<我嘅職業係專溝人地個女朋友>

2.11

係中二三嘅時間，我記得有一次我跟善柔返屋企諗住一齊做完功課後就落街去玩陣，點知返到去就見到善柔當時仲係讀緊小學嘅阿妹善潼好嬲咁嘅樣坐左係梳化度一個人自己生悶氣。

「嘩，到底係邊個激嬲左我地嘅小公主咁大膽呀?」善柔見到善潼咁就即刻笑住口咁行去關心問道。

「家家...其實我係咪好醜樣呀?」家家係善潼對佢家姐善柔嘅專稱。

「傻妹，你點會咁諗架? 我個阿妹明明係全世界最靚最可愛架喎! 」聽到善潼嘅問題善柔即刻好著緊知道要處理。

「咁點解班上面個個同學都笑我嘅...」善潼扁晒嘴好委屈咁問。

「笑你?」

「佢地個個都笑我肥呀，仲話我似近排龍珠出果個魔人布歐! 我邊似啫，果個布歐成個波咁，我唔要似佢呀!」善潼開始吵嚷道。

「魔人布歐?」善柔無睇開漫畫所以唔知咩係魔人布歐，然後就擰過黎以詢問嘅目光望住我希望我可以比到相關嘅資訊佢。

昔逢我咁岩真係買左新一期龍珠放左係書包於是就拎左出黎比佢睇下布歐係咩樣仲係佢耳邊簡單咁作左個角色生平簡介。

「潼潼，你其實有無真正了解個肥布歐衣個角色?」善柔聽完我講諗左陣就問善潼。

「無呀，佢咁肥咁醜樣!」善潼半發脾氣咁講。

「阿妹，你知唔知一個人最唔要得，就係純粹單憑人地嘅外表去判別一個人? 我地做人唔可以咁膚淺淨係因為人地個外表就唔鍾意一個人架... 」善柔聽到善潼嘅說話就帶住怒氣有少少不悅咁講。

善潼感受到家姐有d嬲就無再出聲。

「而且喺我眼中布歐雖然肥但就一d都唔醜仲好可愛添~ 你唔覺咩? 不如我叫仁仁借套龍珠比你睇等你了解下肥布歐衣個角色先啦? 」意識到自己語氣有d重善潼好唔開心，善柔就轉返溫柔tone好有耐性咁同佢阿妹講。

「我唔制呀! 佢地咁講我都係想笑我肥咋嘛!」不過善潼見善柔無再嬲就繼續耍脾氣無立即屈服，然後善柔就擰過黎啤住我示意我幫口。

「唔好咁啦潼潼，一係立仁哥哥衣家即刻返去拎套漫畫黎同你一齊睇? 你睇完就會明白肥布歐衣個角色其實一d都唔討人厭，仲好得人鍾意添架~ 立仁哥哥自己都好鍾意肥布歐衣個角色!」唔想死嘅我當然立刻努力配合佢同善潼講。

「真係嘅? 咁你要陪住我一齊睇我先睇!」善潼聽完我咁講終於無咁嬲然後要求我陪佢一齊睇。因為成日見，潼潼其實都當左我係半個阿哥，好鍾意痴住我。

「好好好，公主叫到當然無問題啦~」而我亦當佢係半個妹咁疼錫。

於是我就即刻返屋企拎左幾本龍珠黎然後同佢地開始慢慢一齊睇，而一向只睇散文小說嘅善柔亦難得同我地一齊睇漫畫。

2.12

「潼潼，咁家姐衣家再問你，比你揀你會想做肥布歐，瘦布歐定係矮布歐?」睇完後善柔再問佢阿妹。

「肥布歐~」善潼完全無猶豫咁答。

「點解呀?」善柔笑住咁問。

「因為肥布歐好善良，而其他果幾個都係壞人~」善潼亦笑住咁答。

「所以你明唔明有時有d野我地唔可以淨係睇外表? 最緊要係我地要識發挖同欣賞人地嘅優點呀。

肥布歐雖然肥，但知道左佢原來咁善良同有愛心，衣家家家真心覺得佢更好更可愛添呀~ 反而其他布歐就算唔肥都好醜樣囉... 所以肥同似布歐其實真係唔代表d咩架~ 」善柔繼續向佢阿妹循循善誘。

「家家我明你咩意思… 不過你咁苖條平時只會比人讚唔會比人笑就梗係可以講得咁輕鬆啦!」只係善潼都唔係完全無事，始終無人會想自己肥然後比人笑。

「唔…咁肥嘟嘟都真係好可愛嘛~ 如果你唔信一係我叫立仁哥哥買個肥布歐公仔比我，然後我晚晚攬住佢訓覺比你睇呀~」善柔望住我奸笑住咁講。

「咁我呢? 你唔攬住我訓喇? 」善潼聽到後向佢家姐撒嬌咁講。

「攬，兩個我都一齊攬~」善柔摸住善潼個頭寵愛地說。

「咁就好! 不過其他同學笑我肥我真係唔開心呀...連張家釗都有份笑我! 家家你快d都教下佢地啦!」善潼就攬住佢家姐繼續撒嬌。

「傻妹呀...你要明白把口生喺人地度我地控制唔到架，而且咁都只係代表佢地膚淺啫~ 我個妹明明咁可愛咁善良，佢地唔識欣賞都實有好多其他人識欣賞嘅!

果個張家釗如果有份笑你又唔識欣賞我個妹，家姐先唔比你鍾意佢呀!」善柔細細力哼左善潼個頭一下咁講。

「但係... 我真係好鍾意佢喎...」善潼有d害羞咁講。

「潼潼你要記住，將來搵男朋友，一定要搵一個真心識發挖同欣賞你優點，甚至可以將你缺點都當成係優點嘅人，因為咁佢先會可以永遠都真心咁錫你同鍾意你，咁你地先可以長長久久，知唔知?

你睇下嗲哋媽咪，你唔發覺嗲哋成日都會喺我地面前讚媽咪架咩? 你唔想大個後同你個未來老公都好似佢地咁幸福?」善柔突然語重心長咁講。

「哦~ 咁家姐你呢?搵到未呀? 立仁哥哥係唔係?」童言無忌，善潼口沒遮攔咁講。

「未呀，但我相信一定會有個咁嘅人存在~ 至於佢? 有排都未合格啦~」善柔望一望我然後笑住咁答佢個妹。

「放心啦潼潼，我完全無興趣做你姐夫架，而且我係你家家個大哥黎架嘛，唔可以咁架~」見到善柔個死人招積樣，我都不甘心咁反擊講道。

善柔向我反了一個白眼，露出一副費事再理我嘅表情無再出聲，然後善潼本身嘅不快，就係善柔努力下隨住我地嘅笑聲隨風飄散，好快消失得無影無踪。

雖然我成日堅持善柔細過我，真係要計我應該先係阿哥，但無可否認，我知善柔係一個好好嘅家姐，佢嘅眼神深處亦總係閃爍著智慧嘅光茫。

所以到衣家我都好唔明白點解充滿睿智嘅佢，當日會落左一個咁蠢嘅決定…

(你明明自己咁講過，但點解最後個結局會係咁?)

我抹一抹臉上嘅眼水心入面默默問道。

2.13

自從果一日後，Winnie再無咁勤力做gym，但我地見面嘅時間卻並無少到，因為就算唔做gym，我地都會開始約出黎食下飯散下步。

而從衣d接觸，慢慢地我都越黎越了解到Winnie嘅另一面。

原來佢都真係有唔少叻同值得欣賞嘅地方，只係好似每樣野嘅背後都有佢一個專屬嘅悲傷故事…


有一次我同佢行緊去餐廳食飯果陣，有個鬼佬突然走過黎問我地路。坦白講，我英文唔算好好，但Winnie就可以一路同個鬼佬有問有答，連英文唔叻嘅我都聽得出Winnie嘅英文係好流利同埋有好純正嘅發音。

「嘩，原來你英文咁勁架?」我一臉崇拜同欣賞咁望住佢。

「邊係呀…溝通到啫…」Winnie有少少唔好意思咁講。

「唔係喎… 聽落去真係以為你係native speaker好勁呀! 如果你唔係之前去過外國生活就一定係細個落過好多苦功!」我繼續由衷讚賞。

「咁以前有段時間都真係苦練過英文嘅，日日都用好多時間背字典，睇報紙同聽新聞… 托賴日子有功衣家講同聽都算無咩問題。」Winnie邊回憶邊答道。

原來佢中學果陣有次因為班上面唔夠人出賽班際英文辯論比賽，而佢當時英文雖然唔算好好但都唔算差，所以班主任就搵左佢幫手湊人數順便希望可以透過咁幫到佢建立自信。

難得有人主動搵自己幫手比賽，Winnie覺得自己有種被需要嘅感覺因而喺果段時間好努力咁練習。最後比賽雖然輸左，但佢嘅表現同進步就獲得老師同隊友嘅稱讚同鼓勵。

果次可以話係佢人生第一次得到別人嘅稱讚同認同，為左下年可以繼續幫手參賽同得到別人嘅認同，自此佢就日日好努力咁練習英文，每日至少花兩個鐘喺練習英文身上，佢希望下年可以幫自己果班拎到冠軍。

不過到到下年因為換左老師，班上嘅同學又自己圍位喂夠左人，所以之後就無人再搵過佢參賽…

「唔緊要啦… 至少咁幫你練得一口流利嘅英文，對你將來做野有好大幫助架， 而且你講英文把聲真係好好聽~」聽落真係有d慘，我就嘗試安慰Winnie。

不過我講嘅其實都係事實，出黎做野後就會發覺好多行業讀書成績好其實都唔及英文好咁重要。如果英文夠好，工種選擇多好多得黎條路亦都會易行d，除非你選擇做professional真係需要獨有嘅專業知識。

「係嘅~」聽到我讚佢Winnie就由略帶傷感變成帶住微笑咁講。

而發現左Winnie講英文好悅耳之後無耐，我好快又有另一個機會再一次被佢嘅聲音所震憾。

2.14

食完飯我地就係街度散下步消化下再傾下偈，咁岩喺橋底見到街邊有人busking我地就一齊企左係度欣賞。

如今終於知道 你是我信心
能得知己一個 汗流未去問
來感激身邊你 在旁為我不斷打氣
盡我能 令你感動興奮

(竟然係衣首歌?) 我一聽到就諗。

當時佢地正唱緊古sir嘅”你是我信心”，無耐我就聽到Winnie不自覺咁跟住唱左幾句，然後我發覺佢竟然唱得仲好聽過表演緊果個。

「你…唱歌會唔會太好聽呀?」我充滿驚喜又帶點懷緬咁望住佢講。

「你又咁誇張!」佢見我望住佢佢先發覺自己原來一直唔覺意跟住表演者唱緊，然後又有d面紅唔好意思咁講。

「無誇張… 真係好好聽呀…」我衷心讚道。

「其實呢…我以前都有唱過choir架…」

原來中學有次音樂考試老師比佢地任意選擇表演項目，懶得諗嘅Winnie就選擇左表演唱歌，咁岩果陣有個Choir隊嘅同學聽到Winnie嘅歌聲覺得好好聽於是就邀請左佢入隊。

當時嘅Winnie本身對唱歌其實無咩特別興趣，但同辯論比賽果陣一樣，因為得到左人地嘅認同同埋感覺到自己好似有種被需要嘅感覺咁，加上又驚自己拒絕會令其他人更加唔鍾意自己，於是佢都應同學邀請加入左choir，之後仲下左唔少苦功去練習。

唔知係咪因為個肺會比較大，我發覺肥嘅人好似普遍唱歌都唔會差。好似欣宜呀，Error個肥仔呀，感覺肥人唱歌差極都有個譜，而Winnie嘅歌聲更確實可以用驚為天人黎影容。

「I see…不過你把聲真係絕對夠做歌手，至少一定好過好多現伇女歌手先…」我再一次讚嘆。

「把聲再好聽無樣都係無用啦…」Winne又自嘲咁講。

「咁又唔係個個都咁膚淺嘅~ 如果你第日一出道我一定做你第一個fans~」

「哈哈~ 多謝你呀... 歌手我就唔再做喇，最多你想嘅下次我地去唱K我比你點唱呀~」

「好呀~一言為定! 話時話，估唔到巨基d舊歌你都識喎?」古sir衣首歌，可能都真係20年前嘅作品喇。

「因為衣首歌其實係我送比Jason嘅第一首歌，當時我好感激佢比左咁多信心我…」勾起往事Winnie又有d受影響。

「突然間我覺得佢其實都幾幸福…」我有感而發。

之後大家好似都察覺到氣氛有d古怪就無再出聲，然後專心欣賞表演者嘅歌聲，直至首歌完左我地先回復工常又繼續邊行邊傾偈。

2.15

對我 你有說不出的信心
出於一片真 一種親切感
我 永遠也不想傷你心
天生雖欠些天份
我 仍然樂意 去為你爭

如今終於知道 你是我信心
能得知己一個 汗流未去問
來感激身邊你 在旁為我不斷打氣
盡我能 令你感動興奮

有你 我有耗不光的勇敢
湧起的決心 好想跟你分
你 教最美好開始發生
終點多遠跟多近
我仍懷著我 最大信心

如今終於知道 你是我信心
能得知己一個 汗流未去問
來感激身邊你 在旁為我不斷打氣
盡我能 令你感動興奮

願你知道 為你跨出足印


果晚告別完Winnie回家途中，我忍唔住上網搵返衣首歌黎聽… 聽聽下，古sir悅耳嘅聲音同善柔刺耳嘅聲音就好似喺我腦海慢慢重疊左一齊…

當年有日放學

「柔柔，唔好唔開心啦…」

「我無事…」

「咁都叫無事? 你睇你隻眼腫到? 除左整親或者比uncle auntie打我好似都未見過你咁… 有咩唔好屈係心，講出黎會舒服d架…」

「仁仁，我真係好唔甘心呀…」

「咁比賽係有輸有贏架啦，而且小說衣d仲要咁個人口味，拎唔到獎都唔代表你個故仔唔好架…」

事源係我地中三果年學校舉辦左個短篇小說徵文比賽，一向鍾意睇書嘅善柔就用左好多心力同時間寫左個短篇故仔報名參加，交完作品仲信心滿滿咁覺得自己可以拎獎。點知最後結果卻令佢失望，拎到冠軍果個係校長個姪女Kitty Kwan。佢知道左結果後就好失落，仲應該喊完一輪添。

「但輸就係輸… 明明我用左咁多心機寫，明明我覺得自己個故仔好過拎冠軍果個…」善柔唔甘心咁講。

「咁你覺得自己果個好d咪得囉~ 唔好咁介意人地點睇啦! 」我嘗試安慰佢。

「咁你有無睇過我個故仔?」佢反問。

「我…未呀…你知我不嬲唔睇小說淨係睇漫畫架咋嘛…」一句比人ko我心虛咁講。

善柔用失望嘅眼神望左我一陣，然後就無再理我自己急步行左返屋企。憑我認識佢咁多年，我知佢真係好唔開心。

衣次可以話係我人生唯一一次見過善柔咁失落。當然，咁可能其實只係因為一向近乎完美嘅佢人生本身就無咩機會去受失敗同挫折，一直係最頂尖果一群。

為左我嘅青梅竹馬，果晚我破天荒咁拎起左漫畫同課本以外嘅文字黎睇，仲要一睇就睇左兩篇…

「柔柔，我比d野你睇呀!」兩日後放學果陣我拎左個電話去搵善柔。

「咩呀…」雖然心情大致平伏，但睇得出善柔仲係有d失落未完全釋懷。

「果晚我睇完你同Kitty Kwan個故仔後，偷偷地將你地兩個故字post左上幾個網同棉登想睇下大家反應同評下理。你估最後結果係點?」我興奮咁同佢講。

「點呀?」果然善柔即刻好緊張咁問。

「網上評論一面倒話你寫果個好好多! 你睇下佢地d留言~」我將我個手機遞左去佢面前。

“好明顯故仔一比故仔二好好多啦，就咁睇d文筆同深度真係完全唔似中三嘅學生寫得出喎!”

“我真係睇唔出故仔二比故仔一有咩優勝之處喎… 學校d評判真係盲架?定係故仔二個作者有後台架?”

“估唔到衣家中學已經咁黑暗…做馬做得咁明顯? 原來中學就已經喺社會嘅縮影。“

“故仔一真係寫得好好呀，佢黎緊仲會唔會有新作? “

善柔一邊睇，臉上嘅表情就一邊重拾返笑容。

「咁無聊架你!」睇完大部份嘅留言佢就笑住咁扔返部手機比我講。

「係呀，我真係好無聊呀，前晚專登去搵兩個故仔黎睇… 除左學校測驗要溫書同埋漫畫我真係未試過咁拎起咁多字黎睇囉… 不過睇完我都好替輸果個人唔值，所以咪諗住扔上網等大家評論一下囉~ 事實上証明大部人嘅眼睛都係雪亮嘅~」我裝作辛苦同埋怨咁講。

「咁你覺得個故字寫成點? 邊部份最吸引到你?」善柔追問。

「故事入面男女主角嘅感情寫得好真摰呀，青梅竹馬長大~ 不過我覺得最後男主角為左女主角做左咁多野又一直默默支持佢，女主角應該都要有d表示報答返男主角囉~」我裝作委屈咁講。

「咁你覺得女主角應該要點報答男主角呀?」善柔笑住問。

「以身相許~ 就唔駛喇… 不過至少應該要請佢食返餐好嘅囉~」我笑住答。

「好呀，見你咁有心，衣家請你食buffet~」

「咁好死?」意想不到嘅回報令我我精神即刻為之一振。

「係呀，我地去k-buffet~」

「下…咁唔駛喇… 為朋友兩脅插刀係應該嘅，唔駛咁客氣…」聽完我即刻後悔想縮沙。

「唔好再講廢話，行啦~」善柔唔容我反抗就捉住我隻手拉住我行。

若果要講近乎完美嘅善柔有咩缺點或者不足之處，咁就絕對非佢唱歌果陣五音不全嘅聲線莫屬。

其實真係好奇怪，明明佢講野把聲無事，彈琴樂理又叻，但唔知點解一到到唱歌，佢就好似點唱都唔會有個音係岩咁，但偏偏佢就好鍾意唱歌，一去唱K就咪不離手…

所以隨住越黎越多人中過伏，之後就再無咩人肯同佢去唱K，而佢慢慢亦都遠離左衣個嗜好。聽善潼講，佢自中二後起就淨係自己沖涼嘅時候先會唱…

果晚，我好記得我掛住食果陣佢突然走黎我側邊搭住我膊頭，然後同我講

「衣首歌係今晚我特登想送比你，我嘅好弟弟~」

如今終於知道 你是我信心
能得知己一個 汗流未去問
來感激身邊你 在旁為我不斷打氣
盡我能 令你感動興奮

果次係我唯一一次發覺原來唱歌走晒音都可以好好聽，只要唱果個人真係用個心去唱比你聽…

當然，果次真係唯一一次。

2.16

之後每一次同Winnie相處，我都會發挖到佢唔同嘅優點再亳不吝嗇咁向佢表達我對佢嘅欣賞之情，而佢對我嘅態度亦同時間漸漸有左唔同程度嘅改變。

「Wooo~ 你今日咁襯衫好好睇喎! 好靚呀~」

例如之後同Winnie出街，我留意到佢會開始越黎越注重自己嘅裝扮同衣著，又開始會化下淡妝唔再好似一開始咁hea。而撇除本身真係肥，其實佢襯衫d顏色搭配都算幾好睇，有時仲可以令自己睇落無真實咁肥添。

然後佢又開始間中會有d小禮物送比我。

「嘩，無啦啦做咩送個手套比我呀? 唔平架喎...!」就好似有日佢突然送左個做gym嘅手套比我。

「無呀，上次見你個手套個有位摩蝕左，咪諗住送個新嘅比你囉，當係答謝你衣段時間嘅照顧同陪伴~」

「咁你都留意到? 其實我發現你都幾細心喎，真係一個好女仔~ 多謝!」唔單只留到到我個手套爛左少少，佢仲知道埋個size一戴上手就好貼手。

佢話因為由細個開始自己已經要努力做好緣葉衣個角色去令其他人開心，又想透過咁可以得到其他人嘅稱讚同認同，所以佢好努力咁去留意其他人嘅表情或者一d細微嘅行為同變化。

因為只有咁佢先會容搵到自己可以做d咩去取悅其他人去氹佢地開心令佢地滿意，同時間亦可以透過對方嘅反應同表情去判斷出自己究竟做得岩唔岩，對方到底鍾唔鍾意。

久而久之就陪養出佢細心同好識睇人眉頭眼額嘅能力。

每次讚佢，佢都好似總係比到一個解釋我點解佢會擁有衣d優點。但佢嘅種種經歷卻只係令我對佢嘅童年生活感到無盡唏噓。

或者每顆璀燦嘅礸石背後，其實都經過一個鮮為人知痛苦嘅打磨過程。

基本上佢所有嘅野好似都係為左取悅他人，希望得到其他人嘅認同而去做。就好似一個人係水中拼命咁抓水希望突然間會有人或者物件可以比佢捉實咁…

到底佢有無試過真係為自己而活過，去做一d自己真係鍾意做嘅野?

不過再諗深一曾，或者為他人而活衣個本身就已經係佢賴以生存嘅目標同動力啦…

而且唔知算唔算因禍得福，正正因為咁，亦真係令佢培育出好多唔同嘅獨有優點。

而我可以做嘅，就係話比佢知佢個人其實真係有好多優點值得人欣賞唔駛咁自卑。

係我努力下，Winnie都漸漸多返d自信，同埋開始越黎越鍾意同我嘅互動。

正如善柔所講，人嘅感覺係一種對比值而唔係絕對值。本身Winnie 感覺其實未必咁深，因為佢接受左自己係唔好，所以當人地話佢，留難佢，踩佢嘅時候佢都會逆來順受。

如果自己都覺得衣個係事實，佢又點會怪人話佢?

但當衣家我慢慢令佢有返自信，唔再覺得自己真係咁差嘅時候，咁以前果d帶有嫌棄同傷害性嘅說話，對佢黎講就會突然變得份外刺耳。

比起批評，人一定係鍾意聽別人嘅讚美同埋認同多好多。

而衣個就係衣家嘅我同Jason最大嘅分別。

當一邊每次都見到佢嘅優點然後予以讚賞，一邊就每次都只係著重佢嘅缺點然後嫌佢衣樣果樣，衣種強烈嘅對比令Winnie嘅感覺同心態都開始左改變。

以前對於Jason難聽嘅說話Winnie都係逆來順受，因為佢覺得事實真係咁。但衣家佢會開始覺得好un耳同反感，甚至質疑對方有咩資格係咁批評自己，因為佢開始覺得Jason衣家雖然係瘦左，但都不見得十分高質，原因係衣家有個比佢更高質嘅我係佢身邊。


然後，佢開始思考到底自己仲值唔值得為一個完全唔欣賞自己相反仲成日嫌棄自己嘅人去付出感情同努力。

隨住時間流逝，結果自然越黎越顯以易見。

預告明天另一個主角Jason終於會登場

2.17

其實如果真係鍾意一個人，對方點都一定係有d令你欣賞嘅特質，那怕可能只係覺得對方靚，都係一種對外表嘅欣賞。

所以調返轉講，如果有日你發現從對方身上已經再搵唔到一個你真心欣賞嘅地方，咁某程度上代表緊其實你已經唔再鍾意佢，最多就只係淨返低兩個人之間嘅感情而唔係鍾意。

咁亦解釋左點解有人 話如果對方只係因為外表而吸引到你，咁衣種鍾意好難會長久，因為再靚嘅外表都會有失去新鮮感同變老嘅一日，而更靚更吸引嘅外表亦隨時可以出現。

當有日你唔再欣賞對方嘅外表，又或者有另一個你更欣賞嘅外表出現，縱使二人之間仍然可以存在有感情，都好難令你地嘅關係繼續長時間維持到落去。

因為現實係當對方喺你眼中再無任何你欣賞嘅地方，咁你剩低見到嘅其實就只會得返對方一個又一個嘅缺點，然後就係兩個人之間相處嘅不滿同壓力。

結果條路大家一齊行得越黎越唔開心，最後將剩低僅餘嘅感情都磨光殆盡。

相反，內在嘅性格，思想，價值觀等等，係比較經得起時間考驗無咁易改變，亦唔係新鮮感可以取代，而最重要係衣d內在地方可以令兩個人之間產生到共鳴。

大家如果有讀過物理都知有樣野叫interference - 共震。兩個同步嘅頻率可以形成constructive interference 造成1+1大過2 嘅效果。相反，唔同步嘅就可以成為destructive interference然後互相扺消歸零。

如果你可以從對方身上搵到其他內在地方係值得你欣賞，然後以此為基礎發掘出對方更加多嘅優點同累積更多嘅感情同共震，咁衣種鍾意就容易可以繼續維持落去，甚至更進一步。

有人曾經講過一個比喻，
話人嘅感情就好似銀行嘅存款咁，
當你每發現對方一個你欣賞嘅地方，都係一種利息，
而你眼中對方每一個缺點，就係投資失利或者罰款。

所以如果有日當一方對另一方再無任何欣賞，咁衣筆存款總有一日會蝕到歸零。

2.18

故事返返去我識Winnie前嘅早幾日。


「你係傳說中嘅果位”壞人”?」

「無錯...有野需要搵我幫手?」

「係呀，我想搵你幫手溝我女朋友Winnie呀...」

「先講一講你地個故事同原因，我再考慮下?」

「好…」


我叫Jason，史積臣。
由小學開始，好食懶做嘅我一直都係果d典型嘅死肥仔身型。
運動又唔做，淨係識對住電腦同遊戲機，
有時連我自己都覺得自己嘅身體機能其實係幾遲純下。
不過對此我一向都唔太在意，淨係繼續活喺自己嘅舒適圈入面。
而自從小學有次我打左個笑我肥嘅男同學一鑊後，
亦無咩人敢再笑我，世界變得更加寧靜。

本來一直都相安無事，直至中四果年黎左個轉校女生仲咁岩坐係我隔黎位添。

「你好，我叫Bobo呀~」

「你好，我叫Jason…」

雖然係轉校生，但Bobo好健談，不時都會聊我傾偈，佢話我聽原來佢係因為原校成績太差好大壓力所以先轉過黎我地衣間比較唔出名嘅學校希望自己同父母都可以讀得舒服D。

對於我衣個A0嘅青頭肥仔黎講，當時嘅我其實從未試過同女仔熟，亦無女仔會主動同我講咁多野，加上Bobo其實好靚好有氣質，身材又唔差，所以好快我就感受到自己嘅初戀已經喺亳無先兆下靜悄悄咁黎臨。

或者愛情真係令人智商下降，果陣其實我都唔知自己點解突然咁勇敢咁有自信，見對方健談又好肯同自己傾偈，識左人一個星期我竟然就膽粗粗咁諗住寫封情信向Bobo表白。

果晚花左唔知幾多個鐘，重寫左唔知幾多次，為嘅可能就只係因為一個字寫得唔靚或者覺得句句子唔夠文雅，我先終於張我封”傑作”寫完。然後第二日放學，懷著緊張嘅心情我就襯佢走左後偷偷咁張封情信放左喺佢櫃桶然後就快步離開課室。

2.19

滿心期待又緊張第二日嘅來臨Bobo睇到封信後會有咩反應，點知一直就唔見佢嘅出現，直至早禱堂開始我先見到佢同班主任一齊行入課室。

「林志威，今日開始你同Bobo調一調位呀。」

我一臉愕然咁望住Bobo，但佢就再無望過我一眼。我好想衝過去問佢到底發生左咩事，但我唔敢。

不過好快我就知原因，因為無耐全班同學都知我寫左封情信比Bobo表白，然後我就成為左全班同學嘅取笑對象。

「Jason哥，聽聞你寫左封情信比Bobo喎，好浪漫呀~ 」
「不過你嚇到人地一睇完就即刻要搵Miss Lui話你騷擾佢要調位喎~」
「好心你照下鏡都知Bobo唔會接受你啦!」
「江華都有講你份人就係太有自信~ 」

男同學光明正大咁講。

「聽Bobo講個Jason好騎呢架…因為一齊坐Bobo又新轉校過黎無咩朋友逼住要繼續同佢傾偈。不過佢話收到果封肉麻變態情信後佢真係忍唔住要同Miss Lui講要求調位。Bobo真係好慘呀… 」

「本身個Jason平時都好毒咁架啦，估唔到咁變態又咁無自知之明，以後邊有女仔再敢同佢傾偈呀… 我地都要小心唔好接近佢呀…」

女同學私下咁講。

肉麻變態情信?
原來我用左咁多心機寫，自以為好sweet嘅情信，喺佢地眼中係變態肉麻?


結果衣件事後，我成為為班上嘅笑柄同地底泥，而Bobo卻反而因為衣件事不單只得到其他女同學嘅同情，仲好快同佢地熟絡左好多添。

衣件事之後令我成個人更加無自信，更加唔敢同女仔相處，甚至我根本唔敢望佢地，因為每次我都會覺得佢地嘅眼神係嘲笑同嫌棄緊我。

不過就算我唔係咁，我相信都無女朋會敢再同我玩。佢地唔對我避之則吉都已經偷笑了…

不過諗返轉頭，其實佢地不嬲都無點同我玩架啦…


好不容易捱過衣個黑暗嘅中學時期上到大學唔駛再對住果班同學，我先終於有機會擺脫過去重新過新生活。

不過事實係就算無左過去嘅枷鎖，都唔代表我真係可以擺脫到過去重新過生活，因為就算其他人唔知，但我自己知。

我都仲活係自己嘅陰影入面，唔敢同女性相處。

如果我撩女仔傾偈後又好似Bobo果陣咁，咁點算? 唔通我4年大學生涯又要重新返返去之前咁?

結果就算無左其他人嘅眼光，因為害怕重蹈覆轍我都唔敢開始行任何一步。

直至有日我無聊聽到個網台節目咁岩講緊溝女衣樣野，主持嘅分享可以話係比左一記當頭棒喝我，令我如夢初醒，亦對自己將來嘅路有左一個全新嘅方向。

2.20

D人成日話係香港溝女好難，
我話你聽，其實香港溝女一d都唔難。
D人覺得難，係因為佢地個個太大諗頭一開始就想溝女神。
大佬呀，你一黎就越級挑戰咁梗係難啦…

就好似你打機咁，
明明得果lv1仲係新手村任務都未開始做，
你一野就去挑戰big boss咁梗係比人秒殺啦。

喺遊戲世界一早已經幫玩家編排好晒﹐
一開始係要慢慢打d弱怪或者NPC 拎經驗值升lv，
到到你升夠lv再去打boss咪有機會贏囉~

溝女其實都一樣，
你乜女都未溝過連同女仔相處都唔識就直接去溝女神，
除非你有金手指好似當年陳冠希咁靚仔一開始就攻擊力max啦，
咁你去到乜都唔駛識淨係襟個attack制都可以秒殺boss一樣溝到女。

但如果你無佢咁嘅樣，咁就唔該你承認自己嘅無能，接受自己係廢柴，
腳踏實地，一步一步黎，
搵d低lv嘅NPC 拎下經驗值升lv先，唔好一開始就越級挑戰，
如果唔係你同自殺係無分別，被秒殺係好正常。

所謂豬扒都係肉，總知一開始唔好咁高要求係度嫌三嫌四，
有女你就去溝，慢慢練習升lv。
到到你有返咁上下經驗，先開始慢慢增加難度，
咁總有一日你會有機會夠lv溝到女神。

記住你有幾高要求都係無用，
如果溝唔到女，你就永遠都只係loser，係nothing。
如果再衰多幾次，你就連男人嘅信心同尊嚴都無埋，
變得越黎越無吸引力，
最後白白咁浪費自己寶貴嘅青春同光陰。

2.21

主持講嘅說話可以講係一下就擊中左我個心…
我咪正正就係果d明明level 0但去溝女神結果火速被秒，
然後就覺得溝女好難果個人?

機我當然有打，仲好沉迷果隻，
所以佢一講我就明當中理論嘅精髓。
而Bobo事件亦話左比我聽我唔係陳冠希無外掛，
所以我要接受垃圾嘅自己，由低做起。

不過要做衣件事最難嘅地方，
就真係要接受到自己係垃圾，
所以只可以向最低層嘅npc埋手。

我有掙扎同猶豫﹐
但當我眼見身邊個個朋友都搵到女朋友幸福快樂咁生活，
而自己就只有使用左手時先可以有短暫嘅幸福感，
我就知道我一定要跨過心入面衣個關口。
只要跨過佢，我就必定可以浴火重生，
向住美好嘅將來進發!

於是我開始物色目標，然後我就發現左Winnie。

好特別，Winnie龐大嘅身型令你永遠都好易就locate到佢嘅位置，但每次你個腦又偏偏會下意識咁將自己嘅視線避開或者bypass左佢。

而當我開始留意佢後，我發現到佢基本上都無乜同男仔傾偈，
但每次當佢望到其他情侶一齊果陣又會露出一種渴望同羨慕嘅眼神。
由此，我知道佢其實同我都係差唔多，
都係想去愛但無人愛果種。

然後，我知佢好適合我。

史積臣，係時候放低自己無謂嘅要求同底線喇，我同自己講。

觀察左Winnie兩日後，我已經完全跨過左自己嘅心理關口。而同時，估唔到機會咁快就出現。

有日我雖然已經遲到，但一入課室就見到佢自己一個坐左係度。 於是我就返轉頭專登去canteen買左兩杯咖啡，然後深呼吸左一啖氣，再慢慢走近左Winnie。

「你…你好呀，請問介唔介意我坐你側邊?」

主持人真係講得無錯，連對住Winnie咁款嘅女仔我竟然都會口窒窒，
我真係連lv 1都不如嘅新手廢物。
不過似乎Winnie都唔比我好好多，佢同我講野竟然都有d口吃，咁令我嘅感覺又好返d，仲不其然對佢多左種親切感添。

再傾落去原來咁岩平時同佢坐開果個friend果日掛住訓覺走堂，於是我就乘機同Winnie一齊坐左成日，傾左成日偈，慢慢我地都再無一開始咁緊張同拘謹。

或者Winnie其實都好渴望被愛啦，當我行出一步，Winnie都願意行出一步，好肯比機會大家發展。好快我地就日日都會message，然後單獨出去食飯約會。
再經過幾星期嘅相處同努力，好快我地就一齊脫離左A0，成為左唔少人眼中天造地設嘅一對。

支持支持

多謝你支持呀

其實我發覺好似每次我留一個言都會即刻多左個負評...

2.22

同Winnie相處期間，除左練膽外，其實同時我都嘗試左好多唔同嘅野，希望透過咁可以了解到底女仔嘅諗法同喜好。

因此不論追佢果陣又好，初初一齊果陣又好，我都真係好落力好比心機咁去氹佢令佢開心。

而且又好似打機咁，lv低嘅時候死其實跌嘅經驗同裝備都好少完全無壓力擔心自己會死。所以當時嘅我覺得就算最後真係攪”彎”失敗左溝唔到Winnie或者要分手，其實自己都無咩損失。

咁諗後自己可以話係完全無壓力，真係咩都任試唔嬲。

不過雖然咁講，隨住因為越黎越了解佢，我都知佢嘅童年其實同自己真係有d相似，都係咁慘咁無異性緣，都係曾經受過傷害。心入面對佢，亦真係有一種同道中人同憐憫嘅感覺。

同Winnie一齊一年幾後，我覺得自己真係升左唔少level。

基本上見到女仔我都唔會再驚，仲可以好自然咁同佢地溝通，甚至間中幽默下令佢地開懷大笑。

加上我衣年決心減肥，雖然唔係話好fit，但至少亦再唔係以前果個死肥仔樣，
衣d同時間亦令我嘅自信增加左好多。

對Winnie，佢一切嘅喜怒哀落可以話已經盡喺我嘅掌握之中。基本上我完全了解同知道自己做咩佢會開心同唔開心，做咩佢會嬲同氹得返佢。

不過之後我會開始疑問，對Winnie係咁，但其他女仔會唔會唔同? 衣家嘅經驗同方法係咪真係完全適用對唔同女仔都得呢?

然後我知我係時候要離開新手村，衣家嘅我，已經夠lv去挑戰更高嘅boss。

當心態唔同左，預備好接受新挑戰後，新目標亦自然好快會出現。而當有左新目標後你再睇返舊目標，感覺亦隨之然會唔同晒，因為實在太大比較。

然後Winnie嘅缺點就好似突然被放大左N倍咁，越睇越唔順眼。

我開始會嫌棄佢衣樣果樣，會開始覺得佢煩。說穿了，其實都係自己移情別戀已經唔想再浪費時間喺佢身上。

不過Winnie始終係我第一個女朋友，第一個女人。

衣年幾我地一齊成長，陪伴對方一齊經歷左好多唔同嘅第一次，真真正正咁成為左man and woman。

我亦好明白自己係對方嘅唯一，對方有幾依戀自己。所以我唔想自己嘅離開會令對方過份傷心同難過，我好驚佢之後會重新跌返落以前嘅谷底。

就係我掙扎緊要點做嘅時候，我聽講有一個叫”壞人”嘅人。而佢完全可以幫我解決衣個煩惱…

2.23

想聽客人嘅故事，除左因為八掛，其實我仲想衡量下對方合唔合乎資格同係咪真係需要我嘅協助。

聽完Jason嘅故事，我知佢乎合資格，因為佢夠衰。
由一開始佢已經只係諗住利用對方去做自己嘅練功爐鼎，
用完就會分手從來無諗過同對方會有將來。

當然睇返佢嘅經歷，其實我又唔可以完全話佢好過份。
只係佢可能都無諗過自己嘅主動原來對當時嘅Winnie黎講，
就好似漆黑中嘅螢火蟲，懸崖下嘅攀山索，
對Winnie嘅意義同影響係咁大。
而佢識搵我幫手，某程度上其實都代表緊佢唔算最絕情果隻，佢都仲會care Winne嘅感受。

你可能又會問，個Jason咁衰你都幫佢，咁咪即係縱容緊d負心男? 唔係掛?

係度容我澄清一下，我之所以會從事衣份職業，
重點其實從來都唔係為左幫個男人分手，
而係為左幫個女人等佢被分手時唔駛咁痛咁傷心。

當個男人越賤，我就越會覺得女方唔值得為左個賤男而傷心，甚至一時睇唔開做左d會令自己後悔終生嘅野。

所以我希望佢地可以有個舒服d嘅方法去完結衣段感情。

如果我發現男方係一個好人，分手係有佢不得已嘅苦衷，
咁調返轉我反而未必會幫佢同個女方分手。

講好似講得好偉大好好聽，不過我知以上都只係我明面上做衣個職業嘅一部份原因。

至於真正嘅原因，可能只係一種贖罪同思念吧…


「我可以幫你，不過你需要比我觀察一日你地拍拖嘅情況。」我聽完Jason個故仔後同佢講。

2.24

觀察客人拍拖一段時間係我每次應承接case嘅必要條件。

之所以提出衣個條件當然唔係因為我八掛無聊，而係因為我需要知道我嘅切入點係邊。

我要搵出佢地二人之間bonding嘅”隙”又或者個斷點係d咩。

要令一個女仔變心，並唔係一件容易嘅事。
如果你唔知切入點係邊，除非個女仔本身係濫情好易溝好易變心果種，
唔係嘅話任你點努力做幾多野，最後好可能都只會徒勞無功。

但如果你知道對方嘅弱點或者搔癢處係咩，再集中火力向果點埋手，
咁所有野就可以一擊即中，事半功倍，水到渠成。

正如我之前所講，搵得我幫手，佢地嘅關係或多或少都一定係有d問題出現左。

所以暫時，(開左touchwood app)，我確實仲未遇到一個我攪唔掂嘅客人。


雖然Jason講佢個故仔果陣我已經打左個底有心理準備，但到第一次見Winnie果陣，我仍然約略有少許震驚嘅感覺。

不過衣d慢慢望慣左，其實就唔覺有d咩。

當時佢地兩個好似正常情侶咁喺間coffee shop食野。

Winnie keep住會撩Jason 講野，但Jason就成日望住部電話，只係有意無意咁得閒應佢幾句。

我化身為路人甲企左係街邊， 望左佢地一陣後我就係衫袋嘅煙盒拎左支煙出黎放入口擔住，再係褲袋拎左個打火機出黎點著左支煙，然後匿埋眼深深咁吸左一啖。

「呼~」

當我感受到我個肺已經去到極限唔可以再脹大，而尼古丁亦已經通過血液到達左我個腦部嘅時候，我開始緩緩咁打開雙眼，再徐徐咁將肺入面已經換氣完畢被吸光精華嘅廢氣全數經我個口呼返出黎。


隔住層矇矓嘅白煙，我透過coffee shop個窗口望住佢地，然後我見到個切入點。

2.25


當時嘅我並唔認識同了解Winnie。
但從窗外，我已經知道佢同Jason之間唔協調可以比我乘虛而入嘅地方係d乜，就係源自於Winnie心底入面對一樣東西嘅渴求。

可能因為自少就被其他同學，特別係男同學取笑同排斥，
Winnie好渴望可以遇到一個完全唔介意同唔會嫌棄自己外表嘅人。
基本上做到衣點，無論你係咩人其實都已經可以話係成功左一半。
而亦因為同上原因，形成左Winnie超級無自信，極度自卑嘅性格，
總係覺得自己咩都唔好，成日覺得其他人個個都笑自己唔鍾意自己，
覺得自己係一個連平凡都遠稱唔上嘅肥胖女生。

正如之前所講，因為咁Winnie以往整個人生其實好似都係為左得到別人嘅認同同接納而活，佢想搵到一種自己被需要嘅感覺。

就好似沙漠中乾旱砂土對水嘅渴求一樣，當你一倒d水落去佢地就會瞬間被砂土所吸收。

如果Winnie可以遇到一個真心識欣賞自己，覺得自己係特別，與眾不同嘅人，咁佢基本上唔會抗拒到想同衣個人相處，因為同衣個人一齊佢會得到佢一直想要但嚴重缺乏嘅野，然後更加想繼續同對方相處。

而當你同一個人相處好開心，對方又比到自信心你，咁之後你亦好自然會向對方越靠越近，同時好容易喜歡上對方。

對Winnie黎講，正因為佢覺得你欣賞佢需要佢，所以佢亦需要你。

衣兩樣野，曾經Jason都比過Winnie。
佢無嫌棄Winnie，仲主動接近Winnie，同佢傾偈，約佢出街向佢示好。
咁令Winnie受寵若驚，拯救左佢寂寞已久的芳心。

而Jason為左學習溝女，亦無所不用其極對Winnie講左好多甜言蜜語，稱讚對方嘅說話。
無論衣d說話係咪真心都好，佢地都係Winne等待已久，一直渴望可以從其他人特別係男仔口中聽到嘅說話。
佢終於等到一個覺得自己好，會欣賞同稱讚自己嘅人。
所以佢好快就淪陷鍾意左對方，同對方過左可能係人生暫時最幸福最夢幻嘅一年多時間。

「衣套戲我想睇好耐架喇，多謝你陪我睇呀!」
「間餐廳好好味呀，good taste!」
「唔緊要架，想食就食啦唔駛忍架，你想食咩我都可以陪你食架!」
「跑唔旭追唔到巴士咪等下一架囉~ 反正可以陪多你一陣仲好~」
「我就係鍾意你份人有要求夠執著，唔求其，唔輕易妥協~」
「同你去廸士尼去幾多次都唔會厭~」
「為左可以見你，幾累都要見架啦! 見完咪即刻唔累囉~」
「你收線先啦，我唔捨得襟掣收線呀…」

以上每一句說話Winnie都覺得甜到入心入肺，對佢係一種好新好快樂嘅體驗。


可惜隨住時移勢逆，又或者Jason真係升左lv，眼角越黎越高開始有其他心思，佢開始慢慢停止給予Winne衣d Winnie視為至寶嘅野。
由唔知幾時開始，佢再無講過讚美佢嘅說話，
取而代之係無盡嘅詆毀嘅同嫌棄。

「下，套戲咁悶你都話好睇?」
「你咁做梗係比groupmate話啦…」
「唔好食衣間啦咁油，你嫌自己仲唔夠肥咩?」
「叫你平時做下運動啦，衣家追唔到架巴士又要等喇…」

然後佢亦好似唔再鍾意同自己一齊，會感到煩厭

「咩你咁多要求咁煩架?」
「又去廸士尼? 幾個月前唔係去過?」
「近排我好忙呀，不如衣幾日唔好見住啦...」
「累喇，收線唔傾喇…」

所有野好似都變得不再一樣。


其實Jason唔係唔識做，只係佢已經唔想再為Winnie去做咁解。

放下煙頭，我已經知我之後要點做。而從Jason口中，我知道Winnie因為佢近排開始左去做gym想減肥，亦因而有左我同佢係健身室相遇同之後發生嘅事。

2.26

「我決定左同Jason 分手喇…」就係我地相識大概兩個月後嘅一日，Winnie終於同我講。

「諗清楚喇?」意料中事我並唔意外。

「嗯… 既然我係佢心目中已經係一無是處，對我只有不滿同埋嫌棄，咁我都唔想再浪費時間落去。 我想搵個真係識欣賞我，真心想同我一齊嘅人…」Winnie講到最後好深情咁望住我。

「你識咁諗就好。記住呀，搵男朋友一定要搵一個識欣賞你優點同埋可以將你缺點都當成係優點嘅人。因為咁佢先會可以永遠都真心咁錫你鍾意你，你地先可以長長久久架~」我將當年聽過嘅一段說話講返比Winnie聽。

「嗯!」衣一刻Winnie嘅眼神係對將來充滿期待。

我當然知Winnie最後講嘅係我，而佢亦打算先同Jason分手處理好之前嘅關係回復單身後再同我繼續發展。

可惜，既然任務已經完成我當然唔會比衣個機會佢。


「Winnie，衣幾個月好開心可以認識你。你嘅真誠、善良、毅力、肯為對方付出嘅心意，全部都令我好感動。或者不自覺嘅靠近令我地慢慢越過左果條唔應該越嘅界線，然後產生左一d唔應該有嘅感情。

你同Jason分手，我係萬二分支持，因為從你口中，我知佢根本就唔錫你，唔識欣賞你嘅好，你值得搵一個真係鍾意你肯寵愛你嘅男仔。

可惜果個唔可以係我，因為我已經無咁嘅資格… 對唔住，其實我一直無話你聽自己已經有女朋友。所以當我發覺自己對你有左好感，我就唔可以繼續比自己咁落去…

如果令你唔開心，好對唔住… 但我想你知道，我對你講嘅全部都係真心話。外表並唔係一切，你要相信自己係一個好好好嘅女仔，所以我相信你將來一定會搵到一個更值得你去付出嘅男仔。

記住要學識相信自己，欣賞自己，咁其他人都一定會識欣賞你。」

過左兩日收到Jason嘅報酬同埋多謝後，我send左一個message比Winnie，然後就拎走左電話張sim card，靜靜咁離開左佢嘅世界。

每一次完結，我都會send一個告別嘅訊息比對方，因為我知如果我無聲無色咁消失，對方完全唔知咩事下反而可能會因為唔知原因而唔甘心然後有左心魔一直搵我放低唔到我。

但如果我同佢解釋返我有女朋友衣個殘酷嘅現實，雖然佢可能都會嬲我，但至少佢會更容易放低到我，唔會比我變成阻住佢前進佢嘅絆腳石。我寧願佢憎我都總好過繼續對我衣個虛構嘅人有幼想同感覺。

至於最後坦誠咁同Winnie講我對佢唔係無感覺，係因為我希望佢可以帶住自信咁繼續生活落去。佢唔係吸引唔到我，只係我已經心有所屬回應唔到佢。只要佢keep住有自信相信自己，我相信將來佢一定可以吸引到其他嘅人，一定搵到個真係識欣賞佢嘅人。

保重喇Winnie，就算你嬲我都好，希望你將來會遇到一個真心錫你欣賞你嘅人啦…

3. Connie與Jacky

分手，有時真係可以係突如其來。
而突如其來嘅分手，又往往可以對人造成最大嘅傷害。
因為你無諗過代表你唔會有心理準備，
而點解你無諗過係因為你察覺唔到大家之間原來有問題。
所以對方提出分手後我地最常問嘅第一句都係

「點解? 」

因為…

「我同你好似都係唔夾…」
「我覺得同你相處好辛苦…」
「我對你無左感覺...」
「我鍾意左第二個...」

聽落好似可以有好多唔同嘅原因，
但知道原因後又係咪代表我地個心可以舒服d好過d?
定抑或，聽完其實只係令我地更加傷心?

因為無論對方講嘅係咩原因都好，其實基本上都係講緊同一個原因比你聽

就係

“我已經唔愛你喇”

又或者係

“我愛佢多過愛你”

而當你知道左你愛嘅人已經唔愛你，
果種痛同傷心就好似喺你個心度突然撕開左忽肉出黎，
然後你發覺個心已經唔再完整。
就算之後好似好返無再咁痛，
你都會發現好似每一次分手後都會令你失去左部份愛人嘅能力，
同埋愛一個人時果種動心嘅感覺，
原來每一次對方唔愛你嘅時候，同時間亦會令你唔識又或者唔再去愛人。

所以與其問點解要分手，
倒不如一開始直接d問

點解你唔再愛我喇?

3.2

「壞人，可唔可以幫我令我女朋友Connie同我分手?」

「原因?」

「因為我個ex搵返我，我想同佢重新開始…」

我叫Jacky，徐植基。
中學嘅時候，因為大家都係學校游水隊嘅成員， 我遇上左我嘅初戀Vivian。
由我第一眼見到佢開始，我就被佢嘅外表同爽朗性格所吸引。
好彩佢亦完全唔抗拒我，好樂意同我傾偈互動，
好快我地就越走越近，經過幾次約會就雙雙墮入左愛河。

我地之所以可以發展得咁快，我相信除左係因為游水衣個共同興趣外，其他好多野我同佢其實都好夾。

例如我地都鍾意挑戰自己極限。

喺未一齊前，我有次講開話想玩三項鐵人，佢就即刻話佢都想參加左好耐，然後我地就一齊報左名參加。

之後我地成日約埋一齊練習，感情亦極速升溫。係大家雙雙完成左賽事後，我就襯機同佢表白然後我地正式成為左男女朋友。

喺拍拖期間，我地再一齊參加過唔少三項鐵人比賽。除此之外，我地仲參加過香港同台灣嘅環島遊，不時又會去玩下攀石，渡海泳，滑水潛水等活動。

事實上我地一樣都好鍾意戶外活動，所以拍親拖基本上都係出街享受陽光多於留係室內地方。就連一d少有嘅室內活動例如睇戲，我地都係一樣鍾意d動作片同埋王道動漫類嘅動畫。

因為大家所有興趣同性格都好相似，所以我地一齊都真係好開心好愉快，感覺永遠好有火花。

中學畢業後我地升讀左去唔同嘅大學，大家無得成日見之餘亦都有新嘅朋友同生活圈子。不過咁並無影響我地嘅感情，就算面對住種種嘅改變，難關同誘惑，我地都仲可以好開心好甜蜜咁一齊落去。

當時嘅我覺得自己真係好好彩，已經認定左Vivian係自己嘅終生伴侶，相信我地可以好自然咁走到去結婚果步﹐然後一生一世咁永遠一齊落去。

我真係無諗過一直都好好嘅我地到到我地出黎做野一段時間後嘅一日，佢會突然同我提出分手。

「點解?」當時我個腦完全運作唔到淨係識問衣兩個字。

「我覺得我地嘅關係好似去到一個樽頸位咁…」Vivian帶點哀傷咁講。

「咩樽頸位呀? 我唔覺呀…我淨係知我真係好鍾意你，好想衣世永遠都可以同你一齊…」我淨係識哀求道。

「對唔住呀Jacky…我唔係唔鍾意你，但我覺得我地嘅關係已經去到一個分水嶺，如果我衣家唔同你分手，咁我地就好自然會繼續一齊然後去到結婚果步…」Vivian解釋。

「咁唔好咩? 我心入面一早已經認定左我係你老婆架啦…」我唔明白Vivian嘅意思。

「但我唔係，我未認定到你就係我老公然後我地咁就一生一世… 我發覺我好似唔甘心就咁同你結婚，唔甘心成世淨係同過你一齊，我想探索下衣個世界更多未知嘅可能性呀… 你明唔明?」Vivian再繼續解釋。

「你… 同我一齊唔開心?」我問。

「唔係…只係我腦入面好似不斷有個聲音叫我唔好咁就同你一世，唔係第日我一定會後悔同留有遺憾… 或者係我未定性唔想就咁就定落黎掛…」Vivian擰側左塊面唔敢直視我講。

果刻我唔知可以點留住Vivian，因為我無可能將自己變成另一個人等佢可以試下同其他人一齊係點。於是任我點努力苦苦哀求，Vivian都係決定要離開我。

3.3

當時一直都當Vivian就係自己終身伴侶嘅我好傷心，覺得自己嘅靈魂霎時間好似被抽乾左咁。果刻個心真係好痛好似唔再完整，覺得自己已經唔再係自己，然後過左段行屍走肉嘅時間。

不過衣個時候，我嘅大學同學Connie卻突然同我表白。

佢同我講由初初識我果陣已經一直鍾意我，只係因為知我有女朋友所以一直唔敢做d咩。衣家知我地分左手，佢話好希望我可以比次機會佢。

不過當時嘅我根本就完全放唔低Vivian，而且文靜氣質型嘅Connie亦唔係我鍾意嘅類型，所以我諗都無諗就直接拒絕左佢。只係Connie並無就咁死心，仲直言唔介意我當佢係水泡，只係希望自己可以有個機會令我鍾意佢。

喺佢不斷嘅死纏難打下，我慢慢都比佢感動到，加上Vivian實在令我太痛，我開始都想擺脫衣種感覺。而當我知道左Vivian終於有左新男朋友後，我亦終於接受現實唔再堅持好快就接受左Connie，然後不知不覺間咁就一齊左3年。

衣3年，我同Connie唔可以話係唔開心。

事實上因為佢嘅努力，令我的確無再咁意志消沉，過多段時間就開始重新振作。

雖然間中我都難免會諗起Vivian，仍然覺得佢係自己最愛，但我亦知道Connie為左令我開心，遷就同犧牲左自己好多野，為我付出左好多。

加上不斷咁從Vivian個IG見到佢同個新歡有幾開心，所以我都半認命咁接受自己繼續同Connie一齊，亦慢慢習慣同投入左衣段關係。

不過就算係咁，唔知點解我心入面總係覺得我地之間差左d野，對佢我總係唔可以好似同Vivian咁完全投入。

衣3年雖然間中我都有幻想有日可以同Vivian復合，但接受左事實後其實我完全無諗過3年後嘅一日Vivian真係會突然搵返我。

「Jacky，衣幾年同過其他男仔一齊後，我先終於發現原來你一直都係對我最好同我最夾果個… 對唔住我知錯喇，你可唔可以比多次機會我，比多次機會大家?我應承你今次我唔會再走架喇…」

然後我發現就算自己同另一個女仔已經有三年嘅感情，但我根本完全壓抑唔到自己答應對方嘅衝動，因為下一秒我已經喊住咁攬住左Vivian，然後係咁up頭驚死自己遲左答應對方會立即反口咁。

冷靜過後，我都有諗到底衣三年只係自己從未忘記到，定根本由頭到尾自己都係一直等待緊衣一日嘅來臨?

如果係咁後者，咁衣三年黎Connie到底又算係d咩? 唔通自己心底裏真係一直都只當佢係水泡?

不過無論係點都好，我知自己立場都係好清晰會揀返同Vivian一齊，只係我唔知應該點同Connie開口。

衣個時候，我醒起之前聽過有個叫”壞人”嘅人可能會幫到手…

3.4

一星期後，係葵青劇院入面正預備上演一齣某中學舉辦的音樂劇，劇名叫 <只想和你愛一次>。

「小姐，你都有睇衣個連登故架?」一個男仔問一個女仔。

「係呀，出故果陣已經好鍾意，估唔到衣家會做埋音樂劇，所以我就算唔係讀衣間學校都即刻周圍撲飛黎睇囉~」女仔答。

「我都係呀!本身我其實買唔到飛架，係好彩有個朋友知我好鍾意衣個故仔而佢又咁岩知佢有另一個朋友突然有事黎唔到，於是幫我問佢朋友拎左張飛我先有得黎睇咋...」男仔有d興奮咁講。

「哈哈，講樣野你知，其實你朋友個朋友應該就係我男朋友...」女仔有少少落寞苦笑住咁講。

「竟然係咁!?」男仔一臉愕然咁望住佢。

「本身我好辛苦先搵到兩張飛諗住同佢一齊睇，不過早幾日佢突然話有緊要工作黎唔到，但就聽有個朋友講佢個朋友好想睇衣場musical，所以就問我可唔可以比張飛佢個friend個friend，即係應該係你喇…」女仔解釋。

「原來係咁! 唔好意思加多謝你呀… 雖然咁講有d衰，不過我真係要多謝你男朋友OT我先有得黎睇~」男仔恍然大悟，唔好意思得黎又帶住少少笑意咁講。

「哈，唔緊要啦… 諗落反正佢本身對衣d野都完全無興趣，係我逼佢佢先肯黎睇啫...與其咁浪費左張飛，倒不如好似衣家咁留返佢比真係有興趣想睇嘅人睇都唔錯呀...」女仔見到男仔咁開心咁想睇套音樂劇就釋懷說道。

「嗯嗯嗯! 個故寫得咁好唔好浪費左佢留返比真係鍾意佢嘅人嘛~」男仔不斷點頭表示認同。

「哈哈，你都幾老實不客氣架喎~」女仔笑住咁講。

「唔好意思係直左少少~」男仔亦伸一伸脷笑住講。


衣一男一女就係我同埋Connie。

而衣次巧遇亦當然唔係真係”巧遇”而係我同Jacky精心策劃嘅安排。

Connie其實一向都好鍾意睇唔同嘅書、小說、音樂劇等等嘅文藝野，但Jacky對衣d就完全無興趣。所以今次佢就順水推舟扮唔得閒然後為我同Connie制造一個互相認識嘅機會。

表演開始後我地都好專心咁欣賞無再講過一句野，直至散場。

(出自”因為我個仆街老豆 我被下了賓周會變短嘅詛咒”入面李乘風同周紫盈飾演嘅音樂劇)


「竟然係咁!?」男仔一臉愕然咁望住佢。

「本身我好辛苦先搵到兩張飛諗住同佢一齊睇，不過早幾日佢突然話有緊要工作黎唔到，但就聽有個朋友講佢個朋友好想睇衣場musical，所以就問我可唔可以比張飛佢個friend個friend，即係應該係你喇…」女仔解釋。

「原來係咁! 唔好意思加多謝你呀… 雖然咁講有d衰，不過我真係要多謝你男朋友OT我先有得黎睇~」男仔恍然大悟，唔好意思得黎又帶住少少笑意咁講。

「哈，唔緊要啦… 諗落反正佢本身對衣d野都完全無興趣，係我逼佢佢先肯黎睇啫...與其咁浪費左張飛，倒不如好似衣家咁留返佢比真係有興趣想睇嘅人睇都唔錯呀...」女仔見到男仔咁開心咁想睇套音樂劇就釋懷說道。

「嗯嗯嗯! 個故寫得咁好唔好浪費左佢留返比真係鍾意佢嘅人嘛~」男仔不斷點頭表示認同。

「哈哈，你都幾老實不客氣架喎~」女仔笑住咁講。

「唔好意思係直左少少~」男仔亦伸一伸脷笑住講。


衣一男一女就係我同埋Connie。

而衣次巧遇亦當然唔係真係”巧遇”而係我同Jacky精心策劃嘅安排。

Connie其實一向都好鍾意睇唔同嘅書、小說、音樂劇等等嘅文藝野，但Jacky對衣d就完全無興趣。所以今次佢就順水推舟扮唔得閒然後為我同Connie制造一個互相認識嘅機會。

表演開始後我地都好專心咁欣賞無再講過一句野，直至散場。

(出自”因為我個仆街老豆 我被下了賓周會變短嘅詛咒”入面李乘風同周紫盈飾演嘅音樂劇)

3.5

「你覺得呢，Elven同Ada分手後明明咁傷心，最後Rachel嘅出現係咪真係可以令佢完全放低左Ada?」散場後Connie突然問我。

「係咪真係完全放低晒Ada我唔敢講，但男主角之後咁多年都放唔低Rachel，最後仲因為佢而睇唔開自殺，咁我估都無需要懷疑佢對Rachel嘅感情已經遠遠超過左Ada啦。」我諗左一陣後答。

「所以就算對方未放低個ex，只要新果個夠好夠努力，總有一日應該都可以令對方放低前度?」Connie又問。

「你有無聽過”沒有忘不了的前任，只有不夠好的現任”?」我縮一縮膊講。

「無喎… 你覺得真係咁?」聽到我個答案Connie面色唔係太好。

「其實你問衣個問題可以傾得好深入，而且每一個人嘅答案都可以唔同。對有d人黎講可能係，但對某d人黎講又可能唔係…

不過如果你問我我會偏向覺得忘記唔到前度，只係因為你未遇到或者遇唔到可以令你忘記前度嘅果個人。」我一臉認真咁答。

「所以某程度上你係認同衣句說話啦…」Connie有d失落。

「係，我覺得只要有衣個人出現，前度係點都可以忘記到。Um… 或者唔好用”忘記”而係用”放低”衣兩個字會比較好。始終人好難真係去忘記一d野，只係對果個人仲有幾上心同執著咁解...

不過問題重點係，要點先可以搵到衣個人，又或者係咪真係可以遇到衣個人?

好似Elven咁，如果佢無遇到Rachel，可能佢真係一世都放低唔到Ada然後繼續傷心一世架喎。但因為遇到，所以佢最後放低左Ada，雖然最後咁都只係令佢走向另一個悲劇…

不過你又可以問，咁如果無遇到衣個Rachel，之後會唔會又有另一個Rachel出現呢? 其實無人知道答案架，可能有，又可能真係一世都無。但無發生嘅野又有邊個可以知?

再講，有d人又會因為ex根本唔比任何機會衣個人嘅出現，自己拒絕晒所有可能，所以我先話衣個問題可以用好多層次去講。而感情有時都真係要天時地、地利、人和三者配合有d事情先可以發生。

哎吔，唔好意思好似越講越複雜添… 做咩呀，你有煩惱?」我一口氣講左個長篇大論。

Connie:「嗯… 有d野可能一直都未諗通…」

「當答謝你咁辛苦撲到飛比我睇套音樂劇，我請你去食糖水你再講我聽?」見佢心事重重咁嘅樣我就提議道。

「好…」Connie稍為猶豫左陣後就講出左衣個字。

然後係衣餐糖水時間，我又聽左Connie自述嘅心路歷情。