<我嘅職業係專溝人地個女朋友>

8. ST與Ryan

衣晚善潼照樣買左外賣上黎我度食，然後我地又照舊一齊路食一路煲下劇，大家好似完全無事咁，但其實大家都知道唔係無事。

「你有無野想同我講呀?」食完飯後我終於問。

「有，但未講前你記唔記得我之前話有套戲好想同你一齊睇?」善潼稍為猶豫左陣後講。

「記得。」我記得果次同佢睇完戲果晚佢係有咁講過。

「可唔可以衣家一齊睇? 睇完我再講你聽?」

「好…」


善潼想我同佢一齊睇嘅衣套戲叫<你的婚禮>。故事內容其實算幾長幾豐富，所以容我用少少篇幅去描述一下衣套戲嘅故事內容。

故事係由周瀟齊（許光漢飾）與尤詠慈（章若楠飾）高中嘅第一次相遇開始講起。游泳隊嘅周瀟齊對轉校生尤詠慈可以講算係一見鍾意，然後喺周瀟齊嘅努努力下兩個人就慢慢越走越近。可惜衣段萌芽中嘅戀情仍未升夠溫令佢地成為戀人果陣，卻因為尤詠慈的酒鬼父親再度出現而令佢同母親被迫要再次搬家，於是喺打左個電話比周瀟齊後佢就從此消失左。

一向成績差嘅周瀟齊高中畢業後並無考上大學，但喺一次打工嘅時候卻從朋友嘅手機照片中發現左尤詠慈嘅身影。於是為左可以再見到佢，周瀟齊決定要同尤詠慈讀同一間大學，然後佢非常努力咁準備重考。經過一連串熱血溫書嘅場面，最後佢亦真係順利考到入衣間大學。 只係當二人第二次相遇喺大學校園時，周瀟齊卻無奈發現尤詠慈已經有左男朋友，完全無視自己。

不過就算係咁，周瀟齊仍舊不斷喺尤詠慈身邊打轉，喺佢生日為佢放煙花，陪佢參加啦啦隊等。然後喺某次偶然嘅機會下，周瀟齊發現尤詠慈嘅男友原來係個渣男，到處拈花惹草。為此，周瀟齊狠狠咁打左尤詠慈嘅男朋友一餐，亦因而令尤詠慈好嬲佢。結果兩人大學嘅第二次相遇就係咁不歡而散。

畢業後周瀟齊持續喺佢嘅游泳事業上努力，想喺全國大賽上拎冦軍，同時間佢身邊亦終於有左女朋友。不過之後周瀟齊又再第三次的遇見了尤詠慈，而今次佢已經唔想再好似前兩次咁錯過對方，於是佢同女朋友分左手，然後比左全國游泳大賽嘅門票對方，希望佢可以黎見証住自己嘅成功。

無奈當日因颱風天氣好差，周瀟齊因為擔心尤詠慈有意外最終沒比賽就從泳池衝左出去搵佢，然後喺大雨下搵到尤詠慈，仲為佢擋下被颱風吹落黎嘅招牌而受傷。不過因為咁，尤詠慈深受感動，今次兩個人亦終於可以係埋一齊。

經歷過咁多次嘅錯過，第三次相遇先可以正式一齊嘅二人非常恩愛，好快仲同居住埋一齊，穩定咁發展落去。當時，所有人都以為佢地會一直行落去順利結婚，圓滿咁走落去。

只係受傷後嘅周瀟齊雖然痊癒了，但卻無法再當游泳選手。運動員沒了原本的戰場同目標，要適應再重新開始搵工作並唔容易，不斷嘅碰壁亦令周瀟齊鬥志慢慢被磨滅，變得自卑越黎越睇唔起自己。而最可悲嘅係佢竟然喺尤詠慈父親嘅葬禮上同朋友講出擔心自己有日會”後悔”當日嘅決定仲要好不幸咁被尤詠慈聽到。

8.2

尤詠慈因為屋企問題從少就好無安全感，而”後悔”這兩個字亦正正擊中左佢嘅死穴。所以經過一輸掙扎後佢最終決定分手。

雖然周瀟齊好懊悔，好想挽回返尤詠慈，但尤詠慈仍然好堅定咁除低左佢手上嘅戒指。

「與其未來，在互相埋怨中讓愛慢慢消磨掉，不如現在就放開彼此。」

這段說話係尤詠慈唔敢再同周瀟齊一齊嘅原因。

之後二人再一次嘅相見已經係喺尤詠慈嘅婚禮上。原本周瀟齊堅決唔去對方嘅婚禮，但因為睇到一張藏喺二人對戒下嘅小紙條，佢改變左主意﹐覺得自己應該要去見尤詠慈，好好咁同衣段15年嘅感情告別。

「以前看過你所有樣子，開心的，難過的，今天就想看一看眼前的你，這個永遠都不再屬於我的樣子。」

這是周瀟齊見到尤詠慈穿婚紗嘅樣子後同佢講嘅第一句說話。

「我的青春裡，所有幸福都是你給的，我怎可能會後悔呢?」

這是周瀟齊同尤詠慈講失去佢後就明白自己根本無可能會後悔想同尤詠慈一齊。

「錯可以改，那錯過呢？」錯可以改，但錯過左可能就係一輩子嘅遺憾…


二人最後告別嘅對話當然係感動萬分，事實上衣套戲唔少對話都好觸動到我。

「人這一生會遇見很多人，但初戀只有一個。」

「曾經毫無保留地愛過，不管結局怎麼樣，這段感情都不算失敗吧。」

「以前總是很傻，一邊擔心未來，一邊浪費現在。」

「希望這份美好一直陪著她，即使在她的畫面裡，沒有我。」

「我不知道從未擁有過，和擁有後又失去了，哪一個更痛？」

「年少時以為，愛情是快樂就好；長大後才明白，愛情是不哭就好。」

「明明心中都在想著那個人，卻總是要找個藉口才能聯繫。」

「如果我早點長大，我們是不是就不會錯過了。」

「有些記憶不會抹去，就像有些人在心裡，從未遠離。」

「愛過你，就不遺憾了。」

「我試過等待，才不願意讓你等待，想遇見你早一點，想愛你早一點。」

「這輩子很短，希望開頭是你，過程是你，結尾也是你。」

「青春的遺憾，或許就是從『要是能一直這樣就好了』，再到以後的『遇見你是我這輩子最驕傲的事』。」

「或許換個時間，我們真的很合適。」

睇完套戲，我同善潼都不自覺咁有d眼濕濕。

好難想像一對咁愛大家嘅情侶，最後會因為一句說話就去到無可挽救嘅地步。如果當日男主角唔係受傷，佢地應該真係會一直都好幸福咁一齊落去。

想像到最後主角有幾後悔因一時迷失講出左果兩個字，然後就換黎餘生難以忘懷嘅痛苦...


「立仁哥哥呀，不如我講個秘密你聽好唔好?」過左陣，善潼嘆左口氣，然後就好似立定左決心咁講。

「好呀，我好樂意聽。」我答。

「其實呢，由細個開始，我就已經一直都好鍾意你架喇…」

8.3

「下?」我唔敢相信自己隻耳朵。

「無諗過呢?」見我個反應善潼笑住咁問。

「講笑可以搵第二樣喎，老人家唔嚇得架…」但我就唔太笑得出。

「我無講笑…我一直無表露或者暗示出黎，係因為我知道你唔會接受我。如其令大家產生隔膜破壞大家之間嘅關係，咁倒不如一直收埋係心入面保持現狀就好啦。」

「我…一直都當你係我阿妹…」我表明左自己立場。

「我知呀，但最主要原因唔係因為衣樣。」而或者一早都知，善潼好似並無難過咁。

「咁係咩?」

「因為我知你鍾意嘅係我家姐。」善潼淡然咁講。

空氣突然陷入詭異嘅寧靜。

「咁同你呃我有咩關係?」過左陣後我問。

「因為前排我知道左你嘅工作…」

「所以你扮有男朋友，扮佢要同你分手，然後等我追你?」突然間我好似了解到善潼背後嘅原因。

「係呀，因為就算唔係真，我都想享受下比你追比你錫嘅感覺，事實上我成功左呀~ 衣幾個月我真係好開心，甚至有d時候我都有個錯覺以為你真係鍾意左我，只要我say yes我地就會一齊，但同時間我亦知道只要我say yes，我地就會結束…」善潼直認不諱。

唔怪得當日我會睇唔到佢同Tony之間有咩切入點，原來係因為佢地本身根本就唔係情侶，等我仲以為善潼係鍾意Tony鍾意到不可救藥嘅地步…

至於點解咁長時間明明感受到善潼無拒絕比機會我，但就點都堅持話唔同男朋友分手，係因為佢想繼續留住我。如果我知道佢真係變左心同男朋友分手再接受我，佢驚咁我喺目的逹成左後好快就會離開佢…

謎底終被解開，但突然間我仲諗起一樣野。

「咁你突然成個人變晒，不斷咁模仿你家姐，都係因為我?」

「唔係…」善潼望實左我一陣，然後有d失望咁講。

「咁係因為咩原因?」我追問。

「你記唔記得細個果陣嘅我係點?」

「咁耐以前都真係唔太記得，不過你以前細個果陣好似係乖d靜d…」我邊回憶邊講。

「其實呢，衣家衣個先係真正嘅我，只係以前嘅我一直扮演緊另一個嘅我啫…」善潼帶住失望咁講。

「對唔住…」善潼嘅說話令我感到好驚訝，但我只可以講到衣三個字。

「既然已經去到衣個地步，咁不如等我講個故事你聽啦。」

8.4

---鄺善潼視角---

我叫鄺善潼。
由我出世開始，就一直有兩個人陪住我一齊長大。
佢地一個係我家姐鄺善柔，另一個就係住喺附近成日會上黎我地屋企玩，同家姐同年同月同日生嘅青梅竹馬李立仁，我一直都叫佢做立仁哥哥。

衣位立仁哥哥除左唔係同我地一齊住外，基本上佢同我嘅親生阿哥都真係無咩分別。

除左假期外，差唔多每日我都會見到佢出現喺我屋企，直至夜晚比較夜嘅時間佢媽咪先會黎接走佢。而到到假期呢，我地兩家人又不時會成日約埋一齊出去玩，所以一星期見足七日嘅情況都屢見不鮮。

不過如果講我地係三兄弟姊妹，雖然我就一定係最細，但對於邊個係最大，邊個係中間就一直都無明確答案。

家姐同立仁哥哥成日都話自己先係最大互不相讓，但真實答案到底係點就連我地嘅父母都無人知道，而衣個爭拗到到衣刻其實都仲未完結。

不過真實答案係點對我黎講其實從來都並唔重要，因為我只要知道我有一個好錫我嘅家姐同埋好錫我嘅阿哥就足夠喇。

年幼時天真單純嘅我地所有野都好簡單直接亦最開心。每一日都無憂無慮淨係食、訓同玩。但隨住我地年紀漸長，人嘅心思同關係都會變得越黎越複雜，就好似一個program因為學習同成長加左越黎越多code係入面，結果變得越黎越難明，越黎越多野要計算，越黎越多變數。

第一個令我從童年無憂嘅小朋友第一次發現壓力同唔開心，係源自於我有個好優秀嘅家姐。

「柔柔好叻喎，潼潼你都要加油好似姐姐咁乖咁叻呀，知唔知?」
「你學下你家姐啦，果陣佢都唔駛我地咁勞氣嘅!」
「你就係善柔個妹妹？」
「果然同家姐一樣，有其姐必有其妹喎～」

其實細細個開始，我就發覺自己同家姐好似，不論興趣同性格都十分類近，加上佢樣樣野都咁叻，我好自然就當左佢係role model咁乜都學佢跟住佢條路去行。

不過慢慢地，我發現我繼續咁跟落去，咁我永遠都只會係鄺善柔阿妹而唔係鄺善潼，我永遠都只會係活喺佢後面陰影下嘅影子。

我做得好，d人就會話我不愧為鄺善柔個妹。
我做得差，d人就會叫我學下我家姐。

好似無論我點做，都唔會有人直接話我係鄺善潼。

多謝巴打嘅創意同提議
聽落其實都真係可以將佢寫成懸疑故
之前留多d伏筆
之後就再慢慢揭盅

或者下個故可以試下衣個方向

喺呢度停?! 你冇野下嘛? 你玩我?

今日都出左4000字架喇...
不過如果可以多幾個正評，今晚可能可以衝多兩篇

正皮就比咗 比多4000字嚟

4000唔得喇...
趕工夜d出多2000字
慶祝同時過左60正評同有30負評

8.5

家姐實在太完美喇，要我超越佢並唔現實亦無可能。所以我諗如果我要擺脫衣個陰影同枷鎖，我就必需要做另一個人，於是我決定開始改變我嘅性格同喜好。

家姐喜歡嘅野我唔會喜歡，
家姐鍾意食嘅野我唔會鍾意食，
家姐有嘅興趣同嗜好唔會係我嘅興趣同嗜好，
如果家姐係溫文爾雅，咁我就係活潑好動，
如果家姐係琴棋書畫樣樣精通，咁我就去挑戰籃足排水樣樣玩下。

總知，我唔想再比機會其他人見到我就會諗起我家姐話我似佢。

我從未同人講過自己嘅真實諗法，但衣d改變無疑係好成功。

當我係水運會陸運會拎到獎果陣，無人會再話我係鄺善柔阿妹，因為佢甚少參加體育活動。

而當家姐喺校際音樂節拎獎果陣，亦無人會再叫我要學家姐咁叻，因為我從來唔玩音樂。

慢慢地，父母買衫買外賣買禮物果陣，唔會再係一式兩份一樣而會主動諗下我鍾意d咩。而我地房入面個書櫃有日亦終於一分為二，左邊係佢嘅文學散文小說集，右邊就係我一套又一套嘅漫畫同公仔書。

不過唔好誤會，雖然我有咁嘅轉變，但唔代表我同家姐嘅感情轉差。

家姐係完美的，所以佢都係一個好好嘅家姐，對我好好，好錫我好照顧我，同時間我心入面亦都好仰慕我家姐。

我咁嘅轉變，唔係對佢有任何不滿或憎恨，而只係單純想對自己身份嘅一種控訴同承認家姐嘅出類拔萃。

無論我變成點，家姐仍然教曉左我好多野，我唔開心時佢都會成日開解我。

有時表面上我可能都硬頸好似未必聽從佢嘅教誨，但心底入面其實佢每一個教導我都有暗地裏銘記於心。

不知不覺已經無人記得我以前到底係點，包括我自己。

8.6

第二個令我改變同成長嘅衝擊，其實係源自於一次小學嘅意外。

喺我小三四果陣，有次我同家家以及立仁哥哥喺屋企樓下一齊踩單車。

我地住果座大廈係喺一個大平台上面，而平台某個位就有條分岔路一邊係一條幾長幾斜嘅斜路落返地面，而另一邊就繼續行去平台上另一邊嘅大廈。

當時我地都已經差唔多踩完，我騎住架單車同家家以及另外一個玩開嘅小朋友喺臨近斜路開頭個邊休息緊，而立仁哥哥就係遠少少嘅平台位置同另一個屋邨朋友傾緊偈。

本身都無咩事，點知唔知係咪另一個小朋友貪玩又唔識危險，佢竟然突然喺我後邊好大力咁推左我一下。我一時無為意結果就咁比佢連人帶車咁推左落斜路。

當時年紀尚幼嘅我面對架單車俯衝落斜路嘅速度，我開頭真係嚇到呆左淨係識合理眼大叫然後咩都唔識做，只可以等睇下幾時自己衝到落地面然後轉唔到彎直撞埋去前面幅磚牆上面。

「潼潼，唔好驚，兩隻手襟brake呀!」

衣個時候我突然聽到一把熟識嘅聲音係平台上面大叫我襟brake，我先如夢初醒醒起係喎我係可以用brake剎車減速。

點知當我雙手一襟嘅時候卻發現其中一邊個brake好似有d問題剎唔到車。

雖然仲有另一邊嘅brake都叫勉強減到少少速，但架車都仲係好快，而發現個brake壞左後亦令我更加之驚。

「唔得呀，右邊個brake壞左剎唔到車呀! 救我呀仁哥哥，我好驚呀!」結果我又合返埋眼然後大叫。

「Bomb!」

就喺我好驚，合埋眼大叫完咩都睇唔到，腦袋一片空白果陣，突然間我感受到一股力量喺前面頂住左我架單車令我地突然進入左靜止嘅狀態。

感受到自己無再向下衝，我終於敢再次打開自己雙眼，然後就見到仁哥哥係我正前方以一個紥馬姿勢用兩隻手頂住左我兩個手柄位。

原來佢見到我衝緊落斜路又減唔到速心急下直接係平台上面跳落黎我前面頂住左我架單車幫我刹車。

回神過來知道自己脫離左危險我再忍唔住落車攬住左仁哥哥喊起上黎。

8.7

「仁哥哥好彩有你咋，我頭先真係好驚呀…」我邊喊邊講。

「潼潼無事喇，仁哥哥係度唔駛驚~」仁哥哥輕輕攬返住我再細細力咁拍我背脊安慰我。

「潼潼你有無事呀?」衣個時候家家都從後趕到，十分擔心咁問。

「無事喇…」我開始收返自己d眼淚脫離仁哥哥嘅懷抱然後同家姐講。

「無事就好喇，頭先真係嚇死我喇… 仁仁，好彩有你咋，不過你知唔知你頭先都好危險呀! 咁高跳落黎真係嚇死我… 萬一落地唔穩跌斷腳，又或者時間配合唔好你就可能比架單車撞倒或者砸死潼潼架喇!」見我無事家家就忍唔住話仁哥哥危險。

「我無諗咁多呀， 頭先淨係見到潼潼好驚好危險，然後潛意式就跳左落黎喇…」仁哥哥有d唔好意思咁答。

衣個時候我先識望一望上面對當時嘅我黎講好高個平台，然後醒悟到仁哥哥頭先為左救我原來真係好危險… 突然間，我發覺我個心好似有種唔尋常嘅律動。

「我都唔知應該多話你定多謝你好… 唔係你潼潼可能真係會出事，但你頭先又真係好危險!」家家對仁哥哥嘅舉動好似仍然有d難以釋懷。

「唔好再諗喇，最緊要衣家無事咪得囉~」但仁哥哥就越黎越輕描淡寫咁答。

家家好似仲想講d咩，但衣個時候推我落斜路個細路都知自己爭d闖左大禍就戰戰兢兢咁行過黎咁同我講對唔住。

因為個小朋友貪玩，我差d發生嚴重車禍，好彩仁哥哥救左我。

而喺衣件事發生後，我發現我之後對立仁哥哥嘅感覺開始唔同左。

喺佢身邊我總會有一種莫明嘅安全感，只要有佢係度我就會好安心，好似我一有咩危險佢都一定會及時出現拯救我咁咩都唔駛驚。而同時間我不時都會諗起佢，想見到佢同依賴佢…

突然間，我覺得自己本身係學校有好感嘅對象通通都變得不值一提。

其實當日立仁哥哥問我鍾意Tony d咩果陣，我答佢嘅答案正正係就係講緊立仁哥哥佢自己。

數已找 多謝各位支持

正皮 加速

8.8

雖然我，家姐同立仁哥哥都算三個一齊長大，但其實一直以黎我都覺得自己喺三個人當中係偏向一個外人。可能因為佢地同年同月同日生本身就有一個特別嘅bonding同connection，加上同年紀成日又返學放學都一齊，所以仁哥哥同家家嘅關係自然會比同我更加close。

同時間我亦好明白立仁哥哥一直都只係當我係半個阿妹，衣種感情同佢對家姐果種係唔同。當時細個嘅我唔識理解同表達，只係知道如果立仁哥哥將來要喺我同家姐兩個之間揀一個做老婆，咁佢一定會揀家姐。

隨住年紀漸大，我慢慢都終於意識到自己原來係鍾意左立仁哥哥。不過因為有以上嘅自知之明，我反而能夠調節好自己嘅心態同期望，唔會奢想有日佢會鍾意自己，而只要一直當我係佢半個親人就已經足夠。

其實一直我都諗家姐同立仁哥哥最後會一齊，成為真正嘅一家人，但點知去到佢地高中果陣，家家卻竟然同左另一個男仔一齊。

敵唔過心入面嘅好奇，我有日終於忍唔住問家家。

「家家，其實你之前有無諗過自己會同立仁哥哥一齊?」

「點解突然咁問?」家家有d愕然，或者佢仲一直當我只係小妹妹啦。

「無呀，我無諗過你會同另一個男仔一齊咋嘛。你同立仁哥哥感情咁好，我一直以為你地最後會結埋婚做真正嘅一家人添~」我扮作小朋友好奇咁問。

「哈哈，咁衣家其實佢同真正嘅家人都無分別呀~ 由我出世果日開始佢就已經成為左我人生嘅一部份，係爹哋媽咪同你以外對我最重要嘅人，而佢仲要係一個異性，所以坦白講對佢嘅感情都真係幾複雜架…

不過感情可以有好多種，雖然我唔否認我唔係完全無諗過，但喺我心目中佢對我黎講唔會係一個好好嘅男朋友，如果同佢一齊，我地實會有拗撓實會唔開心，最後反而破壞左大家嘅關係，我唔想咁… 你明唔明?」家家諗左陣後就同我講。

「明… 就好似有時我地好珍惜一樣野果陣，就算幾鍾意佢都好，我地反而唔敢掂佢驚整污漕佢或者整爛佢，結果只係遠遠觀賞就好。」我好快就答左佢。

「潼潼真係好聰明喎!」家家有d驚訝我竟然遘得出衣d說話。

其實我明，係因為我對立仁哥哥何嘗唔係有衣種感覺呢?

「咁點解你話覺得立仁哥哥唔係一個好嘅男朋友?」我再問。

「Um…因為佢比唔到種安全感我。」

「點解呀? 我覺得立仁哥哥好比到種安心嘅感覺我喎! 我有咩事佢實會即刻衝出黎保護我!」我唔認同家家所講嘅野立刻為立仁哥哥辯護。

家家聽到我咁講有d驚奇，而我亦意識到自己有d失態。

「咁我相信我有危險佢都會即刻出黎保護我~ 但咁又唔代表就一定係男女朋友之間果種安全感，而衣d都好個人嘅~

譬如有d人可能係需要對方緊張自己咩都以自己為先，有d 人係需要一個隨傳隨到唔可以失踪嘅人，有d人係鍾意自己可以好似小妹妹咁比對方錫同保護… 所以真係唔同人夾唔同人，無一個特定嘅答案。」不過隔左陣佢又笑笑口咁講。

「哦…」

當時因為察覺到家家嘅笑容似乎有d奸，所以我唔敢再問落去驚佢會發現我鍾意立仁哥哥衣個驚天大秘密。

不過喺一段長時間之後，我最後都終於知道左背後嘅原因。

----------------


講到衣度善潼突然停左無再講落去。


其實聽到衣度，佢已經比左好多震憾嘅訊息我。

原來一直以黎善潼同善柔咁南轅北轍嘅性格同喜好，係佢專登扮出黎。

原來早喺細細個果陣，佢就已經開始鍾意左我。

原來我真係衰喺”安全感”衣三個字上面。

8.9

「係咪好想問我到底係咩原因呢?」善潼又回復佢一貫調皮性格笑笑口問我。

「咁實係有d好奇嘅…」我就扮作淡定。

「其實某程度上，可能你都算有少少唔好彩，不過衣part事關家家私隱我就暫時唔講住喇…」

「嗯… 我都想聽埋你之後嘅故仔先…」雖然心入面我確實係好想知道答案，不過我都知我衣刻唔應該對此過份著緊造成善潼不快。

果然善潼滿意地笑左一笑然後就繼續講落去。

----------------

自從家姐同佢個男朋友一齊左後，慢慢我就感受到立仁哥哥同家家關係上嘅微妙變化，衣種變化係變差果種。

我發覺佢地兩個人相處之間好似慢慢多左層隔膜同避忌，無以前咁放鬆同隨心，總係好似有d顧慮要就住就住咁，然後立仁哥哥喺我地屋企出現嘅時間都好似越黎越少。

我感受到立仁哥哥心入面係唔開心，而從佢對家家嘅唔同，我更加確定立仁哥哥係鍾意我家姐，只係佢發現得太遲，結果就只可以自己不斷咁唔開心同妒忌對方。

曾經我都有諗過家家同左第二個男仔一齊後咁會唔會代表自己有機會，不過見到立仁哥哥咁我就知道佢唔會鍾意自己，繼續保持現有關係係最好嘅安排。

見住佢地兩個變得越黎越疏遠，其實我都越黎越唔開心。明明家家本身其中一個考量喺唔想破壞大家關係所以唔會一齊，但原來兩個人就算唔一齊，只要其中一方牽涉到有其他感情出現左第三個人，段關係都一樣都會變質受到破壞…

咁其實算唔算都係一種諷刺?

衣樣亦令我越黎越慶幸我無去努力再追求d咩而只係安守自己”阿妹”衣個位置。如果第三個人係我，衣種關係可能會破裂得更加之快。

隨住家姐同立仁哥哥升左上大學，佢地嘅生活圈子同模式都越黎越唔同，我見到佢地嘅時間都越黎越少。雖然會掛住佢地，但慢慢我都習慣左。

不過之後我又留意到佢地嘅關係好似慢慢好返d，雖然仍然未返到去以前咁，但感覺上佢地好似有部份心結解開左。

我當時真係覺得，佢地嘅感情係經得起考驗，假以時日佢地一定可以變返以前咁好。我有時甚至會偷偷祈求家姐同佢男朋友早日分手，咁我地又可以返返去以前咁。

只係我無諗過一切都好似變好緊果陣，有一日當我上上下堂，突然有老師叫左我出班房，然後同我講我父母叫我即刻去醫院。

8.10

我初初都唔知咩事，直至去到醫院，我見到訓得好安詳嘅家家。佢嘅臉龐蒼白到完全沒有一點血色，但就仍然都係咁靚。只係當我去到床邊任我點叫佢點拍佢，佢都無再應過我…

佢地話家姐因為感情問題所以選擇左自殺結束自己嘅生命。

當時嘅我真係好唔明白，平時充滿住睿智，咁鍾意講道理，凡事都咁完美嘅家姐，竟然會因為男朋友有左第二個而選擇自殺?唔通佢真係能醫不自醫?

不過當時極度悲痛嘅我已經無心情再諗衣d問題，因為我根本就接受到衣個事實。媽咪叫我通知立仁哥哥黎醫院見家家，而再過一段時間我就見佢趕到黎醫院。

果刻我好想追住佢問到底發生左咩事，點解會攪成咁，甚至向佢興師問罪。不過當我見到佢一見到家家好快就跪左係床前失聲痛哭，悲痛欲絕嘅樣子，我意識到佢嘅悲痛其實唔會比我少，然後我就打消左衣個念頭。

人嘅感情真係好複雜，攪掂完家家嘅身後事呀，我就再無點見過立仁哥哥。

其實之後好長嘅一段時間，我都接受唔到家姐已經唔係度嘅衣個事實。每次返到屋企，返到我地間房，我都會諗起我同家姐嘅點點滴滴…

所以某程度上我都明白點解立仁哥哥會唔想接觸我地。因為如果有得揀，我都唔想返屋企，唔想每次返到黎都會諗起佢然後又再經歷一次心痛…

因此到到我讀大學果陣，我選擇左住hall。

同時間或者基於對家姐嘅思念，我無再故意去扮成為另一個人，相反我仲好努力咁回復返自己原本嘅性格，希望可以成為好似家家咁嘅人。

突然間，我開始想其他人叫返我做善柔個妹，將我同家姐比較話我好似佢一樣咁叻，我以我係家家個妹為榮。

其實轉變左咁耐，我都分唔清到底邊個先係真正嘅自己。但我估努力做返自己，應該都算係自己一種獨特思念佢紀念佢嘅方式。


而經過左大學幾年忙碌嘅生活，慢慢我都從傷痛中走返出黎，習慣無左家家同立仁哥哥衣兩個親人陪伴左右嘅人生。

不過咁唔代表我唔掛住佢地。

雖然我走返出黎無再咁傷心，但我唔知立仁哥哥走返出黎未。所以雖然擔心，但我一直都仍然唔敢點主動搵佢。

我害怕我嘅出現，只會係喚醒返佢唔開心嘅回憶。

8.11


直到有晚我地大同出黎飲野，其中一個女同學飲飲下就係度喊，話佢前排識左個男仔，個男仔對佢好好，好了解佢嘅需要，但到到自己鍾意左佢決定同男朋友分手果陣，個男仔留低左個message後就消失左，衣家佢咩都無晒…

大家當然好不齒衣個男人嘅行為，仲話要上網唱衰佢。不過個女同學話因為個男仔唔鍾意影相又無正式一齊過，所以無佢嘅相，淨係有次襯佢唔為意偷偷影低左佢嘅背影。

而當我一望到果張相，見到果個熟悉嘅背影，我就感覺到果個係立仁哥哥。始終佢嘅背影，我都唔知望左幾多個年頭…

於是我開始調查衣件事，甚至有幾次偷偷咁跟踪佢，然後我發現果個真係佢黎，同時仲喺一個神秘群組入面知道左佢到底係度做緊咩工作…

原來佢衣家係專幫d想甩拖嘅男仔溝佢地自己女朋友等個女朋友變心然後主動提出分手，咁個男仔自己就唔駛做衰人仲成為左受害者可以接受世人嘅同情，而同時間個女仔亦唔會因為比個男仔飛而感到傷心難過。

細心一諗，我就知立仁哥哥做衣樣野嘅背後動機係咩。

果刻我為佢而感到心痛，亦知咁代表佢仍未可以放低到家家…

就好似我做返自己咁，我相信衣種亦係佢自己掛念家家嘅一種獨有方式。

我唔希望見到佢繼續咁落去，而同時間當我見住佢同唔同嘅女仔有講有笑，雖然知佢唔係真心真意，但我嘅感覺都好唔舒服，仲有d妒忌果d女仔…

(其實我都好耐無同過立仁哥哥傾偈喇…)

突然間，有一個念頭喺我腦海中形成，就算唔係真，話唔定我都可以透過咁去感受一下本應只可以喺夢中先感受到嘅感覺。

於是我搵左一個同我好friend嘅中同Tony幫我手。

我心諗如果搵佢扮我男朋友，然後佢再同立仁哥哥講想同我分手，咁立仁哥哥為左令我唔會傷心，就一定會好落力咁追我，然後我就可以好好享受被佢追同寵愛嘅感覺…

而當我最後同Tony分手，答應同仁哥哥一齊果陣，雖然衣段關係應該好快就會完結，但至少咁我嘅初戀應該都算係比左立仁哥哥?

就算明知佢唔係真，就算明知唔會長久，但如果至少可以曾經感受過擁有過，咁其實都已經好好啦…

夠70可以再慶祝

好好睇

live咗，樓主加油

聽落幾虐心 不過又好似幾過癮

90再慶祝 如果到時故事仲未完嘅話

多謝！

多謝支持