柔差唔多每日都會去醫院探望郭子安。


轉眼間一個月過去，張啟光亦終於攪掂晒英國嘅嘢正式移居返嚟香港。

本來一心一意滿心歡喜諗住今次返到嚟就可以同李思柔拉埋天窗，但知道咗郭子安嘅意外，佢個心都好唔舒服，而心入面亦有一種強烈不安嘅預判，所以張啟光決定提早同父母分別返嚟香港。

話晒由細玩到大，張啟光當然都好擔心郭子安希望佢可以早日醒返同好返，但同時間因為佢同李思柔以前嘅關係加上見到李思柔日日出入醫院亦令張啟光心入面出現有一絲嘅擔憂。

「不如我地個婚禮暫時緩一緩先啦... 我真係無心情結婚呀...」而張啟光都未講，李思柔就已經主動提出。

「明白，贊成呀，我好明白你嘅心情，見到子安哥咁我個心都好唔舒服...」

對此，張啟光心裏都好明白哩個時候確實唔適合提結婚嘅事，只能默默咁陪伴喺李思柔身邊支持佢。

12.41

時間一日一日咁過去，對於仍然昏迷不醒嘅郭子安，大家都慢慢習慣咗哩種擔心、焦慮同不安，開始過返正常嘅生活。而唯一例外嘅，就係李思柔仍然風雨不改咁每日去探望郭子安，而佢哩個舉動，亦同時引起咗身邊唔同人嘅擔心。

「本身以為等啟光返嚟同思柔結婚哩件事就可以完美落幕，估唔到依家又會出現咗哩個變數... 我唔係話要佢地即刻結婚，我都知依家咁絕對唔係good timing，只但係我擔心因為哩件事思柔對子安又會舊情復熾，然後三個人嘅關係又會變得複雜起嚟...」見愛女茶飯不思咁日日去照顧郭子安，李立仁哩日就忍唔住去咗自己間舊鋪搵黎浩明傾偈。

「哩個炸彈可能本身一直都存在，依家只係突然被引爆咁解啫，我地哩幾年其實一直都唔知你個女係咪真係放低晒郭子安... 不過或者都真係天意啦，偏偏喺佢地就快結婚前發生哩個意外...」黎浩明平靜地答。

「你仲有無草? 我想再睇下思柔到底依家喺度諗緊咩呀...」李立仁擔憂地問。

「其實比你知道咗你又可以點幫佢? 如果佢已經放低咗你就唔駛擔心，但如果佢真係未完全放低郭子安，依家發生咗咁嘅事見對方為咗自己攪成咁，你覺得你可以勸到佢放低? 你咁做為嘅都係等自己知道答案舒服啲啫，但你唔會幫到佢任何嘅嘢㗎...」黎浩平冷靜分析。

「咁你都講得啱嘅...」但這分析沒有讓李立仁好過點。

「你係關心則亂，去到依家嘅階段，其實我地都無咩可以做，唯一可以做嘅就只有陪住佢支持佢... 一切可能都要等時間，或者等郭子安醒返先可以有結果...」黎浩明講。

「咁如果佢一直唔醒呢?」李立仁問。

「其實你都唔駛太擔心嘅，你個女係一個顧及人感受同有責任感嘅人，所以去到某個時間就算佢未必想都好，我相信佢都會比個交待張啟光嘅...」黎浩明仍然冷靜地說。

「嗯... 咁你覺得某個時間即係幾時?」了解愛女嘅李立仁經黎浩明提醒後亦認同。

「三年，最長三年如果郭子安都唔醒，我相信Celia都會主動同張啟光完婚。」黎浩明又像個智者咁講。

雖然唔多 不過都出個年初一更同大家拜過早年～

祝大家新年快樂，身體健康，兔年行大運～

新年快樂

各位新年快樂

呢個故真係好正，如果我個ex有睇，我哋就唔會分開了

因為佢遇到李立仁？

係Joe嘅故事，衰溝通，亦冇真正嘅朋友可以幫到手

icic..兩個人一齊溝通真係好重要，成日都‘’我以為"，大家唔了解大家真正想法，當誤會一旦形成就好危險然後陷入惡性循環。

明明可能本身一句說話解釋就可以解決嘅問題，因為主觀同硬頸，結果就令問題越嚟越嚴重，而關係一破壞咗，就未必修補得返。

希望你同ex睇完，下段關係會更好啦

12.42

「子安，你瞓咗好耐喇，偷懶都要有個限度，你好快啲起身啦，你一日唔起身，我一日唔安樂㗎... 」

「子安，我近排訪問咗個釋囚，佢個故事好峰迴路轉㗎，我講比你聽呀~」

「 子安，你再唔起身我就唔嫁㗎喇，你係咪想我哩世都嫁唔出呀!」

「 子安，我知喇，你根本就係想我嫁唔出，你哩個衰人!」

「 子安，你唔係話終於搵到個可以令你定落嚟嘅人咩? 你就算唔為我，為咗佢你都應該要醒呀... 雖然我唔知係邊個咁叻咁好彩，但你再唔起身人地可能都唔再等你，比人搶走㗎喇...」

「子安，我講你聽呀，雖然你決定唔再尋夢做導演，但我其實仲一直好努力咁寫緊小說㗎，近排我有咗靈感，覺得今次或者可以成功...」

「子安，已經600日喇，你捨得醒未呀... 如果唔係你，我結咗婚，小朋友應該都生埋喇!啟光好好一直都無比過壓力我，但我知佢一直等緊我，我覺得好對佢唔住呀...你到底肯醒未呀?」

「子安，我講個秘密你知呀，其實都唔係秘密，因為我估好多人都知，甚至你自己本身都知，不過今日，我好想親口同你講一次...

其實細細個開始我就已經一直都鍾意你，仲因為你而無接受過其他男仔攪到成30歲都仲係A0，但你就好似從來都無當過我係嗰回事，不單只細細個已經開始同其他女仔拍拖，仲成日換畫轉女朋友... 慢慢地我都習慣咗由傷心變成麻木，但就一直無諗過試下接受其他男仔... 或者我都仲一直寄望緊有日奇蹟出現你會改變肯接受我然後為我定落嚟?

等下等下唔經唔覺就等到30歲，然後有日啟光突然出現話原來一直都好鍾意我仲做咗好多嘢去感動我... 曾經我都好掙扎，因為接受咗佢就等於接受埋我地唔會有一齊嘅一日，我係咪真係可以放低你，一心一意咁同佢一齊呢?

不過當我仲猶豫好迷茫嗰陣，你就幫我落咗決定話比我聽我真係要move on了，因為你連自己嘅夢想同埋我地之間一直嘅約定都放棄咗... 既然你都唔再重視我，唔重視我地之間嘅承諾，咁我又何必對你再咁執著呢?

所以最終我都比啟光感動答應咗同佢一齊，之後我地過咗好開心嘅兩年，開心到慢慢我都覺得自己好似真係完全放低咗你唔再鍾意你，仲同啟光訂埋婚添。

點知無耐後偏偏就發生咗哩件事... 你可唔可以話比我聽如果你係唔重視我，點解你咁傻咁危險都要救我呀? 依家見到你咁，我仲點安心去尋求自己嘅幸福? 明明我已經放低咗你，但你係咪想透過咁話比我聽原來我並唔係真係完全放低咗你?

不過就算真係未放低咁又點? 啟光真係好好，哩兩年佢從來無講過或者逼我做啲咩，只係默默咁陪住我同支持我，所以我好內疚覺得自己好自私呀... 我唔想再咁負佢落去喇， 你可唔可以快啲醒呀?求下你呀... 」

「子安，我無呃你，哩兩年我除咗嚟探你仲好努力咁寫小說，終於成功出咗書喇，你睇下我係咪好叻? 我好想話你聽只要肯努力，無嘢係做唔到㗎，我行咗哩步喇，你呢?」

12.43

「因為病人過咗咁耐都醒唔返，所以我地都想向你地提議一種新研發嘅技術應該可以幫到病人。技術個原理係我地首先會令病人進入休眠狀態，然後再為佢注射一種藥物，哩種藥入面蘊含住我地人體最原始嘅幹細胞，所以係病人休眠嘅同時，藥物會刺激病人全身嘅細胞令佢地同時間重新生長一次，咁佢個腦同脊椎嘅傷就可以慢慢被修復。

簡單啲講就好似我地將部死咗機嘅電腦重新format一次，咁基本上所有software嘅問題都會解決到，只不過今次我地將哩個原理apply咗落人嘅hardware度。但正因為佢好似我地format電腦咁會刪除晒所有舊有嘅嘢，所以同樣地病人就算康復後都會無晒以前嘅所有記憶，好似一個新生嬰兒咁...

當然，我地都會嘗試盡量保護佢負責記憶嘅果部份等佢好返後可以自動reinstall返啲memory，但就完全確保唔到啲咩... 因為如果保護範圍越大，format哩個動作就越唔徹底而成效亦越易受影響。始終我地一開始嘅主要目的係要醫返好病人嘅傷勢，所以會寧願捨棄記憶都希望佢身體機能可以復原。

整個休眠修復時間大概為期半年左右，而暫時研究數據顯示，用哩個方法病人有68%機會身體機能可以完全康復，88%機率康復後會完全失憶或者嚴重失憶。

你地可以考慮下試唔試哩個方法再話我地聽。」

見已經過咗咁耐時間郭子安都無醒，而且經過診斷醫生都好肯定郭子安就算醒返癱瘓嘅機會亦十分之高，所以就向郭子安屋企人提議哩個新研發嘅醫療技術。不過哩個方法雖然成功就會醫得返郭子安，但就好有可能令佢失去以前嘅所有記憶。

只但係比起昏迷同癱一世，失憶似乎比相對上係容易接受，所以最後佢地都決定接受用依項新技術。



「 思柔，可唔可以同你傾幾句?」喺郭子安休眠期間，有日郭非凡見李思柔坐咗喺郭子安床邊同佢傾偈，再三猶豫後就同佢講道。

「 Uncle Kwok? 可以呀...」李思柔應道。

「 有啲野，我估子安應該一直無同你講過，而本身我亦覺得應該由佢決定講唔講你聽，同埋親自講比你聽會比較好... 不過依家佢好可能醒返後都會無晒以前嘅記憶，所以我覺得我應該至少將一啲我知嘅嘢講比你聽，特別係你同啟光結婚之前...」郭非凡一臉認真又帶點心痛地說。

「請講...」對此李思柔有啲意外地又有啲緊張咁回應。

「其實喺你同啟光一齊之前，子安曾經搵我傾過一次偈... 唔知你有無聽過，Uncle後生嗰陣其實都係一個浪子，曾經有過好多唔同嘅女朋友喺身邊?」郭非凡問。

「都有聽過，話你自從失過一次戀後就變成咁，直至遇到Auntie Eva...」李思柔將之前從父親口中聽過嘅嘢講返出嚟。

「係呀，子安都知我嘅過去，但亦因為哩個原因，佢一直好擔心自己都會好似我咁花心，所以佢好驚如果同你一齊，有一日佢會傷害到你，佢唔想見到你唔開心同受傷嘅樣，亦唔想有日同你嘅關係會破裂...」郭非凡帶著點尷尬和內疚說。

「吓? 但係Uncle Kwok你之後都修心養性啦，咁唔係証明只要遇到啱嘅人，你同佢都可以一心一意?」李思柔唔明白。

「唉...本身我真係唔想同人講，不過為咗子安，我覺得我必需要同你講出事實...」郭非凡把心一橫講道。

完全係，我有早啲睇到個故嘅話，可能都唔同晒。仲係好希望可以追返佢

12.44

故事回到當日BBQ後郭子安搵郭非凡傾偈嘅時間。


「咁你可唔可以老實同我講，你同媽咪結咗緍後有無出去玩過?」郭子安問。

「哩個問題對你好重要?」郭非凡沒答而是反問。

「好重要!」郭子安堅定地答。

「其實你心入面唔係已經有答案?」郭非凡始終唔想答。

「但我想親口聽你講…」但郭子安無比佢逃避。

郭非凡望著郭子安，再三猶豫最後還是嘆了一口氣然後開始說：

「遇上你媽咪後再加上有咗你，曾經我都以為自己真係可以修心養性定落嚟，但或者玩慣咗嘅我原來已經唔再識得咩叫專一同穩定而始終需要新鮮感，道德枷鎖更加從來唔會困得住我…

嗰陣日日要幫手湊你，我覺得生活雖然開心但同時亦好單一同苦悶，加上你媽咪生完你同依婷後身型曾經好走樣，一齊耐咗我又開始覺得悶，所以安定咗幾年後，我都係忍唔住再出咗去搵其他女人滿足自己嘅需要…」

「媽咪一直都唔知?」因為早已經親眼見過，所以對此郭子安並唔覺得意外，但得到父親確認心裏還是有種失落。

「就我所知，佢應該係唔知嘅… 事實上我都好小心同埋真係好忍唔住先會出去玩，始終我同自己講過，一係就唔好出去玩，一出去玩就一定唔可以比你媽咪發現，所以每一次我好小心安排同打醒十二分精神，同時亦一直告誡自己唔可以沉迷，因為次數越多被發現嘅可能就一定越大…」郭非凡帶點自傲咁講，或者佢覺得為自己定立咗哩啲”rules”就說服到自己出去玩係無問題。

「… 咁我係咪應該讚你叻?」見郭非凡咁嘅樣郭子安忍唔住挖苦佢父親。

「對我好失望?」郭非凡望住郭子安沒有辯駁只係問。

「點都唔會係欣賞你做嘅事啦…」郭子安苦笑道。

「我知我係唔啱，所以我從來無諗過同你或者任何人講…」郭非凡收起了自滿嘆息了一聲然後講道。

「可以嘅我都唔想知，可惜嘅係你咁小心都偏偏要比我撞到，可悲嘅係我偏偏係你個仔…」郭子安心痛地說。

「點都好，過咗去嘅嘢再提都無意思喇，老豆依家年紀大亦已經無再出去玩好耐… 其實我知點解你今日會問我哩個問題，老豆比到你嘅意見係如果佢對你真係好重要，你就問下自己有無信心可以對佢一心一意，如果無，你又有無信心可以呃到佢一世? 如果都無，咁你就好好考慮下自己應該點做啦…」郭非凡知郭子安為李思柔嘅事而心煩於是講道。

----------

「同子安傾完哩次偈一段時間後，我就聽依婷講你同啟光終於喺埋咗一齊，咁我亦知道咗子安最後嘅選擇係咩…」郭非凡有點歉疚講道。

「所以子安其實一直都鍾意我? 佢專登唔接受我係因為佢驚有日自己會出軌然後傷害我?」李思柔聽完後震驚地說。

「我相信係，佢一直都十足十我後生嗰陣咁，所以當佢知道咗我就算有咗佢媽咪結咗婚後都係控制唔到自己有出去玩，佢就覺得自己都會好似我一樣... 唉，都係我累咗佢…」郭非凡自責地說。

(原來當日佢辭職，同我講要放棄自己夢想，都係因為想我死心將我推向啟光度…) 李思柔恍然大悟。

「依家我相信你同啟光結婚都已成定局，所以我諗子安會失去記憶其實都未必係一件壞事，對你對佢都好，但同時間我自私地唔想子安對你嘅心意哩一世都無人知…」郭非凡解釋自己今日講哩堆說話嘅用意。

「明白，多謝你話我聽… 無論點都好，我依家只係希望子安可以健健康康咁醒返…」


皇天不負有心人，經過半年嘅休眠，昏迷咗已經兩年有多嘅郭子安終於再次打開咗佢雙眼睛。

12.45

「子安，你醒嗱?」郭子安母親Eva見到愛子終於甦醒就即刻緊張問道。

但郭子安就只係望住佢地神情帶點呆滯出唔到聲。

「醫生，點解佢會咁嘅? 佢係咪啞左呀?」郭非凡夫婦即刻緊張咁問。

「詳情我地要幫佢做個詳細檢查先知，不過正如之前所講，format完個人佢就咩記憶都會無晒，包括埋之前學咗嘅語言，所以佢依家就好似一個新生嬰兒咁唔識講嘢。不過隨住佢個腦開始活躍返，之前部份被保護咗嘅記憶會慢慢restore，所以可能過一段時間佢會突然講得返嘢同有返部份以前嘅記憶都未定，哩一個星期會係關鍵期睇下佢仲可以保留返幾多之前嘅記憶。」醫生為郭子安做完簡單檢查後就講。


懷住感恩但同時又不安同焦慮嘅心情，三日後幸運地佢地終於再次聽到郭子安久違了嘅聲音。

「嗲哋媽咪，依婷?」

「子安你記得我地? 咁就太好喇!」郭氏三人知道郭子安記得自己都雀躍萬分。

「點會唔記得呀… 係之前幾日唔知點解好似突然唔記得咗點講野咁…咦，咁你地身邊哩位係?」郭子安向父母微笑住講。

郭子安嘅說話又令郭非凡佢地嘅笑容瞬間凝固。

「佢係思柔喎，你地由細玩到大㗎，你唔記得佢係邊個?」郭依婷答。

「思柔? 邊個嚟㗎? 點解我完全無印象?」郭子安完全諗唔起李思柔哩個名。

「子安… 你真係唔記得我係邊個?」聽到郭子安嘅說話李思柔帶點口窒咁問。

「唔好意思我真係無印象… 不過小姐你咁靚，或者我地可以重新認識過?」雖然唔記得，但郭子安好快就回復返佢浪子嘅性格開始flirt李思柔。

但李思柔就完全笑唔出，亦唔知可以有咩反應。

郭依婷見狀就試下喺手機比郭子安睇返佢同李思柔以前細個啲合照，但郭子安睇完都只能搖頭表示唔記得。

而經過醫生診斷同測試後，發覺郭子安除咗記得父母同個妹外，其他所有嘅人佢都一概唔認得，包括李立仁夫婦同張啟光。

「其實病人哩個情況我地一啲都唔意外，因為本身哩個治療方法暫時嚟講就有好大機會令佢喪失記憶。至於佢點解會記得自己嘅家人同語言，好大程度係可能因為哩啲記憶對佢太根深柢固同重要，所以重生後仲可以保護同修復成功。」醫生解釋。

而經過一段時間再努力嘗試，郭子安始終都係再記唔返起其他嘅嘢，不過由昏迷咗兩年加上好大機會半身癱瘓到到依家見佢醒返又行得走得食得，大家都勉強接受到哩個事實，覺得算係不幸中之大幸。


而哩個消息對某啲人嚟講，亦可能真係唔算係一個壞消息。

佢如果未變心有另一個，可能都仲有機會㗎

相信就未嘅，希望啦～暫時未有聯絡

呢幾日追哂成個故 好好睇呀樓主
但原來仲有外傳未完 要等live

我都等左n 日本先一次過追故
想同樓主講聲有人睇架，加油呀