<我嘅職業係專溝人地個女朋友>

3.6

我叫Connie，江麗儀。

由細到大，我都係偏屬於文靜瘦弱型嘅女仔，鍾意畫畫、音樂、睇書等靜態活動而甚少走出戶外接受陽光嘅毒害。

只係喺鍾意男仔方面，我就好似調返轉，會對果d外向，玩運動又充滿住陽光氣息嘅男仔特別容易有感覺。

所以當我脫離左女校喺大學識到Jacky後，好快就比佢嘅外型同陽光性格所吸引。

我覺得靚仔、大隻又陽光，成個許光漢咁嘅佢，真係好型好charm。

而當自己以啦啦隊嘅身份睇到佢係大學水運會入面嘅英姿，我更加係久久不能自拔。

不過好鍾意咁又點?

當我仲係心思思都未開始行動，就已經出身未捷身先死咁收到一個不幸嘅消息

-原來Jacky已經有女朋友，知情人仕仲話佢地嘅感情非常之好添。
個女仔都係泳手，又fit又靚，同Jacky簡直就係絕配。

原本我對自己都仲有少少自信，但睇完佢女朋友張相，我真係有種自慚形愧嘅感覺，亦知道自己完全唔會有機會。

因為問心如果自己係Jacky，我都一定會揀對方而唔係自己。

估唔到自己第一次鍾意人，就比Dear Jane 講中未開始已經結束…

不過諗落其實都好正常嘅，咁高質嘅男仔身邊點可能會無一個高質嘅女朋友?

於是我只可以收起自己嘅心思同妄想，默默咁單戀住對方。

之後嘅時間其實我都唔係無人追，只係佢地無一個可以好似Jacky咁令自己有心動嘅感覺。

然後不知不覺我就單戀左Jacky幾年，而自己一生只有一次嘅大學生活竟然就喺單戀中完結左。

我愛的人不是我的愛人。

見住Jacky不斷咁係社交媒體曬佢同女朋友有幾恩愛，等待著對方分手衣個似乎根本不可能會出現嘅機會，衣種感覺並不好受。

不過喺痛苦嘅同時，咁又令我更加欣賞Jacky嘅長情同專一，覺得對方真係一個好好嘅對象，亦因而更加為自己唔係佢身邊果個女朋友而感覺到失望同惋惜。

不過再鍾意都好，經過幾年嘅等待同痛苦，我嘅耐性同鬥志都開始慢慢被磨光殆盡。加上畢業後我地都無機會再可以好似之前咁成日見面，令我不得不開始生出真係要決心放棄嘅念頭 (因為雖然一直對外宣稱自己已經係放棄狀態，只係真實情況仲係做唔到下定唔到決心)，仲諗住逼自己試下接受其他嘅追求者，好等自己可以忘記Jacky。

點知係衣個時候，我突然收到一個消息。

「突發! Jacky同佢女朋友分左手!」

果刻嘅感覺就好似買左好多年六合彩突然有一次真係中左咁，呆左完全唔識比反應，直至過左段時間先終於識笑出黎。

苦等多年突如其來嘅喜訊令我歡喜若狂，但冷靜過後我又明白人地散左其實唔代表對方就睇得上自己。

可能第二日佢地就復合，可能下星期佢就同左另一個女仔一齊。

所以我知我要把握時間，因為我好驚miss左衣次機會，又唔知要等幾多年，甚至以後都唔會再有衣家嘅機會。

於是我亳不猶豫咁放低自己嘅矜持立即撲向對方，希望自己可以襯Jacky最軟弱嘅時候乘虛而入。

可惜雖然俗語話女追男隔重紗，但一切果然如我所擔心一樣。

儘管我不斷講話唔介意Jacky當我係水泡，只希望佢可以比一次機會自己，但Jacky對我始終無任何感覺亦無心情接受新嘅感情，所以一直只係不斷咁拒絕同推開我。

不過之前果幾年咁辛苦我都捱得過，衣少少嘅挫敗當然唔會令我就咁死心放棄啦。

或者Jacky敵唔過我嘅死纏難打，又或者慢慢地佢心態上都有d轉變想脫離苦海，過左段時間後我感受到佢強硬嘅態度開始軟化，開始越推越細力然後唔再抗拒比機會我同佢發展。

佢開始唔再hea覆我message，願意同我分享下佢嘅生活，間中仲會肯同我單獨出街食飯。

之後我從其他途徑知道左衣一切嘅轉變，應該係源自於佢個ex有左新男朋友。

雖然知道左對方嘅改變並唔係因為自己嘅努力感覺唔會太好受，不過咁又點?

只要有機會我就應該要好好珍惜同把握，何必要執著於個機會係點黎?

3.7

然後有一晚，我知佢去左同中學同學飲酒。

初初佢都有間中覆下我message，但後尾就完全無覆消失左。

因為擔心佢所以我打左個電話比佢，結果卻係佢個同學聽。

原來Jacky醉到不醒人仕，佢d同學都諗緊點抬佢返屋企。於是我主動承擔左衣個責任，飛的去左搵Jacky。

去到佢地見到我就笑笑口咁話交Jacky比我然後就一齊走晒。

(睇佢地嘅反應，唔知Jacky係咪曾經有同佢地提起過我呢? )我心入面默默咁諗。

望住咁醉嘅Jacky，我好心痛，因為我知佢飲到咁醉，係因為佢仲未忘記到佢個ex。我好希望自己可以幫到佢減輕佢嘅痛苦。

於是我做左一件好多人可能覺得係錯甚至好不齒我嘅行為但係我好慶幸自己有咁做嘅一件事，就係我將佢帶左返自己屋企，然後襯佢唔清醒可能只係得返生理上嘅本能時張自己嘅第一次比左佢。

果晩雖然好痛，但我知我衣一世都唔會忘記到果一晚….

到到第二朝佢一起身見到我果陣好驚訝，我約略解釋左琴晚點解會去左接佢後佢就係咁講對唔住。見佢一臉歉意好內疚咁嘅樣子我感受到佢仲係對我無感覺所以並唔開心，然後我再忍唔住攬實左佢話比佢聽自己有幾鍾意佢，完全無怪佢嘅意思。

點知意外地，感受到佢內心掙扎左一陣後佢突然攬實返我，然後喺我耳邊輕輕咁講左句”多謝”，之後就錫左落我個嘴度。

果刻起，我終於得到左佢”女朋友” 衣個名份。

有時我都會諗如果果晚唔係咁岩屋企人去左旅行，又或者最尾自己無咁主動，咁最後我仲會唔會感動到Jacky同我一齊。

始終果日佢終於肯同我一齊，除左可能真係因為比我感動到，我相信更多係因為佢覺得唔好意思內疚想補償。如果無左果層關係，最後我可能都真係只有徒勞無功。

不過衣個問題無人會知道答案而答案其實亦都唔再重要。

因為最重要嘅係已經發生左嘅事，就係我地真係一齊左。

同Jacky一齊後，我真係好開心。等左咁多年終於等到，我每日都覺得自己好似置身於夢境之中咁。

但夢境除左可以好美好外，同時間其實感覺都可以好唔真實。

因為同佢一齊我覺得真係好唔實在好無安全感。

我好驚有日佢會突然同我講佢都係唔鍾意自己，又或者都係忘記唔到個ex所以要離開我。

因此我好努力，我好希望自己可以成為Jacky 心目中100分嘅女朋友等佢唔會離開我。

我好努力去令自己變成Jacky喜歡嘅類型，好努力去配合佢嘅一切。

於是平時從來唔做運動嘅我開始會去跑步同學游水。

平時視陽光為毒物，多數喺室內地方生活嘅我會開始擁抱陽光去行山、踩單車甚至喺學識游水後去埋學滑水同潛水。

而因為咁，本身一身雪白肌膚嘅我因為長期暴曬變成左黑炭頭同多左好多雀斑，本身瘦弱嘅我亦變得健碩身上多左唔少肌肉嘅線條。

我彷彿好似完全變左另一個人咁。

好多人都話我由一個文質彬彬嘅氣質女神變成左一個野性嘅非洲黑炭女孩犧牲太大。

不過講真，衣d 其實我通通都唔點介意。

因為由鍾意Jacky果刻開始，我最介意嘅從來就只係咁可唔可以令佢嘅眼光可以喺自己身上停留耐一點。

而且我覺得衣家嘅我喺外表上好似同佢更襯更夾。望住衣家自己個樣，我覺得自己同佢個ex嘅差距因為咁反而好似拉近左唔少。

事實應該証明左我係無錯，我嘅付出係有我想要嘅回報。

因為好好好彩咁，我地無風無浪咁就一齊左三年。

當日整天徬徨不安嘅我慢慢都習慣左自己身份，無再咁易煩燥不安同擔心Jacky會突然同自己講分手。

只係事實又係咪真係咁呢?

雖然我講左好多好似好好嘅野，但我知我心入面有一個感覺其實仍然係未變過。

就係我覺得自己喺佢心目中，始終都係及唔上佢個ex…

3.8


「唔怪得你頭先問我果個問題啦...」聽完佢嘅故事後我回應道。雖然心入面我早知佢講嘅係事實。

「但你嘅答案話比我聽係我嘅問題...」Connie有d沮喪咁講。

「咁我又唔係咁嘅意思... 其實果句野所謂”唔夠好”唔係真係”你唔夠好”嘅意思，只係可能你唔係果個人啫。

可以係大家唔夠夾或者性格相處上嘅問題，又或者只係佢有d特殊喜好而你符合唔到，唔代表係你有問題或者唔好....」我解釋。

「特殊喜好? 你指… 變態野?」唔知Connie係咪諗起d咩，塊面突然有d紅。

「… 唔係呀。雖然都有可能但唔一定係果方面... 例如，我講例如咋，可能佢本身游水叻所以游水勁嘅女仔會特別吸引到佢，咁但係你游水唔叻所以吸引唔到佢，唔代表就係你有問題架嘛，只係人人鍾意嘅野唔同咁解。」我再解釋。

「哦...」Connie似明非明咁。

「所以我想講嘅只係，你未必係佢個Rachel， 但你唔係Rachel唔代表你唔好。」我再用直接例子解釋。

「所以我無野可以做只可以接受現實?」Connie諗左陣後又問。

「單憑咁少資訊我又唔認識佢，真係比唔到咩comment呀… 不過我覺得最重要係首先你唔可以成日質疑自己有問題，要比d信心自己係個好好嘅女仔。講真，你又靚女又fit，對男朋友又好乜都咁就佢，差極有個譜啦~」我嘗試開解Connie想比d自信佢。

「咁係因為你未見過佢個ex啫…」但睇得出Connie對Vivian真係有種自卑感。

「但衣家你先係佢女朋友喎… 我問你呀，如果只可以揀一樣，你會想做佢至愛嘅ex定係佢個正印女朋友甚至老婆先?」我拋出左個值得反思嘅問題。

「咁… 我會揀做正印， 因為我真係好鍾意佢好想同佢一齊!」Connie諗左好短時間後答。

「咁咪係囉~ 有時唔好咁執著自己係咪no. 1會舒服d開心d架。又或者唔好將感情當成係比賽一定要分第一二三，本身感情就係一樣複雜好多嘅野…」我講。

「理性上我都明呀… 但如果女人真係咁睇得開衣樣野，衣個世界應該就少好多人離婚或者分手啦…」Connie帶著唏噓地講。

「所以衣個就要睇你自己諗唔諗得通同埋夠唔夠愛佢喇… 如果真係好愛好想同佢一齊，咁為左可以同佢一齊你應該可以忍受到自己唔係第一名衣樣野。」我回應。

「但同一時間當你越愛佢嘅時候，亦會越想佢都越愛你視你為第一呢… 如果調返轉我唔係咁愛佢，我又未必會咁care…」Connie反駁道。

「咁人同感情，好多時本身就係矛盾架喇… 我地成日話愛對方，又有幾多個真係做到完全不求回報無私嘅愛? 當得到一我地又會想二，然後變得越黎越貪心。就好似一開始你都話唔介意佢當你係水泡，只要佢肯比機會你同你一齊就得，但衣家你嘅要求又升左想做no.1喇… 」

「你岩…係我自己唔知足越黎越貪心…」Connie比我講到有少少無言以對。

「或者簡單d唔好諗咁複雜，你問下自己覺得對方有無心想同你一齊囉，如果係有嘅，咁其實就已經足夠啦~」我嘗試換個角度。

「咁我估佢有嘅，至少佢對我並唔係差...」Connie諗左陣後答。

「咁就得啦~」

3.9

「只係… 衣家有時我會有種幻得幻失，好累嘅感覺...」Connie隔左陣後又講。

「累? 邊方面?」我問。

「我都唔知... 有時好似有d迷失唔知自己做緊咩，有時又好似無左以前果種有佢係身邊就好雀躍同開心嘅感覺...我地之間好似總係差左d野咁，一齊越耐就越覺衣樣野…」Connie帶點迷妄咁答。

「會唔會係一齊耐左開始淡，你無以前咁鍾意佢?」我問。

「我覺得唔係。 事實上我仲係覺得佢好charming，好吸引呀…」

「咁就可能係相處上有問題喇...」

「嗯... 我都唔知道呀...定抑或真係如你所講，係因為我自己對佢要求多左?」Connie問。

「你試下放低唔好諗咁多佢個ex嘅問題先，專心享受同佢一齊，咁可能即刻會鬆晒呢~」雖然我大概估到原因，但衣刻我唔想講住所以提議。

「嗯… 好啦，唔好再講衣個話題喇，太沉重..咁你呢? 有無女朋友呀? 」或者一時間太多資訊好混亂，Connie決定終止衣個話題。

「無呀，單身狗一名…」我苦笑道。

「竟然? 睇你個外表都唔差呀~ 係咪要求太高呀?」收拾左心情Connie笑住咁問。

「哈，或者啦… 有時要搵個同自己岩傾又夾嘅人真係好難架…」

「都係嘅… 係呢，咁你仲有無睇開咩連登故呀?」Connie決定再轉話題。

「梗係有啦~」

之後我就同Connie成晚就係度傾大家睇過嘅連登故同埋其他小說作品，傾得不易樂乎。


到傾到時間已經唔早要埋單，我就係褲袋拎左個銀包出黎。

「咦! 你鍾意D. D. Duck?」佢見到我銀包當眼位有個D.D. Duck貼紙後突然好興奮咁講。

「係呀，估唔到你會識佢喎~」我裝作有d意外。

「因為我都好鍾意佢架!」Connie帶住心心眼咁講。

「竟然!」然後到我一臉驚訝。

「信我，我明白你感受。」佢對我嘅驚訝表情並唔意外，然後望住我露出一個”我明”嘅眼神。

從佢嘅眼神，我知佢真係明。

因為衣隻鴨雖然可能好多人都見過，但要搵一個鍾意佢嘅人並唔容易，甚至係可以用稀有度SSR級黎形容。

所以當搵到同自己一樣鍾意佢嘅兄弟姊妹時，衣種難能可貴就好似他鄉遇故知咁令我地難免會有d興奮同激動。

種感覺就好似… 醜小鴨搵到另一隻醜小鴨咁，原來衣個世界都有人同我一樣架!

「其實我放佢係銀包，係希望可以透過咁搵到一個同我一樣鍾意佢嘅人... 估唔到今日終於搵到喇~」我一副感動到想喊咁嘅樣。

「真係架? 其實我曾經都同你做過相同嘅野喎!以前我會專登掛隻D.D. Duck公仔係我手袋，係同Jacky一齊後佢唔鍾意我先無再掛咋...」Connie有D尷尬但又感覺到佢有d開心咁講。

四目交投下，我地都有種惺惺相識嘅知已感覺，而同時間衣種感覺亦將我地之間因為初初認識為左自我保護而形成嘅果種陌生隔膜都溶化左。

衣晚我地交換左contact，我話佢有需要時隨時歡迎佢搵我做樹窿。


Jacky對Connie係點，由Jacky搵我果日我已經大概知道。
只不過佢地之間最大嘅問題，我估Connie本人到衣刻可能都仲未發覺，仲單純以為只係ex嘅問題。
而衣個切入點，係我又食住煙咁睇佢地拍拖果日我就已經見到。

我無直接講比佢聽實質問題係咩，係因為人嘅感覺係一種對比值。
只有親身感受過果種落差，佢先會更易明白問題嘅癥結所在，
亦因而知道自己近排點解會有種累同迷失嘅感覺。


衣個case其實令我諗起我同善柔以前一個未知結果嘅賭局。而話唔定透過今次，我地亦終於可以揭盅知道答案。

3.10

你有無曾經試過遇過一個同自己好岩傾，一傾如故嘅人?

你地d話題好似傾極都仲有，一講就停唔到口好自然咁就同對方一直傾落去。

果種投緣程度會令你地有種共鳴感，好似雖然唔係識左好耐但就總係好自然咁就擊中對方嘅味蕾咁。

R:「喂，近排承影出左新故喎，有無睇?」
C:「梗係有啦，今次個題材設定超特別呀，即刻live左!」
R:「我都係! 衣家成日心掛掛…」
C:「好彩佢永遠唔會拖稿啫… 但每日等果陣都好難捱呀!」


R:「岩岩睇完The Phantom of the Opera，好正呀!」
C:「係呀! 我幾年前睇過，真係好好睇好震憾! 本身難得佢地黎香港都想睇多次，但又無人肯陪我睇...」
R:「我都係自己一個去咋嘛，早知問下你啦~」
C:「!!! 下次一定要呀!」


R:「有無睇林日曦套新舞台劇?」
C:「有呀，好好笑~」
R:「係喎! 真係由頭笑到落尾呀我~ 但睇完又有d sad...」
C:「Yes... 不過我更sad係因為我隔黎果個睇到一半已經訓著左...」
R:「咁...至少佢無興趣都肯陪你睇呀~」
C:「係嘅...其實除左訓覺好似要佢坐定定超過半個鐘都好難，除非係睇d好緊張刺激嘅動作戲啦...」
R:「緊張激嘅動作戲... 即係AV?」
C:「喂呀!」

R:「喂! 旺角開左間用D.D Duck做主題 嘅餐廳呀!!!」
C:「我見到呀!超想去!!」
R:「叫你男朋友同你去啦~」
C:「試過啦...但你諗下佢連我掛隻公仔係袋都唔鍾意，點會肯陪我做衣d低B野呀...」
R:「其實…可能都未必可以怪佢嘅...因為都無人肯陪我去...」
C:「點解佢咁可愛會無人鍾意架!」
R:「係囉! 全部人都係盲架!好彩仲有你!」
C:「咦，不如...」

排斥異類，親近同類係人嘅天性。如果自己仲要係稀有品種，當遇見同類果陣就會覺得加倍親切同難能可貴。

結果咁岩衣間主題餐廳嘅出現，加快左我地第二次見面嘅速度。


「嘩，好大隻D.D. Duck呀~」作為主題餐廳，首先門口就當然有一隻巨鴨放左係度啦。

「你快d過去我幫你同佢影張相啦~」見佢一臉興奮好想衝過去攬住佢咁嘅樣我就笑住咁講。

「好呀!一陣幫你影返~」於是佢真係即刻衝過去攬住左隻鴨。

作為溝女能手，我幫女人影靚相嘅功架當然有返咁上下，影左兩張一近一遠佢都好滿意。而喺佢幫我影返張相後，我地就再自拍左幾張，大家都笑得好開心。

「個個餐都有個D.D. Duck樣架! 點算呀…我好想樣樣都叫晒佢然後再瘋狂影相打咭呀!」望住個餐牌Connie兩隻眼都變左心心眼。

「叫囉~ 食唔晒咪打包返屋企今晚繼續食! 機會難得呀~」我不懷好意咁鼓勵佢講。

「我都想...不過返到屋企實比人笑到面都黃呀...」Connie猶豫。

「Connie姐，鍾意一樣野就唔好介意人地嘅目光啦! 你衣家攪到鍾意D.D. Duck好似唔見得光變左犯罪咁… 就係因為你衣d人我地先要比人歧視呀!

你應該大大方方咁話比人聽，”我係鍾意D .D Duck呀，吹呀~ 你地唔識欣賞咋嘛，廢柴!”，咁先係fans應有嘅態度架嘛!」我裝作激動地講笑道。

「咁粗俗架你! 講就容易，你咁叻你試下呀~」

「好呀，驚你呀~ 你無聽過”只要你唔尷尬，尷尬嘅就係人地”?」

「係喇係喇，至叻係你，咁你快d叫晒佢比我影相啦~」

於是我就真係叫晒menu上有隻公仔樣嘅所有餐，比Connie影完相就再打包拎返屋企。當然以上嘅費用我會問Jacky拎返。

3.11

「係呢，岩岩見你影相都幾靚喎，有研究過?」一邊食野一邊睇住d相，Connie突然問。

「主要係Model靚啫~」我笑住講。

「喂呀~ 咁口花花架你!」Connie有少少面紅咁講。

「下? 我唔係覺得佢靚就唔會鍾意佢仲專登黎衣度啦~」我故然整蠱佢講。

「哦! 原來你係講...係嘅係嘅...」知自己會錯意Connie更加面紅同尷尬。

「不過個配角都難得好靚~」見佢紅都面晒我又講。。

「衰人!」佢終於知道我係有心玩佢。

「我係壞人唔係衰人呀~」

「你真係無改錯名! 壞到死呀...死Ryan!」

「係...我真係無改錯名架...」觸動到我內心深處一個位，我勉強保持笑容帶住自嘲咁講。

「喂，咁係咪即係有研究啫?」察覺到我好似有d唔妥，Connie好細心咁轉移返話題。

「有呀，以前都有買過書上過堂研究下咁。」我搖一搖頭回過神講。

「你好鍾意影相?」

「係呀，因為我好想將每樣或者每刻美好嘅事物留住...」

「原來係咁~ 我其實都有諗過去學影相，不過後尾驚影相會分薄左我畫畫嘅動力同時間就放棄左。」Connie有少少惋惜咁講。

「你鍾意畫畫?」

「係呀~原因其實同你都相似，我都想將美好嘅事物留住，但畫畫可以容許我加入自己嘅想像力同感情衣d元素，又或者可以直程將我腦海入面一d幻想出黎嘅畫面化為現實呈現出黎。」講起畫畫Connie成個人嘅感覺都唔同左，多左一種獨特吸引嘅神韻。

「我明呀，以前細個我都有嘗試學過畫畫，每次見到張白紙我都好興奮咁諗畫d咩好呢~不過好快我就發現我隻手根本support唔到我去畫我腦入面嘅畫面，知自己無天份所以就果斷放棄左。然後大個左受人啟發先開始研究影相用另一個方式去做衣件事。」

「咁有無作品可以睇下呀?」Connie好奇咁問。

「有嘅，不過因為主要影人，事關人地私隱就唔方便比你睇喇...」我諗起自己影過嘅相後就推搪說。

「你咁講一定係成日影女仔啦~」

「都係以前嘅事啦...咁你呢?有無畫可以睇下?」

「其實同Jacky一齊後我都少左好多畫畫喇... 所以電話無呀，有機會我搵返d舊相比你睇啦~」其實Connie都係一個幾細心體貼嘅女仔，察覺到我神色唔對路知我唔想講就唔會再問落去。

「一拍拖就淨係掛住陪人放低支筆唔畫~」我取笑佢。

「其實你都可以咁講… 為左陪佢去d戶外活動我都真係花左好多時間心力去學其他野，始終以前嘅我完完全全係一隻室內生物... 衣家雖然唔叻，但我都叫識游水，踩單車同行山架~」Connie有點自豪但又有d言不由衷咁講。

「係喎… 你上次都有講。以前嘅你同衣家嘅你可以一個人做晒黑白雙煞兩個角色~」

「喂呀… 你把口真係好衰呀!」

雖然Connie係笑住咁講，但我感受衣個笑容背後，隱藏住一種失落同累嘅感覺。

3.12

衣晚返到屋企，我開左電腦，打開一個叫”善柔”嘅folder，映入眼廉，全部都係善柔嘅相片。

初中有次，我地一家同鄺氏一家相約去左郊外遊玩順便喺下白泥睇日落。

果陣我拎住老豆新買部數碼相機好興奮咁左影右影。新奇加上唔駛顧慮菲林損耗，可以亂咁影相仲要即時睇到照片對當時嘅我黎講種感覺實在太爽，所以一整日我都無放低過部相機。

睇返果陣影嘅衣堆相片當然唔係點特別靚，甚至可以用”劣作”黎形容，但唯獨有幅係例外。

我記得果日落果陣咁岩有陣風吹過，善柔係日落下望住個海輕輕咁撥弄住佢被風吹起嘅髮尾。

“咔嗦”

果刻，我覺得衣個畫面好靚，下意式就按下快門將衣幕影低左。

之後善柔睇返d相見到衣張相就好鍾意好滿意，仲做左佢FB好多年嘅profile pic。

自此我就被要求成為左佢嘅御用攝影師，負青拍低佢每個重要畫面同漂亮時刻。

可惜果張相只係咁岩神來之筆….

喺之後一段好長嘅時間入面，佢都好唔滿意我影嘅相仲成日抱怨。

「仁仁，你可唔可以好好學下點影相呀，影到我隻腳咁短塊面又咁肥! 」
「你影相個人同個景嘅比例可唔可以掌握好少少呀! 個人佔左成個畫面7成咁我仲駛咩專登搵衣個景影相啫! 」
「知唔知咩叫7分面呀! 你再係咁第日你女朋友實怨死你呀! 唉…」
「真係比你果一張相呃左…」

敵唔過佢嘅”吟沈”，我之後終於扚起心肝買左本書同上網研究攝影技巧，慢慢佢就再無再投訴，仲成日捉我出去同佢影相。

係螢光幕望住一張又一張有佢漂亮笑容嘅相片，我視線不自覺間又開始矇糊。

柔柔，對唔住...

今日一次過五千字幫自己推下

雖然有少少錯別字，暫時都覺得幾好睇
感覺有少少又係抄金仔啲故

Btw,衣件事->依件事

多謝你講幾好睇比左d鼓勵我

我估你係講金仔個遺書故？ 衣個故都係經典。

其實我都無特別諗抄唔抄，但你咁講暫時都真係有d相似嘅開頭，希望之後發展可以比到另一個感覺你。


其實我一直以為不論 衣件／依件／呢件 其實都係口語所以並無話邊個係正字而都只係拎個音

多謝指正

不過今個故我為左維持一致性暫時應該唔轉住

如果有下個故先全部轉返用依個

3.13

兩個人見第一次可以係巧合、緣份或者試探，相約見第二次就代表雙方都認為大家真係有機會可以成為朋友。

所以經過埋衣次D.D. Duck聚會，我同Connie嘅關係又再熟左d，開始真係咩都會同大家講下。之後不論文藝片、古典音樂、音樂劇、舞台劇、或者散文小說，我同Connie都可以傾足一餐。

而為左繼續我嘅計劃，約佢第三次見面後我就帶佢去左工厦一間專比人畫畫嘅地方。

「嘩，咁神秘咁原來係帶我黎畫畫？」Connie有d驚喜。

「係呀，上次講完你都無比你d畫作我睇，所以咪決定索性帶你黎即直畫幅比我睇囉～」我笑住講。

「咁好大壓力喎...諗返我原來都差唔多三年無畫過畫喇，咩都生疏晒啦...」Connie有d自信不足。

「咁咪當今日重新pickup返囉～反正你生疏極都畫得好過我架啦，唔會有壓力架喎！」

「真係要？我真係放低左好耐喇...」Connie有d猶豫，我知佢好驚畫完真係見証住自己嘅畫技生疏退步。

「咁你問下自己仲鍾唔鍾意畫畫，想唔想畫畫？」我問。

「咁好啦...」好快Connie就屈服。

於是我地就入左去開始揀畫咩喇。


通常佢地都會比好多參考圖片我地自己揀，然後揀好佢地就會幫我地set好架步同工具可以照住幅圖開始畫。而對我衣d初學者佢地初初又會特別指導下我。

最後我揀左張Q版iron man，而Connie就揀左幅太空下嘅地球。好快，我地就各自投入自己嘅大作。

畫畫衣d手作野對我黎講其實都係攪笑下架啫，不過因為有圖跟又預先用鉛筆跟比例起晒稿，所以畫出黎都有正常小學生嘅水準，至少唔會變左抽象畫級數無人睇得明自己畫緊咩。

而Connie就完全唔同，我發覺佢初初望住張白紙諗左好耐，然後終於落左第一筆，跟住又諗左陣先落第二筆，慢慢先開始越落越快，完全專注沉醉喺自己嘅畫作之中...坦白講，衣刻嘅Connie真係幾靚，望住佢我都有少少比佢吸引到嘅觸動。

3.14

兩個鐘後我幅大作就已經完成，但見Connie仲好認真咁畫緊我就無打擾佢繼續點綴下自己幅畫。直至又過多兩個鐘...

「完成～」Connie望住自己幅作品心滿意足咁講。

「嘩，好靚喎！果然係畫家～」我衷心讚賞。

「好彩都唔算退步左好多～ 睇下你果...幅...都幾cute幾可愛呀～」佢擰側個頭望到我幅iron man後就怒力忍住笑講。

「所以你明點解我要放棄畫畫啦～」我完全面不紅咁講。

「其實畫得開心舒服咪得囉～畫就算畫得唔好，只要你係用心畫其實都可以傳遞到你嘅感情架。」

「勁喎! 比你講到好深奧咁成件事好似即刻升晒level呀~」

「衣個世界有時你講堆人地聽唔明嘅野人地就會覺得你好勁架喇~」Connie講笑道。

「咁你覺得我衣幅畫傳遞到咩感情呀?」

「嗯… 從你幅畫作，我感受到你仲有一顆小朋友嘅心~」Connie望住我幅畫一陣後又忍唔住笑住咁講。

「車~ 其實我知我水平有幾高，唔駛你氹同安慰~」

「咁最多下次我地去影相比你表演返次囉～」

「哈，你想我幫你影靚相咋嘛，唔會中你計～」

「梗係唔係啦，你可以影風景架！」

「講笑啫，model咁靚我都唔介意影～」

「又黎?今次我唔會中你計架喇...」Connie諗起上次比我整蠱左次。

「哈哈，講真架喎，你睇下？係咪真係好靚？」

我係手機比左張相佢睇，係我岩岩襯佢好聚精會神畫畫果陣偷偷地影。

「喂呀！做咩偷拍我呀！」佢下意識想搶我部手機。

「因為頭先見到你太靚一時忍唔住...」我就一邊避開一邊講。

衣句好似有少少flirt嘅意味，大家突然靜左落黎。

「罰你send返比我然後delete左佢！」不過Connie好快就回復返原本咁。

「考慮下～」

「衰人！」

「係壞人呀～」

「衰壞人！」

「不過呢...真心架，我覺得頭先畫畫果個你真係好charm好靚，我覺得衣個先係真正嘅你...」我突然轉返認真mode講。

「多謝你...我真係好耐無畫過畫，差d就忘記左拎住支筆望住畫紙嘅感覺喇... 初初跟Jacky去做運動，成日隻手都酸軟到筆都拎唔起，慢慢就算唔痛都無再拎起了…」Connie有少少唏噓咁講。

「畫返畫啦，你睇下你幅畫幾靚？唔好浪費自己嘅天賦，做返多d自己鍾意做嘅野~」我鼓勵道。

「嗯...」Connie若有所思咁答。

由衣日開始，我同Connie再見面都會帶佢去做返d佢真係有興趣嘅野。我地會去畫展，會聽音樂劇，話劇，文藝戲等等。

3.15

正如一開始所講，Connie本身就係一個好文靜，充滿文學氣息嘅一個女仔。只係因為Jacky佢先逼自己脫離果個世界走向戶外陽光。

而遇見我衣個曾經嘅同類，加上我故意嘅鋪排，佢就好似遇見一個老朋友咁，好快就將佢壓抑已久嘅毒癮全部爆發返晒出黎。

當然，衣個世界邊有咁多巧合。我本身並唔係文學人，只係從Jacky口中，我大概都知道Connie嘅喜惡，所以我可以預先做定功課去配口我嘅計劃。

我嘅計劃其實好簡單，只係想比佢感受一下同一個有共同話題同興趣嘅人相處以及同一個完全無共同興起嘅人相處嘅分別。

去到衣度，我估大家都應該估到Jacky同Connie嘅切入點係咩，就係佢地兩個嘅喜好同興趣根本就係南轅北轍，一個鍾意動，一個鍾意靜，完全無一點相同嘅地方。

雖然Connie好努力咁迎合Jacky，陪佢做佢想做嘅野，但咁係咪就代表無問題二人可以一生一世？

又 兩個人如果純粹只係單憑外表性格所吸引或者鍾意，咁衣d遷就又足唔足夠去長時間咁維繫一段感情?


隨住同我出去多左，亦喚醒越來越多Connie一d早已經遺忘左嘅感覺。而和我同埋和Jacky相處嘅反差，亦漸漸令Connie開始有左唔同嘅感覺同體會。

「我諗我知自己點解近排會有種心累嘅感覺喇...」有日我同Connie行完書局後去食飯果陣佢突然講。

「願聞其詳?」

「因為我發現原來衣幾年我一直扮演緊另一個人，唔係做緊真正嘅自己。」Connie平靜地講。

「因為你衣幾年為左令男朋友鍾意自己多d，一直好努力咁扮演緊對方鍾意嘅果類人?」

「... 你其實係咪一早睇得出?」Connie有d驚奇咁望住我。

「或多或少啦...」

「原來係我努力扮演嘅同時，慢慢我都混淆左再分唔清到底自己係咪真係想咁，又或者邊個先係真正嘅自己。

我之所以覺得累，係因為我一直扮緊另一個人，只係時間耐左令我都以為自己變左而再意識唔到衣個根本唔係自己。

而最慘係我覺得自己付出嘅努力其實並無令對方鍾意自己多左，無論點我地一齊嘅感覺好似都總係有一種唔協調。

與其話我努力係想大家關係更進一步，倒不如話我嘅努力似乎只係令大家可以繼續maintain到衣家嘅關係唔退步。

直至近排，我開始知道點解...」

3.16

「咁係點解？」見佢無再講落去我就問。

「你覺得呢，點為之”陪伴”？」佢諗左一陣後問。

「喺你身邊陪住你？」

「咁你覺得”陪伴”係咪真係只係喺你身邊陪住你就夠？」

「咁可能都可以分唔同程度嘅陪伴嘅。」我諗左陣後答。

「因為鍾意Jacky，我以前真係以為只要佢個人physically係我身邊陪我就得。但近排，我發覺原來咁係唔夠架…

真正嘅陪伴係應該要大家一齊共同用心去做一件事，如果唔係雙方其實都唔會開心或者享受，再從而增進大家嘅感情，加深大家嘅交流…

雖然我鍾意陪住佢喺佢身邊，但心入面我其實並唔鍾意行山，唔鍾意游水。而因為我唔享受，所以我地一齊做衣d野嘅時候其實並無真正嘅connection。

或者就係因為咁，所以我一直都代替唔到佢個ex，因為就算我地一齊做一件事，都完全無果種synchronization...」

「其實要不斷咁扮另一個人去討人歡心，係好辛苦嘅一件事... 而且扮代表住唔係真，而如果一樣野唔係真，對方點都會感受到分別… 所以你覺你地點都係有種唔協調，甚至幾努力可能都只係可以勉強maintain到大家嘅關係。

或者你要接受你地真係唔適合大家...」我好harsh咁講。

「但我真係好鍾意Jacky，我唔想分開呀...」

「咁你要問自己你同佢一齊係咪真係開心? 如果要咁樣一世你又係咪真係可以?」

「如果早一年問我，我會答你一定可以。但衣家，我都真係唔知...」Connie有d迷妄咁講。

「曾經有人同我講過一對情侶如果想長久一齊，係一定要有共同嘅興趣唔可以單靠外表或者其他吸引力去維繋。因為如果完全無共同興趣，代表兩個人唔可以一齊去享受一件事，咁兩個人就會少左好多一齊嘅樂趣同話題，然後感情會慢慢退色。

可能初初喺熱戀初期大家係完全無問題，因為果段時間人係最無理智同自我，真係同對方做咩都覺得開心。但當時間過去，熱情減卻，新鮮感消退呢?又係咪真係仲可以咁？

其實只要你地有一個共同嘅興趣，問題可能都已經可以解決... 只係就我聽你平時所講，你地好似真係一個都無...」我邊回憶邊講。

「嗯...我鍾意佢，所以我鍾意成日同佢一齊，會鍾意陪佢做佢想做嘅野，但原來咁唔代表係我鍾意做果樣野。而正如你所講當時間耐左，感覺慢慢都會唔同… 其實呢，我發現衣個問題都係多得你...」

「因為我地太夾?」我笑住問。

「哈哈，我確實否認唔到衣點... 其實好似果日果場musical咁呀，我知就算當果日係佢陪我睇，佢一定好快就已經倒頭大睡，完全唔知套劇講咩...咁其實同我自己一個睇，係咪真係好有分別?

相反，當時我同你就算本身係兩個完全唔識嘅陌生人，但我地因為大家都鍾意個故事而可以有好多話題，可以好自然咁傾到好多偈。我相信衣d其實先叫真正嘅陪伴。

然後我再諗返，或者平時我同佢去游水，去行山，雖然我個人係喺佢側邊陪緊佢，但佢嘅感覺可能同我睇musical時對佢嘅感覺都係一樣…

如果無比較都還好，但偏偏佢就一直有個同佢超夾嘅ex可以比較…」

「對唔住呀...我點醒左你令你咁煩惱添...」我抱歉說道，雖然衣個本身就係我一開始嘅計劃。

「咁又唔駛對唔住，我相信就算無你其實總有一日我都會發現，最多都係遲d咁解啫... 所以你話人其實到底應該搵個自己鍾意嘅人，定係合適同自己夾嘅人?」

「其實你自己心入面都已經有答案啦，唔係你唔會有咁嘅轉變。而且你有無諗過，其實兩樣野根本就無衝突? 搵個夾嘅人去鍾意咪得囉… 」

佢聽完我講後突然望實左我。

「我其實搵到… 但我唔可以咁做…」

我的職業是19工程師

其實我都係 咁岩嘅

btw 突然一下子多左3個負評 都係衝唔到雙位數

你無做錯到！我相信你！ 無所謂啦！人生有遺憾才是完整！ 而且世界都不需要這麼多人，死多幾個人無所謂，像考dse 讀不上大學、讀u沒有hon 、錢沒有錢買樓！
劉馬車都曾經講過，坐監前，人生是完美的；坐監後，人生是完整的。
失去了才明白，什麼是愛是恨、公義良知只是浮雲秋水。

負評唔表示咩，唔駛介意。
就算係，都係讀者嘅真實諗法冇得變。

你寫得幾好，又多又快，有嘗試盡力去刻畫人物。但變換視角有啲混亂。由於你一開始用第一稱「我」，但後面又有其他人用「我」作為對白。一時又winnie一時又jason．完全分唔到邊個講野，係主角？還是其他人物嘅對白？
呢方面變換視角要小心啲。

好多謝你意見呀
我都明唔好太介意
不過有時諗如果正評多d可能會吸引到多d人睇
但正如你所講 係讀者諗法 証明真係有野寫得唔好 都只可以繼續努力

至於轉換視覺，其實我都有諗過
所以通常係故事講到當時人同主角講自己故事果陣，再用我係XXX開頭去表示轉左角色視角
但可能都係唔夠清晰啦，同埋轉返主角視覺果陣確實好似無咩提示
以後會注意返講得清楚d

3.17

我記得喺中學時間，我地學校曾經出現過一對震驚全校嘅情侶。

之所以震驚，係因為完全無人會諗過衣兩個人可以走埋一齊。其實唔好話一齊，淨係將佢地兩個人名聯想埋一齊嘅機會其實都無咩。

佢地女嘅係我地當時深得老師寵愛嘅乖乖女學生長( head prefect)，男嘅卻係出名曳又成績差，甚至懷疑同黑社會有關係嘅一名問題男學生。

消息一傳出，老師們當然跌晒眼鏡仲不斷勸女學生長唔好，全校同學亦一片譁然覺得根本無可能。衣對情侶當時就好似戲入面d富家女意外愛上黑社會大佬嘅劇情，困難重重之餘亦完全唔被各界睇好...

只不過再一次令大家大跌眼鏡嘅係，出奇地一年後佢地竟然仍然喺一齊，感情仲好似完全無問題添。

然後大家睇睇下望慣左，又開始覺得佢地其實都幾襯。

女嘅又乖又叻又靚，男嘅就高大靚仔又man。

雖然男方確實係唔讀書又好曳成個黑社會大佬咁，但不得不講習慣左後再睇又覺得衣種反差配搭其實幾吸引幾好睇。

然後大家都漸漸接受左佢地衣pair情侶，仲好想睇下佢地可唔可以繼續一齊去到最後，打破衣個世界既有嘅固定框框，推翻世俗固有嘅傳統目光。

有日我同善柔返屋企果陣撞到衣pair應該已經考完會考嘅師兄師姐正手拖手好開心咁拍緊拖。

「估唔到佢地拍左成年拖都無散仲幾恩愛喎~」睇住佢地十指緊扣嘅兩隻手我就同善柔講。

「暫時係嘅，不過我敢肯定佢地總有一日會分手。」但出乎意料之外，善柔就好有自信好肯定咁潑佢地冷水講。

「點解咁講呀?」我好奇問。

「你覺得一對情侶可唔可以長長久久最緊要係咩?」善柔繼續望住遠處嘅佢地然後反問。

「互相鍾意大家?」我答。

「仲有呢?」

「夾?」我諗左陣後又答。

「Bingo~」

「你覺得佢地好唔夾?」我不解地問。

「”夾”衣個字太籠統喇。其實夾都可以分好多方面，例如性格，價值觀，興趣等等.。而憑我對佢地嘅認識，佢地根本就完全無共同嘅興趣，咁一段關係係唔會健康同長久…」善柔一副長者智慧老人咁嘅口吻。

「你真係咁肯定?」我表示懷疑。

「你唔信?」佢又反問返我。

「又唔係唔信嘅，始終本身由中學開始拍拖嘅情侶可以去到最後結婚嘅本身就係少之又少近乎奇蹟...」我道出事實。

3.18

「你試諗下佢地男嘅基本上完全唔讀書唔睇書，淨係鍾意打波打機同打交，其他就咩都唔理。女嘅呢就淨係鍾意睇書，彈琴同drama。咁你覺得佢地平時拍拖會做D咩係大家都鍾意?」善柔問。

「攬攬錫錫?」我好自然咁答。

「唔係講衣d呀!」善柔面紅紅咁一拳打落我度鬧我。

「講下笑啫...」我掩住自己被襲擊隻手然後好痛咁講。

「簡單講，佢地平時嘅活動一定係一方鍾意但另一方唔鍾意或者無興趣嘅活動。」善柔無再理我繼續講。

「咁咪互相遷就下大家就下大家囉，無問題格?」我問。

「唔好睇少共同興趣衣樣野呀... 你講嘅互相遷就，熱戀時間當然無問題啦，因為果段時間人係最無理智同自我，真係做咩都覺得開心。

但如果講緊係一生一世呢? 仲係咪真係可以？如果成世都做唔到自己要遷就一個人而活，咁會唔會又太辛苦？

兩個人一齊，共同經歷係好重要。而如果兩個人無共同興趣，咁其實代表佢地一齊果陣嘅話題同樂趣會越黎越少。咁當有日熱戀退卻，新鮮感減退嘅時候，到底係咪真仲可以單憑吸引力衣樣野去維繫衣段感情?

佢地男嘅靚仔女嘅靚女，一開始被對方嘅外表所吸引一d都唔奇。加上兩個反差太大，一齊就好似有種禁忌之戀咁好新奇同刺激。但當衣d感覺隨時間要消減而佢地本身性格同興趣又制造唔到一d新感覺或者感情嘅時候，咁就遲早會出現問題…

你睇我爹哋媽咪你都知啦，佢地幾多共同興趣~ 咁多年黎仲成日會一齊去行山釣魚睇舞台劇，又鍾意一齊發掘新地方試新野~ 我覺得衣樣野同佢地一直可以咁恩愛係好大關係架~」善柔一口氣講道。

「咁你講嘅都唔係無道理... 不過本身情侶分手就好正常， 點知係咪一定係你講嘅衣個原因?」雖然鄺生鄺太確實好恩愛但我都嘗試反駁。

「黎打個賭?」童心未泯嘅善柔雙眼轉左個圈後提議。

「哈，好呀，但就算佢地第日散左其實我地都唔會証明到邊個岩架喎…」我提出我嘅疑慮。

「如果到時真係散左又判別唔到說服唔到大家咁咪當打和囉~我覺得就算果刻唔知，總有一日我地會知嘅~ 」善柔又一副高深莫測咁嘅樣。

結果半年後真係比善柔講中，衣對曾經引起熱烈話題嘅情侶就宣稱因性格不合而分手，而好快各自亦都有新嘅另一半。

之後我同善柔都有再討論過到底關唔關善柔嘅推論嘅問題事。不過同佢地唔熟資訊又太少，加上佢地果屆學生都已經畢晒業甚少有機會見面，所以大家果刻都承認我地斷定唔到到底係善柔推論正確定抑或只係單純因為佢地之中有人變左心，最後個賭局亦只好不了了之。

3.19

回到現實

「你真係好犀利喎! 其實我知道Connie真係好鍾意我，但估唔到咁你都有辦法令佢變心...」Jacky心悅誠服咁比左我嘅酬勞我。

「其實我只係令佢發現左個佢一直都發現唔到，或者係唔想發現嘅問題啫。」我拎住疊錢淡然咁講。

「咩問題?」Jacky好奇。

「講之前我想問你一個問題先...」我無直接答。

「問啦。」Jacky無所謂咁講。

「如果你個ex無搵返你，你覺得你同Connie可唔可以一直繼續行落去?」

「以前我會答你唔知，但衣家我會好明確咁答你唔得。」Jacky諗左陣後答。

「點解?」

「因為同返Vivian一齊後我先明兩個人夾係幾咁重要。我唔係唔鍾意Connie，但同佢之間好似真係完全無火花咁…就好似兩個完全無bonding嘅人只係physically咁一齊，但佢地中間就完全無connection將兩個人連住。

無其他人出現可能都還好，但只要有一個同我夾d嘅人出現，我估就算Vivian無搵返我，我都照會因為第二個而去搵你幫手...」Jacky續解釋道。

「所以其實你地之間無真正嘅connection就係我令Connie發現嘅問題，我相信衣家嘅你都會明白，你地嘅性格同喜好真係差太遠喇，咁成件事好難長久…

希望你同Vivian今次真係可以開花結果，你以後都唔駛再要搵我啦…」

「多謝! 經過衣幾年之後，我地都成熟左好多。我有信心今次我地一定無問題!」Jacky對未來充滿信心咁講。



其實起初見到Connie同Jacky之間嘅問題，我都唔肯定自己衣個方法work唔work。

不過突然間我又諗起同善柔之間未有結果嘅賭約，或者衣個都係一個契機去為我地揭盅當日嘅答案。

於是今次我選擇左相信善柔。

結果証明左原來雖然人係異性相吸，但就都係會鍾情於自己嘅同類多d。

(柔，恭喜你，個賭約真係你贏左喇...)

至於我同Connie，今次我唔駛再send告別message比佢。因為雖然佢接受到自己同Jacky性格不合所以分手，但就接受唔到自己因為移情別戀而同對方分手。

所以果次佢最後主動提出要同我斷絕來往，唔係佢會覺得同Jacky分手係因為我而唔係單純嘅佢地兩個人唔夾，咁佢會覺得自己做錯對唔住Jacky。

當然，佢都有講如果將來有日大家都放低左衣件事後再真係咁有緣撞返大家，咁佢都唔排除到時嘅諗法可能會改變，但係衣刻佢好清楚知道自己接受唔到再同我繼續有往來。

岩嘅，緣份… 就睇下我扔左張sim card後，以後嘅我地仲有無緣份真係咁都撞得返啦。

不過就算真係有緣，到時嘅我其實又仲邊會係同你咁夾嘅我呢...

希望真正同你夾嘅果個人好快就會出現啦

至少個連登故好似都有幾十個人鍾意睇嘅~

4. Maggie與Louis

所謂食色性也，好色理論上係人嘅天性。

不過好多人對於男女之間性衣個話題都比較敏感，而討論和爭拗點亦可以有好多唔同嘅層面。

例如最簡單直接係婚前性行為嘅討論。

基本上反對嘅多數係因為宗教信仰問題，而支持嘅就覺得性就好似肚餓就會食野咁只係簡單地順從人嘅天性。

我唔太熟聖經，不過我知聖經十誡入面有一條叫”不可姦淫”。而未結婚攪野衣個行為喺佢地眼中係屬於”姦淫”嘅一種，所以信奉衣個宗教嘅人就視婚前性行為罪，係錯誤嘅行為。

不過說話係咁講，但環觀自己四周，犯誡嘅信徒好似遠比無犯嘅多。雖然佢地話人本身就有罪，只要死前誠心悔改，上帝最後都會原諒佢地。

當然，都有人唔係因為信仰而反對，而係覺得兩個人嘅結合係好神聖嘅一件事，所以喺未認定對方前係唔應該發生衣件事，至少唔應該濫交。

至於讚成嘅人基本上都係率性而為，覺得性係一件美好嘅事，亦可以大大增進兩個人之間嘅感情和距離。

相反如果喺性方面唔夾，反而有可能直接影響兩個人嘅關係，破壞大家嘅感情。如果結婚後大家先發現衣樣野唔夾有問題，咁就未必可以有美滿嘅婚姻甚至最終做成離婚收場。

我記得外國有個case係有對情侶堅持結婚後先可以有性行為，而喺佢地結婚後嘅洞房花燭夜，本應該滿心歡喜享受衣個神聖嘅夜晚，點知完事後個女仔下體卻出現異想嘅痛楚，痛不欲生。經檢查後發現原來個女仔對該男性嘅精子產生敏感反應，所以佢地除左必需要用安全套外，基本上亦無可能用正常方法去懷孕。

結果因為唔可以有正常性生活同有BB，所以二人最後都係離婚收場。

以上都係相對上有爭拗性嘅例子，然後再引申討論落去，又可以爭拗到底情侶以外嘅性行為，係岩定錯?

SP、FWB、ONS 衣d 詞彙好多人都耳熟能詳，然後再極端少少就係收錢嘅性工作者。

可能普遍人都覺得以上嘅行為係唔岩或者唔好，只不過好多人都有或者曾經做過咁解。性工作者更加係自古以黎最恆久不衰嘅職業。

不過講開性衣個話題，通常被攻擊嘅對象都係男人。

有人話男女之間其中一個最大嘅分別，
係女人必先有愛才可以有性，
而男人呢，就可以將衣兩野分得好開，無愛都照樣可以有性。

有人為男人解釋因為喺設計上男人係負責播種，所以基於天性，佢可以同時間向好多人播種，當中並唔需要感情。
而女人就唔同，因為同一時間佢只可以受孕一次，而且一旦受孕，個BB就會一直係佢身體入面直至出世，所以佢地只會希望同自己鍾意嘅人結合，為佢地誔下共同嘅下一代。

如果以此推論成立，咁簡單講，衣種分別歸根究底都係基因嘅問題。

好喇，廢up左咁耐，其實都唔係真係想同大家討論衣個話題，只係想為我下一個客人嘅故事做個引子。始終衣d野，本身就好難定義岩定錯。只要你唔係靠呃，唔係格硬黎，咁衣d都係果兩個人之間你情我願嘅事，其他人嘅批判並唔合適。

更何況其實我自己，都曾經有過一段荒唐嘅日子呢...